Fall for His Majesty

Episode 16

'ဘာဖြစ်ကုန်တာလဲ'

မြင်နေရသည့်မြင်ကွင်းကို Castiel မယုံနိုင်ဖြစ်သွားမိသည်။
နယ်စားအိမ်တော်၏တောင်ဘက်တစ်ခြမ်းမှာ အနက်ရောင်မီးခိုးငွေ့များကြားတွင် ပျောက်ကွယ်လုမတတ်။ လူများရုတ်ရုတ်သဲသဲဖြစ်မနေသည်က ကြိုတင်ပြင်ဆင်ထားသည့်အတိုင်း အစီအစဉ်ကျနေသေးသည့်ဟန်။ ရဲမက်တို့သည်သာ အိမ်တော်ဝင်းအတွင်း လိုအပ်ရာကို ပြေးလွှားဆောင်ရွက်နေကြသည်။

*ဝုန်း*

သိမ့်ခနဲတုန်ခါမှုကပ်ပါလာသည့် ပေါက်ကွဲသံကြောင့် နယ်စားမင်းကို Castiel ရှာမိသည်။ အနီးဆုံးရဲမက်ကိုဆွဲခေါ်မေးလိုက်ရာ နယ်စားမင်းကို Inias နှင့်အတူတွေ့လိုက်သည်ဟုသာ သိလိုက်ရ၏။ ထို့ကြောင့် အိမ်တော်နောက်ဘက်အခြမ်းသို့ Castiel ကူးလာလိုက်သည့်အခါ

"တပ်မှူး... နယ်စားမင်းတို့ ဒီဘက်မှာပါ"

လာခေါ်သည့်ရဲမက်နောက်သို့ Castiel လိုက်ခဲ့၏။ လက်နက်တိုက်ရှိရာသို့ ရောက်လာခဲ့ပြီး နယ်စားမင်းကိုတွေ့လိုက်ရသည်။

"အရှင်... ပေါက်ကွဲမှုက ..."

"အိမ်တော်ထဲမရောက်ဖို့ကို ကြိုပြင်လိုက်နိုင်လို့ စိတ်ပူစရာမရှိဘူး... မီးကိုတော့ မတားနိုင်တော့ဘူး... အခု အရေးကြီးတာ စားဖိုဆောင်နောက်ဘက်မှာ သမီးငယ်ကိုသွားခေါ်ဖို့ပဲ"

စားဖိုဆောင်၏နောက်ဘက်တွင် သီးနှံမျိုးစေ့များသိုလှောင်ရာ တဲငယ်များရှိပြီး အောက်ဘက်တွင် မြေအောက်အခန်းတစ်ခုဖွဲ့စည်းထားကာ ထိုမှထွက်သွားလျှင် အနောက်ဘက်လယ်မြေများကိုကျော်၍ တောတန်းရှိရာသို့ရောက်နိုင်ပေသည်။ တောတန်းကိုပတ်ထွက်လျှင် နန်းမြို့တော်သို့သွားရာလမ်းသို့ ရောက်နိုင်၏။

"Inias ရော အရှင်"

"ငါ့ကိုမပူနဲ့... Inias ရှိတယ်... အခု သူတို့အဓိကထားပြီးရှာနေမှာ ငါနဲ့ သမီးငယ်ပဲ... ဒါကြောင့် မင်းကိုစိတ်ချပါရစေ"

*ဝုန်း*

"လယ်ကွင်းဘက်ကပဲ Castiel... ပေါက်ကွဲမှုတွေက အဲဒီနေရာကနေ ရှေ့ဆက်မတိုးနိုင်ပါဘူး... အခြေအနေကိုတည်ငြိမ်အောင် ငါထိန်းထားနိုင်တဲ့အထိ သမီးလေးကို ဘေးကင်းအောင်စောင့်ရှောက်ပါ"