Castiel နှင့် Meg တို့ နယ်စားအိမ်တော်တိုက်ခိုက်ခံရသောညတွင် တောတွင်း၌သာပုန်းခိုနားနေခဲ့ကြပြီး နောက်တစ်နေ့မနက်အရုဏ်တက်သည်နှင့် ခရီးဆက်ခဲ့ကြရာတွင်လည်း ခြေရာဖျောက်နေရသည်က အလုပ်တစ်ခုဖြစ်နေ၍ ခရီးမတွင်ခဲ့ပေ။ စိတ်ချရသောနေရာတွင် ခေတ္တခဏနားနေစဉ် Castiel က ပါလာသောရိက္ခာခြောက်ကိုထုတ်၍
"သခင်မလေး"
Castiel ကမ်းပေးသည့်ရိက္ခာခြောက်ကိုကြည့်ကာ Meg က မယူသေးဘဲ
"ဘယ်လိုယူလာတာလဲ"
"စားဖိုဆောင်ကနေဖြတ်လာရင်း ယူလာတာ... မွန်းလွဲနေပြီ... ဗိုက်ဆာတယ်မဟုတ်လား"
မနက်ပိုင်းက လမ်းတွင်တွေ့သည့်သစ်သီးအချို့နှင့် မနက်စာပြီးခဲ့သည်။
"ဘာမှ မစားဘူးလား"
"မဆာဘူး သခင်မလေး"
"မဟုတ်သေးပါဘူး"
"ရှေ့နားမှာ ရေရှိလိမ့်မယ်"
စကားဆက်ရန်ပြင်သည့် Meg မှာ ပတ်ဝန်းကျင်ကိုလေ့လာနေလျက်မှပြောသည့် Castiel ၏စကားကြောင့် သူပြောမည့်စကားရပ်သွားရသည်။ ဆက်ပြောလျှင်လည်း Castiel က အဖက်လုပ်မည့်ဟန်မတူ။
ဒုတိယညတွင်လည်း တောတွင်းတစ်နေရာတွင်သာ အနားယူရပ်နားခဲ့ကြသည်။ နောက်တစ်ရက်တွင်မှ စိတ်ချရသည့်နေရာလေးသို့ ရောက်လာခဲ့ကြခြင်းပင်။
ရောက်လာသည့်နေရာတွင် ရရာသစ်ခက်သစ်လက်၊ ဝါးလုံးများနှင့်ဆောက်ထားသော ယာယီတဲငယ်ဟောင်းလေးတစ်ခုကို Castiel တို့ တွေ့ရချိန်တွင် ညနေစောင်းနေခဲ့ပြီ။
အန္တရာယ်ကြားမှထွက်လာခဲ့ပြီး တောတွင်းသို့ရောက်နေသော်လည်း Meg ၏စိတ်ထဲတွင် ပေါ့ပါးလွတ်လပ်နေပေသည်။ ဤအခိုက်အတန့်တို့မှာ မည်သည့်အခါမှပြန်မရတော့မည့် အမှတ်တရများဖြစ်သည်ကို သိနေသည်ကြောင့် ပို၍ပင်အဖိုးတန်နေသယောင်။
"ဟိုဘက်နားအထိ ချောင်းရိုးကရှိတယ်မဟုတ်လား... မမှောင်ခင် ရေသွားချိုးရမယ်... နှစ်ရက်လုံးတောတိုးလာတာ ညစ်ပတ်နေတာပဲ"
Meg က စမ်းချောင်း၌ရေဆင်းချိုးနေပြီး Castiel က ခပ်လှမ်းလှမ်းမှကျောက်တုံးများပေါ်တွင် စမ်းချောင်းဘက်ကိုကျောပေးကာ ထိုင်စောင့်ရတော့သည်။ နေလုံးမပျောက်မီကပင် လကထွက်လာနေပြီး မပြည့်တပြည့်အနေအထားနှင့်ဖြစ်၍ နေဝင်သွားလျှင်ပင် လင်းနေပေလိမ့်ဦးမည်။
YOU ARE READING
Fall for His Majesty
Historical FictionDestiel Kingdom Story by IX & Demon . Complete 52 parts ~~~~~~~~~~~~~~ ကြယ်တွေဆီ မျောပါလို့ ဒဏ်ရာတွေ ထင်ရှားလာရင်း အကြောက်တရားတွေ နှိမ်ချိုး ကျွန်တော်မျိုးကို အပိုင်ယူတော်မူ။ ▪︎ ၾကယ္ေတြဆီ ေမ်ာပါလို႔ ဒဏ္ရာေတြ ထင္ရွားလာရင္း အေၾကာက္တရားေတြ ႏွိမ္ခ်ိဳး က...
