Fall for His Majesty

Episode 06

"Castiel... အဲဒီသူလျှိုကိစ္စစုံစမ်းတာ သတိထားပါနော် ... ဒီလောက်ခက်ခဲတယ်ဆိုရင် လျှို့ဝှက်ပြီးအန္တရာယ်များမှာ သေချာနေပြီ"

"စိတ်ချပါ သခင်မလေးရဲ့ ... ဟိုမှာ အိမ်တော်ထိန်းကြီးလာခေါ်ပြီ"

"အင်း ... ဓား ခဏပေး"

အဆက်အစပ်မရှိပါဘဲ ပြောလာသည်ကြောင့် Castiel ကြောင်အသွားပြီးမှ သူကိုင်နေကျဓားကို Meg ထံသို့ ကမ်းပေးလိုက်၏။
Meg ၏လက်ဖဝါးတစ်ဖက်မှ တွဲလောင်းကျလာသည့် တစ်စုံတစ်ရာကို Castiel ၏ ဓားထိပ်တွင် ချည်နှောင်လိုက်ပြီး

"လက်ဆောင်"

ဓားကို Castiel ထံသို့ပြန်ပေးလိုက်ပြီး Meg လှည့်ထွက်လိုက်ရင်း

"လိုက်မပို့နဲ့တော့"

အိမ်တော်ထိန်းနှင့်အတူထွက်သွားသည့် သခင်မလေးကို ရပ်ကြည့်နေမိရင်း Castiel အရိုအသေပြုလိုက်သည်။ ထို့နောက်မှ သူ၏ဓားကိုပြန်ကြည့်သည့်အခါ ရတနာပစ္စည်းဆိုင်မှဝယ်လာသည့် လက်စွပ်လေးကို နက်မှောင်နေသည့်ချည်တစ်မျိုးဖြင့်ကျစ်ကာ ဓားလက်ကိုင်တွင်ချိတ်ပေးခဲ့ခြင်းပင်။

ကြည်ပြာရောင်ကျောက်လေးသည် အလင်းရောင်တွင် လက်ခနဲ။
ထိုကျောက်လေးမှပြန်ထွက်လာသည့် အလင်းသည်လည်း ကြည့်နေသည့် Castiel ၏မျက်ဝန်းပြာတို့တွင် ဖြတ်ပြေးသွားသည်မှာ လွန်စွာလိုက်ဖက်ညီသည့် အတွဲအစပ်တစ်မျိုးပင် ဖြစ်ပေလိမ့်မည်။

♕♔♛♞

နယ်စားမင်း Masters တို့သားအဖ ပြန်သွားပြီးနောက် Castiel စုံစမ်းမိသည့်သတင်းတစ်ခုမှာ သေဆုံးသွားသောသူလျှိုသည် သူအသက်ရှိစဉ်က တစ်စုံတစ်ဦးထံ လစဉ်ပုံမှန်ငွေလွှဲပြောင်းပေးနေတတ်သည်ဟူသည့် သတင်းပင်ဖြစ်သည်။ ထိုနေရာသို့ Castiel လိုက်သွားလျှင် သတင်းအစအနရနိုင်ပေမည်။

Castiel ရောက်သွားသည့်အခါ ထိုနေရာတွင် မည်သူမျှမရှိတော့ပေ။ စုံစမ်းကြည့်သည့်အခါ ယခင်က ဆေးဆိုင်တစ်ဆိုင်ဖြစ်ပြီး နောက်ကွယ်တွင်မူ တန်ဖိုးကြီးဆေးမြစ်များကို တရားမဝင်မှောင်ခိုရောင်းချသည်ဟု သိလိုက်ရပေသည်။ သေဆုံးသူသူလျှို၏ ပေးပို့ငွေတို့သည် ထိုဆိုင်သို့ တရားမဝင်ငွေကြေးအနေနှင့် လစဉ်ဝင်ရောက်နေပြီး ထိုငွေမှာလည်း သာမန်ဆေးမှောင်ခိုများမှရနိုင်သည့် ငွေကြေးထက် အဆမတန်များနေခြင်းမှာ သံသယဝင်ဖွယ်ရာဖြစ်နေခြင်းပင်။ ယခု ထိုသူလျှိုသေဆုံးပြီးနောက်ရက်တွင်ပင် ဤဆေးဆိုင်ပြောင်းရွှေ့သွားသည်ဟု သိလိုက်ရပြီး မည်သည့်နေရာသို့ပြောင်းရွှေ့သွားသည်ကိုမူ အမျိုးမျိုးပြောဆိုနေကြ၍ လမ်းစပျောက်သွားရပါတော့သည်။