أسوء شعور هو شعور الفقد بعد الإعتياد...إنك لما تتعود علي شخص في حياتك وفجأه يختفي ويسيب فرااغ كبير في قلبك .. ويرجع في أي وقت ويتعامل معاك بطبيعية كإنه كان معاك امبارح...
(مصابين بحب البعيدين،مبتلين بفقر اللقاء)
************************************
ريتال..
(فلاش باااااك)
كنت ف اخر سنه من الإعدادية وكنت راجعه من المدرسه دخلت البيت ولقيت ماما قالبه الشقه كلها وبتنضف نزلت الشنطه علي الأرض وقعدت علي الكرسي وقولتلها "ايه ياماما كل ده هو في حد جاي عندنا النهارده ولا ايه؟ "
قفلت المكنسه وقعدت جنبي وقالتلي "اه ياحبيبتي فاكره عمو ابراهيم صاحب بابا"
قولتلها لما افتكرت اسمه
"ااه عرفته بس مش هو كان مسافر ؟"
وقفت ومسكت المكنسه شغلتها وقالتلي "ااه بس رجع مصر من يومين وجاي النهارده يتغدي عندنا هو وعيلته عشان كده عايزاكي تغيري هدومك وتساعديني في الترويق والغدا"
*دخلت اوضتي وغيرت هدومي وساعدت ماما وبعد ما خلصت ترويق بابا وصل وقعدت معاه مستنين عمو ابراهيم يوصل... بابا كان بيحكيلي عنه كتير وعرفت انهم كانوا صحاب من زمان ايام المدرسه وفضلوا أصحاب لحد ما عمو ابراهيم قرر يتجوز واحده اجنبيه كانت زميلته في كلية الطب حبوا بعض وقرروا يتجوزوا بعد التخرج..واخر حاجه فكراها عنه انه سافر برا مصر ..وعلاقته اتقطعت مع بابا من وقتها...
قطع تفكيري صوت جرس الباب.. بابا فتح الباب
وانا وماما كنا واقفين وراه عشان نسلم عليهم اول حد دخل كان عمو ابراهيم ومراته كانت جميلة اوي ولون عينيها كان حلو اوي كانت زيتوني ودخلت معاهم بنت صغيرة في نفس سني ..
دخلوا وسلموا علي بابا وماما وانا واقفه جنب ماما وماسكه طرف فستانها من توتري ..
عمو إبراهيم لاحظ وجودي وقف قدامي مسك إيدي و باسها وقالي "ريتال حبيبتي ازيك، كان اخر مره شوفتك فيها وانتي عندك عشر سنين"
قولتله بإبتسامه "ازي حضرتك يا عمو "
عمو ابراهيم قالي وهو واقف بيعرفني علي بنته
"دي بقي يا ريتال بنتي مريم هي ف نفس سنك ودي يامريم ريتال بنت عمك خالد حكيتلك عنها قبل كده"
بص ليا وقالي.."عارفه ياريتال مريم لما عرفت انك ف سنها انبسطت اوي انها هتتعرف عليكي ومتحمسه طول الطريق عشان تشوفك"
أبتسمت لما سمعت كلامه مديت إيدي وسلمنا علي بعض وقبل ما بابا يقفل الباب عمو ابراهيم قاله ”استني يا خالد يحيي طالع دلوقتي بس هو كان بيركن العربيه تحت..استني اهو وصل"
بصيت علي اللي دخل من الباب وكان شاب طويل بشعر بني وعينيه زيتوني زي عيون مامته فضلت واقفه وكل تركيزي كان عليه وهو بيسلم علي بابا وماما ولقيته بيمشي ناحيتي لحد ماوقف قدامي وانا مش عارفه اعمل ايه مريم وقفت جنبي وقالتلي" ده بقي ياريتال يحيي اخويا ودي..."
يحيي قطع كلام مريم ومد ايده وقالي
"ريتال انا عارفك لما كنتي صغيره كنت بلعب معاكي بس انتي اكيد مش هتفتكريني عشان كنتي صغيره اوي"
حسيت بتوتر اول مره اكلم شاب واكبر مني كمان سلمت عليه واكتفيت بأبتسامه علي كلامه..
ماما قالتلنا "يلا ياجماعه عشان نتغدي اكيد جُعتوا من الطريق "
دخلنا كلنا وقاعدنا علي السفره مريم كانت قاعدا جنبي ناحيه اليمين ويحيي قاعد جنبي ناحيه الشمال كنت باكل وانا باصه ع طبقي مش عايزه اشيل عيني من عليه ومن توتري الشوكه وقعت مني ناحيه يحيي نزلت ايدي عشان اجيبها ف نفس اللحظه يحيي نزل ايديه وراسنا اتخبطت ف بعض حطيت ايدي علي راسي بعد ما حسيت بألم في راسي وقولتله " انا اسفه ماكنش قصدي"
رجع الشوكه مكانها علي السفره جنب طبقي وقالي "لا انا اللي اسف راسك اكيد وجعتك "
حسيت بنظرات الكل أتجاهي حسيت بتوتر من نظراتهم ليا وقولتله " لا..لا عادي مش وجعاني خالص انا كويسه "
شاور علي راسي وقالي" متأكده؟اصل مكان الخبطه فيها احمرار"
حطيت ايدي مكان الخبطه عشان أخبيها وقولتله "بجد !!ه.. هي هتروح دلوقتي بس صدقني مش وجعاني "
*بصيت قدامي عند ماما وكانت بصالي ابتسمت ليها وكلت معلقه من طبقي ووقفت من علي الكرسي استأذنت منهم ودخلت الحمام غسلت ايدي وبصيت على مكان الخبطه ف راسي لقيت فيها احمرار بس خفيف أكيد هيروح مع الوقت حطيت ايدي عليهاوحسيت بوجع هي راسه ناشفه اووي كده ليه.. خرجت ودخلت المطبخ مسكت تلج وحطيته مكان الخبطه عشان متعملش علامه وانا ماسكه كيس التلج سمعت حد داخل المطبخ بصيت لقيتها ماما قالتلي"ايه ياحبيبتي ماأكلتيش ليه؟ "
"ماانتي عارفه ياماما اني بتوتر لما ببقي قاعدا مع حد غريب مش متعوده عليه و اتحرجت اووي بعد اللي حصل ومعرفتش اكل هبقي اكل لما يمشوا"
مسكت شعري ورجعته ورا ودني وقالتلي بحنيه "مكسوفه ليه ياحبيبتي وبعدين شوفتي مريم مبسوطه بيكي ازاي وشكلها عايزاكوا تبقوا صحاب ويحيي برضو يعني مع الوقت لما تتعرفوا علي بعض هتتعودي عليهم "
قولتلها وانا عيني علي الأرض"مش عارفه يا ماما انا مش إجتماعية زيهم وهما هيملوا مني ويسبوني "
حطت إيديها علي خدي وقالتلي" ليه ياحبيبتي بتقولي كده..انا متأكده إنكوا هتبقوا أصحاب اووي كمان ومع الوقت هتعرفي إن كلامي صح"
مسكت راسي مكان الخبطه وقالتلي“ وريني راسك كده الإحمرار راح خلاص شيلي كيس التلج كفايه كده وتعالي معايا نشيل الأكل من علي السفره"
شيلت كيس التلج وانا خارجه من المطبخ قابلت يحيي ف الطريق وقالي"عامله ايه دلوقتي احسن؟ "
حطيت إيدي علي راسي عشان أخبيها وقولتله"اه بقيت كويسه شكرا علي سؤالك"
أنت تقرأ
الدنيا علمتني
Romanceالدنيا علمتني إزاي أحب وأغامر وأواجه وأجرب حاجات جديده اتعلمت اثق في نفسي وأقدرها وأقيمها واحب نفسي الاول قبل اي شئ في الدنيا عشان اقدر ألاقي الحب في عيون اللي حواليا واتقبل عيوبي قبل مميزاتي عشان اقدر اصلح من نفسي،اتعلمت إزاي أحدد أهدافي وسبب وجودي...
