حاولت الإبتعاد عنك..ولكن قلبي له رأي آخر....
...........................................
ريتال.....
فتحت الباب وقولتله مع ابتسامه
"يحيي ايه المفاجأه دي "
باين عليه العصبية بسبب وقفه برا وقت طويل بس لما شافني اتصدم وقالي"ايه ده ريتال ؟ انتي بتعملي ايه هنا؟"
سندت علي الباب وقولتله"جيت أقضي الاجازه هنا مع مريم"
"طالما انتي موجوده هنا مفتحتيش بسرعه ليه "
ابتسمت ليه وقولتله بإحراج "معلش يا يحيي كنت نايمه ومفيش حد موجود غيري عمتو ومريم بيجيبوا حاجات "
"متعرفيش هما بيجيبوا الحاجات منين اروحلهم"
هزيت راسي بلأ سابني واتكلم في الموبايل وكانت مريم خلص معاها وقالي
"مريم قالتلي انهم خلصوا وجاين في الطريق"
قولتله وانا بفتح الباب عشان يدخل"طب ادخل مش هينفع تفضل واقف برا كده"
قالي وهو بيرجع خطوه لورا "لا ادخلي انتي وانا هستناهم برا"
سيبته ودخلت خدت موبايلي ورجعتله خرجت وقفلت الباب ووقفت جنبه وقولتله
"هنستناهم سوا تعالي نقعد في الجنينه اللي تحت"
ابتسم لما سمع كلامي نزلنا وقعدنا علي مقعد في الجنينه وهو قرر يكسر الصمت اللي بينا وقالي مع ابتسامه وهو"بقالنا فتره مش بنتكلم طمنيني عليكي؟"
بصيت قدام وقولتله"انا تمام بحاول اتعايش مع نفسي وانت ؟"
قالي بعد تنهيده منه"انا تعبت من ضغط الشغل وحسيت ان ده الوقت المناسب اللي اقدر اخد فيه راحه عشان كده قررت اجي وأقضيه هنا في اسكندرية "
اكتفيت بأبتسامه ليه ونزلت راسي لتحت ولاحظت دبلته وهو لابسها في ايده حسيت بقبضه في قلبي خرجني من تأملي لدبلته صوته وهو بيسألني"لسه بتاخدي ادويتك؟ "
قولتله بعصبيه"في ايه يا يحيي كل ما تشوفني تسألني نفس السؤال ده انا زهقت..واه ياسيدي لسه بخدها"
قالي بإستغراب"في ايه يا ريتال اتعصبتي ليه كده ؟ انا بطمن عليكي مش اكتر لو السؤال مضايقك خلاص مش هسألك تاني ”
حسيت اني انفعلت عليه من غير سبب قولتله وانا ندمانه علي اللي قولته
"معلش يا يحيي انا اسفه اني اتعصبت عليك شكرا علي سؤالك"
قالي مع ابتسامه"لا عادي ولا يهمك"
شوفت مريم وإلين ومعاهم ُمراد ايه اللي جابه معاهم؟!..
وقفت انا ويحيي وهما وصلوا عندنا سلموا علي يحيي وانا خدت مريم علي جنب
وكلمتها "مريم هو انتي كنتي عارفه ان يحيي جاي هنا؟"
ردت عليا وقالتلي"لا معرفش ده انا اتفاجأت لما عرفت انه وصل هنا وقالي انه كان عملها مفاجأه يعني وكده "
قولتلها "هو انتي ماكنتيش قايله ل يحيي اني مسافره معاكي"
قالتلي"لا ماجتش فرصه اعرفه ليه هو قالك حاجه"
قولتلها وعيني عليه"لا بس لاحظت انه اتفاجأ بوجودي عشان كده بسأل"
بصيت علي مراد وقولتلها"هو مراد بيعمل ايه معاكم؟"
قالتلي وباين عليها الفرحه
"مش هتصدقي قابلناه في السوبر ماركت كان بيشتري حاجات عشان يطبخ لنفسه عمتو لما عرفت عزمته يتغدي معانا وهو وافق علي طول تحسيه ما صدق"
قولتلها وانا بضحك عليها"واكيد انتي الفرحه مش سيعاكي"
لاحظت إحمرار وشها دليل علي إحراجها خدتها وروحنا وقفنا معاهم إلين قالت ل يحيي"ده يا يحيي مراد ابن صديق ليا وزميل مريم في الشغل"
بصت ل مراد وقالتله"ده يا مراد يحيي ابن اخويا واخو مريم"
سلموا علي بعض ودخلنا البيت يحيي ومراد قعدوا علي الكنبه يتكلموا مع بعض وانا ومريم وإلين دخلنا المطبخ نبتدي تحضير في الغدا..
بعد ساعتين خلصنا الغدا وقعدنا كلنا علي السفره ناكل انا ومريم جنب بعض ويحيي قدامي ومراد قدام مريم وإلين قاعده في مقدمه السفره ابتدينا أكل وكان في صمت بينا إلين قررت تكسر الصمت وتتكلم
"يحيي مبسوطه اووي ان انت جيت النهارده بجد احلي مفاجأه ده انت كنت وحشني اووي"
يحيي قالها بأبتسامه"وانتي كنتي وحشاني اكتر ياحبيبتي بس انتي عارفه الشغل مش مخليني اعرف اعمل اي حاجه واول ما عرفت اخد اجازه قررت ازورك "
ردت عليه وقالتله"احلي حاجه عملتها وايه اخبار خطيبتك كنت جبتها معاك تقعد مع البنات واتعرف عليها اكتر "
قالها وهو مش مهتم"هي لما عرفت كانت هتيجي بس حصل معاها ظرف إضطرت انها تروح لجدتها عشان تعبت وهتقعد عندها يومين "
قالتله بصدمه"خير طب جدتها كويسه دلوقتي؟"
"اه كلمتها واطمنت عليها وبقت احسن دلوقتي"
سمعت مريم جنبي وهي بتقول بصوت واطي"احسن كويس انها ماجتش"
بصتلها وضحكت علي كلامها
مريم قالت ل يحيي"انت هتقعد معانا بقي يا يحيي اليومين الجايين دول صح؟"
رد عليها بعد ما بصلي"لا هشوف مكان اقعد فيه مش هينفع اقعد معاكوا هنا عشان تعرفوا تاخدوا راحتكوا "
حسيت بالذنب عشان عارفه اني انا السبب..
مراد قاله"طب ما تيجي تقعد معايا انا قاعد لوحدي وكمان تبقي فرصة نتعرف علي بعض اكتر"
لاحظت التردد باين علي يحيي
مريم قالت ل مراد"هو عمو توفيق مش قاعد معاك"
بصلها وقالها"لا بابا رجع القاهره النهارده الصبح عشان شغله وانا قاعد يومين هنا"
إلين قالت ل يحيي"فكرة حلوه يا يحيي بدل ما تدور علي مكان وممكن متلقيش وانا هبقي مطمنه اكتر وانت مع مراد عشان مش هتبقي لوحدك"
بعد ما يحيي لاحظ ان الكل موافق علي فكرة ُمراد وافق هو كمان وانا حسيت براحه عشان يحيي مش هيبقي لوحده...
خرجنا نتمشي علي البحر انا ويحيي ومريم و ُمراد لاحظت نظرات ُمراد ل مريم كإنه عايز يتكلم معاها بس محرج مننا حسيت اني عايزه اساعدهم قولت ل مريم
"مريم فاكره المحل اللي بيبيع ايس كريم ايه رأيك تروحي تجيبي لينا كلنا"
بصتلي بنظره إستغراب كإنها عايزه تقولي ايه اللي بتعمليه ده متعرفش اني بساعدها الهبله...
قولت ل مراد"مراد روح معاها عشان متبقاش لوحدها"
يحيي بصلي وقالي"طب مانروح انا ومراد ونجبلكوا وانتوا خليكوا هنا"
قولت بصوت عالي مش عارفه طلع مني ازاي
"لااا هي مريم تعرف المحل كويس انت متعرفهوش صح يا مريم"
بصتلها عشان تتصرف قبل ما خطتي تبوظ فهمتني اخيرا وقالت ل يحيي
"ااه فعلا انا عارفاه خليك انت يا يحيي وهاخد ُمراد معايا يلا يا ُمراد"
مشيت هي و ُمراد لما بعدت خطوتين من عندنا لفت وشها وضحكتلي وانا غمزتلها وضحكت مخدتش بالي ان يحيي كان مركز معايا وانا بغمز..
اتوترت منه وبصيت علي البحر سمعت صوت ضحكته بصلي وقالي وهو لسه بيضحك
"بقيتي تخططي يا ريتال من ورايا.. بس هعمل نفسي مش واخد بالي"
انا مش مركزه علي كلامه انا تايهه في ضحكته اللي تسحر العيون لقيت نفسي بقوله
"ضحكتك حلوه اووي "
هو اتصدم من كلامي ووقف ضحك وانا في اللحظه دي كنت عايزه احفر في الرمل وادفني فيه من كمية الإحراج اللي انا فيه
قالي مع ابتسامه"شكرا..بس مش احلي من ضحكتك اللي وحشتني"
قلبي دق بسرعه بعد ما سمعت كلامه مش هنكر ان كلام يحيي بيلمس قلبي.. اي حاجه بيقولها ليا مهما كانت بساطتها او حتي مجامله بس بتغير حالتي في لحظه..
غمضت عيني وخدت نفس عميق وطلعته مش سامعه صوت غير صوت امواج البحر والهوا اللي بيطير شعري فتحت عيني وانا لسه عيني علي البحر وامواجه سمعت يحيي وهو بيقولي"ريتال هو انا ممكن اسألك سؤال بس اتمني تجاوبي عليا"
بصتله مستنيه اسمع سؤاله قالي وحسيت في نبره صوته التردد"هو ايه اللي حصل في يوم الحادثه؟"
مردتش عليه ورجعت عيني علي البحر من تاني
"تمام يا ريتال لو مش عايزه تتكلمي معايا في الموضوع ده انا مش هضغط عليكي ولا هفتح الموضوع ده معاكي تاني"
لاحظته لما وقف من جنبي قولتله قبل ما يمشي
"انا ماكنش قصدي اموت نفسي"
وقف ورجع يقعد جنبي مره تانيه وانا باصه علي البحر وكملت كلامي
"اليوم اللي حصل فيه الحادثه كان نفس يوم عيد ميلاد بابا"
..............................................
أنت تقرأ
الدنيا علمتني
عاطفيةالدنيا علمتني إزاي أحب وأغامر وأواجه وأجرب حاجات جديده اتعلمت اثق في نفسي وأقدرها وأقيمها واحب نفسي الاول قبل اي شئ في الدنيا عشان اقدر ألاقي الحب في عيون اللي حواليا واتقبل عيوبي قبل مميزاتي عشان اقدر اصلح من نفسي،اتعلمت إزاي أحدد أهدافي وسبب وجودي...
