تقضت لبانات وجد رحيل...
ولم يشف من أهل الصفاء غليل...
ومدت أكف للوداع تصافحت ...
وكادت عيون للفراق تسيل...
عمر:- منو ..
فهيمه: اني يمه اني افتح الباب يمه...
عمر:صار يمه جايج كومي هيا نامي فوك بسرعه ولمي الفراش لتخليه تشوفج نايمه بالكاع ..
هيا: طفرت من الفراش لميته وشمرته وكعدت عله الجربايه..
فتح الباب عمر ..
فهيمه: صباح الخير يمه شلونك مهنه يمه مبروك يوم اشوف وليدك بحضنك أن شاء الله..
عمر:- الله يبارك بيج يمه تدللين يمه بس غير .
ويباوع عليه ويضحك..
فهيمه:شنو يمه شكو صاير شي..
عمر: لايمه ماكو سلامتج ..
فهيمه: شلونج يمه هيا بالخير أن شاء الله ديربالج عله وليدي ترا يحبج اريدج تسعدينه..
هيا: صار عمه تدللين واني اكول بكلبي اي كلش يحبني يخابر الليل كله بحبيبته والله يا الله هه..
هيا: جابتلنه الريوك باوعت الصينيه بيه ماعون بيض زغير وطاسة روبه خلته وكعدت عمر راح يغسل ورجع..
عمر:يله كومي غسلي..
هيا:رحت ركض غسلت واجيت بيتهم جان قديم كلش حته مابي مغسله غسلت بالحمام واجيت للغرفه..
عمر:- سدي الباب وتعاي تريكي..
هيا:- لا عمر ماشتهي اكل انت اني مو جوعانه..
عمر:- تجين تاكلين وغصبا عليج امس نمتي بدون عشه وهسه متتريكين شنو مو جوعانه ..
فهيمه:- يمه عوفه عروس وتستحي تاكل هيه براحته تجوع وتجي تاكل..
عمر: تعاي هيا تريكي..
فهيمه:- تعاي يمه اكلي ويانه..
هيا:- امه كاعده ويانه تتريك كعدت اكل كوه بلعت اللكمه اكلت لكمتين وكمت ..
عمر:- شنو شو متاكلين..
هيا:- شبعت ماكدر اكل بعد..
عمر:- هاي شنو عصفور شو متاكلين انت..
هيا:- اني ويني وين الاكل وشوف هذا بطران (بكلبي احجي)ها لا ماكدر اكل هاهيه شبعت بالعافيه..
فهيمه: عوفه يمه بعده عروس تستحي تاكل..
هيا: اباوع لعمتي شلون كاعده تاكل مسحت الماعين والطاسة وكامت اخذت الصينيه وطلعت كاعدين شويه واجن بنات عمه يسلمن علينه طبعا بيت عمه بصف بيتهم حايطهم واحد سلمن علينه وطلعن وره شويه اجن بنات عمي يسلمن عليه اني فرحت من شفتهن حسيت براحه حسيت اكو واحد يمي احبه..
رغد:- شلونج هيا حبيبتي مشتاقتلج رغم انت قريبه..
هيا: هلو رغد حبيبتي واني أكثر والله تمنيت يجي واحد منكم همزين اجيتي..
رغد:- شلون ما اجي حبيبتي اجيج ركض..
أنسام:شلونج هيا ..
هيا: هلو نسومه حبيبتي وصديقتي شلونج..
أنسام: زينه الحمدلله
هلو اني أنسام عمري ٢٣سنه اني الصديقه المقربه لهيا ودائما احنه سوه بكلشي حته من نلعب سوه وكلشي اعرف عنه وعن حياته يعني بالمختصر اني وهيا وغزل ورغد صديقات كلش اني طولي وسط وبيضه وجسمي وسط شعري زين طوله تزوجت هيا واني كلش نقهرت عليه لان متزوجت احمد واني ادري كلشي وادري شلون يحبه ويموت عليه بس كله بسبب جدي وكف بوجهه حبهم وماخلاهم يتزوجون ..
كعدت من الصبح كعدت رغد.
رغد رغد كومي..
رغد:ها أنسام شبيج مكعدتني من الصبح..
أنسام:رغد خلينه نروح حبابه والله مشتاقتله..
رغد:- يله ماشي بس خل نغسل ونغيير ملابسنه ونتريك ونروح ..
أنسام:اي يله حبابه طفرت من فراشي ركض غسلت وبدلت وتريكنه اني ورغد ورحنه لهيا..
رغد:- هيا سولفيلنه شنو صار وياكم البارحه..
هيا:- ها ماصار شي يعني مثل أي عروسين شيصير بيناتهم ..ستحيت احجي الي صار البارحه لان ميتسولف...
رغد: حسيت بيه تجذب وتستحي تحجي ..
يله هيا احنه نروح بعد فشله ليجون ناس عليج ..
هيا:- ظلن والله مشتاقتلجن..
رغد:- لا هيا نروح بعد وامي وحده بالبيت يله أنسام خل نروح للبيت..
هيا:- راحن للبيت اني كلش نقهرت لان راحن بس غزل مافاركتني يوميه تجيني تضل هواي يمي وتروح لمن اجه اخوي اخذه ..
من طلعن بنات عمي اجه عمر طب وسد الباب ورا واجه كعد يمي ..
عمر:- هيا شلون يعني نبقه هيج..
هيا:- شنو عمر شكو..
عمر:-هيا تعرفين شنو يعني ابقه هيج متصيرين زوجتي ..
هيا:- عمر والله خايفه ماكدر ..
عمر:- تمام براحتج ..
هيا:- يومين عله هاي الحاله كلما يتقرب انفره واظل ابجي صار ثالث يوم اجتني خالتي من الصبح كلتلي وين نيشانج ..
خاله والله مريضه ماكدر ..
خالتي:- شنو مريضه اليوم لازم تحصلين النيشان جدج ظل يحجي يكول ليش لسه ماكو نيشان ..
هيا:- تمام خاله صار ..
صار الليل اجه عمر وسد الباب..
عمر:- ها هيا كافي اليوم لازم نتمم زواجنه..
هيا:- تقرب مني كمت ابجي عمر خايفه والله خايفه ..
عمر:- ماشي كافي اسكتي راح اسوي شي بس يضل بيناتنه ماريد اي احد يعرف بي سمعتي..
هيا:- شنو شراح تسوي..
عمر:- هسه تشوفين شراح اسوي..
هيا:- شفته جاب موس وجرح رجله اني من شفت الدم طلع من رجله كمت ابجي فرفحت..
عمر:- اسكتي هيا لتبجين وما أريد اي احد يعرف بهذا الشي سمعتي اهلنه يردون النيشان ولازم الصبح نراوي الهم بس هيا هذا الموضوع ماريد اي احد يعرف بي سمعتي..
هيا:- تمام ماحجي والله..
مسح الدم بالوصله وانطانيا ..
عمر:- هاج هذا ضمي يمج باجر من تجي خالتج راويهيا سمعتي..
هيا:- واني ارجف تمام اراويهيا..
عمر:- ماشي يله نامي ويصير خير الصبح..
هيا:- نمنه اني ويا الصبح اجتني خالتي..
خالتي:-ها يمه صباح الخير شلونج..
هيا:- (من شفته خفت وكمت ارجف )هلو خاله صباح الخيرات تفضلي طبي جوه ..
خالتي:- وين بياضج جدج يريد يشوفه..
هيا:- اي هسه اجيبه.. كمت جبت الوصله واجيته واني متوترة كلش خاف تشك .
هاج خاله هاي ..
خالتي:- شنو هاي شو قليل هذا..
هيا:- اي خاله مو نصه وكع بالحمام من رحت سبحت..
خالتي:- ها يله ميخالف اهم شي بياض كدام العالم ملينه من الحجي..
هيا:- اوف من الناس دمرو حياتي بعد شيردون مني أكثر من هذا..
خالتي:- تهون بعد شتسوين قسمتج هاي نشوف تاليه شلون..
هيا:- والله ياخاله ماعرف شلون راح تمشي حياتي خايفه..
خالتي:- منين تخافين يمه انسي احمد وكلشي ينحل..
هيا:- هيه سهله انسا لو بيدي أشيل كلبي من صدري وارتاح..
خالتي:- كولي يا الله وتوكلي عله ربج بالعشرة راح تحبين عمر وتنسين احمد..
هيا:- أن شاء الله خاله والله مالت أخذ احمد بعد نتهت لان تزوجت عمر ولازم احاول احبه ..
خالتي:- الله كريم يمه كلشي بوقته حلو يله اني اروح البيت فارغ محد بي وتدرين انت بالنسوان بس اطلع تدز جهاله يبوكون شكو شي بالبيت..
هيا:- دخيلك اللهي شوكت يبطلون يبوكون ذوله صدك جذب..
خالتي:- تربية يمه امهم مربيتهم تربية فاشله خل اروح تأخرت..يله مع السلامه..
هيا:- الله وياج خاله.. راحت خالتي واني كلش رتاحيت خلصت من هذا الهم الي عله راسياوف الحمدلله والشكر ربي بس الى متى نبقه هيج عمر راح يضوج مني زين منه متحملني هلكد ياربي دخيلك انت تدري بحالي وتدري بشنو دا أمر حالياً نفسيتي تعبانه وماكدر انسه احمد شلون اتحمل اعيش ويه غيره يارب دخيلك سهله عليه ..
شيصير لو هسه اني وأحمد متزوجين هاي الايام أحله ايام تعيشه العروس واني ماعبالك عروس عبالك ارمله كله بسبب جدي اوف لو قابل جان هسه اني اسعد انسانه 😔💔... وعيت عله نفسي هيا لازم تنسين احمد حرام الي يصير ميصير افكر بي اني مره متزوجه وعمر حباب ويحبني..ظلينه عله هاي الحاله لحد ثامن يوم من زواجي اجاني عمر بالليل..
عمر:- هيا ..
هيا:- نعم عمر..
عمر:- شوكت ناويه نتمم زواجنه ترا طولنه..
هيا:- اخاف والله وبجيت..
عمر:- كافي هيا ماكو خايفه هيه وراج وراج اليوم يعني اليوم سمعتي..
هيا:- اني سكتت لان حقه ترا تحملني هواي وهيه وراي وراي لازم تكضي ..
تمام عمر الي تشوفه. من كتله هيج فرح كلش. بده يتقربلي وتم زواجنه عله خير بس ماكلنه لاي شخص بهذا الشي ..صار الصبح كمت نظفت غرفتي وشتغلت ويه البنات لان تعودت عله البيت للظهر مرة حماي الجبير سوت غده تغدينه ونمنه صارت ب٣ سمعت الباب يندك كمت لبست وفتحت الباب لكيت عمتي بالباب..
هيا:- ها يمه تفضلي ..
فهيمه:- تعاي يمه اريدج تعجنين النه..
هيا:- صار عمه دقايق وجايتج راحت هيه رحت وراهن لكيته مخليتلي طحين بالمعجانه كعدت عجنته للعصر ختمر العجين رحت خليت حطب بالتنور شجرت ورحت شنكت العجين اني ماعرف اخبز وعمتي تعرف بس تريد تعلمني حته اخبز واطبخ الهم اجيت للتنور واني خايفه شلون بيه واني ماعرف اخبز بلشت اخبز نص طاح بالتنور ونص حترك ونص طلعته عجين خلصت وجبت الخبز حطيته بالمطبخ اجت عمتي..
فهيمه:- عفيه يمه عاشت ايدج يله ميخالف شويه شويه تتعلمين..
هيا:- اي يمه تدللين رحت غسلت وكعدت بغرفتي صار الليل صبينه عشه وكعدنه ناكل اجه عمر كعد يتعشه..
فهيمه:- عمر يمه شوف خبز مرتك اليوم خبزتلنه هيه..
عمر:- ههههه هذا شنو من خبز يمه الحيوانات حشه النعمه متاكله هاج اكليه هاي عجين ومحتركه تنوكل شوفيه..
هيا:- اني كلش نقهرت وضجت وهمه يضحكون عليه اخذته أكلته وسكتت محجيت شي شلون هيج يفشلني كدامهم اني ماعرف اخبز وهمه يعرفون بهذا الشي اجو حماتي وزوجه يردون يسلمون علينه كعدو اني جبتلهم الجاي وألمي وكعدنه نسولف ونضحك طبعا اني لبست عباتي لان استحي من زوج حماتي وخصوصا اني بعدني عروس واول مره اشوفه ف عيب اطلع هيج كدامه كعدو ل١١ بالليل وراحوا طبيت للغرفه شويه اجه عمر طب وراي وسد الباب واجه كعد يمي وهم حاول يتقربلي اني سكتت مارفضته ولاسويت شي هو من شافني ماصديته ماصدك تقرب مني كمل ونام اني هم كمت سبحت ونمت صار الصبح كعدت عجنت وكنست وغسلت الماعين وسويتك ريوك لزوجي وجبته اله ..
عمر:- كعدت من النوم لكيته مسويتيلي ريوك نزلت تريكت ماكعدت وياي تعاي تريكي..
هيا:- ماريد ماشتهي..استحي اكعد اكل ويا بعدني متعودت علي ولاهو حاول يقربني اله ابد ومن كلي تعاي بس كلمة تعاي حجايته فاترة ومو بحالي ابد رحت خبزت شويه نعدل خبزي صار زين رجعت خليت الخبز بالمطبخ وسويت غده وصبيتلهم تغدو وشربو شاي طبعا مرة حماي شالت أيده من الشغل من اجيت اني صار كله عليه غسلت الماعين وخلصت سبحت وطبيت لغرفتي نمنه والعصر هم نفس الحاله عشه واماعين كملت كلشي وطبيت للغرفه شويه دك موبايل عمر كلي اني راح اطلع شويه وارجع اني من دك موبايله شكيت انو هاي نفس البنيه الي اتصلت علي بيوم العرس كلت ماكو غيرهه ماهتميت ولاغرت علي ابد لان لسه ما احبه بس صار عندي فضول اشوف شكو طلعت امشي ورا وهو يمشي ويتلفت شبي خايف وجان يوصل يم بيت جيرانهم ظليت واكفه واباوع شراح يسوي ..
فتحت عيوني اباوع مصدومه من الي دا اشوفه كدامي..
شفته طفر سياجهم مواعد بتهم ونصدمت من الي شفته يعني حته يتقربله مثل رجال وزوجته شمأزيت منه ولعبت نفسي شكد نذل وحقير هذا الإنسان سكتت خليتهم ورجعت للغرفه وره ساعتين اجه طب للغرفه كلي تعبان اريد انام اني سكتت محجيت شي لف راسه ونام وكلشي ميهمه شوكت انام لو شراح اسوي اكلت شربت مايسألني ابد اهم شي نفسه ظليت كاعده الليل كله ليش هيج راح للبنيه اني اعرف بعلاقتهم كلتلي نورس بس ماكدرت ابطل الزواج لان بيوم العرس كلتلي بس ليش لسه وياهه معافه مو علساس هيه عافته بيوم العرس شو لسه ماتخله عنه فكرت اسأله بس ترددت وخفت اسأله خلي انام والله كريم كلشي ينعرف بالوقت المناسب وينكشف المضموم لان حاسه اكو شي ضامه عمر واكو مصيبه ورا اوف خل انام تعبانه كلش من الشغل والتنظيف كله شالت أيده من اجيت ماعرف ليش ذاباته براسي واني استحي احجي وأقسم الشغل الله كريم نشوف وين توصل وياهن نمت وماحس غير دكه قويه يمه إسم الله شكو شصاير طفرت اباوع الساعه ب٦ الصبح شكو ياستار منو بهذا الوقت يدك الباب كمت فتحت الباب وماشوف غير عمتي واكفه بالباب..ها يمه خير أن شاء الله..
فهيمه:- لا يمه ماكو شي بس كلت اكعدج تعجنين عجينتج لايروح الوكت عليج..
هيا:- صار عمه هسه جايه.اوف ربي هاي شبيه صدك جذب مكعدتني من صباحيات الله تعاي اعجني ناس بعده نايمه حته الدجاج نايم ..لبست شالي وطلعت لكيت عمتي كاعده بالمطبخ تتريك دخيلك ربي من الصبح تاكل شلون نفسيه تشتهي تاكل واني نعسانه كوه مفتحه عيوني طلعت المعجانه وعجنت ورجعت لغرفتي وظليت كاعده عيني متاخذ نوم بعد شويه وحسيت عمر كعد..
عمر:- خير أن شاء الله شعدج كاعده من الصبح..
هيا:- امك كعدتني حته اعجن ..سكت ورجع نام ماتفاجأ يمكن يعرف امه هيج اوف ربي هسه مكعدتني من الصبح شكو خليت وطلعت نفس الروتين نظفت وغسلت مواعين سويت ريوك لعمر تريك وطلع غسلت مواعينه ورحت خبزت رجعت سويت غده والمسعده خيريه نايمه طايح كله براسي..
خيريه مرة حماي خلدون الجبير عمر عنده ٢اخوه و٥خوات (خلدون ,وعارف )والبنات (حنين،ود،منال،غفران،ليلى) ..حنين متزوجه والبقيه كلهن زغار يكعدن من الصبح هم تكعدهن امهن يروحن للبستان يشتغلن بي
كعدت الظهر سوت ريوك وتريكت هيه وزوجه وذبت المواعين هم غسلتهن اني ..
للظهر صبيتلهم غده تغدو وناموا صار العصر نفس الروتين عشه ومواعين كملت شغلي طبيت للغرفه شويه اجه عمر..
عمر:- اكلج اني لكيت شغل وراح اروح كل اسبوع اجيكم خوش..
هيا:- وين الشغل..
عمر:- بالفندق بغداد..
هيا:- تمام براحتك الله يرزقك..ظليت افكر شلون راح ابقه وحدي شلون بيه حسيت بديت احب عمر شويه شويه...بهاي الأثناء اجه اخوي عليه هو هم يروح ويه عمر للفندق يشتغلون سوه ..سلم علينه اني وعمر كعد شويه حجو بخصوص الشغل عمر يروح قبل اخوي امجد للفندق وبعدين يلحكه امجد عمر وصه امجد عليه..
عمر:- امجد ديربالك عله هيا هاي زوجتي يمك..
امجد:- تدلل غير هيه اخيتي شلون مادير بالي عليها..
عمر:- تسلم اخويه الغالي..
امجد:- سالمه عيونك حبيبي..
هيا:- شويه وراح امجد واحنه نمنه كعدت من الصبح لميت غراض عمر بالجنطه ونطيتهيا وراح كلش نقهرت من راح ماعرف ليش احس عندي مشاعر تجاهه ..يومين صار واني ماعرف عنه كلشي ياربي شلون وضعه هسه خفت علي كلش وشتاقيتله رحت لخيريه عده موبايل بعد ماتحمل لازم احجي ويا بهاي الأثناء طبت عليه خيريه ..
خيريه:- اكلج خيه هذا زوجج يريد يحاجيج..
هيا:- طفرت من كعدتي مامصدكه..صدك فرحت كلش انطيني..
خيريه:- عله كيفج شبيج خيه راح تموتين هيج مشتاقتله هاج هاج احجي ويا..
هيا:- هههههه ..الو..
عمر:- الوو هلو شلونج هيا..
هيا:-زينه الحمدلله..
عمر:- شكو ماكو..
هيا:- ماكو شي سلامتك..
عمر:- الله وياج..
هيا:- الله وياك..شنو من رجال هذا هو هيج الي يحب لاسأل عليه لا كال أكلتي شربتي صحتج شلونه شمحتاجه ممحتاجه ..اوف شلون هيج وصرت من قسمتك عمر ماتوقعت بيوم راح اصير لعمر لان جان هو وسيف وأمجد اخواني مثل الاخوه حته ينام وياهم بنفس الفراش ودائما سوه واني معتبرته مثل اخوي سبحان الله..نطيت الموبايل لمرة حماي وطلعت كملت شغلي وسويت عشه صبيتلهم العشه كاعدين نتعشه اجه خلدون سلم عليه وكعد ياكل احنه نكعد سوه سفره وحده ..اجه عارف من الفندق الي يشتغل بي عمر هو جان قبل عمر يشتغل بالفندق وسجل عمر وأمجد ويا..
عارف:- السلام عليكم..
الجميع:- وعليكم السلام..
فهيمه :- هله يمه شلونك شفت اخيك هناك شلونه شياكل شيشرب..
عارف:- اي يمه شفته زين الحمدلله ظال الاكل بالفندق وين رايح احنه نشتغل بنفس المكان بس هو الصبح يشتغل واني بالليل ..
فهيمه:- ها خير أن شاء الله روح يمه غسل وتعال تعشه..
عارف:- اي يمه ثواني واجي..
هيا:- مر اسبوع عله روحة عمر اليوم راح يجي اني سبحت وبدلت وخليت مكياج وتعطرت طلعت عروس للعصر اجه سمعت صوته يسلم عله امه وخواته طفرت من الجربايه فرحانه شوكت يطب للغرفه واشوفه طب للغرفه سلم عليه ..
عمر:- حضريلي ملابسي اريد اسبح وسويلي اكل جوعان..
هيا:- نقهرت كلش صارلي اسبوع مشايفته وهيج يسوي معقوله ما شتاقلي كل هذا الأسبوع مو يمه ولاجن مبدله ومحضره نفسي حضرتله ملابس ورحت سويتله اكل سبح واكل ونام لليل كعدته حته يتعشه كعد تعشينه ورجع نام اني هم خليت ونمت بس ضايجه ومقهورة كعدت الصبح متخربطه وبطني توجعني واتقيء ..
عمر:- شبيج هيا بيج شي ..
هيا:- ماعرف شبيه بطني توجعني ونفسي تلعب ودايخه..
عمر:- كومي خل اخذج للدكتورة..
هيا:- لا ماروح هسه اصير زينه..
عمر:- لاترحين وغصبا عليج العصر حضري روحج اخذج..
هيا:- صار العصر رحنه للدكتورة طبيت اله قاست ضغطي وكلتلي روحي سوي سونار رحت عله السونار ورجعت للدكتورة تفضلي دكتورة هذا السونار قرت السونار ..
الدكتورة:- الف مبروك ماما انت حامل..
هيا:- شنو لا مستحيل كولي غيره دكتورة شنو حامل ماكدر والله ماكدر بعدني صغيرة..
الدكتورة:- كولي يا الله ماما ميصير هيج حرام عليج هذا ابنج وقطعه منج..
هيا:- ستحيت كلش طلعت عمر منتظرني بالباب ...
عمر:- ها هيا بشري شبيج..
هيا:- عمر اني حامل ..
عمر:- صدك تحجين يا الله الحمدلله والشكر..
هيا:- عمر فرح كلش ورجعنه للبيت وهو فرحان وخبر اهله كلهم وعمامه اني ستحيت كلش ليش هيج يحجي لعمامه عيب..
عمر:- شبيج قابل بايكين كل مره متزوجه هيج تحمل من تزوج شلون يعني وبعدين انت مرتي وبلحلال..
هيا:- سكتت ماحجيت ترا صدك بس اني صغيرة مافتهم..لليل طلع عمر كال رايح لعمامي ..شويه وطلعت ورا ردت اروح للحمام واني دا امشي شفت شي خلاني مصدومه تصنمت بمكاني من الي دا اشوفه مستحيل شنو هذا ياربي....
يتبع......
