أموت ولا تدري وانت قتلتني...
فلا أنا أبديها ولا انت تعلم....
لساني وقلبي يكتمان هواكم....
ولكن دمعي بالهوى يتكلم....
-ندك الباب وطفرت من مكاني مخروعه وارجف منو...
سرى:- اني اني افتحي الباب..
هيا:- رتاحيت رحت فتحت الباب..تعاي سرى طبي جوه...
سرى:- شبيج تبجين هيا شكو...
هيا:- طبي جوه اسولفلج..طبعا سرى صارت صديقتي وكلشي اسولفله وهيه هم...طبت سرى وقفلت الباب خاف يجي عمر وكعدت اسولفله..
سرى:- ها هيا شنو الموضوع...
هيا:- شوفي انت تدرين عمر يخوني..
سرى:- اي اعرف ليش..
هيا:- اليوم تجرأت وفتحت موبايله ودخلت اقرا بالمحادثات تعاي شوفي شيكلله عليه..فتحت الموبايل وكعدنه نقرا سوه..كاتبله مرتي ماعده مقومات الانوثه وهيه تكوله ها خطيه اني اقرا وانصدم ودموعي تنزل ويه كل رساله اقراهه ..يكله اني مظلوم ومرتي محلوه ابد وتلعب النفس واني دا اقرا جان اشوف دازله صورتي واني نايمه شهكت ولطمت على صدري مصورني واني نايمه ..شفته تكله ها مو هاي عده مقومات انوثه وحلوه شلون تكول محلوه وماعده مقومات انوثه كذاب تريد تستغفلني انت شفكرت ما اعرف...
-لا والله هاي توه صار عده مقومات انوثه جان ماعده هستوه كبر ...هيه تسب وتغلط علي وهو يقنع بيه سحل نفسه سحل عليه..كملت المحادثه قفلت الموبايل ورجعته لمكانه وكعدت ابجي فرفحت وسرى تسكت بيه ومصدومه من الي شافته..
سرى ليش هيج شسويتله اني مدللته دلال حته انتظره للصبح حته يجي وهو يجي ممهتملي ولاعبالك عنده مره..
سرى:- اسكتي هيا الله كريم شتسويله هو حقير ونذل لتسوين هيج بنفسج تردين تموتين نفسج ماكو شي يسوه اذا صار بيج شي جهالج منو الهم ...
هيا:- اوف سرى شلون اسكت شوفي شيحجي عليه كدامه في سبيل تقبل ترتبط ويا ااااخ ولج كلبي يوجعني ورم من الصدمات ورم كل يوم صدمه شنو ممكتوبلي ارتاح ابد ممكتوبلي اعيش مثل أي زوجه يحبه زوجهه ممكتوبلي اعيش ويه رجال يحبني ويحترمني اه..
سرى:- هيا فدوه اسكتي راح تموتين كومي علي وحيدر خترعو لان تبجين لتخبليهم خطيه..
هيا:- باوعت لكيت علي وحيدر صافنين عليه مخروعين ركضت عليهم حضنتهم وكمت ابجي سرى شوفيهم شنو ذنبهم ابوهم هيج ومو بحالهم ليش....للمغرب اجه من الطوبه طب للغرفه أخذ ملابسه وسبح وبدل ومدد على الجربايه يراسل منتظر اصبله عشه يتسمم إذن المغرب صليت وصبيت عشه تعشو وكملو لميت المواعين وغسلتهن وسرى كامت تشتغل وياي تعلقت بيه وحبتني هيه هم خوش بنيه وحبابه كاعدين نظف بالمطبخ اني وسرى اجتنه عمتي للمطبخ...
فهيمه:- شوفن خيريه شسوت...
هيا،سرى:- شبيه شسوت...
فهيمه:-تتعارك ويه خلدون تريده يبنيله بيت وهو يكله ماعندي منين اجيبلج هيه تكله اني عندي فلوس بس خلي نبني..
هيا:- اي يمه هيه عده فلوس خير من الله من النسوان الي تجيه والنذوره الملايين الي ينذؤنه اله...
فهيمه:- اي صدك عده خير من الله خل تبني جا شلنه حاجه بيه احنه...
هيا:- لعد ماتبني منو لازمه..كملنه شغل بالمطبخ ورحنه كل وحده طبت لغرفته ..طبيت للغرفه لكيت عمر يخابر ويضحك تقربت سمعته يحجي ويه بنيه ضجت حيل قفلت باب الغرفه ومديت فراشي بالكاع ومددت واريد انام ماكدر أحسه يزرف كلبي من يحجي وياهه ويضحك شويه نزل كعد يمي فتح سبيكر ..
عمر:- هاج حبيبتي هاي مرتي تردين تحجين وياهه تسمعج...
- لا ماريدها ما احجي وياه..
عمر:- هيه هم متريدج واذا حاجيتيه تكب عليج ..
-لابله اذا الزمهه اشك حلكهه ال....
هيا:- من سمعته حجت عليه كلمه محلوه فزيت باوعت هو سد السبيكر ورجع على الجربايه يحجي وياهه بقه يحجي وياهه لل١ خلص اتصال سد الموبايل ونام ولاكلي تعاي نامي يمي ولاهتملي بجيت لحد ماغفيت كعدت الصبح عجنت وتريكت وريكت علي وحيدر وبديت اشتغل سمعته يصيحلي...يكعد متأخر لان يسهر بالليل يحجي ويه بنات....
عمر:- هيا هيا...
هيا:- ها اجيت...
عمر:- امشي سويلي ريوك يله...
هيا:- اي صار..رحت سويتله ريوك ..تريك وخلص شلت الصينيه وكملت شغلي وهو لبس ملابسه وطلع ..اجت عمتي كلتلي كملي شغلج من وقت لان جايين خطابه ل منال ...
هيا:- اني فرحت كلش ..اي عمه صار..فرحت منال فقيره تستاهل كل خير رحت ركض ركض كملت شغل ونظفت البيت ورتبته للعصر اجو الخطابه طبعا خالته لمنال الي جايه تخطب هيه شايفته بس جابت الولد يشوفه طب الولد شاف منال عجبته وقبل وعمتي فرحانه وافقت بس كلتلهم يجون اخوته اشوف رأيهم. اردلكم خبر..اجه عمر ولا مهتم ولابحال البيت ولا يفكر شبي مابي شمحتاجين طب للغرفه وكعد يراسل ويخابر بنات أجيته ابد ما حاجاني ولا كأنما اني زوجته وأم أولاده ولا مهتملي خليت وطلعت من الغرفه...وره فترة بقيت على هاي الحاله عمر متغيير عليه كلش حته من يريد حقه الشرعي يجيني يكمل ويكوم عني عبالك خادمه عنده اخذت عقله البنات ليل ونهار يفكر بيهن ويراسل ...مره سنتين على خطوبة منال كلش طولت بالخطوبه واليوم كان عرسه اني كالعادة مكياج خليت ولبست بدلته الموجودين ضلو صافنين عليه كالو طالعه احلى من العروس واني لابسه البدله وكاعدين بغرفتي ونضحك طب عمر للغرفه باوعت علي وفرحانه كلت اكيد هسه يتغزل بيه أو يكلي طالعه حلوه ..باوعلي ودار وجهه وراح للغرفه اني تزهمرت من القهر نزعت ورحت ورا للغرفه اريد اعرف شنو قصة شبي هاي الايام صاير كلش مو طبيعي طبيت الغرفه لكيته مدد على الجربايه ويراسل ..عمر انت شنو سالفتك هاي الايام مو بحالي ولاتدورني اني وجهالك وبس تراسل وطالع من البيت وتجي تاكل وتنام..
عمر:- يعني شتردين ابقه نايم يمج لو اعبدج عبادة شبيج انت روحي عني ولي...
هيا:- كلشي ماريد منك الله كريم نشوف وين توصل وياك..طلعت من الغرفه ضايجه ومقهوره وأبجي..لهنا وبس هيا كافي بعد ما اتحمل نوب اوكف بوجهه ما اسكتله ابد كافي صمت الى متى..للعصر طلع وره ساعتين رجع بسيارة رحت يمه اركض..عمر منيلك هاي السيارة...
عمر:- شتريته اريد اشتغل بيه..
هيا:- فرحت كلش كلت بلكت يلتهي بيه من الدوام للسيارة وينسه هاي السوالف..امه فرحانه لان اشتره سيارة ..كام يطلع يشتغل بالسيارة يروح من الصبح يرجع ب٢ بالليل بقه على هاي الحاله يوميه واني اكعد انتظره لمن يجي ..كاعده انتظره صارت بل٢ طب للبيت ..هله والله وين جنت..
عمر:- وين جنت يعني اشتغل..
هيا:- وين فلوسك مالت الشغل...
عمر:- صلحت بيهن السيارة وين اوديهن يعني..
هيا:- سكتت لان اعرف يجذب عليه بس مابيدي شي ماكدر اسوي اي شي ويا ..بقه على هاي الحاله فترة يطلع الصبح يجي ب٢ بالليل اخر شي نفجرت بعد ماتحملت تعاركت ويا ...عمر وين تروح من الصبح لليل ...
عمر:- وين اروح غير اشتغل على باب الله...
هيا:- وينه فلوس شغلك شو كلشي مشايفين منهن من تروح من الصبح لليل متكول ذوله شياكلون شيشربون وانت متجيب مسواك...ماحس غير اجاني الراشدي من قوته نسطرت بعد محجيت حرف ضليت صافنه وهو نزل بيه ضرب موتني يضرب ويسب ويغلط..
عمر:- تعاي اليوم اعلمج شلون هيج ترفعين صوتج عليه يابنت الحيوانات يابنت الكلاب لو عدكم كرامه مابقيتي دقيقه هنا..
هيا:- نتهيت من الضرب وهو يسب ويغلط ..عوفني عمر الله ليوفقك أن شاء الله يكسر ايدك بجاه النبي راح اروح لهلي بعد ماتحمل هاي العيشه...
عمر:- روحي طاحضج وحض اهلج ذوله الكلاب...
هيا:- تغلط عليه وعلى اهلي خوش اني الك عمر...
عمر:- روحي راحت روحج أن شاء الله...
هيا:- بسيطه....كعدت بالغرفه ضليت منتظرته لمن ينام...حسيت علي غفه ركضت فتحت موبايله ودخلت على المحادثه مالته هو وعشيقته..
عمر :- اوف حبيبتي راحت روحي من عفتج ورجعت كلبي يمج بقه مشتاقلج يروحي ...
-حبيبي واني هم شتاقيتلك..
عمر:- بعد عمري حبيبتي..شلونه الليله اليوم 😉..
-🤭🤭تخبل احلى ليله عشته بحياتي ما انساها طول عمري...
هيا:- اني قريت هيج لو تخبلت تهسترت وضليت ابجي ..كلام حب وغزل بيناتهم من تزوجته لهذا اليوم ماكلي كلمه وحده منهن ويدزله ايموجي يبجي هلكد مايحبه وميكدر يفاركه..جانت ابشع ليله بحياتي شيجيب الصبح واروح لهلي بعد ما ابقه دقيقه كاعده بفراشي واتكلب والوب ماغمضت عيني ولاغفيت وهو اباوعله مطمور ولايمه باوعت من الشباك شفت الصبح صبح كمت لميت غراضي وغراض جهالي واني الم بيهن جان يكعد شافني الم بالغراض..
عمر:- ها راح تولين..
هيا:- اي راح اروح ابو النسوان ما ابقه هنا دقيقه بعد..
عمر:- روحي يطبج مرض حقيره..
هيا:- اني أعلمك اله اندمك وتشوف منو هيا...
عمر:- روحي روحي عود تهددني خايف منج من ابوج الكلب..
هيا:- خزرته حيل حسيت عيوني نطن من مكانهن من غلط على ابوي تمنيت ارفس بطنه بس ماكدرت لان راح يذب الصوج كله بيه لميت غراضي وأخذت جهالي وطلعت وصلت الباب تلكتني عمتي...
فهيمه:- ياستار وين تردين من الصبح..
هيا:- اروح لهلي بعد دقيقه ما ابقه بالبيت وما ارجع لو عمري يوم احجي ودموعي عشره عشره وحده تنزل..
فهيمه:- يا يمه تحجين صدك تعاي تعاي ماتروحين...
هيا:- والله اروح وما ابقه هنا المن باقيه..جلبت بيه وتصيح منو يسويلي خبيزه بعد وكامت تبجي من سمع امه تبجي اجه ركض ضربني على راسي ويغلط ويصيح اني كمت اصيح وهو يضرب بيه..
فهيمه:- اسكتي لاتصيحين فضحتينه بت الجلاب..
هيا:- هو يضرب بيه وهيه ويا تضرب بيه وتغلط عليه وعلى اهلي واني ااصيح يباوو على صوتي التمت العالم عبالهم واحد مات خليته يلتهي ويه الوادم واني اخذت جهالي وركضت لبيت اهلي ابجي وعيني مورمه ضربني عليه ..وصلت لبيت اهلي ابجي تلكني خواتي وامي بالباب..
سحر:- يمه دخيلك ياعلي شبيج ولج يمه..
هيا:- يمه ضربني هو وامه موتوني ويضربون بيه على راسي..
سحر:- اني أعلمه اليوم يمد أيده عليج بسيطه..
هيا:- امي لكفت عباته وركضتلهم للبيت..خواتي اخذن جهالي وطببني للبيت جابلي مي شربت رتاحيت شويه اجت امي تصيح..
سحر:- ولج أحاجي يدير وجهه عني مايحاجيني اكله ليش وياهه امه تكلي ماسواله شي والله هيه لمت غراضه وطلعت وحده ..
هيا:- خليهم خل يجي ابوي واني الهم..للظهر اجو ابوي واخوتي من الشغل..سألوني شبيج حجيتلهم الي صار كله كلشي حجيتلهم حته على الشرب والنسوان حجيتلهم نصدمو بي وكلولي بعد ماكو رجعه اله اكعدي واسكتي هنا..
امي مقبلت لان حجيت تخاف يصير مشاكل بيناتهم..
سحر:- ولج يمه ليش حجيتي كلشي هسه يظلون يتعاركون ويطلكج..
هيا :- لهنا وبس كافي وذا طلكني علوا اني ماريده ولا اريد اعيش ويا ..اخوتي يتصلون علي ميرد عليهم يخاف منهم جبان ابوي كاعد كبالي ويفور من القهر واني كاعده ابجي...لليل خلصت الهوسه وكلشي كاعدين اجه ابوي ..
يعقوب:- بويه هيا باجر من الصبح ترحين وياي المحكمه نشتكي علي ونسويلج نفقه حته تصرفين على نفسج وعلى جهالج الى متى تبقين بدون مصرف لو تجين اليه انطيج مصرف لو تسكتين..
هيا:- اي والله ياريت لان اني استحي مرات احتاج مصرف بس استحي اجي لهلي واطلب منهم اله تصير شغله ضرورية مثل طبيب اجي اطلب من امي وهم استحي بس شسوي ما بليد حيله شنو ذنبي..
يعقوب:- لاتخافين بويه اريد اطلعلج مصرف انت وجهالج ..شكلتي بويه..
هيا:- اي يابه علوا اروح وياك..
يعقوب:- يله بويه حضري نفسج الصبح نروح..
هيا:- أن شاء الله يابه...كلت بيني وبين نفسي احسن شي راح يسوي ابوي هو هذا اني لازم اعيش واعتمد على نفسي ما اظل كلساع اطلب من واحد واني اعرف عمر راح يتخبل اذا سويت علي نفقه اضرب عصفورين بحجر واحد..كعدتني امي من الصبح رحنه اني وابوي للمحكمه رفعت دعوة وسجلت عدد الأطفال ورجعنه شكلنه محامي وكللنه خلال شهر الدعوة راح توصل لعمر اني فرحت كلش ..بقيت يم اهلي صح بالبدايه جانت صعبه عليه بس بعدين تعودت على اهلي وخواتي ونسوان اخوتي ونسيت كلشي صار(نسيت اكللكم امجد وسيف تزوجو بنفس اليوم .امجد تزوج أنسام بنت عمي وسيف تزوج ميس بنت خالتي)...اطفالي عذبوني كلش يردون اهلهم ظلو يوميه يروحون ويرجعون وعلى الشارع واخاف عليهم كلش ومرات ياخذوهم يمهم اسبوع او اكثر ويخلوهم يشتغلون وهمه بعدهم زغار كلش ويخلوهم وصخين عناد بيه حته ارجع ..مرات يجي عارف من الدوام يدز عليهم ويجي يسلم عليه لان يعرف مو مني الصوج من اخو الصوج كله وسرى هم حجتله كلشي لان اني ماضم عليه شي بس امه ابد ما نطت بي لان ينطيه فلوس وتخاف اذا حجت بعد مينطيه طماعه وظلت واكفه بصفه وتحجي عليه كله منه السبب هيه مامنعته ابد...مر شهر على زعلي يم اهلي جنه كاعدين الصبح بالبيت وندك الباب ..
سحر:- ياستار منو هذا من الصبح..
هيا:- راحت امي تفتح الباب واني بقيت كاعده جوه شويه صاحتني امي تعالي كمت تمشيت للباب وشفت خيريه واكفه ..خيريه شعده من الصبح جايه .....
.....يتبع....
