قصة : ( أبليتني بالعشق ) ل سهيلة سعيد المنجي ، فكرة : نور عمر

الحلقة ١ و ٢

قصة : { #أبليتني_بالعشق } ♥️☎️

الحلقة الأولى { ١ } 📵

*( شهر 10 ، سنة 2009 )*

( جوة قاعة افراح ، أغاني شغالة والكل مبسوط وبيرقص ، عند ترابيزة عليها ستات ، واقفين فوق الترابيزة بنت وولد صغيرين عندهم ٨ سنين و ٩ سنين عمالين يرقصه سوا والستات بتسقف وكاميرا القاعة بتصور )
رنيم بتحايل : طلعيني معاهم
هدى : لا انتي كبيرة هما صغيرين ، ويلا انزلوا كلكم ل الترابيزة تقع علينا ، يلا ي اسراء انزلي
اسراء وهي بترقص : لأااااا
هدى : ي بنتي انزلي ، متشبطيش العيال يلاااا !
( متردش عليها وتكمل رقص مع الولد )
هدى : مفيش سمعان كلام ، يعني اقول لبابا ؟
( تتنهد اسراء بزهق وتنزل وينزل وراها الولد ويكمله رقص مع رنيم ع الأرض )
فايزة : دي هتطلع عينك اما تكبر دي والله !
هدى : هتجنني والله ، بتعشق الرقص والهيصة !
الكل : ههههههه
عزيز ل اسراء : تعالي نرقص مع العروسة
اسراء بحماس : يلااااا
( يروحوا يرقصه ع الأستيدچ ، يعدي الوقت ويخلص الفرح ، ف بيت الجدة ، الستات قاعدين ف اوضة بيحكوا عن الفرح وبرة الولاد مشغلين اغاني وبيرقصه )
هدى : يختي العيال مشبعوش م الفرح والرقص وجايين يكمله هنا كمان !
فايزة : بتك الي مسهراهم
هدى : يادي بتي ، م ابنك الي جابلها قناة الأغاني يختي ومطاوعها وعمال يطبلها برة !
الجدة : لا وهو زيزو يقدر يرفض طلب ل اسراء !
فايزة : معلمالي الولا الأدب بت الجزمة !
هدى : لا يختي هو الي بيعملها كل حاجة بمزاجه
فايزة : ايوة طالع ل ابوه ، بكلمة بيعملي الي انا عوزاه
الكل : هههههه
الجدة : ايوة ، ربي ي خايبة للغايبة
فايزة : هههههه لا انتي الي ف القلب ي نينة
( برة عند الولاد )
اسراء وهي بترقص : ازاي يعدي يوم عليهااااااا ، من غير م عيني تشوف عنيهاااااااا
عزيز : والحلوة يابااا مغلبناااااني ، ورموشها يابااا مدوبااااني ، والرمش سلم سلام جارحني ، معرفش شبكني ولا رماااااني
اسراء : والحلوة يابا مغلبناني مغلباني
عزيز : اسراء كفاية انا زهقت ، تعالي نجيب حاجة حلوة
اسراء : الوقت اتأخر ، ماما مش هترضى تنزلنا
عزيز : انا هقولها
اسراء : ماشي
( يدخله جوة )
اسراء ل عزيز : قولها
عزيز بتردد : ماشي
هدى : في ايه ؟!
اسراء : يلا قول
عزيز : عاوزين ننزل نجيب حاجات حلوة 
فايزة : حاجات حلوة ايه انت عارف الساعة كام دلوقتي !
عزيز : بسرعة والله من تحت البيت
فايزة : لا ي بابا الوقت اتأخر مفيش نزول ليكوا
هدى : شوفوا عاوزين ايه وهاشم يجبلكوا
اسراء : هاشم طلع نام من بدري
هدى : خلاص النهار له عيون محبكتش يعني !
فايزة : المفروض تناموا اصلاً ، يلا بينا ي استاذ
عزيز بتحايل : طب اجيب الحاجة الحلوة بالله عليكي
فايزة : زيزوووو لأ ، الصبح ابقوا هاتوا يلا
عزيز بزعل : طيب
( تطلع كل واحدة شقتها تنام ، تاني يوم ، ف بيت عزيز ، هاشم اخوه ف اوضته بيذاكر ، عنده ١٣ سنة ، يسمع صوت عالي ، يستغرب ويقوم يطلع برة ، يلاقي اسراء وعزيز قاعدين بيتفرجوا ع ال tv ع كرتون ومعليينه ع الأخر )
هاشم : انت ي بني وطي شوية !
عزيز : اسراء بتحبه عالي
هاشم بعصبية : وانا مالي انا ، وطي ورايا مذاكرة !
عزيز بزهق : طيب
( يوطي شوية ، يدخل هاشم المطبخ )
هاشم ب انفعال : ي ماما انا مش عارف اذاكر وكدة مينفعش !
فايزة : في ايه ي هاشم ؟!
هاشم : عزيز معلي التليفزيون ع الأخر !
فايزة : قوله يوطيه 
هاشم : قلتله وعمل نفسه وطاه !
فايزة : معلش طيب
هاشم : معلش ايه بقولك مش عارف اذاكر بسببه ! 
فايزة بتنهيدة : لا حول ولا قوة إلا بالله ، قوله ماما جيالك بالشبشب
( تطلعله فايزة )
فايزة : انت ي ولا وطي الزفت دة ، اخوك وراه مذاكرة !
عزيز : وطيته والله
فايزة : وطيه ومتستهبلش ي زيزو
عزيز : طيب
( يوطيه تاني ، تمشي فايزة )
اسراء : تعالى نلعب بمكعباتي
عزيز وهو بيقوم : ماشي يلا
( يقوموا يدخله الشقة الي ف وش الشقة ، يدخله اوضة اسراء ويلعبه ب العابها ، تعدي الأيام ، يصحى عزيز من نومه ويطلع من اوضته ، يلاقي الكل قاعدين )
الجدة : يروحوا ويرجعوا بالسلامة ب اذن الله
الكل : امين يارب
( يروح عزيز يقعد ع رجل بباه )
مرزوق : صباح الفل ي خوم النوووم
( يبتسم وينام ف حضنه )
مرزوق : فاتك انت مشيان اسراء
عزيز بعدم فهم : مشيت فين ؟!
مرزوق : سافرت لبباها
عزيز ب استغراب : عمو ثابت جه خدها ؟!
الجدة : لا ي حبيبي ، اسراء الي سافرتله هي وطنط هدى
( يتخض عزيز )
عزيز : مشيت خالص ؟!
مرزوق : مش خالص يعني هتيجي تاني
عزيز : بكرة ولا امتى ؟
مرزوق : لا طبعاً مش بكرة
سميرة : هتطول شوية ي زيزو
مرزوق : شهر يعني ؟
سميرة : لا سنة سنتين ، ممكن اكتر
( يعيط عزيز )
مرزوق : الله ليه كدة ؟!
عزيز بعياط : مصحتونيش اسلم عليها ليه مدام هتغيب براااا !
فايزة : ي حبيبي انت كنت نايم !
عزيز : كنتي صحتينييييي !
( يجري ع اوضته يعيط )
فايزة : اهو مرضتش اصحيه عشان كدة ، مكانش هيسيبها تمشي وهيقلبها نكد !
الجدة : كفاية الي هي عملته ، دة انا سامعة صريخها من فوق !
سميرة : اتعودت ع هنا وعلينا ، مهو برضو ثابت غريب دة كمان !
مرزوق : ولا غريب ولا حاجة ، الراجل استقر ف الأمارات وعاوز مراته وبنته معاه ، دة بقاله سنتين برة مشافهمش !
فايزة : ربنا يرزقهم بقا ويرجعهم بالسلامة
الكل : امين يارب