قصة : { #أبليتني_بالعشق } ♥️☎️
الحلقة التاسعة { ٩ } 📵
عزيز وهو بياخد منها الساندوتش : طب هاتي بقا
اسراء بضحك : لا لأ خلاص طيب
( يكمله اكل )
عزيز وهو بيبص حواليه : وراكوا ايه هنا ؟
رنيم : بلاوي ي بني زي م انت شايف !
عزيز : طب شوفوا محتاجين ايه اساعدكم فيه
اسراء : احنا بنظبط الدنيا اهو
عزيز : ماشي م انا مواريش حاجة ، سحس ف المحل
اسراء : سحس مين ؟!
عزيز : دة الحتة الشمال
اسراء ب استغراب : شمال !!
رنيم بضحك : ي بت دة شاب شغال عنده ف المحل
اسراء بفهم : امممم
رنيم : بس قارفه ف عيشته
اسراء : دة اكيد طبعاً ، الله يكون ف عونه
رنيم : اة والله
عزيز ل رنيم : طب وحيات امك اسأليه كدة بيحبني ولا لأ وشوفي هيقولك ايه
اسراء : م هيقول بيحبك طبعاً عشان ميطردش !
عزيز : لا طبعاً مقدرش استغنى عنه
رنيم : ي بني هتتفهموا غلط كدة !
عزيز : ميهمش ، حبنا اقوى من دماغك الو .........................
رنيم بتحذير : ايه ايييييه !
عزيز : متنكشنيش طاااايب عشان انا تعبان ف لساني !
اسراء وهي بتقوم : تشربه ايه ، في نيسكافيه وفيه شاي
عزيز : نيسكافيه
رنيم : وانا كمان
اسراء : اوك
( تروح اسراء تشغل الكاتل وتعمل نيسكافيه ويقوم كل واحد يشوفله حاجة يعملها وينضفه المكان ، تمسك اسراء كرسي تحطه وتطلع تقف عليه ، يبصلها عزيز )
عزيز : انزلي من ع الكرسي دة !
اسراء وهي بتبصله : ليه ؟!
عزيز وهو بيقرب عليها : هيقع بيكي مكسور !
اسراء وهي بتبص ع الكرسي : لا مفيهوش حاجة !
( وفجأة ، تنكسر رجل الكرسي ، تنط اسراء من عليه تقع ع الأرض ، يجري عليها عزيز )
اسراء ب وجع : ااااه !
( يقومها م الأرض )
رنيم بقلق : كويسة ولا ايه ؟!
اسراء بوجع : رجلي بس ، نطيط جامد !
عزيز : دماغك الناشفة قلتلك انزلي ، لازم تعملي كشف طبي للكرسي الأول !
اسراء : م كنت شيفاه سليم !
( يقرب عزيز ع الكرسي ويمسكه )
عزيز : سليم اوي !
اسراء وهي بتقرب عليه : باظ ؟
عزيز : هو تلاجة ي ماما !
اسراء بزهق : بطل تتريق عليا بقااا
رنيم : طب الكرسي دة طقم تبع ديكور المكان هنعمل فيه ايه ، دة المفروض ندهنهم مع الترابيزة انهاردة !
اسراء بحيرة : مش عارفة بقا !
عزيز : في عدة هنا ؟
اسراء بعدم فهم : عدة ايه ؟!
رنيم : اة في ي زيزو ، الصندوق الي هناك دة
( يقرب ع الصندوق وياخد شاكوش ومسامير ويمسك الكرسي يدقدق فيه ويصلحه )
رنيم : الله ينور والله
عزيز : وعليكي ، فين البوهيا الي هتعملوها ؟
رنيم : هجيبهالك
عزيز : اوك
( تجيبله رنيم علبة البوهيا ، يعدي الوقت ، عزيز مشغل اغاني ع فونه وقاعد بيبيض الترابيزة )
عزيز وهو بيغني : رايقة ف حبها ، انا فعلاً بعشق امها ، خطفت عيني وسحرتلها ، ودتني لدنيا بعيداااااا
( تبصله اسراء )
عزيز : انا وانتي وبس ، مش عاوز حد تاني يحس ، ولا عين الناس عليكي تبص
( يبصها ، تتحرج وتضير وشها )
عزيز ب ابتسامة : ي احلى برنسيسااااااا
( تبصلهم رنيم وتضحك ، يقوم عزيز يرقص ويقرب ع رنيم ترقص معاه ، تبصلهم اسراء وتضحك ع طريقتهم المضحكة ، يعدي الوقت ويروح الكل ، يقفه قدام شقتهم )
رنيم : يلا باي
اسراء وعزيز : باي
( تطلع رنيم بيتها ، تفتح اسراء شنطتها تدور ع المفتاح )
اسراء : رحت فين !
عزيز وهو بيفتح باب شقته : ايه ؟!
اسراء : المفتاح مش لقياه !
عزيز : طب رني الجرس
اسراء وهي بتدور ع المفتاح : محدش جوة ، ماما مع بابا عند الدكتور
عزيز : طب تعالي استنيها
اسراء بعدم تركيز : هو انا نسيته جوة ولا ايه !
عزيز : افتكري طيب
اسراء بتنهيدة : استغفر الله العظيييبم !
عزيز : بقولك تعالي لحد م عمي يرجع
اسراء : طيب
( يدخله شقته )
عزيز : ماماااا ، مامااا
( محدش يرد )
عزيز : شكلها مش هنا
اسراء ب احراج : طب انا هطلع عند رنيم
عزيز : استني انا ممكن انط من بلكونتنا وافتحلك الشقة
اسراء : هتعرف ؟
عزيز : اة البلكونتين لازقين ف بعض
اسراء : طب ماشي
عزيز وهو داخل اوضته : بلكونتكم مفتوحة ؟
اسراء وهي رايحة وراه : مش فاكرة ، بس اظن متشيشة
عزيز وهو بيفتح بلكونته : ع المسا كدة دخان !
اسراء بنفاذ صبر : ي بني بقاااا !
( يقرب ع سور البلكونة واسراء وراه ، يطلع ع السور ، تتخض اسراء وتقرب عليه ، يسند ع الحيطة ويمشي ع السور ، تبص اسراء تلاقي في فرق بين البلكونتين )
اسراء بقلق : عزيز بالله عليك خلي بالك
عزيز : متخافيش
( يحط رجله ع سور بلكونتها يبقا رجل هنا ورجل هنا ، تمسك اسراء ف التيشيرت بتاعه )
عزيز بخضة : يخربيتك خضتيني !
اسراء بخوف : لا انزل بالله عليك ، انا هستنى عند رنيم لحد م ماما تيجي انزل !
عزيز : ي بت سبيني انا ماسك كويس !
اسراء ب اصرار وهي ماسكة فيه : بقولك لأ ، انزل يلاااا
عزيز : متخافيش والله انا ع السور خلاص ، سبيني !
اسراء وهي بتشد فيه : والله هتقع ، ارجع بالله عليك !
عزيز وهو بيحاول يتماسك : لو مبطلتيش تشدي فيا كدة والله هقع بجد ، سبيني بقا !
اسراء : طب نط وانا مسكاك
عزيز : لو وقعت هتلحقيني كدة يعني ؟!
اسراء : ايوة هلحقك
عزيز : طيب
( ينط عزيز ف بلكونتها )
عزيز : امان كدة ؟
اسراء ب ارتياح : الحمدلله
عزيز : تعالي بقا من عند الباب ، البلكونة لسة قاعدة بتشيش
اسراء بضحك : ههههه ماشي
( يدخل عزيز الشقة وتلف اسراء تقف عند الباب ، يفتحلها عزيز ، تدخل )
عزيز : اي خدمة
اسراء : اتمنى منكررهاش تاني
عزيز : لا مش خدام ابوكي انا ، دوري ع مفتاحك
اسراء : هو انت متعرفش تكمل حاجة بذوق للأخر ابداً !
عزيز ب ابتسامة : لأ للأسف معرفش
( يطلع هاشم ، يشوفهم واقفين ف الشقة من جوة )
اسراء : طب يلا روح بيتك شكراً منك
عزيز : ايه دة مش هتعزم ع حاجة حق المجهود الي عملته ؟
اسراء : لا احنا فقرا اوي ومبنعزمش حد
( يدخل هاشم شقتهم )
عزيز وهو بيخرج م الشقة : مش عاوز من وشك حاجة
( يقفل الباب وراه ويروح شقته يدخل اوضته ، هاشم قاعد ف اوضته ع اخره مش حابب الوضع دة بينهم ، يعدي اليوم ، تاني يوم ، تدق الساعة سبعة ونص الصبح ، يخرج هاشم من شقته وينزل السلم يلاقي اسراء نازلة ، تبصله )
اسراء ب ابتسامة : صباح النور
هاشم وهو نازلها : صباح الخير ، صاحية بدري ليه كدة ؟!
اسراء : رايحة المحل ورايا شوية حاجات
( ينزلوا سوا )
هاشم : بس مش بدري اوي تكوني هناك لوحدك !
اسراء : لا المكان هناك حي ، يعني في محلات كتير بتفتح من بدري ، وكمان رنيم هتقضي نص يوم انهاردة ف الشغل وتجيلي ع هناك
هاشم : طب كويس إنها جيالك
اسراء : اة والله ، تعباها معايا
هاشم : جدعة رنيم
أنت تقرأ
قصة : ( أبليتني بالعشق ) ل سهيلة سعيد المنجي ، فكرة : نور عمر
Roman d'amour_ في حاجات كدة ف حياتنا زي الخبطة ع الدماغ ، مهما مر عليها هيكونلها اثار جانبية ، ما بالك بقا ب الخبطة ف القلب ( 15/6/2023 )
