قصة : ( أبليتني بالعشق ) ل سهيلة سعيد المنجي ، فكرة : نور عمر

الحلقة ١٣ و ١٤

قصة : { #أبليتني_بالعشق } ♥️☎️

الحلقة الثالثة عشر { ١٣ } 📵

( يتنهد عزيز بضيق ويقوم يقعد ، يلم حاجاته ويقرب ع اوضة هيثم ، يدخل ويقرب عليه )
عزيز : ولاااا
هيثم بنعاس : اممم !
عزيز : انا ماشي
هيثم : ليه الساعة كام ؟!
عزيز : تسعة ونص ، انا نازل هبقا اكلمك
هيثم : ماشي
( يمشي عزيز ، يروح يفتح محله ، يدخل ويبدأ يرتب حاجته ، يمسك مكنسة يكنس المحل ، يخلص ويغسل ايده ووشه ويقرب يقعد عند العجلة ، يمسك الطينة ويبدأ يشتغل ، كل م يعمل فاسة تبوظ منه ويعيدها تاني اكتر من مرة ، يتعب ، يتنهد ويوقف العجلة مش عارف يشتغل ، يقوم يشغل السماعة ع اغاني ويرجع يقعد ويحاول تاني )

*( انت اول كل حاجة والبداية ف كل شئ ، حب اول مرة ييجي لما قلبي كان بريئ ، انت اول كل حاجة وانت عارف كنت ايه ، وانت اول حد يمشي ودمعتي تنزل عليه .. 💔 )*

عزيز وهو بيغني : كنت اول كل حااااجة بتجرى لياااا ، كنت اول روح بتلمس حاجة فياااا ، كنت اول حب ييجي ونفسي يفضل !
( يسكت )
عزيز ودموعه بتنزل : كنت اول فرحه ، بتمناها ، تكمل !
( تفضل تنزل دموعه ويمسح فيها ، يعدي الوقت ، يوصل حسن المحل ويدخل ، يلمح عزيز نايم ع الكرسي وقدامه فاسة معجنة ، يستغرب ، يقرب عليه )
حسن : زيزو ، زيزووو !
( يفتح عزيز عيونه )
حسن ب استغراب : متصلتش بيا ليه مدام هتفتح بدري !
عزيز وهو بيعدل قاعدته : عادي
حسن : شكلك تعبان ، قوم روح طيب !
( يشاورله ب اة ويقوم يغسل ايده ووشه ويمشي ، يروح كافيه يقعد هناك يفطر ويشرب نيسكافيه يحاول يفوق ووشه باين عليه الأرهاق من قلة النوم ، يعدي الوقت ، يوصل عزيز العمارة ويطلع ، يسمع صوت زغاريط مامته ومرات عمه ، يتخض مع إنه فاهم ، يكمل طلوع مع خروج ريماس من شقتها )
ريماس : كنت لسة طالعة اشتم
عزيز وهو بيبصلها : ليه ؟!
ريماس : مش قلتلك لما تقولها تقولي عملت ايه ، الموضوع اتطور لزغاريط وحضرتك مكلمتنيش !
عزيز : عشان مقلتش حاجة
ريماس ب استغراب : هي الزغاريط دي مش من عندكم ولا ايه ؟!
عزيز : لا من عندنا
ريماس : اومال ايه ، وبعدين مال وشك كدة تعبان ، هو جرا ايه ؟!
عزيز : مجراش حاجة ، هاشم الي هيخطب
ريماس ب اندهاش : لا والله !
عزيز : اة
ريماس : طب وانت زعلان ليه ، هما اهلك قالولك يخلصوا منه هو الأول والجو دة ولا ايه ؟
عزيز : لأ ، هيخطب اسراء
ريماس بصدمة : ايه !!
عزيز ب ابتسامة وجع : هيخطبها
ريماس بتشويش : ازاي طيب ، انا مش فاهمة !!
عزيز : هفهمك بعدين
ريماس : طب ....................
( يسيبها ويكمل طلوع وهي بصاله بحزن وعدم فهم ، يقرب ع باب شقته ويفتح وهو سامع الزغاريط والهزار من شقة اسراء ، يبص للشقة وبعدين يدخل شقته ويقفل الباب ، يدخل اوضته ، يرمي الفون والمفاتيح ع السرير ويترمي هو كمان وراهم ب ارهاق وتعب ، يغمض عيونه ويروح ف النوم ، عند اسراء ، قرأه الفاتحة واتفقه ع كل حاجة )
ثابت ب استغراب : اومال فين الولا زيزو ؟!
مرزوق : صاحبه عيان وبايت عنده من امبارح
ثابت : م انا استغربت إنه مش موجود يعني !
فايزة : لا كلمني امبارح وقالي لازم يبقا معاه وكدة ، هو ميعرفش اصلاً إننا هنقعد نتفق انهاردة
هدى : طب كدة مش ممكن يزعل إنه محضرش مع اخوه ؟!
فايزة : لا مش دماغ زيزو دي انتي فاهمة
هدى : ههههه هتقوليلي 
مرزوق : عاوزين ننزل بقا نجيب خاتم العروسة
ثابت : ينزلوا هما بقا
هاشم : ممكن ننزل دلوقتي انا فاضي انهاردة
ثابت : مفيش مشكلة
مرزوق : شوف اخوك الأول عشان ميزعلش ، عرفه وخده معاك
هاشم : مهي ماما بتقول إنه عند صاحبه ! 
مرزوق : اتصل بيه شوفه اكيد مشي من عنده ، مش هيقعد كل دة ! 
هاشم بضيق : ماشي
( يمسك هاشم الفون ، عند عزيز نايم ، يرن فونه ، يفتح عيونه بخضة ، يغمض عيونه بتنهيدة ويمسك الفون ، يلاقيه هاشم ، يستغرب ويقوم يقعد )
عزيز : الو 
هاشم : ايه فينك ؟
عزيز : ف البيت
هاشم : انت جيت ؟
عزيز : اة
هاشم : طيب احنا نازلين نجيب الخاتم ، هتيجي معانا ؟
فايزة : انت بتسأله ، قوله ينزل معاكوا !
هاشم : هتنزل معانا
عزيز : لأ روحوا انتوا انا نايم
هاشم : ابقا اتخمد لما نرجع
فايزة وهي بتضربه ع رجله : ي ولا !
هاشم بزهق : اخلص بقاا
عزيز : ماشي ، هغير هدومي
هاشم : طيب انجز ، سلام
( يقفل هاشم ، يتنهد عزيز ويقوم يدخل التويليت يغسل وشه ويطلع يغير هدومه ، يلبس بنطلون چينز وتيشيرت بيبي بلو وكوتشي ابيض ، يطلع من شقته ويقرب ع شقة اسراء ويخبط )
مرزوق : دة اكيد زيزو ، يلا قوموا عشان متتأخروش
( تقوم اسراء ورنيم وهاشم ، يفتح هاشم الباب )
هاشم : كل دة !
عزيز : معلش
رنيم : عقبالك ي زيزوووو
عزيز ب ابتسامة : حبيبتي
( ينزل هاشم واسراء ووراهم عزيز ورنيم ، يمسك هاشم ايد اسراء ، يبصلهم عزيز ، تدمع عيونه ويضير وشه وياخد نفس طويل ويحاول ميبصلهمش ، يطلعه م العمارة ، يقربه ع عربية بباهم ، يفتحها هاشم ويركب وتركب اسراء جنبه وعزيز ورنيم يركبه ورا ويمشوا ، ف الطريق )
رنيم وهي بتبص ل عزيز : لا غريبة بجد !!
( يبصلها )
عزيز : في ايه ؟!
رنيم ب استغراب : هادي اوي انت انهاردة ، فيك حاجة غلط !
اسراء بتريقة وهي بتبصله : ايوة صح فيك ايه ، انت تعبان ولا ايه ؟!
عزيز : لا منمتش من امبارح بس
رنيم : صاحبك عامل ايه صحيح ؟
عزيز : تعبان
اسراء : فين الفاسة ي عم ؟
عزيز : هعملها ، لسة هعملها
اسراء : لا انجز انا عوزاها ماليش دعوة ، كسرتها تعمل غيرها
عزيز : هعملهالك والله
هاشم : دة فاشل دة فكك منه ، هبقا اشتريلك واحدة
( يبصله عزيز )
اسراء : لا بجد كانت جميلة اوي عجباني !
هاشم : مهو دة الي هو فالح فيه ، الحمدلله إني هخلص منه
رنيم : ليه قاعد ع دماغك هو ولا ايه ، دة حتى زيزو ملاك
هاشم : ههههههه ضحكتيني !
اسراء بضحد : بطلي كدب بقا !
رنيم : هههههه
( يقعده يهزره ويتريقوا عليه وهو باصص ناحية الشباك مبتسم وساكت ، يوصله عند محل الدهب ، ينزله م العربية ويدخله المحل ، تختار اسراء الخاتم وهاشم ورنيم معاها ، وعزيز واقف ع جنب باصصلهم وعيونه مدمعة بس متماسك ع اد م يقدر ، يخلصه ويرجعه يركبه العربية ويمشوا ، ف الطريق )
رنيم : حلو اوي الخاتم
اسراء وهي بتبص للخاتم ف صوباعها : اوي بجد
هاشم بغرور : زوقي
اسراء : زوقك قمر
هاشم وهو بيمسك ايدها : انتي الي قمر
( يبصلهم عزيز ، تبتسم اسراء بكسوف ، يبوس ايدها هاشم ، عزيز يجيب اخره ، يمسك الفون بتاعه ويفتح الواتساب ويدخل ع شات ريماس )
عزيز : ريماس
عزيز : انا مش قادر
عزيز : والله م قادر
عزيز : مش المفروض كان يحصل كدة !
عزيز : طب ايه الي رجعها ، هي راجعة تأذيني ! 
عزيز : اعمل ايه طيب ، انا مش قادر استحمل كل دة !
عزيز : مش قادر استحمل إنه يلمسها !
عزيز : ي ريماس ردي عليا بالله ، انا عاوز اصرخ والله هصرخ فيهم وهفضح الدنيا
عزيز : مش قادر اسكت
عزيز : انا بحبها اوي ، مش هعرف والله م هعرف اسكت كدة ، مش هعرف !
( تنزل دموعه وتتحول لعياط وينسى إنهم موجودين معاه ، يبصوله )
رنيم بخضة : عزيز في ايه ؟!