الحكاية بدأت من زمان, ساعة تيتانيك... قالوا عنها جملة مرعبة:
"Not even God himself could sink this ship"
"حتي الاله بنفسه لا يمكنه إغراق هذه المركب"
انتم متخيلين هما بيتحدوا مين و ب ايه؟ بيتحدوا مالك البحر ب سفينة تمشي في بحره اللي هو هيكون بارادته اصلا انه مش هيقدر يغرقها... حاجة قمة العبث... المهم... بعد سنين من غرق السفينة اللي بيقولوا عنها تاني أعظم سفينة في التاريخ بعد سفينة نوح (أهي شكل بس و غرقت من الجبروت... علي الأقل سفينة نوح عليه السلام نجته هو و اللي معاه) ييجي 5 أفراد يقرروا يلقوا بأيديهم الي التهلكة و ينزلوا بغواصة اسمها تيتان لعمق 3800 متر في المحيط عشان يشوفوا "حطام تيتانيك"... يا اخي ده حتي اسم الغواصة لا يبشر... بلاش... أنت ليه مش محترم قدراتك انك بشر؟ و الانسان اتخلق ضعيف... لو انسان اتوجد في العمق ده جسمه مش هيقدر يستحمل و هيموت فا انت بتتحامي في مين؟ في غواصة من صنع البشر؟ انت عارف انك بتخاطر بحياتك و قبلت تدفع فلوس (ملايين) عشان تخاطر بحياتك و مت! لا و يا سلام علي الثقة في ان الاوكسيجين يكون محدود كده... بجد النسان كل ما بيفتكر انه يقدر يتحدي الطبيعة او يسخرها بعلمه "اللي هو اصلا محدود" لازم ياخد علي دماغه عشان يفوق... انت ضعيف فا احترم ضعفك... انت اتخلقت بامكانيات محددة و علمك محدود و مهما طورت تكنولوجيا و و و فانت نقطة صغيرة ي هذا الكون الواسع... في حاجات كتير ماشوفناهاش و كائنات حية في اماكن كثيرة لا نعلم عنهم شئ! ... "و يخلق ما لا تعلمون" ... شبه فكرة البكتيريا اللي موجودة حواليك و في جسمك و انت مش شايفها ولا حاسس بيها... في مخلوقات موجودة في العمق اللي تيتان انفجرت فيه عايشة و زي الفل بقدرة ربنا بل و في كائنات في اعماق بعيدة, مظلمة, و باردة.
كل ده كوم و القلبان اللي حصل عشانهم كوم تاني... الموضوع بقي عالمي! و خفر سواحل و سفن عشان تحاول تنقذهم او تلاقيهم... هما دفعوا ملايين عشان يستمتعوا بتجربة انتحارية و أظن كانوا هيدفعوا ملايين اكثر مقابل انهم يرجعوا سالمين, بل مقابل لحظة واحدة من الطمأنينة, بل مقابل نفس من الاوكسيجين. غيرهم بيدفع حياته عشان فرصة في حياة يا تيجي يا لأ... قوارب الموت(الهجرة الغير شرعية), اللي كان في قارب غرق منه عدد مأسوي من البشر من غير ما حد يسلط الضوء عليهم... من غير نصف المساعده اللي حصلوا عليها ركاب تيتان ... طب مش كده الحياة ظالمة ولا ايه؟ اه الحياة ظالمة و ماتنسوش ان الدنيا ما هي الا دار اختبار زي الكام ليلة اللي قبل الامتحان اللي بنطحن نفسنا فيهم عشان ننجح ... بس هل كدة خلاص كلة ظلم؟ لا في عدل و في حساب عسير و جزاء صارم لكل حد ظلم في الدنيا.
أخيرا يا اصدقائي امتنوا لحياتكم اللي ربنا منحها لكم و اغتنموها في عمل ما يحبه و يرضاه... لا تنبهروا بزخرفة حياة البعض "لبيك إن العيش عيش الاخرة" ... اه اكيد اسعي انك تحقق اهدافك و ذاتك بس ماتنساش ان السعادة في الرضا مش في المال و مش في أي حاجة تانية... ربنا يرضي عنا و يراضينا جميعا.
