اتفقنا قبل كدة علي حكم الاغاني في الاسلام انها حرام. و ان الموسيقي مزامير الشيطان لأنها تلهي عن ذكر الله.
الحفلات نوعين اما مجانية و اما مدفوعة. بالنسبة للحفلات المجانية زي الحفلات اللي الجامعات بتعملها تحت مسمي "welcome party", انا اتعرضت للحدث ده قبل كدة فا خلوني أقول تجربتي مع اللي كانوا بيفكروا يروحوا.
أنا وقتها أخذت قرار اني مش هحضرها و كانت حفلة لمطرب مشهور لأني عارفة ايه اللي ممكن يحصل في الحفلة و انا هاخد منها ايه. بالنسبة للي ممكن يحصل فا هو مضايقات قد تصل لتلامس و بالنسبة للي هاخدوا فا هي ذنوب بتضاعف. بالمناسبة الحفلة كانت يوم جمعة و انا كنت اللي هو انتم بجد رايحين؟ ده الحفلة دي حرام في الايام العادية فا انتم بجبروتكم هاتخلوها يوم الجمعة؟ هاتروحوا تسمعوا أغاني و ترقصوا و لبس لا يرضي الله و في ولاد بتبص علي بنات و اختلاط و كمان يوم جمعة؟ اليوم اللي القيامة هتقوم فيه؟ اليوم اللي المفروض نقرأ فيه سورة الكهف و نصلي علي النبي؟
"قال صلى الله عليه وسلم: (إن يوم القيامة يكون في يوم جمعة، وما من دابة إلا وهي مصيخة تنتظر النفخ في الصور يوم الجمعة)"
بس هقول ايه, غفلة ربنا يفوقنا منها. و بالنسبة لدفعتي فا كان فيه تردد يروحوا او لا و وجهات النظر اللي سمعتها منها:
-طيب ما احنا كده كده بنسمع أغاني فا مفرقتش
-انا خايفة اروح و اموت و انا راجعة
-انت مش هتروح عشان يوم جمعة صح؟
-أصلهم رايحين فا انا كمان هروح
نمسك بقا كل رد من دول كدة مع بعض.
_____________________
الأول: طيب ما احنا كده كده بنسمع أغاني فا مفرقتش
الحقيقة انه فرق و كبير كمان. انت بتسمع أغاني لوحدك (حاجة حرام) و بتاخد ذنوب فا تفكيرك انه طالما خربانة خربانة مانخربها علي الاخر بقااا. غلط, لأن ده مجاهرة بالمعصية
"قال رسول الله ﷺ: كل أمتي معافى إلا المجاهرين"
انت ماكتفتش انك عملت الحرام في صمت لا انتم جمعتم بعض كده و يلا نعمل حاجة حرام سوا! ده غير ان طريقة التفكير دي هتدمر صاحبها, طريقة انا مش هتوب انا هتمادي دي غلط و فيها قنوط من رحمة ربنا
(" يا عبادي الذين أسرفوا على أنفسهم لا تقنطوا من رحمة الله إن الله يغفر الذنوب جميعا إنه هو الغفور الرحيم")
_____________________
الثاني: انا خايف اروح و اموت و انا راجع
و الله ده تفكير حلو بس الفكرة انك ممكن ماتموتش و انت راجع, انت ممكن تموت و انت رايح و انت في نيتك انك رايح الحفلة و انت في نيتك انك هتعمل معصية.
