الهَوى اسّرار وهَواجِيس واحّلام ... والىَ متّى واحّلام وصِلك بعّيده

البارت الرابع

'
قامت تمشي بعيد عنهم ، متجهة لمُقدمة اليخت تاركتهم بحُزن ع حالة اصغر بنت ببيت أيمن وخنساء ..
~ قدام العزبة ، بسيارة مطلق ~
لفّ له وتأمل عيونه ، الخُضر ونظاراته اللي م عهده يلبسها ابدًا ، الشعر ملئ وجهه وتشكل لحية وشنب ، قدامه شخص يحلف انه ماهو بالصغير اللي كان معه بطفولته ، دمعت عيونه وشهق يبكي ، ولأول مره يبكي بعد وفاة أُمه بعشر سنين ، لفّ له بصدمة ونطق : أخو سطّام !
سطّام نطق وهو يحسّ بالأشواك بحنجرته : أنا سطّام
توسعت محاجره الخُضر وقال : انا في وجهك يالله !!
سحبه سطّام لحضّنه يبكي على كتفه ، شّد مطلق عليه وقال بصوته المهزوز : سطّام يا أخوي اذكر ربك
شّد سطّام وشهق يبكي بأرتفاع صوته ، قطرت دموع مطلق بصدمة ونطق : جددت العهد يالهَاجس بجيتك ي أخوي واجتمعنا هواجيسك مرهً ثانية
ضحك سطّام ونطق : يواحشني يواحشني ي مطيليق !
ضحك مطلق من نطق الأسم اللي فقده ١١ عام ، وقال بأرتفاع صوته : طلاق ان تتذكى لك ناقه !
ابعد سطّام يمسح دموعه مع وجهه ولحيته وقال : أعقب ! اعرست ولا عزمتني ؟
مطلق : يخوي دخلت الثلاثين ولا اعرست
سطّام : اجل من تطلق ؟
مطلق : محزمي وسلاحي
ضحك سطّام ورجع يضمّ مطلق ، يستنشق ريحة الذكريات والماضي بوجود أُمه ، ابتسم مطلق ومسح ع راسه وقال : اذكر ربك العرب بخير بس مشتاقين لك والأرض ناشفه وجيتها وأرويتها ولو ان م انت بساقي
فهمه علطول وانه يقصد صدره بالأرض ، وابتسم بشوق للألغاز مطلق واشعاره وقال : عساني م انحرم من الأرض ولو انها عجاج وقيضّ ! اشهد بالله انها بعيوني جنات ومطر
ركب ضاحي وقال : بسم الله شفيكم ؟
مطلق مسح وجهه وشنبه وقال : ذا سطّام
طاحت الطاسه بحليب العنز اللي فيها من يد ضاحي وقال بصراخ : بكّر نهيّان !!؟
سطّام انفجر يضحك ودوّت ضحكته ولأول مره ، وسحب مطلق زبيريته يرميها على ضاحي اللي قام يناقز فالجو ويرقص ويرحبّ ، ضحك يركب وقال : يرجال نروي الأرض بالحليب مشينا نكرمه ؟
مطلق ابتسم وقال : والله انه أعز ضيف يجي والله انه أطيب من اكرمه
سطّام ابتسم وقال : يجعلني قبل زولك ي مطيليق
ضاحي مسك راسه وقال : يولد متغيير ! اجل حلالك اسرار وسيارتها
ضحك بصوت عالي يضمّ ضاحي ، انصدم من حركته لكنه قابله بصدر رحب وضمّه له وقال : الحمدلله ع سلامتك والحمدلله شفناك مره ثانية ي أخونا
سطّام تنهد ونطق : عادت الحياة اي والله
مد يده ورا كتف مطلق يضمّه له ، ضربت رؤوسهم ببعضها ونطق مطلق : أطيب راس يبو وفاء
ضحك بهدوء وقال : وأطيب ساس يبو مشبب
مطلق ضحك وقال : رحمة الله ع مشبب
سطّام تنهد وقال : ورحمة الله ع وفاء
لفّ مطلق بصدمة ونطق : لا تقولها يالهَاجس !
سطّام : تطلب الحل ي مطلق لها عشر سنوات بقبرها
ضرب مطلق الدركسون ونطق : الله يجعله بضلوعي عنك وش سويت !!
سطّام نطق بحدة : ضلوعك طيبة ان شاءالله اذكر ربك ووش سويت ي مطيليق لي عشر سنوات عايش بذاك اليوم وبكذب لو اني قلت توو حسيت بالحياة
ضاحي بخفه دم نطق : اكيد عشانك شفتني
مطلق : سد حلقك لا احشيه تراب
ضاحي قمطّ ونطق : سمّ
سطّام : وانت صادق ي ضويّحي
ضاحي ابتسم وقال : لبى كبدك ي سويّطم
ضحك وقال : يالبييييه
دعس مطلق وهو مجهز ناقه عند المسلخ لعزيمة عند اهله بكره لكنه استعجلها لسطّام ..
~ النيابة العامة ، العصر ~
قفلت التلفون اللي ع مكتبها ومشت تمشي للشماعة واخذت عبايتها وشنطتها ولبست وخلصت ، مشت تفتح الباب ونطقت مريم : استاذتي وصلت لوحتج تبين ادش بدالج اسويها ؟
اسرار رمت المفتاح ونطقت : بأمانتك
مريم : من عيوني
مشت تطلع واتصلت ع عِقد ووصلها صوتها وهي تقول : ايوه ؟
وقفت بمكانها ونطقت : عِقد !! يالسخيفة
عِقد : اش بغيتي ؟
اسرار ضحكت بصدمة وقالت : ترا م كنت ادري عن شيء لا تتهميني ي صاحبتي وتجي منك وانتي اقرب الناس لي !
عِقد : بصدق كلامِك أنا دحين ؟
اسرار : انتي وين بجيك واخليك تصدقيني غصب
عِقد ضحكت بسخرية وقالت : جِدة موفقه
سكرت الجوال وضحكت اسرار تدخل الحجوزات ، مشت للأستقبال ونطقت : م عندي قضايا للأسبوعين الجاية بأخذ أجازة
موظف الاستقبال : بلغي المدير ودربك خضر
مشت تتجاهله وتدخل قسم الإدارة ، وبغضون دقايق قدرت تقنعهم وتسحب اول إجازاتها اضطرارية لأجل صاحبة عُمرها ، ابتسمت تنطق : جايه للصيف والبحر والتان جايه اقلب مودك ي عِقد وانسيك وصال
تقدمت لسيارتها تفتحها وتركب متجهة لبيت عِقد ..
~ فالديرة ~
جالسين فالمجلس لوحدهم ، راسها ع فخذه ويسولف بأجتماع اونلاين عن القضية ، رفعت راسها ونطقت : وصال خلص يخي
ابتسم يسكتها ونطق : تم م بقى شيء اصلاً اشوفكم بكره ؟
الكل مجتمعين ونطقوا بالإيجاب ، سكر اللابتوب وانحنى يبوس خشمها وينطق : عيوني ؟ لبيه ي وداديّ
ابتسمت وقالت : شرايك نسافر ؟
وصال : والله ودي بس اقنعي الشايب ابو راس يابس هو رفض تجين ببيتي تبين يوافق نسافر سوا ؟
زفرت بملل وقالت : وش نسوي طيب ؟ ترانا متزوجين
وصال رفع كتفه بعدم معرفة وقال : والله قولي الكلام ذا اللي شاده حيلك فيه علي لأبوك وشوفي وش رده
قامت بغضّب وقالت : اصلاً انت م همك وم تبي تسافر معي وكل همك شغلك !
وصال رفع حاجبة وقال : ايه همي شغلي اللي بيعيشك ويعيشني معك ! لعاد اسمع هالكلام
وداد : ايه م همك الا نفسك وتحطها فيني وتضمّني معك عشان م تحسسني ! تراك واضح ماخذني من عند اهلي عشان ايش ؟!
مشت تدخل وبكت علطول وسحبتها منيرة وأمها ، سكروا الباب ولفّت تشوفه مع الشباك وكيف طلع معصب وقافلة معه ، بكت وقالت : حرام عليكم !!
منيرة نطقت بحدة : حرمت عليك عيشتك انطمي وسوي الخطة خليه يهج ويطلق ونأخذ المؤخر ونكسب شوي !
أم بجاد نطقت بعصبية : هو صعب يطلق بس كسره سهل ي فيك ي في بنت عمه اللي يحسبها اخته
وداد بكت بحرقة صدر وقالت : سووها بأسرار بس انا ابعدوا عني
منيرة ضحكت وقالت : ان حصل وقبعت بينهم معاد بنقرب منك اصلاً
بكت وداد تدعي تخرب حياة اسرار لأجل تأخذ وصال ويبتعدون عن اهلهم ، وطلعوا منيرة وهديل من عندها وتركوها منهارة تبكي فالمقلط ..
~ بيت مطلق ~
دخلوا ثلاثتهم وابتسم وقال : يالله كل شيء على حاله
مطلق جلس وابتسم يقول : وش لنا فالتغيير ؟ اجلس نتقهوى ونقابل وجهك السمح ونعرف اخبارك ي عين أخوك
جلس سطّام ونطق : وشلون ابدأ ؟
مطلق : م حيث م بدأت آلامك
سطّام : يطويل العمر والسلامة بدأت قبل عشر سنوات وزودٍ عليها سنة ، وفاة الوالدة خلّف داخلي ألم اواجهه ليومك ذا ولا خفّ والله ي مطيليق وانه م تحسّن حالي الا بعد مقابلك
ابتسم مطلق ومد فنجاله بيمينه ليمين صاحبه ورفيق دربه الطويل ورغم السنين اللي جوفت بينهم فراق طويل ، خذا الفنجال ونطق : عمرك طويل
مطلق ابتسم وقال : وانت من أهم اولوياته يالهَاجس ومضمون العمر هو انت والله
سطّام ابتسم وقال : لا خلا ولا عدم
لفّ مطلق لجواله اللي دق ورفعه وقال : اخو العيال !
سطّام نطق بحدة : وشفيك ؟
مطلق ابتسم يهديه وقال : م فيه الا الخير بس به رقم غريب مفجر جوالي اتصالات
رفع يرد وقال : مرحبا ؟
اسرار نطقت بغضّب : ذبحتوه ؟؟
مطلق : هاه ؟
اسرار : مطلق انا اسرار ذبحتوا الرجال اللي جبته اليوم ؟؟
مطلق ابتسم وقال : ايه بالله
اسرار شهقت ونزلت دموعها وقالت : اييش !!
مطلق : ذابحين له ناقه وبنذبح شاة لمجهودك العظيم وجميلك اللي اموت م نسيته
اسرار وقفت سيارتها جنب الخط وقالت : وش تقول انت ؟!
مطلق : بقفل وبحذف رقمك يبنت عمي خوفي يمسك خير ماهو بشر ويكون مني
اسرار عضّت شفايفها لثواني من لطافة مطلق وقالت : دربك خضر
سكر الاتصال وبالفعل حظر رقمها لكنها م سوت شيء ، تُظن انها بيوم من الأيام يمكن تحتاج لمطلق ، سجلته عندها وكتبت ' أخو ظبيه ' سكرت جوالها ودعست للديرة تبي تشوف وش اللي صار للغريب ..
~
وصلت وفتحوا لها البوابة ، دخلت بسيارتها وأخذت نفس عميق من شافتهم مجتمعين بمُنتصف الحوش ونياقهم معهم وأنظارهم عليها ، طفت سيارتها ونزلت تقفلها وتمشي لبيت مطلق على الرغم من وجود مطلق مع اعمامها ، دخلت البيت ونطقت بعّلو صوتها : ظبي..
قاطعها خروجه من المجلس قدامها ، وجهه يميّل للعصبية وجدًا ، عروق جبينه واضحة ، صدّت عنه تمشي من جانبه بس لفّت من الصراخ اللي برا ومن ارتفع صوت مطلق ، سدّت اذانيها برعب وقالت بهمس : يارب سلم مطلق يارب
طلع يركض ولفّ مطلق عليه بعصبية وقال : انا م قلت لك لا تجي ؟؟
أبو بجاد ضحك بسخرية وقال : هلا والله بولد نهيّان ! هلا والله باللي كلى من خبزنا وشرب من مانا عُمره كله ويوم خلصت حاجته سافر وخلانا !
سطّام قطّب حجاجه وقال : وش تخربط انت ؟
أبو بجاد ضحك وقال : نسانا الله يسود وجهه
مطلق نطق بحدة : م عمرك طليّت بوجهه والحين اشوفك تحاسبه على شيء هو ماله دخل فيه !
أبو بجاد صرخ بعصبية : تسكت يالكلب اذا اكبر اعمامك تكلم تسمع ؟
مطلق نطق بعصبية : كنت تطردنا اذا جينا عند بجاد انا وسطّام والحين تهاوش على وش ؟!
أبو بجاد نطق بحدة : انت صادق اكلته من اكلك اللي يجيك مني انا ! وشربته من المويه اللي م يصرفها الا انا ! فالحين تسكت لا اوريك نجوم الليل بعزّ القايلة وقليل الخاتمه اللي وراك حرام م تكتب له ناقتي يعزمنا بالأول ويسّد جميلنا وبعدها خير !
مطلق بلع ريقه وقال : ناقتك ؟ كلها حلال أبوي شلون تنسبها لك وبكل ثقة تهاوش عليها ؟؟
أبو بجاد صرخ وقال : حرام م تكتب له وحلال مشبب من حلالنا ي اخوانه وان انكتبت له تعرف زين ي مطلق وش بسوي !
شّد ع قبضته من عرف انه يقصد أخوانه ، ضاحي وظبيه ، مسح وجهه وشنبه وقال : ليه تحرم ؟
أبو بجاد بحدة نطق : بس ! حرام حرم الدم انه م يذقوها وان نذبحها للشيخ بكره
سطّام كان وجهه مجهّم ومصدوم ، تقدم وسحب مطلق وقال : خلاص اقطعوا الشر وعزيمتكم الجمعة الجاية ببيتي لفّ على مطلق وقال : يخوي واصلاً م بيننا تعال عندي متى م فضيت لبيتي
مطلق فزّ يبوس خشم سطّام وينطق : حرام م يكتب لي انا ي مطلق شيء ! حالنا واحد يخوي والسالفة ماهي مقياس قدر !
سطّام ابتسم وقال : تحّب الكعبة ، اجل بترضى بقهوة عصر يبن مشبب ؟ بكره ؟
ابتسم مطلق وقال : بعطيك رنه
ضحك سطّام ورفع عيونه يسمع أبو بجاد يقول : تم لقاءنا الجمعة الجاية ونشوف جميلك فينا يبن نهيّان
كان أبو بجاد واقف بثقة بين اخوانه وعيالهم ، مشى سطّام ومشى مطلق معه وقال : شوف ضاحي برا جاب موترك
سطّام : م تقصرون وترا سجلت رقمي عندك
مطلق : خلاص اجل بيننا تواصل والعذر والسموحة اضطريت تسمع شيء ماودي والله انك سمعته واضطريت تعزم ناس ثقيلين وأنفسهم شينة
سطّام : عيب عليك اخوان وم بيننا هالكلام !
مسك جيوبه وقال : ثواني اجيب جوالي
مطلق : وانا بسبقك لضاحي
افترقوا ورجع سطّام يدخل بيت مطلق ، مشى للمجلس وسمع اصواتهم والواضح انهم فيه ونطق : يولد
رفعت حجابها على راسها ومسكت طرفه تغطي به وجهها ، وظبيه فزّت تدخل لأن مطلق بينهيها لو يشوفها قدام الغريب بقميصها ، دخل ونطقت اسرار : شوف لو يمسّ مطلق شيء ويطلع من وراك..
قاطعها وقال : م يمسّه شيء مني
اسرار : اصلاً شلون تعارفتوا
سطّام انحنى ياخذ اغراضه ونطق : يكثر م تسولفين معي وانتي م تعرفيني ! قلت لك لا تثقين بالغريب واسألي مطلق اللي تخافيني لأجله وبيقولك من انا بالنسبة له
اخذ اغراضه ولفّ من نطقت : انت م انت بغريب انت بلاء لا أكثر ولا أقل !
سطّام : تشرفت فيك
مشى يطلع من بيت مطلق ، وطلع مع البوابة وأنظارهم عليه كلهم ، ركب سيارته ونطق ضاحي : ماشاءالله الله يعطيك خيرها ويكفيك شرها وجعلها اردى م تركب يبن وفاء
ابتسم له وقال : قديمة لها سنين معي لكن الله يرفع قدرك وعقبال م افر الرياض فيها معك انت ومطيليلق
ابتسم وقال : في امان الله ولا تباطى
سطّام اشر بأصبعه ع خشمه وقال : على خشمي
مطلق ابتسم وقال : عليه الشحم وبيننا اتصال م كملنا سوالف
سطّام : ابشر
قفل شباكه ومشى راجع للرياض ، ودخلوا مطلق وضاحي وتقفلت البوابة ، مشوا للبيت وقابلوا اسرار طالعه منه ونطقت بخوف : خشمه وشفيه ؟
مطلق وهو يناظر الارض : ضاحي ضربه
شهقت وقالت : م قاله شيء ؟؟
مطلق : ذا سطّام خويي 
اسرار : اوه م اعرفه بس معنى كلامك انه مشاها ؟
ضاحي ابتسم يناظر عيونها وقال : خايفه علي ولا وش ؟
توسعت عيونها وقالت : ايش ؟
ضرب ضاحي على راسه وضحكوا يدخلون للبيت ، ضبطت نقابها ولحقتهم لبيتهم وقالت : اغبياء كلكم اغبياء !
مطلق لفّ لها وقال : تبين شيء ؟
سكرت الباب وراها بقوة وقالت : ايه شيخ مطلق بتقولي كل السالفة
توسعت عيونه بصدمة وبلع ريقه بخوف ، يخاف وكثير انها تسأله ذاك السؤال ، اللي اجابته بتنهي حياتها وممكن تكون ميتة وهي على قيد الحياة ، شّد ع قبضته وقال : اي سالفة ؟
اسرار : مطلق بلا استهبال تعرف مقصدي وم بطلع الا والسالفة كلها معي
مطلق : سالفة سطّام ؟
ميّلت راسها بمعنى كمل وقالت : ايه ذاك سطّام
زفر براحة وقال : ابد تذكرين ولد كنت اجيبه دايم معي من المدرسة وكنا نذاكر سوا ونلعب سوا ؟ كان شكله غريب عننا ونظيف ولطيف عكسنا ؟
ابتسمت وقالت : اوه عرفته واو يالصدف ! اخرتها طلع خويك اللي لو يشّد حيله دخل كرت العايلة ؟
مطلق ضحك وقال : قريب ان شاءالله يدخلها
اسرار فهمت ان مطلق ناوي يزوج سطّام لظبيه ، تنهدت وقامت وقالت : انتبهوا منه م ارتحت له صراحة
مطلق : معليك م يمسّني شيء منه ارتاحي يبنت عمي
طلعت وسكر مطلق الباب وراها ، دخلت بيتهم وضبطت شنطتها بملابس صيفية وملابس بحر ، قفلت شنطتها وانسدحت تشوف موعد اقلاع طيارتها ..
~ فالليل ، قصر نهيّان ~
دخل هذام للبيت ومدّ اغراضه لدّره اللي تقدمت تاخذها ، مشى من جانبها يدخل ويسلم وم كان فيه احد موجود ، طلع لغرفته وفتح جواله يتصل على سلطان : الو
سلطان ابتسم وقال : ارحب هذامي
ابتسم وقال : وينكم غاطسين مالكم حسّ ؟
سلطان : بخير ونسلم عليك انت وش صار عندكم ؟
هذام تنهد وقال : أبوي للحين يهاوش وظنتي معاد بيسمح لك تدخل البيت بالمرّه
سلطان ضحك وقال : عاد ميت على بيته انا يشيخ بيت سطّام اكبر واوسع وتحسّه شَرح يخي
هذام : اجل بجيكم الويكند الجاي
سلطان ابتسم وقال : ايه تعال فيه عزيمة سطّام مسويها لمطلق
هذام ابتسم وقال : ولد مشبب ؟ يالله لك الحمد على تجديد العهد ! شخباره ؟
سلطان : والله للحين م رجع سطّام بس باخذ العلم منه
هذام : اجل بنخمد والله مابي اطول عليك
سلطان ابتسم وقال : نوم العوافي حبيب قلبي
ابتسم وقال : يعافييك يالعضيد
قفل الجوال ورفع الملفات اللي رفض معظمها ووافق على اقّلتها ، فتح الملف وقرأ الاسم : ظبيه بنت مشبب بن حمد آل يزيد
نزل عيونه لدرجاتها والدورات اللي اشتركت فيها ، ابتسم وقال : حلو ماشاءالله السي ڤي حقها يفيدنا وبقوة !
طبع بالطبعة ' مقبول ' ووقع على ملفها واخذ الرقم يتصل عليها ، هو م كان عنده علم بإسم مطلق كامل ولا جاء على باله من الأساس ، ردت ونطقت : الوه ؟
سلطان ابتسم وقال : سلام عليكم معك شركة اتش اس للوحات العالمية ، اخت ظبيه ؟
ابتسمت تشّد على قميصها بكفوفها ونطقت : ايه انا ظبيه
سلطان : ابشرك انقبلتي ودوامك الاحد
شهقت ونزلت دموعها وقالت : الاحد بكره ؟
ابتسم يشوف الساعة تخطت ١٢ ودخلوا بيوم السبت وقال : ايه نعم طال عمرك لاتنسين نسخة ملفك واوراقك كاملة
ظبيه : تمام
سلطان : موفقة يارب
قفل ونزلت تسجد وبكت بفرحة وقالت : اخيرًا بساعد مطلق اخيرًا برد له جميله ولو اني م بقدر الحق جميله عُمري كله
طلعت تركض وهي ترقص وقالت : انقبلت بوظيفة !!
فزّوا من المجلس ونطق مطلق : سألتك باللي خلقك وسواك !
ابتسمت تبكي وقالت : والله ي مطلق والله
ضمّها له وباس راسها وقال : مبروك ينظر عيني مبروك !
ضاحي ابتسم وقال : توسطي لي
غمز لها وضحكت ولفّ مطلق يضربه وينطق : اعقل لا والله ان اعقّلك !
ضاحي : بيجيني ارتجاج فالمخ منك !
مطلق ضربه وقال : لا ذيب م يمسّك شيء
ضحك يضمّه ويضمّون ظبيه معهم بشكل عفوي ، وبقلوبهم يحملون لها خالص الدعاء والتوفيق ..
~ فالمجلس ~
انسدح على فراشه وهمس بحقد : م يحق لك تتكلم ولو عرفت يستحسن تعرف من بتال العلم لا يجي منك !
غمض عيونه يسترجع الأحداث قبل حوالي ١٩ عام ..
~ بعيد جدًا عن الديرة ~
نزل يسحبه مربّط وعلى راسه قماشه ، صرخ يستنجد فيهم وكان جّل م يقوله : تكفى ي أبو مطلق ! تكفى ي أبوي !
صرخ بتال ' أبو بجاد ' ونطق : اسكت !! اجل تطلع عن شور ابوك وشور اخوانك وتتزوج ريم ولنا سنين نحذرك منها ومن اهلها ؟ حجازيه م ندري وش اصلها عديمة الاصل وفوق خبث فعايلك تجيبها عند حريمنا وتسميها قدامهم شيخة الشيخات وسيدة الحريم كلهم ! وتسكنها بأكبر بيت وتطلعني منه عشان وش ؟ عشان ريم ؟
صرخ محمد ونطق : عشاني بكّر حمد وأخوك الكبير فكني ي بتال !!
سدحه ع الارض وقال : انطق الشهادة ي محمد
نزلوا من السيارة حمد ومشبب ومطلق بعُمر الاثنى عشر سنة معهم ، كان يستند على ولده مشبب ويركض رغم كبر سنه ، صرخ وقال : اترك اخوك انا راضي عن..
انلجم من انطلق الرصاصة من سلاح بتال برأس محمد ، وصرخ مشبب يترك ابوه ويركض لأخوه ، ركض يركب سيارته وينطق : نهاية الكلاب اللي تنسى اهلها ! يموتون موتة كلاب
دعس وتركهم بالبر بعيدين بالحيّل عن الديرة ، صرخ وقال بصوته العالي : مطلق تعال ي أبوك ساعدني تعال !! نلحق عمك
ابعد مطلق عن جده ومشى يساعد ابوه وبالفعل ركبوه فالسيارة ولفّ وشاف الشايب خارٍ على وجهه ، صرخ وقال : أبوي !!
كان مغمى عليه من منظر محد يتحمله حتى الشجاع القوي ، منظر يشوف واحد من عياله يقتُل أخوه بدم بارد وبدون م يرف له جفن ، شاله مشبب وركض فيه للسيارة ومشوا للمستشفى ، لكن فارق محمد الحياة من اول م اخترقت الطلقة راسه وصار لهم حادث مروري بالطريق بعد م اخذوا منيرة ' أم مطلق ' وتوفوا مشبب ومنيرة وتسبب الحادث بشلل لحمد بجميع اعضاء جسده ، حتى لسانه وفقد كل حواسه وعايش معهم لكن روحه غادرت مع اكبر عياله محمد ويتليّه مشبب ، وبالنسبة لمطلق اصاب بيدى اليسرى ولليوم ذا مايقدر يشيل فيها ولا يستند عليها ، ودخل غيبوبة وكان بين الحياة والموت ، بالحادث المروري نجو اثنين بس ظلّ الحادث بذاكرتهم وكأنه حصل امس ، وبالنسبة لأسرار صار الكل يرميها على الثاني وتكفّل فيها منّير من حُبه لمحمد واخذتها عفيفة ورضعتها وكفلتها وسمتها بنتها ، ولا نقصّوا عليها بشيء ، وللأسف كشف بتال ان مطلق شافه وهدده بأخوانه وانه ممكن يصير لهم نفس م حصل لعمهم محمد ..
~ فالصباح ، الساعة الخامسة فجرًا ~
طلعت بشنطتها وأغراضها وركبتها بسيارتها ، ومشت حدّ م وصلت باب مجلس جدها ، اخذت نفس وهمست : ماله داعي كل م شفتيه تبكين !
دخلت تمشي ونطقت : سلام عليكم يبوي
ابتسم من شافها واستهَل وجهه وصار يتراقص براسه يميّله يمين وشمال ، ابتسم ودمعت عيونها ومشت له تبوس راسه وتضمّه ، ابعدت وقالت : يبوي انا مسافرة واذا احتجت شيء مطلق عندك تبي اجيب لك شيء من الحجاز ؟
هز راسه بنفي وباست جبينه وقالت : بجيب لك مو شغلي !
ابتسم وضحكت وقالت : تعال ساعدني نبدل فراشك
استند أبو محمد عليها ورفعته بصعوبة وثبتته بالمركى ، مشت تلفّ بطانيته ومفرشه اللي تحته وحطتها بكيس وفرشت له فراش جديد وبخرته ونطقت : شرايك ي حمد ؟ صح اني ذيبة بنت ذيب ؟
هز راسه بنعم وهو يتأمل ملامح محمد فيها ، مشت تبخر فراشه وتشبّ نار مجلسه وتسوي القهوة والفطور ، مشت له واكلته بحذر وعناية تامة ، ابتسمت من شربته الشاهي وتلذذ فيه وقالت : بالعافية يبوي بالعافية ع قلبك يحبيب حفيدتك انت يبو عيون خُضر كلها جاذبيه !
اشر عليها يقصّدها بأخر كلامها وضحكت تبوس خشمه وتنطق : ورثتها منك
هز راسه بنفي وقالت : الا ونص !
ضحكت من ابتسم بأقصى مقدرته ، قامت وقالت : اذا رجعت بخليك تأخذ شور ولا فالخيال
هز راسه بنعم ومشت تطلع وتمشي لسيارتها ، ركبت وشغلتها ومشت تتوسط الخط تبعد عن الديرة ، شافت المدة بين موقعها والمطار ساعتين ، زفرت بملل وقالت : تهون لأجل بنت أيمن
وقفت عند محطة البنزين تفّلل سيارتها ، نزلت للسوبرماركت ودخلتها تتمشى بين الأرفف وتأخذ لها سناكات ، لفّت من نطق وراها : اسرار ؟
توسعت عيونها من شافته وقالت : ايوه ؟
ابتسم وقال : ماشاءالله وش جابك هنا ومن صباح الله ؟
اسرار صدّت عنده تطالع المنتج بيدها واردفت : مسافرة
بجاد : لحالك ؟
هزت راسها بنعم وقالت : بغيت شيء ؟
بجاد ابتسم وهمس : بغيتك
دققّت بعيونه ونطقت : ايش ؟
بجاد : ابد سلامتك وتمنيت ان وصال معك ماهو كذا تسافرين يبنت عمي بدون محرم
اسرار ابتسمت وقالت : دام وصلنا لهالنقطة اشوفك ع خير
مشت تتخطاه وتدفع حسابها وطلعت تركب سيارتها بعد م خلصت من البنزين وانطلقت للمطار ، ابتسم يمسك قلبه وقال : يويل حالي اجل ذي تسافر لحالها ومحد يراعيها ولا ينتبه لها ؟
مشى يطلع ونطق : والله ي بجاد لا يدري ابوك انك تحبها لا يذكيك ويعشي الجماعة على لحمك
ركب سيارته ومشى خلفها لأجل يحميها ، هو بنظره انها ضعيفة وتحتاج سند وفالصدق اسرار عن رجال قبيلتها كلهم سند وذخر وظهر لنفسها ..
~ الرياض ، بيت سطّام ~
جالس على طرف سريره ، بيده لوحة صغيرة الواضح انها لبيته وماراح تنعرض فالشركة وللبيع ، يرسم باللون الأسود ويهوجس ..
وقت نطقت له : انت م انت بغريب انت بلاء لا أكثر ولا أقل !
ابتسم بهدوء وقال : حمار ! احد يقول تشرفت فيك ؟؟
مسح على شنبه ونطق : بس ضغطتها كلمتي وهذا الأكيد
استوعب وتوسعت عيونه بصدمة ، بكل حياته اللي مضت كان يهوجس بحادث أمه ولا شيء غيره ابدًا ، والحين اسرار تتوسد هواجيسه ، انسدح ونطق بصوته الرخّيم : من انتي ي اسرار ؟
مسح وجهه وضحك بخفه وقال : اعقل اعقل
طلع من غرفته ينزل للفطور فالحديقة من سمع صوت حليمة تناديه منها ، جلس ع الطاولة وقال : سلطان متأكد وصلت اللوحة لتايلند ؟
سلطان رفع التابليت حقه وشاف خُطة اللوحة ومكتوب عند اخر خطوة ' تم التسليم ' ومُضيئة باللون الاخضر ، ابتسم وقال : معليك وصلت تأكدت من المبلغ ؟
سطّام : لا ذا ماعليه خوف اصلاً كل لوحاتي دفع مسبق
سلطان : يعني وصلك ؟
هز راسه بنعم وكمل يأكل ، جلست حليمة وقالت : تبون شاهي ؟
سلطان : انا لا يكفيني كوب قهوتي
لفّت لسطّام اللي يهوجس بنُص لقمته ، ابتسمت وقالت : سطّام يروح أُمك تبي شاهي ؟
رفع عيونه وقال بهمس : اسرار ؟
توسعت عيونه وغصّ بلقمته يكح ، ضحك سلطان ونطق : بسم الله علييك ! وش جاك ؟
سحب الكاسه من يد حليمة وشربها ، شهقت وقالت : حااار !
طيح الكاسه من يده وركض للحمام ، شغل الماء البارد وانحنى يتركه يلامس شفايفه ، فتح فمه يتمضمض ويغسل وجهه كامل ، رفع عيونه وقال : يوه وش جاني ؟
طلع يركض راجع للسفرة ونطق : بخير بخير معليكم
سلطان : اسمع اجل ترا هذام بيجي للعزيمة
ابتسم وقال : احلف ؟
سلطان : والله كلمته وقال تم
سطّام : الله يحييّه والله حاسرتني روحتي بدونه
سلطان ابتسم وقال : يرجل ! اصلاً م طرى عليه يجي معنا
سطّام : افا ليه ؟
سلطان : م يخلي مطعمه
سطّام : الا كيف شغله ؟
سلطان : وش تقول ! عالمي والكل يمدح السي فود هناك
سطّام ابتسم وقال : موفق حبيب أخوه
سلطان : كان بيوظفني اصلاً بس من سمعت انك تبي مدير اعمال قلت والله م تفوتني
ضحك سطّام بخفه وقال : م طرى علي احط احد بدالك بس لو مطلق كان موجود سبقك
سلطان : كلنا ندري وش يعني مطلق لسطّام
حليمة : م عندكم دوام اليوم ؟
سطّام : انا بكون طول اليوم فالمرسم لحد يجيني
حليمة ضحكت وقالت : اوه شكل في هواجيسك شخص جديد ؟
سلطان : مطلق ؟
سطّام ابتسم وقال : انا فدا مطلق وأهله
مشى يقوم ويأخذ كاسه شاهي معه ، كان يقصدها ' بأهله ' ولا يدري شلون وصلت له علطول ، تمكنت منه بتصرفاتها الغريبة والغير مخططة ، تسوي كل شيء يخطر ببالها بدون اي خطط وهو يدري انها تحاسب نفسها عليه بعدين ، تصرفات طفلة هو كذا يشوفها ، ممكن انحرمت من شيء بس ماهو واضح عليها لما تعيد النظر فيها ، بتشوف انثى مستقلة قوية وثابته ثبات الجبال الراسية ولو ان خلفها قصص وسرٍ كبير ، جذابة في طريقة تحدثها معه وعباطتها وسخريتها جذابة ، في نظراتها ولون عيونها جذابة ، يعترف انها تمكنت وبالسهل منه عكس توقعاته بنفسه انه الشديد والصعّب القوي وبنفس اللحظة هو من سابع المستحيلات يضمن قلبه وتقلباته مرات يحب ومرات يكرهه ولا هو يضمن الظروف والوقت ابد كيف تعصف به وتوديه لأبعد مكان وكيف تهب مع النسناس والبراد ..
~ في بيت أحمد ، جِدة ~
صحت من نومها بإنزعاج من نور الشمس الحارة ، مشت للحمام وفتحت الدش ودخلت تأخذ شور ، انتهت منه وطلعت وبدأت جلستها بالماسكات والكريمات اللي تثبت لون التان اللي سوته على اليخت بالليلة الماضية ، رفعت عينها لجوالها اللي يدق ومشت تاخذه ونطقت : ايوه ؟
اسرار : بجلدك خلاص عاد !
عِقد ضحكت بخفه تبعد الجوال عنها وتفتحه سبيكر ونطقت بعصبية زائفه : اش تِبغي مني ؟ اتركيني فحالي !
اسرار صرخت بعصبية : ارسلي الموقع لا اهبدك ترا مرفوع ضغطي !!
فزّت عِقد ونطقت : زيتونه انتي في جِدة !؟
اسرار : لا في صنعاء ! ايه في جِدة ارسلي موقعك
ضحكت وقالت : يالله قد ايش احُبِك !
اسرار : واضح الحب ماشاءالله
ضحكت وضحكت اسرار معها وقالت : دحين ارسِلُه !
اسرار ابتسمت ابتسامة عريضة وقالت : يالله انتظرك
قفلت الجوال وفعلاً ماهي ثواني الا ووصلتها رسالة من عِقد باللوكيشن حقها ونطقت : وحشتني رسايلها الوسخة !
مشت تطلع من المواقف اللي أمام البحر وتتوجه للوكيشن الخاص بعِقد ، وصلت وضربت بوري ، وشوي وانفتح الباب وطلعت عِقد بـ سمَار بشرتها الغير معتاد ، وشعرها حيوي بشكل مميز يمكن لأنها بالحجاز وهي تنتمي له ، ركبت ونطقت : م وحشتِك صح ؟
لفّت اسرار وقالت : تعالي يحيوانه
ضحكوا من ضمّوا بعضهم ، شّدت عليها وقالت : اخ وحشتيني اوي !
اسرار ضحكت وقالت : م يوحشك غالي حُبي
نزلت اسرار من السيارة وفتحت الشنطة ، اخذت بيدها الباقة ومشت تركب ومدّتها لعِقد ونطقت : على اني م غلطت بس م هنى لي نومي وانتي زعلانه ويروح وصال ويجي غيره ! والله انك اغلى عندي منه وانك كل شيء بدنيتي وشلون اخليك زعلانه واروح ؟
ميّلت راسها وبكت بصمت ، واخذت الباقة ونطقت : بالله هدي كم حبة !
اسرار ابتسمت وقالت : م تغلى عليك لو انها عشرين مليون وردة ! انتي الورد يخجل بمقامك ويزهر اذا لامس يدينك
عِقد ابتسمت وقالت : ي بنت ! والله هدا مو كلامِك ! مين جالس يمليك ؟؟
اسرار ضحكت وقالت : مطلق
رفعت حواجبها وضحكت اسرار وقالت : ايوه ؟ شخبارك
عِقد : لحظة ! هو قاعد يسمعنا ؟
اسرار ابتسمت وقالت : ليه م تبينه يسمعنا ؟
عِقد عدلت جلستها وقالت : اسرار تستهبلي معايا ؟
اسرار ضحكت بصوت عالي وقالت : لا لا بس ساعدني شوي بالكلام قبل اقابلك
رجعت ظهرها على المرتبة ونطقت : ايوه اشوا
اسرار مشت تحرك وقالت : علومك ؟
عِقد : بنت حموتِك ترا !!
ضحكت وقالت : وش اسوي لهجتي كذا !
عِقد : لا كنتي تقولي اخبارك ودحين علومك ؟
اسرار : انا بسكت احسن
ضحكت عِقد وقالت : لا امانه حكيني عنك
اسرار : انا على حالي والله انتي وش صار معك ؟
عِقد : والله ولا حاجة تخطيت اخوكِ من هديك الليلة ودحين تخيلي لقيت الكرش المناسب !
اسرار ضحكت وقالت : العب يالبلاير !
عِقد : هدا اسمو سرعة تخطي وتجاوز شخص مو بلاير البلاير ي شطوره هو احُب ثلاثه بالوقت نفسو !
اسرار : اسلم ووينه الكرش ذا ؟
عِقد : اغار عليه م حوريك !
اسرار توسعت عيونها وقالت : امحق جيبي الورد
ضحكت بصوت عالي وقالت : امزح م معاي صورته شوفتوه امس عند البحر
اسرار : بترجعين نجَد ؟
عِقد : دوامي بيرجعني غصب
اسرار : كويس متى ؟
عِقد ضحكت وقالت : بكرا !
صرخت وقالت : الله لا يوفق عدوك !! وانا ماخذه أجازة !
عِقد : اماااانه ! كم عطوكي ؟
اسرار : م عطيتهم مدة بس قلت بأخذ اضطراري وعطوني
عِقد : خلاص اسمعي اليوم نسوي اللي نباه ونمشي الفجر ؟
اسرار : تم
ابتسمت وعلطول نطقت : مشينا باونس ؟
اسرار : فاضية يالبزر تلعبين ؟
عِقد : والله مرره ممتع !
اسرار : ابي البحر
عِقد : خلاص نركب اليخت ؟
اسرار : فكيني من اخوانك بس انا وانتي
عِقد ابتسمت ابتسامة عريضة وقالت : بتتحملي سواقتي ؟
اسرار : م فيه مباني ولا جدران فالبحر بتحمل
ضحكت وقالت : خلاص امشي للشاطيء اللي قدام الفيلا
رجعت اسرار تاخذ اليوتيرن للشاطيء ، وصلوا بعد مدة قصيرة ونزلوا ، لفّت تشوفها تكلم أحمد واخر شيء قالته له هو : تمام يعني تحت الحجر الصغير ؟
وشوي وسكرت ومشت لها وقالت : مشينا يبنت نجَد
اسرار ابتسمت وقالت : اخاويك يبنت الحجاز
نطقت عِقد بحُب وهي تتدور ع الرمال : وخاويتك على اهدابك ! وان ضاع مستقبلي ماني بسامح لك ، يكفيني الماضي اللي ضااااع بأسبابك
ضحكت اسرار وقالت : ي بنت الأوادم م معنا وقت امشي
عِقد : أتمنى انك تحسستي لأني اقصُد اخوكي !
ضحكت اسرار بصوت عالي ومشت عِقد تضحك معها ، ركبوا اليخت وسحبت عِقد المرساة ومشت تمسك المقود وتنطلق وبعد مدة توسطوا البحر ، طلعت بعد م طفت المحرك وقالت : انبسطي !
فصخت اسرار عبايتها ومسكت شعرها تحرره ، لفّت وقالت : جبت مشروبات طبيعية
عِقد جلست وقالت : جوي الفريش ! بتسبحي ؟
اسرار رفعت عيونها للبحر وقالت : انا مسبح حدي تبيني اموت ؟
عِقد : امانه م تعرفي ؟
اسرار : اعرف بس فالمسبح لأني اضمن القاع بس البحر محد يضمنه
عِقد : بنت البحر تضمنه معليكي لا تخافي انا معاكي
اسرار ابتسمت وقالت : هذا اللي زادني رعب اصلاً
ضحكت من ضربتها عِقد وقالت : اش تقصدي يمعفنه !
اسرار : م بسبح اخاف البحر
عِقد : ليش زيتونه ! تخيليه مسبح كبير طيب ؟
اسرار : فيه عوامة ؟
ضحكت عِقد بصوت عالي وقالت : فيه
اسرار : خلاص توكلنا على خالق البحر والله يستر من بنت البحر
ابتسمت تشرب عصيرها وقالت : الحين حر ماينفع بنسبح ع المغرب
شهقت اسرار وقالت : حرام بالله م اطب اجل ! يمه صاحية انتي تبيني اسبح فالظلام !!
عِقد : طيب ؟ م حيطلع حاجه بلا دلع !
اسرار : العصر طيب ؟
عِقد : الساعة خمسة تمام ؟
اسرار : طيب
صدّت تناظر البحر من كل اتجاه يحّفهم ، بأياديهم كاساتهم ، ابتسمت من قربته من كاسها وتصوروا سوا ..
~ فالديرة ~
صحى من نومه وزفر بقرف من الحر ، مشى مغمض عين وفاتح الثانية ، ورتب فراشه ومشى يحطه فالمخزن ورجع يرتب المجلس ويفتح شبابيكه ، فصخ ثوبه وفنيلته ومشى يفتح باب الحمام ويدخله ، فتح الدش ودخل تحته وشهق من احرق جلده وضرب الجدار بحسرة ، رفع يده من حسّ بالألم وزفر بتعب وقال : متى بيزين الحظ وبتزين الحياة ؟
طلع يلفّ منشفته على خصره ودخل داخل البيت ، هو من عهد نفسه وهو م يدخل البيت لأجل تأخذ ظبيه راحتها بعيد عنه وعن ضاحي اللي ينام فالمقلط ، ضرب الباب وقال : ظبيه
طلعت من المطبخ ونطقت : اوف اول مره اشوفك كذا ! ماشاءالله طلعت معضل
ابتسم مطلق وقال : اسمعي بدخل اخذ دش عادي ؟
ظبيه ابتسمت وقالت : يعمري ي مطلق ايه عادي هذا بيتك ولا ناسي ؟
مشى وهو يناظر ممشاه ، يخجل منها ويخجل انه يكون سبب احراج لها ويكره انه يكون ثقيل عليها ، رفع راسه يتأمل عيونها من لمست شعره وقالت : غرق ؟
مطلق مسك كتوفها يثبتها وقال : حرق جلدي موية المجلس
ظبيه ابتسمت بحزن ودموعها تغورقت وقالت : جعله بعمري
مطلق باس راسها بقوة وقال : بعمرك العافية
ضمّته وابتسم يبوس كتفها وقال : م هنا خلاف ي ظبيه
ظبيه مسحت دموعها وقالت : م ابي الشوك يمسك !
ضحك وقال : افا م يهزمني وانا اخوك
مشى يدخل حمامها وابتسم من شاف أنواع الشامبوات والصوابين ، هي بنت ديرة بس بمكافأة الجامعة ودلع مطلق لها م بخلت على نفسها بشيء ، وبرزت بجمال أُمها منيرة وعيونها العسلية وشعرها الحرير اللي يلامس اخر ظهرها ، جميلة ويزهاها الجمال ومن حق أخوانها يغتّرون بجمالها ، ابتسم وقال تحت انفاسه : لا عدمت الظبي ولا خليت من جماله
دخل يتروش بسرعة وطلع بدون م تحسّ فيه ، فتح الدولاب اللي بالمخزن وسحب احد ثيابه يلبسه ، وطلع وابتسم من شافها حاطه الجمر والعّود يعتليه ويزين ريحة المجلس بأحتراقه ، مشى يتبخر ولبس شماغه وبخره معه ، مشى للمقلط ونطق : ضويّحي !
فزّ ضاحي من نومته ونطق : لبيه يابه !
ابتسم مطلق وقال : جعله فالجنة
قام يركض وباس راس مطلق وقال : لبيه ي مطلق ؟
مطلق : رتب فراشك وتعال الغداء
ضاحي حكّ راسه وضحك وقال : كم قد الساعة ؟
مطلق : قد حن عصر امش
مشى مطلق ودخل ضاحي يرتب فراشه ، طلع من البيت يشوف كل اهله في بيوتهم من شمس الديرة ، سحب مسبحته وصار يلعب بها بين يدينه ، مشى لمجلس جده المفتوح اربع وعشرين ساعة للضيفان وللجماعة ، دخل ونطق : سلام عليك يبو محمد
أبو محمد ابتسم ورفع يده يأشر لمطلق ، تقدم يبوس راسه وقال : استريح جعلني قبلك
غمض عيونه بقوة بمعنى الأمتنان وقال : وش وقعك ؟ طيب ؟
هز أبو محمد راسه بالإيجاب وابتسم مطلق وقال : حد جاك اليوم ؟
هز راسه بنعم وقال مطلق : عيالك ؟
هز راسه بالنفي وكمل مطلق يقول : احفادك ؟
هز راسه بنعم وقال مطلق : بنيّات ولا صبيان ؟
أبو محمد رفع سبابته بمعنى الأولى وقال : م خبري حد البنات يجون هنا ؟ منهي !
أبو محمد آشر على عيون مطلق ، توسعت عيونه بصدمة وقال : ظبيه !!
خمن أنها أخته لإنه يشوفها عيونه ، لكن ارتخى وطفت نيران غيرته من هز جده راسه بالنفي ورجع يأشر على عدسة عيونه ، جلس ثواني ونطق : عيوني ؟ نفس لونها تقصد
هز راسه بنعم وقال مطلق بأبتسامة : مابه الا انا وبنت محمد
هز أبو محمد راسه بنعم وقال مطلق : بيض الله وجهها
مسح أبو محمد على صدره بمعنى الحُب ، وابتسم مطلق يبوس راسه وقال : حتى هي تحبك من حُبك لأبوها الله يرحمه ويغفر له
قطرت دموع أبو محمد وانحنى مطلق يبوس كفته وقال : حسبي الله على كل ظالم صوتك م نسمعه لنا تسع عشر عام !! لكن ربي يبو محمد يسمع صوتك ادع واشك لخالقك انا ماشي ان بغيت شيء اضغط الزر وبينبهني
ابتسم بهدوء وهز راسه بنعم ومشى مطلق يطلع من عنده ، مطلق حاط بسيارته جهاز انذار والزر الخاص فيه مع أبو محمد ولحد يدري عنه الا هو ، يدري لو يعرف عنه أبو بجاد بيكسره على راسه ويدري انه اكثر واحد ينتظر الشيبه يموت ..
~ في عزبة منّير ، العشاء ~
سلم من انتهى من صلاته وقام ينفض سجادته ، رتبها وحطها بسيارته ورجع لمحله ، انسدح بهدوء ورفع عيونه بصدمة من شاف البعير وسرعان م دعس كتفه الأيسر وصرخ منّير بألم وصار يصارع ، والبعير هايج ويرفع نفسه ويرفس بكل قوته الأرض ومنّير ، كان يصارخ ويصارع بصعوبة وألم مُميت ، شهق وسحب ذراعه كاملة مكسورة وصرخ يركض والبعير يركض وراه بشكل مرعب ، ركب سيارته وانطلق علطول يبتعد عن العزبة ، رفع جواله واتصل على مطلق ووصله صوته وهو يقول : مرحبا
منّير : تكفى ي مطلق تكفى وانا عمك
فزّ مطلق وفزّوا العيال معه من نطق : وش العلم ؟!
منّير اخذ نفس وقال : الحق عمك تكفى.. تكفى ي مطلق
تقفل الخط ونطق مطلق : أخو سطّام !! قوموا يرجال منّير فيه شيء
صرخ وصال بصدمة : هااه ؟ من ؟؟
ضاحي نطق بخفه دمه المعتادة : ابد والله ميحد حمد
ضربه مطلق وقال : ماهو بوقتك هات مفتاح الشاص بسرعة
مشوا العيال يرجعون لأهلهم بدون مبالاة عكس مطلق وضاحي ووصال ، ركبوا الشاص وحرك مطلق يمشي للعزبة ، لفّ وصال وقال : وش جاه ؟ علّمك وش قالك ؟
مطلق : مدري تكفاني وقفل وتكفى تهز الرجال
ضاحي ابتسم وقال : ومطلق رجال !
لفّ ضاحي لوصال وقال : بتعلم اختك ؟
مطلق ضحك بسخرية وقال : وش دخلها ماهو بأبوها
وصال : يعتبر ابوها
مطلق : عيشتوا بنت محمد فالحياة الزائفة ذي كلها شوفوا لا طلعت الحقيقة وش بيصير اول من بينفر منها انتوا ! تحسبونه عار المصيبة بنت اخوه ! ووش سوا منّير بن حمد ؟ بغى ينتحر اول م رموها عليه عشان عياله قليل وعفيفة م تنجب بعدك احد ! وقفوا ذا الفلم كله
وصال صرخ بعصبية : وش تبينا نسوي استاذ مطلق ؟؟ نعلمها بالحقيقة ونقولها ما حن بأهلك ؟ هذا اللي تبيه يصير
مطلق نطق بحدة : وين امها ؟ ولا هددوها بتال ومنّير وانتهت السالفة ! اجل الصح بعيونك هو اني اخطف بنتها واهددها بأني اقتلها عشانها اجنبية وماهي من اهلنا !! وصار ذا كله في ريم وهي حداد بثالث يوم !! مستوعب دخلوا عليها الشياطين وقالوا لها الكلام اللي متأكد انها ماتت من سمعته وتركت بنتها مجبورة لأجل سلامتها من نفس الشياطين
وصال : اللي صار صار ليه ترجع تعيد فالسالفة بعيوننا اسرار بنت منّير وتنسب له خلاص..
قاطع مطلق كلامه وقال : تعقب تنسب لمحمد بن حمد ! وريم بنت خالد
صدّ وصال يستغفر بغضّب ، ضاحي لفّ لمطلق وقال : تعرف وش صار لعمي محمد ؟
مطلق هز راسه بنفي وقال : لا بس اللي متأكد منه انه بليلة فقدنا ثلاث رجال ! محمد ومشبب وحمد
قطّب ضاحي حواجبه وقال : حمد !
مطلق مسح وجهه وشنبه من نطق بحدة : ي نعى وجهي ي حمد طريح فراش له تسع عشر عام ! الله يبلاه بمصيبة اللي كان سبب في حالته
ضاحي رفع عيونه للطريق وقال : سيارة عمي
وقف مطلق وركضوا كلهم للسيارة ، فتحوا الباب وكان الدم مغطي جانبه الأيسر ، رفع ثوبه مطلق وشاف عظام كتفه وعضّ على طرف ثوبه وركض فيه للسيارة وانطلقوا للمستشفى ..
~ في بيت سطّام ، المرسم ~
جالس على كرسيه ويرسم بهدوء ، رفع عيونه للوحة وقال بهمس : منزمان عن مطلق
سحب جواله يتصل عليه ووصله صوته وهو يقول : مرحبا يدهر قلبي ورجعانه
ضحك سطّام ونطق : والله ان صوتك حياة يرجل
مطلق مسح بشماغه شعره وقال : لبى كبدك وش بغيت ؟
سطّام : اتطمن
مطلق : ابد فالمستشفى
فزّ سطّام ونطق بحدة : سلامتك وش اسم المستشفى جاي
مطلق ابتسم وقال : خيرك سابقك يبو وفاء بس منّير تمشكل مع البعير وفاز البعير
ضحك سطّام ونطق : لا تستهبل
مطلق : حرام اني صادق
سطّام ابتسم وقال : اجل جايكم لسلامته
مطلق : يشيخ ليتنا افتكينا منه شيطنة اعوذ بالله
سطّام : لا حول ولا قوة الا بالله ! ابو من هو ؟
مطلق : الحرمة وصال
سطّام ابتسم وقال : لو اني م اذكر وصال كان حسبته بنت
مطلق ابتسم وقال : كان عندهم بعد نظر يوم سموه
ضحك بصوت عالي وضحك مطلق بهدوء ، مسح عيونه وقال : الله يقطعك ي مطيليق اسمع شرايك تجيني ؟
مطلق : يمكن اقدر بكره لأن دوام الظبي بكره وعندكم
سطّام : حلو يعني تمر قهوة عصر ؟
مطلق : هو اني اذبحك ؟ دوامها صباح نتقهوى صباح شيبان حنا !
سطّام ابتسم وقال : المعذرة يالمشخصن
مطلق : سر امها بس ودعتك الله
سكر وضحك سطّام ونطق : طينتهم وحدة
انحنى يميّل وبدأ يهوجس ، ابتسم من جاته فكرة وهي ان اسرار اخت مطلق بحكم عيونهم ، وصار يفكر ينزل لديارهم لأجل يشوف اخت مطلق ببيت مطلق ، ابتسم وقال : الاكيد انها اخته قابلتها عند المدخل وكانت فالمجلس بعد ! اجل ان تمت خطبتها منه
ضحك بشكل لطيف ، هو طاح م يدري في مين ، م يدري بأن ظبيه ممكن تعترض طريقه لو تقدم وقال لمطلق ابي اختك ، هو طاح لأسرار ولا يدري بالوحل اللي تعيش فيه ، سرها الكبير ان اهلها قتلة وخاطفين لبعضهم وكيدهم في انفسهم وكل شيء مخفي من سنين خوفًا من بتال وسلطة بتال ، هو من طاح الشيبه حمد وبتال انتقل من ولي عهد لملك وحاكم ، صار الامر الناهي عندهم ولحد يتعدى كلمته ، ومنّير ترك كل شيء وانشغل بحلاله من سنين وصار بتال الوحيد صاحب السلطة ..
~ في اليخت ~
منسدحين بهدوء جانب بعضهم ، يتأملون القمر بكل هدوء وهمست عِقد : احسك زعلانه
اسرار : مدري احس فيه شيء صاير
عِقد : وين ؟
اسرار : فالبيت
عِقد قامت تجلس ونطقت : اذكري الله مافي حاجة ان شاءالله
اسرار : والله مو متطمنة نرجع ابي اكلم أمي
عِقد : ولا يهمك بس م تقلقي
اسرار هزت راسها بنعم ومشت عِقد باليخت ترجع للشاطئ ، وصلوا واتصلت على عفيفة ووصلها صوتها وهي تقول : ارحبي
اسرار ابتسمت وابعدت عن عِقد ونطقت : البقى ي أمي فيه شيء صاير ؟
عفيفة : لا يبنيتي ليه ؟
اسرار : لا بس بغيت اتطمن
عفيفة ابتسمت وقالت : يبعد روحي طيبين وبخير ونسلم عليك
اسرار ابتسمت وقالت : الله يسلمكم
سكرت وابعدت الجوال واتصلت على مطلق وعطاها مشغول ، زفرت برعب وقالت : يالله يارب كلهم بخير
نزلت جوالها وقالت : عِقدي بروح اخذ ثلج عشان باقي العصيرات والايسكريم واجيك اذا دق جوالي قولي لي
عِقد ابتسمت : يارب وصال عشان اشرشحوه !
ضحكت اسرار تمشي للدكان القريب ، وانسدحت عِقد وسرعان م رفعت راسها من حسّت بشخص يلامس اصابع رجولها ، صرخت وقالت : مييين !!
رفع جمال راسه وضحك وقال : خوافه اشبك تصارخي !
عِقد توسعت عيونها ورفعت المنشفة على راسها وقالت : م شُفتك عشان كدا صرّخت !
جمال : سويتي تان ؟
هزت راسها بنعم وقالت : بس حبكي مو عاجبني
ابتسم وقال : والله مره خيال يزهاكي
ابتسمت ولفّت لجوال اسرار اللي دق وقالت : بس لحظة
ردت علطول بدون م تشوف الاسم وسمعت صوته وهو يقول : مرحبا دقيتي علي ؟
شّدت على الجوال من ميزت صوته ونطقت : ايوه اكيد اتصلت فيك اسرار
توسعت عيونه بصدمة وقال : هاه !
عِقد : اش م سمعتني ؟ اقولك انتظر ثواني وهيّا حتجي تكلمك
مطلق قام وقال : أخو سطّام أخوه !
عِقد توسعت عيونها وقالت : اوف انت تستعبط ولا كيف !
مطلق : انتي من انتي ؟
عِقد تكتفت وقالت : م يخُصك !
مطلق : عطي بنت محمد جوالها اعجلي
عِقد ابعدت الجوال وقالت بصوت هامس : اف يقرف
رجعت تمشي وم شافت جمال ونطقت : حسافه راح جمال !
شّد على جواله ونطق : وش هو !!
رفعت الجوال وقالت : اش قولت ترا مو سامعتك
مطلق : جمال من ي بنت ! جايين مع عيال ؟
عِقد : ايوه ؟ شكلك م استوعب كلامي لسى !! غيرتك على خواتك م تجي عندي وتبرزها على راسي ماني فايقة والله
مطلق احتدت نبرته ونطق بغضّب : اخو العيال شكلك معرفتي من هو مطلق !
عِقد : لا للأسف ولا لي الشرف
سكرت بوجهه وزفرت بقرف ، شافت اسرار جايه ونطقت : اخيرًا ! امشي نرجع ورانا عفش وطياره
اسرار ابتسمت وقالت : تمام فيه احد دق ؟
م ردت عِقد ومشت ولحقتها اسرار راجعين للفيلا ..
~ فالديرة , بيت أبو بجاد بعد الحادثة بأسبوع ~
أكبر بيوت آل يزيد ، بيت محمد سابقًا وبتال حاليًا ، الأنوار تضيء الحته كلها ، واصوات الرجال فالمجالس الضخمة وتحمدهم بسلامة منّير ، عشاء كبير وذابحين بكرّه وثلاث خرفان كرامة له ، طلع مطلق من المجلس من حسّ انه ضاقت به الوسيعة ، سحّب بوكيت دخانه ومشى يجلس بعيد ويشعل بصدره حرايق ، لفّ بعيونه من شاف سطّام طالع من المجلس وابتسم يناديه ومشى له وقال : ماشاءالله ماشاءالله للحين م اقلعت ؟
مطلق : منهو ؟ وين اطير ؟
ضحك سطّام يجلس جنبه وقال : الدخان م تركته
مطلق : زوجتي م اقوى بدونها
سطّام : اذا على كذا كم زوجة عندك ؟
مطلق : ثلاث
ابتسم سطّام ونطق : منهم ؟
مطلق سحب مسدسه من محزمه وقال : والله لا اثور فيك وش تبي بحريمي !
ضحك سطّام وضحك مطلق معه وقال : ابد والله بكرتي مكحولة هي الأولى واليابانيه الثانية والدخان الثالثة
سطّام : وش اليابانيه ؟
ضحك مطلق بصوت عالي وطلع مفتاح الددسن من جيبه وانفجر سطّام يضحك معه ، مشى بجاد لهم وقال : مطلق ابوي يبيك
مطلق مسح وجهه وشنبه ورمى زقارته وقال : وش يبغى بتال ؟ هو م وده يعتق مطلق ؟
بجاد : امش اخلص
استحقر بجاد سطّام ومشى يعدي من جانبه ، ابتسم سطّام على جنب وقال : ماشاءالله يالتربية
مطلق ابتسم وقال : امسحها بوجهي لبى كبدك وادخل لا تخلي اخوانك لحالهم
سطّام : يعقب محشوم وجهك من هالأشكال واخواني عند سيارتي بروح لهم
طلع أبو بجاد وصرخ بسخرية: متى ودك تعزمنا يولد نهيّان ؟
مطلق همس : صبرك يارب
ضحك سطّام وقال : بكره مستعجل على رزقك ؟
أبو بجاد ضحك يرجع للمجلس ولحقه مطلق اللي مشى لهم ومشى سطّام معاكس اتجاهه يبتعد عن البيت ، وصل لورا بيت مطلق ورفع راسه من شاف أخوانه عند سيارته ولفّ لجهة احد البيوت وشافها ، ابتسم وسحب كراسته الصغيرة وقلم الرصاص ومثل م توقع نزلت بدون نقابها وطرحتها على كتوفها ، كانت مستعجلة تشيل الأغراض من وصال ، بس سطّام دقيق وبس لو يأخذ ثواني يحفظ تفاصيل الشخص ولو انهم بليلة سوداء بقمر مُعتم ، ابتسم من اختفت من أمامه وبدأ يرسمها بشكل دقيق ومخيف نوعًا ما لأنه نسخها وكأنها جالسه قدامه لساعات طويلة بدون حراك ، كان مُغرم بملامحها وبشكل جنوني ، يرسم ومنحني ووقفت اصابعه عن الرسم من حسّ بظل يغطيه من الكُبس اللي بأعلى البيت ، رفع راسه بهدوء وشاف انثى واقفة على راسه ونطقت : وش تسوي عند مدخل الحريم ؟
توسعت عيونه من استوعب نفسه وطلع من هواجيسه باللي دخلت احد البيوت مستعجلة ، صرخ احدهم ونادا : منيرة !
ابتسمت ترفع لثامها على وجهها وتنطق : لبيه
دخلت من جنبه بسرعتها لأجل يستنشق ريحة كانت تظُنها منيرة فاتنة ، بس سطّام سحب شماغه بتقرف من ريحة الطبخ اللي عالقة بملابسها ومشى لحّد م وصل لسيارته ، لفّ من نطق هذام : وش تسوي ؟
سطّام لفّ لهم وقال : جيت اناديكم تعالوا نرجع للمجلس
سلمان : م ودكم نسري ؟
سلطان : والله ودنا بس عيب بحق مطلق
سطّام : بنتعشى ونمشي
مشوا الأربعة راجعين للمجلس ، لفّ بهدوء وهمس : يده سالمة ؟
سلطان ابتسم وقال : ابشرك قطع خفيف بس سلمان يكبرها شوي
سطّام ابتسم من تذكر طفولته مع سلمان وكيف كان اكبر درامي عرفه سطّام ، مسح طرف ثوبه وقال : زين زين
كانوا رايحين لسيارة سطّام لأجل يد سلمان اللي انقطعت من سكين الفواكه ، وم حضروا الا عشان عزيمة سطّام لمطلق وأهله بكره في بيته ..
~ بيت منّير ~
وقفت تشوف الرجال فالحوش منتشرين ، لمحت قفى ظهره ميزته بشماغه البُني المرتب وساعته اللي تبرق بيده ، خاتمه وجزمته ، مميز بين اخوانه توسعت عيونها من عرفت انه خوي مطلق والأكيد ان اللي معه اهله ، مشت تصّد من شافته بيلف ودخلت تركض وشهقت تبكي من شافت عفيفة تبكي وقالت : يمه !
بكت عفيفة زيادة من بكاء اسرار وقالت : يروح امك وابوك م حصل شيء يفداك منّير بروحه وتدرين بس لا توجعيني وتوجعينه بالبكي
غطت وجهها من حسّت بحرارته دليل احمراره ، رفعت وجهها وشافت منيرة داخله بكراتين العصير ، مسحت عيونها وسمعتهم يتهامسون تسنيم ونهال ووداد ومنيرة اللي جلست معهم ونطقت بصوت واضح : تبكي من اسبوع عليه وكأنه ابوها !
لوهلة حسّت الدنيا ضبابية بعيونها ، م سمعت شيء بعد كلمة منيرة ومشت تطلع لغرفتها ، فتحت شباكها من حسّت بجمر صدرها واخذت نفس عميق وطاحت تبكي عند الشباك ، تبكي من قهرها وتبكي لأنها معاد هي اسرار الصغيرة صارت الأحداث ترتبط بعقلها ولا ودها تصدق شيء في أهلها أمانها ومكانها الدافئ بالأيام القاسية ، مسحت دموعها بعنّف وقالت : انتي اسرار بنت منّير يعني عفيفة امك ومنّير ابوك ووصال اخوك انتهى !!
رفعت عيونها للي واقف عند باب المجلس يتأملها ، صدّت بقرف وهمست : وبجاد ذا ماعنده حياة غيري ؟ كل م شفته حصلته يتأمل جعل عيونه تبقق !
مشت لحمامها وغسلت وجهها ومشت تنزل ، شافت ظبيه جالسة ونهال جنبها تسولف معها ، جلست جنبهم وقالت ظبيه : يهنيك سلامة ابوك
نهال ابتسمت بسخرية وقالت : ايه صح يهنيك سلامته
نطقت اسرار وهي تتأمل صحن التمر : الله يسلمكم
لفّت عفيفة ونطقت : اسرار تعالي شوفي ابوك
قامت بكل سرعتها ، له اسبوع فالمستشفى وطلع اليوم ، ومن شافته بالجبيرة بكت ، ابتسم بألم وقال : لحد يوجعني !
مشت تركض له تضمّه وابتسم يحاوطها وقال : انا بخير ليه الدموع ؟ تحسبوني مت !
مشى أبو بجاد وسحبها بكل قوته ودفعها على الباب وقال : الرجال برا هنا م تستحين !!؟
شهقت من ضرب ظهرها فالباب ورفعت عيونها بصدمة لمنّير اللي صدّ يمشي ، صرخ أبو بجاد بغضّب : م عندنا حريم يطلعون بالشكل ذا وان كأنك م تربيتي م عندي مشكلة اعيد تربيتك !
كانت مصدومة ولأول مره تتعامل ، صح صار لها اسبوع ملاحظه تقلباتهم بس توقعت عشان السفرة حقتها ويمكن بجاد نشر بهارات واجد بغيابها ، هي شافته وقت تبعها للمطار ، بس م توقعت يوصل التعامل بهالشكل ومحد يدافع عنها ، هي شافت وصال ومنّير كيف مشوا يرجعون ولحد وقف بوجه بتال ، احترقت عيونها وهي تناظر فيه بحدة وبقوة عين ، صرخ بوجهها وقال : عينك تنزل !!
رفضت أوامره وظلت بمكانها واقفه وشعرها كاشف وصدرها واضح ويزينه عقد الذهب بنحرها ، جلابيتها المخمل عليها ويزينها الذهب بيدينها وأذانيها ، احترقت كبده من منظرها يشوف نظرات محمد عليها ويشوف شامة ريم تتوسد خدها قريب من مبسمها ، هو يذكر تفاصيل ريم لأنه دخل عليها هو ومنّير وقت كانت بحداد وفاة محمد ، وبهذيك الليلة بكل بشاعة وصف انفتن بملامح حرم أخوه ، وعرف بهذيك الليلة ان ابسط حقوق محمد يناديها شيخة الشيخات وسيدة على الحريم كلهم ، بس من غيضه سحب التراب بأنسانية معدومة ورماه بوجهها ، شهقت من دخل بعيونها ودفعها برجله يسكر الباب بكل قوته وكانت تسمعه يسّب ، كانت تشاهق وتبكي ومحد قام لها يشوفها ويداري خاطرها ، م تدري ليه صاروا معادين فجأة ولا تدري وش غير أهلها بيوم وليلة ، حسّت بيد رقيقة على كتفها ورفعت عيونها أمل انها تشوف عفيفة لكن انصدمت من شافت ظبيه تسمي عليها وتمسح على راسها ، عيونها تحرقها من الرمال والحجاره الصغيرة ، حمراء ودموعها م وقفت ، صرخت تبكي وضمّت ظبيه بكل قوتها ونطقت : بسم الله على قلبك تعالي ي حبيبة قلبي
مسكتها تطلعها معها من ورا البيت ، غطتها بجلالها ومشوا تحت جلال واحد ، ركض ضاحي لهم وقال : عسى م شر ؟
ظبيه نطقت بغضّب : بتال الكلب ضربها
توسعت عيونه بصدمة وقال : ووصال وينه !!
اسرار نطقت ببكي : يحسرتي ان اخوي بينهم ولا سوا شيء وحسايف ان ابوي قدامي ولا حرك ساكن
صرخ بعصبية وقال : تبكين لعنبو لحية تبكيك !!!
مشى يركض للمجلس ودخل بكل قوته وصرخ على أبو بجاد وقال : م عاش من يبكيها وعيال عمها حييّن !
فزّوا الرجال كلهم ، وانطلق مطلق ونطق : من هي العن جدك !؟
ضاحي نطق بحدة : بنت محمد !
لفّ مطلق راسه وناظر عيون بتال اللي يضحك ومشى له ومسكه مع ياقته يرفعه وقال : ملفك في يدي ي بتال امسك ارضك لا اشهد عليك واحرضها ترفع قضية وهي اللي تمسكها ولا ناسي انها مدعية !! والله لأجرجرك فالسجون حرام معاد تعرف ارضك من سماك فاهم ؟ بنت محمد لعاد تعرضها وهي في وجهي منك وتعرف وش يصير للي يتعدى مطلق
ضحك بتال يهجد عياله اللي فزعوا له وقال : اعرس بها دامها بوجهك
مطلق ابتسم وقال :تحسّب بوقف كذا ؟ عادي وين المشكلة بنت عمي وانا اولى بها
شّد بجاد على قبضته وقال : يبه العنوا ابليس اللي راكبكم خلاص !
ضحك مطلق وهمس بأذن بتال : صح لازم قبل اعرس بها تعرف ان بكّرك ميتٍ على خطاها فالقاع
مشى ولفّ أبو بجاد بحدة على بجاد اللي يناظره بصدمة من عرف وش همس مطلق في اذنه ، مشى له وقال : صدق ذا الحكي !؟
بجاد نزل راسه ومسك كتفه بتال ونطق : صدق !!
هز راسه بنعم وهو يناظر رجوله ، حسّ ان الدنيا تلف فيه من شاف بكّره يهز راسه بالإيجاب ، صر ع اسنانه ونطق بحدة وهمس : هييّن ي بجاد والله لا اكرهك فيني قبل اكرهك في بنت محمد
رفع راسه وهمس : تكفى يبه لا يمسَها شيء مني تكفى
دفعه بحدة ومشى من جنبه ، مسح وجهه ومشى يركض ورا ابوه ..
'
انتهى البارت ادعموني بنجمة وكومنت عشان اتحفز اكملكم 🩵
" وحشتووووني ، البارت طويييل جدًا جدًا يعني عوضنا القطعة عطوها حقها يحباااااني ولا تنسون النجمة 😢 "