الهَوى اسّرار وهَواجِيس واحّلام ... والىَ متّى واحّلام وصِلك بعّيده

البارت السادس

'
جمّد وجهها بصدمة بس م وضحت واجد ونطقت : ولا شيء لوجه الله قبلت فيها
ضحك بسخرية وقال : اجل ليه ابارك ؟
اسرار : اذا فالسالفة فلوس بتبارك ؟ حلو نظامك
نطق بحدة صوته وقال : احترمي نفسك يبنت !
اسرار ضحكت وقالت : لحظة ؟ وش سويت !
مشت تطلع لغرفتها ولفّت عفيفة وقالت : عشان بتال تمرد بترجع لشخصيتك القديمة ؟!
منّير : انا م يصحيني الا اخوي بتال ! اجل اعيشها معي واخرتها م ترد الجميل ؟؟
عفيفة وقفت بصدمة وقالت : تراها بنتي ولو تسوون المستحيل م بعدتوها مني !
منّير ضحك وقال : دخلتي بالجو صدق ؟
عفيفة نطقت بعصبية : اذا رضعت مني مثل م رضع وصال ولدي وولدك تصير بنتي وبنتك وغصب عن أطول شارب فيكم تسمع !!
منّير رفع حاجبة وقال : بنشوف اذا م هربت هي منك م أكون انا منّير
رمى الجرايد على وجهها وطلع بغضّب وقفل الباب وراه بقوة ، شهقت ونزلت دموعها بحرقة على اسرار اللي سمعت كل شيء من عند الدرج وتوضح لها ماضيها المجهول ، كانت تبكي وتشاهق بس بدون صوت كاتمة نفسها بيدينها ، طلعت تركض ودخلت غرفتها ودفنت وجهها بوسادتها تصارخ وتضرب بفراشها تبكي بحرقة دم ، هي عاشت معهم حياتها كلها ولا عمرها بيوم حسّت بالغربة بس بيوم وليلة قرروا يرجعون لشخصياتهم المخفية ، داخت من كثر بكائها وطاحت نايمه ..
~ فالمحكمة الجنائية العليا ~
دخلوا ومشوا يأخذون موعد لكن بحكم سمعتهم وكنيتهم دخلوا علطول ، مشى سطّام وابتسم يصافح نافل ونطق : يالله حيّيهم عيال نهيّان
جلسوا ونطقوا : الله يبقيك
نافل : كيف اقدر اساعدكم اليوم وخطاكم الشر مقدمًا
سطّام : الشر م يجيك ابد جيتك ابلغك بلوحة مسروقة من لوحاتي
نافل عضّ طرف إبهامه ونطق : امم.. حلو بلغت الشرطة ؟
هز سطّام راسه بنفي وكمل نافل : اجل نبلغهم ولا تشيل هم فيه احد شاك فيه ؟
رفع راسه وقال : ايه بقولك الأسم بس للحين مدري
نافل : اسلم
سطّام : اسرار بنت محمد آل يزيد
نافل سجل اسمها عنده ونطق : بس ؟
سطّام : ايه ايه والظاهر أنها هي لأن محد براسي غيرها
نافل : طيب وش تقرب لك ؟ لأن نعرف انك ترسم داخل بيتك
سطّام مسح شاربه وقال : م تمسّني بصلة ولا بدم
نافل : خلاص أجل بنتحرى ونشوف ومتى م شكيتوا بأحد غيرها قولوا لي لا تخلوني بدون علم
سطّام : ابد معليك
نافل : ايه سطّام بيتك فيه كاميرات مراقبة ؟
هز سطّام راسه بنعم وقال : بس عند البوابات والمداخل والمخارج
نافل ابتسم وقال : خلاص اجل نجيبه يعني نجيبه سهالات لا تشيل هم
سلطان ابتسم وكمل الشطر يقول : لو كان تحت الحراسة
ضحكوا وقال سطّام : بشيك لك عليها وبرد لك خبر
نافل : تمام وخذ راحتك
طلعوا ونطق سلطان بحدة : والله م اعديها يالخفيف ! حستني وحست عمرك !! م فيه غيرها اللي مشكوك بأمرها ليه التردد ؟
سطّام : وتحسبني بالسهولة عطيته أسمها بس عطيته وانا عارف اني بضيعها وبتطير من يدي
سلطان بغضّب نطق : وش هي حمامة ؟ روقنا لا احوسك
ابتسم سطّام وقال : م بتفهمني والله
مسح سلطان وجهه وشنبه واستغفر وقال : امش امش
طلعوا من المحكمة ووقف سطّام بصدمة من شاف الشرطة يحاصرون سيارته ، تقدم مع سلطان ونطق : عسى م شر ؟
الضابط محمود : في أمر القاء القبض عليك ، أنت سطّام بن نهيّان ؟
هز سطّام راسه بنعم وكمل الضابط : بأتهام أنثى بأوائل العشرينات من عمرها
سطّام توسعت عيونه بصدمة وقال : لحظة نفهم ! اتهمتها بشنو ؟
سلطان : يرجال غلطانة الحين !
الضابط محمود : ماهنا خلاف فالمحكمة تقولها انها غلطانة
مسكوا سطّام وكلبشوه ، وقف بصدمة يستسلم لهم ونطق : بتقول لي ولا شنو ؟ اتهمناها بأيش ؟
الضابط محمود : سرقة لوحة تُقدر بـسبع ملايين يورو
سطّام : طيب هي فعلاً سرقتني ! ولا ليه بكون عند المحكمة ؟
الضابط محمود : م عندي علم بس بتجي معي للقسم
لفّ لسلطان وقال : محلولة ي سليّط لا تنسى أندريه الحين تعطيه الملف حق القضية
سلطان بتوتر اردف : لا تشيل هم انت بعد محلولة بوكل محامي ونشوف وش قصة اسرار
شالوه وأخذ سلطان مفتاح السيارة ، ركب السيارة وشاف الساعة سبعة صباحًا ، مشى للشركة ماوده يلتهي بهالسالفه وينسى من أندريه ، توجه للشركة علطول ..
~ شركة 𝐻𝒶𝒿𝑒𝓈𝒮𝓊𝓁𝓉𝒶𝓃 ~
دخل سيارته بالمواقف ونزل منها ، لفّ يشوفها عند المصعد وركض علطول ينطق : لحظة !
لفّت ظبيه للي جايها يركض وشهقت من ضربت يده برأسها ، هو م انتبه انها قريبة من الباب حق المصعد وكان يبي يوقفه قبل يسكر ، دخل وقال : اسف والله اسف م قصدت
ظبيه ابتسمت بهدوء وقالت : م حصل شيء
ضبط ثوبه وشكله وتقدم يضغط الطابق الثلاثين ، توسعت عيونها من استوعبت انه سلطان اللي قابلته قبل يوم ببيته ، لفّت تشوفه مشغول بالتابليت اللي بيده ، صدّت برعب وم صدقت يفتح الباب للطابق العاشر ونزلت علطول من المصعد ، تسكر الباب وطلع سلطان للطابق الثلاثين ، طابق نائب المدير التنفيذي والمدير التنفيذي ، دخل وابتسم يشوف مشهور وقال : صباح الخير أبو ماجد
مشهور ضحك وقال : انت الخير
ابتسم يتقدم يسلم عليه وقال : وش الجدول اليوم ؟
مشهور : ابد حرقنا بالأتصالات مدير اعمال أندريه
سلطان : محلولة بإذن الله
مشهور : وش السالفة اصلاً ؟
سلطان : انزرفت اللوحة
شهق مشهور وقال : اتق الله !
سلطان رفع أغراضه ينزلها على مكتب السكرتير مشهور وسحب الكرسي وجلس جنبه وقال : وقسم بالله
مشهور جلس وقال : والحل ؟
سلطان : مدري وضب لي اجتماع سريع مع طاقم التحرير والتنظيم والتنسيق بعد شوي تمام ؟
مشهور : وطاقم النقل والشحن ؟
سلطان : مالهم دخل اصلاً م وصلهم شيء وكل الأوراق والمستندات عند التحرير فالطابق العاشر
مشهور : خلاص ازهلني
مشى سلطان يأخذ اغراضه ويدخل مكتبه ، فتح مشهور اللابتوب وأرسل إيميل لكل من يوجد بالطابق العاشر بداعي الاجتماع اللي بيكون بعد نصف ساعة من ألان ..
~ فالديرة ~
طلعت وكوب قهوتها بيدها ، نزلت نظارتها وحطتها فوق رأسها من شافت الشرطة تحاصر حوش أهلها ، وفجأة أشروا عليها بتال ونايف وأبو بجاد وراهم يبتسم ، قطّبت حواجبها ومشوا لها رجال الأمن ونطقت : فيه أيه !
ابتسمت الشرطية سهى ونطقت : فيه بلاغ عليك
اسرار : تمام نتفاهم
الشرطية سهى مشت وراها تكلبشها ونطقت : ابشري بالقسم نتفاهم زين
اسرار شهقت من طاح كوبها فالأرض وقالت بحدة : لا انتوا تستهبلون معي !
الشرطية سهى : يحق لك توكلين محامي وتلتزمين بالصمت لأن كل شيء تقولينه ممكن يتسجل ضدك خصوصًا اخر كلامك لأنك تعبثين مع الجهات المسؤولة !
اخذت نفس طويل وزفرته ونطقت : حلو نظامك ي سطّام
ركبوها السيارة وحركوا من أسوار الديرة ، نطق أبو بجاد بغضّب وقال : شفتوا ؟ حقت دعارة ومشاكل وجابت الشرطة لبيتي الحين وش بنقول للعربان ؟ الله يبلاها ببلاء ويفكنا منها
دخل للمجلس ودخلوا العيال معه ..
~ في بيت عِقد ~
حطت آخر لمسات ميكب دوامها ومشت ، سحبت جوالها من سمعت أتصال وصلها وردت تقول : ايوه زيتونه صباح الخير
اسرار بعصبية : صباح الزفت والله ! تعالي قسم شرطة الرياض الان !
شهقت وقالت : بنت اشبك !! اش مسوية ؟
اسرار بهمس : لا تخليني اسب وتعالي
قفل الاتصال ومشت تركض لغرفتها ، اخذت مفاتيح السيارة وطلعت تسكر بيتها وتمشي للسيارة ، ركبت وانطلقت للقسم علطول ..، وصلت بعد فترة ونزلت تمشي داخل القسم ووصلت للغرفة ووقفتها الشرطية سهى ورفعت عِقد بطاقتها ونطقت : أنا محاميتها
الشرطية سهى انحنت على جنب ودخلت عِقد وقفلت الباب وراها وقالت : اسرار اشبك ؟
اسرار : مدري اقول تعشى علي ولا انا تغديت عليه انا بلغت وبالصدفة طلع هو مبلغ بعد
عِقد : مين هو ؟
اسرار : اجلسي طيب
جلست عِقد وقالت : حكيني اش صار ؟
اسرار : ابد والله صح انا بلغت على سطّام أمس ؟
هزت عقد راسها بنعم وقالت اسرار : هو بلغ الصباح علي وم فيه وقت عند الشرطة ماشاءالله داهموني حتى قهوتي م خلوها تحدر وشوفيني هنا
عِقد : يعني بفهم ليش بلغ ؟ متأكد انك سرقتيه ولا ايش ماني فاهمة !
اسرار : يبنتي يسولف واجد بقلبّها عليه وخليني اشوفه كيف بيطلع نفسه
عِقد مدت الأوراق وقالت : وقعي اني محاميتك وأنتي بوجه بنت سّت المُدن والله م يقربو مِنك !
ابتسمت اسرار توقع واخذت عِقد الأوراق ووقعت انها موكلتها ، ابتسمت بفخر وقالت : بس أخاف من اللي معاهم فلوس دايم محامييهم يكون قوي
اسرار : حن أقوى وبتصير كارثة دام تحدى محامية ومدعية عامة والله لا اطلع تاريخ ولادته بعد
عِقد : بأخذ كفالتك وبتطلعين معاي
اسرار : هيا روحي ولا تطولين
عِقد ابتسمت تبوس خد اسرار ونطقت : اف كيف فرطوا فيك ي زيتونه !
ضحكت اسرار وطلعت عِقد من عندها ونطق الضابط فواز : نعم ؟ مين سمح لك تدخلين
رفعت بطاقتها وسحبها بقوة يقرأها ونطقت : بشويش !
الضابط فواز ضحك بسخرية وقال : واذا محامية ؟ وش عرفني انك محاميتها وهي موكلتك !
زفرت بغضّب تسحب الملف من شنطتها ، سحبه بقوة وقالت بحدة : حَتندم والله !
قرأ الأوراق وتوقيع اسرار وعِقد ، مد لها الملف وقال : تفضلي
سحبته منه بقوة وانصدم وقالت : ادخل اي مكان ابيه بدون م تقولي اتفضل سامع ؟
مشت تتخطاه وتطلع من الجهة اللي هي فيها ، دخلت ممر طويل وابتسمت ونطقت : استاذ سطّام ؟
رفع سطّام راسه ونطق : هلا ؟
عِقد : اكيد م عرفتني
سطّام قام يوقف وقال : كيف اقدر اخدمك ؟
عِقد بثقة كبيرة نطقت : لا ولا حاجه بس اقولك لا تحط مني عدوة لك
سطّام رفع حاجبة وقال : ايوه ؟
عِقد قربت منه ونطقت بهمس : وأنتبه تلعب بذيلك حولي انت م تعرف حجم قوتي ولا تعرف مين مصدر قوتي !
نزل عيونه لبطاقتها وقرأ اسمها ' المحامية عِقد بنت أيمن ' مشت تتخطاه تكتب كفالة اسرار وتطلع علطول ، مسح وجهه وشنبه ورجع يجلس ونطق : وش تحس فيه ذي ؟ أجل م تبيني اعادّيها ؟ اعادّيها واطى على رأسها بعد
رفع راسه من دخل وصال ونطق : سلامات ي أبو نهيّان وخارج من الشر
وقف سطّام يبتسم ونطق : م يجيك والله يسلمك
وصال : سلطان كلمني وقال أجي اطلعك
سطّام : كويس بعده ؟
وصال : والله اذا بخاطرك أصير محاميك تكرم عينك
سطّام ابتسم وقال : والله م ودي أكسر بخاطرك وم عندي احد للأمانه ونجرب شغلك ي أبو منّير
ابتسموا يصافحون بعض وكتب كفالة سطّام وطلعوا علطول من القسم ..
~ فالديرة ~
كان يعضّ طرف ثوبه ويحَلب النعجة ، صرخ من بدأت ترفس ونطق بصوته الجهورّي : ي ضويّحي عادك بتجي !
ضاحي ركض يدخل الشبك وبيده ثنتين من الصخال ، حطها عند أمها وبدأ مطلق يرضعها ، سحب طاسه الحليب بعيد منهم ولفّ لجواله اللي فوق المطارة ويدق ، رفع عيونه وقال : الزم النعجة مني
مسكها ضاحي ومشى ينفض ملابسه ، طلع من الشبك ومشى لجواله ورد علطول وقال : مرحبا ؟
عِقد : اهلين مطلق
سحب مسواكه من جيبه وقال : هلا هلا
عِقد ابتسمت وقالت : فيه قضية بحق اسرار تساعدنا ؟
مطلق جلس على المطارة وقال : اسلم وش مسويه بنت محمد !
عِقد : م سوت حاجه بس خويك مريض
مطلق : والله م اعلم وش تقولين بس اسلمي
عِقد : اف مطلق ركز معاي
مطلق ابتسم وقال : سمّي
عِقد : اوكيه ببدأ اشرح الحين مو كنا أمس بعزيمة خويك سطّام ؟
مطلق : الا بالله
عِقد : حلو ماشاءالله بديت تستوعب
مطلق وقف يمشي من الشمس وقال : والله يبنت الحجاز تكلميني وانا أحلب النعجة وشمس الضحى تضرب نخاعتي
عِقد وقفت بصدمة من اللهجة البدوية ، تقرفت من كلمته وقالت : يشيخ الله يقرِفك ! انا سألت عن اش قاعد تسوي ؟
ضحك بصوت عالي وكان بيتكلم بس لفّ لضاحي اللي ماشي له وقال : اسلم يبو مطحس !
عِقد توسعت عيونها وقالت : اش مطحس دا برضو !
مطلق عضّ شفايفه يكتم ضحكته وقال : ايه ايه ضاحي جنبي ويسلم عليك
استوعبت وابتسمت بخفه وقالت بهمس : بس أنا كلمتك عشان اسرار مو موضوعنا الحُب واني حبيبتك ليش تتستر علينا ؟
مطلق ابتسم وقال : ماشاءالله العقبى عندنا ان شاءالله ولا يهمك
ضحكت من نطق بكلمتها وقالت : اش قاعد تقول ! خلاص بكلمك بعدين سجل رقمي عندك
مطلق : على خشمي
عِقد : علي الشحم صح ؟
انفجر يضحك عليها وقال : يعقب الشحم
عِقد ابتسمت وقالت : خلاص اشوفك بعدين باي
مطلق ابتسم وقال : في حفظ الله ورعايته
قفل الجوال ولفّ لضاحي اللي نطق : وش ابو مطحس ذا
مطلق : رفيق لي قديم
ضاحي : امش الله يصلحك امش وم عيّن ابو مطحس يدق عليك الا فالضحى !
مطلق ابتسم وقال : يدق جعلني فدا عيونه بأي وقت وبأي حزّه
ضاحي لفّ بصدمة وقال : لا خطأ يبو مشبب خطأ
مطلق مشى يركب الددسن وركب ضاحي جنبه وقال : منهو صدق ؟
مطلق : يخوي تراك أزعجتني سكرت الشبك ؟
هز ضاحي راسه بنعم وكمل مطلق : اجل كتّم
سكت ضاحي يلفّ للشارع اللي اعلتاه مطلق وتوسطه ..
~ مكتب وصال ، مكتب القانون والمحاماة ~
يحتسي كوب شاهي ويرسم بهدوء ، يناظر بوصال اللي يقّلب بالأوراق ويقرأ ، صدّ لكنه رفع عينه من نطق : مين هي اللي رفعت عليك بلاغ ؟
سطّام زفر بملل وقال : اسرار بنت محمد
كح وصال بصدمة ونطق : هاه ؟
سطّام رفع حاجبة وقال : سلامات ؟
وصال قام يوقف من الصدمة وقال : أختي
توسعت عيونه بصدمة وقال : مستحيل !
وصال : والله العظيم بكذب يعني ؟!
سطّام قام بغضّب وقال : انتوا شنو ؟ وحده ترفع بلاغ والثانية تجي تهدد والثالث يقول أختي ! انتوا أيش ؟؟
مسك ياقة ثوب وصال ونطق بحدة وهمس : وبعدين اسمك وصال بنت منّير لا تخليني احوس بوجهك الحين !
وصال نطق بتوتر : يبن نهيّان الزم ارضك ! أختي من الرضاعة
سطّام : شلون الف وأبعد وارجع اطيح فيكم ؟
وصال اخذ نفس من ابتعد سطّام عنه وقال : اذكر ربك واجلس بكلمك بموضوع
سحب شماغه بغضّب ورماه على الكنب وقال : حلها يالله
جلس وصال وقال : علاقتي فيها ماهي ذاك الزود بهالأيام وبالوقت ذا بالتحديد
سطّام رفع حاجبة وقال : بتوقف معي ضد أختك !
وصال ابتسم بسخرية وقال : ماهي شقيقة انا وحيد أمي وأبوي اساسًا وايه بوقف معك ضدها
سطّام غطى وجهه بكفوفه وهمس تحت انفاسه : الله حسيبه م عرف معنى الأخت بس م بعطيه دروس تعلمه الحياة بعدين
رفع راسه يناظر عيون وصال ونطق : تمام انا معك لو ايش يصير ويحصل وبأي مبلغ تبيه بس طلعني من هالدوشه !
وصال ابتسم بأنتصار ، هو قرأ بالأوراق الجديدة أن عِقد محاميتها وهو يعرف نقاط ضعفهم ثنتينهم ووقت انه يستخدم كل قوته ويسحقهم ، رفع راسه وابتسم ينطق : أبي من ٥٠ ألف
~ بيت عِقد ~
جالسة بالصالة ، لفّت للي تناظر من المطبخ وتقول : شرايك بكوب ماتشا ؟
اسرار : لا واللي يرحم والديك
عِقد كشرت بملامحها ونطقت : حقتلك
مشت تسوي كولد برو لهم وانتهت وطلعت تمشي للصالة ، جلست وقالت : اش صار بينكم ؟
اسرار عبّست من تذكرت كل شيء ، كيف حاصرها وكيف بوجوده أخفى صوت تنفسها ، وكيف قطع تواصلها مع العالم وحافظ على تواصل الأعين بينهم ، تتذكر ملامحه وكأنها تشوفه قدامها وتذكر طريقة توبيخه ومن حسّرتها بلغت بنفس الليلة ووقت كانت ببيته برضو ، أخذت نفس طويل وزفرته ولفّت لعِقد وقالت : ولا شيء غير اللي قلته لك
عِقد : مين سرقها طيب ؟
اسرار : بجاد
عِقد ضحكت بسخرية تشرب قهوتها وتنطق : مو عشانك م تحُبيه تتهميه !
اسرار : لا جد بجاد دخل علينا
كحت بصدمة تعدل جلستها وتترك القهوة على الطاولة وسحبت اسرار من رجولها ، ضحكت من توسدت حُضن عِقد ونطقت : الا هدا م حكيتيني عنُه !
اسرار انسدحت على فخوذها ونطقت : دخل وصرفه سطّام فأكيد انه مشتبه به
عِقد : طبعًا اصبري تنادي مطلق يجي ؟
اسرار قطّبت بحواجبها وقالت : لحظة شدخل مطلق ؟
عِقد : انا حكيتوه عن اللي صار صراحة لازم يعرف
اسرار صّرت ع اسنانها بغضّب ونطقت : انتي منجدك تتكلمين ؟؟
عِقد : سوري بس ازا باقي تحسّبي انُه هوا اللي حكى لهم فأنتي غلطانة وبقوة ولازم تصحصحي شويا
اسرار : ومين غيره ؟!
عِقد : بجاد ولا نسيتي انُه مشى وراكي للمطار ؟
اسرار مسحت وجهها بيدينها وقالت : وليش تبينه يجي ؟
عِقد : عشان يسمع سوالفنا ويفهم السالفة وغير كدا تكون عينُه على بجاد ولا ؟
اسرار ابتسمت وقالت : بعتذر منه وبقوله يجي
عِقد ابتسمت وقالت : هدي بنتي اللي اعرفها يجماعه !
سحبت جوالها تبحث عن أسم ' أخو ظبيه ' واخذت نفس تتصل فيه ، وصلها صوته وهو يقول : مرحبا ؟
اسرار : هلا مطلق
مطلق : رضيتي علينا يبنت محمد ؟
اسرار ابتسمت بفشلة وقالت : اسفه والله..
قاطعها وهو يقول : افا والله ماهو بيننا الأسف يبنت عمي
اسرار : طيب وش رايك تجي انت وظبيه وضاحي لو تبي بعد
مطلق : وين اجي ؟
اسرار : فالرياض برسلك الموقع وتعالوا
مطلق : اخواني ماهم فيه وصعبة اجي بمكان انا وانتي فيه والله م ودي يمسّك شيء مني وتوجعيني فيك
اسرار : مطلق والله محد يدري تعال بس !
مطلق اخذ نفس وقال : تكفين مابي اوجعك وتوجعيني
اسرار ابتسمت وقالت : تعال طيب ؟
زفر بقلة حيلة وقال : سمّي يبنت محمد
ابتسمت وقالت : يعيش مطلق !
ضحك بخفه وقال : وتعيش بنت محمد
قفل جواله وانفجرت تضحك من تذكرت نوع جواله ، ولفّت لعِقد المصدومة وقالت : اشبك ؟ قفل بوجهك اقتُلُه !
ضحكت اسرار تهز راسها بالنفي وابتسمت عِقد تقول : اش فيكي طيب ؟
اسرار وهي تضحك نطقت : جواله كشاف وانا اقوله برسلك الموقع !!
عِقد توسعت عيونها بصدمة وقالت : مستحيل جوالُ كشاف
رفعت جوالها من دق وطاحت تضحك ، عِقد كانت واقفة بصدمة وسحبت الجوال ترد وقالت : مطلق جوالك كشاف ؟
مطلق توسعت عيونه وقال : انا دقيت عليك ؟
عِقد : جاوبني ؟ تبى اشتري لك جوال ؟
مطلق : خيرك سابقك يبنت الحجاز بس وين الموقع وصفوه لي
عِقد مسكت راسها بصدمة وقالت : ويقولي وصفي لي ! اضخم فيلا بحيّ الياسمين هوا بيتي
مطلق توسعت عيونه وقال : تسلم يبو مطحس على الوصف وبعدين طلعت جاي لبيتك ؟ حلوى وسلوى
عِقد ميّلت راسها وقالت : مين سلوى وحلوى ؟ حتجيب احد معاك ؟
مطلق ضحك وقال : مجازي صح ولا لا ؟
عِقد : وجازي كمان حتجي ؟
مطلق ابتسم وقال : معسلامة يبنت الحجاز
عِقد : حطلع لك برا تمام ؟
مطلق عدل جلسته ونطق بحدة : أخو العيال ! ادخلي ولا اشوفك عند البيبان
عِقد نطقت بأستغراب : اشبك ؟ كيف حتدخل وتعرف بيتي ؟
مطلق : اعرف اعرف لا اشوفك سامعه ؟
عِقد : ايوه سمعتك
مطلق : يالله يبو مطحس ودعتك الله
عِقد : اوف وجايب ضاحي معاك برضو
ضحك بصوت عالي يقفل الجوال ، لفّت وم شافت اسرار ودخلت داخل بيتها ..
~ شركة 𝐻𝒶𝒿𝑒𝓈𝒮𝓊𝓁𝓉𝒶𝓃 ~
دخلوا الموظفين لغرفة الاجتماعات ، مشت لمكانها على الطرف من شافت اسمها ، ولفّت بصدمة للي ضربت فيها وركضت تجلس بالمكان الخاص فيها ، ضحكت لجين بكلافة ونطقت : م بيعرفون اجلسي بمكاني
ظبيه نطقت بصدمة : وش تشوفين فرق ؟
لجين : بكون جنب سلطان تستهبلين !
ظبيه صدّت بغرابة ونطقت بهمس : عليك ياكبدي سلام الصابرين
مشت تجلس بمكان لجين بآخر الطاولة ، رتبت اغراضها ولفّت للجين اللي حطت اسمها قدامها وقالت : م ودي يقولون لي ظبيه !
مشت وهي تقول بهمس : يع يالأسم من وين جايه ذي
شّدت على أوراقها وحطتها قدامها ، فتحت شنطتها تطلع اللابتوب حقها ولفّت من وقفوا دليل دخول سلطان ، وقفت بهدوء وأردفت بسخرية : وشو سلام ملكي ؟
ضحك عماد جنبها وصدّت بصدمة منه ، مستنكرة المكان وبقوة لكن واجب بحق مطلق تكمل بشغلها للنهاية ، سلطان ابتسم وقال : اهم شيء ظبيه وعماد موجودين ؟
ظبيه رفعت يدها ولفّت لعماد جنبها ، ابتسمت له بحنّية من شافته مُصاب بمتلازمة داون ويضحك بهدوء ويضبط نظاراته عليه ، سلطان ابتسم وقال : حلو ركزوا معي
جلس وكمل كلامه يقول : احد اللوحات انسرقت ومافيه وقت ابدًا يرسم سطّام فيه لوحة ونرسلها عشان كذا نبي حلول منكم وكيف بتحلون هالمشكلة وركزوا ترا سبب بقائكم هو بحلولكم
الكل بدأ يفكر بحلول مناسبه والبعض طرح فكرته ، لكن كانت ردود افعال سلطان سيئة نوعًا ما ويعطيهم الرفض علطول ، ابتسمت من سحبت أوراق ظبيه وحلول ظبيه اللي كانت مجهزة حلول من الإيميل اللي وصلهم بعنوان الاجتماع ، هي وقت ارتطمت فيها سحبت الورقة بدون م تحسّ ظبيه عليها ، لفّت لسلطان وقالت : استاذي تسمح ؟
سلطان عدّل جلسته وقال : تفضلي
لجين : سهلة ندور بالأرشيف عندنا اذا فيه رسمات قريب تكتمل وم بتأخذ وقت طويل نضيف عليها طلبات الزبون ونرسلها لأن شعارنا المعروف هو انه احنا اللي نحدد الرسمة وشكلها ونوعها والتفاصيل من الزبون
ابتسم سلطان ونطق : برافو عليك قسم بالله برافو !
ابتسمت وقالت : م سوينا شيء
سلطان : تعالي لمكتبي وبكلم سطّام يجي عشان نناقش معك الفكرة
مشهور ابتسم وقال : والقهوة علي وش تشربين ؟
لجين بخجل أردفت : اي شيء يمشي
سلطان : خلاص يجماعة الخير موفقين وشكرًا مره على مجهودكم الواضح !
كان يضرب بكلامه لليّ م نطقوا بحرف ومنهم ظبيه اللي كانت تحوس تدور ورقتها اللي نظمت فيها أفكارها وحلولها وسرعان م توقف الزمن فيها وهي تسمع كلام لجين ورجع فيها الوقت لحّد م ارتطمت فيها ، شَدت ع قبضتها هي تأخرت وبقوة ، زفرت قهرها ومسحت على صدرها تنطق تحت انفاسها : حسبي الله ونعم الوكيل
طلع سلطان يثني على لجين ولجين تمشي معه ، أخذت اغراضها وطلعت من الاجتماع ، رفعت راسها م ودها تبكي وتنزل بحور عيونها ، جلست بمكتبها وطاحت براسها عليه تبكي بهدوء وتطلق سراح عيونها من الغرق ..
~ مكتب وصال ~
وقف ونطق بصدمة : ايش ؟
وصال : أبي من ٥٠ ألف وفوق
سطّام : كذا مبالغة وبقوة
وصال ابتسم وقال : والله هذي أسعاري
سطّام : خلاص خرجنا منها وبدفع لك
وصال ضحك بسخرية وقال : دفع مسبق
كان سطّام بيرد بس هو يعيش على هالأساس ، صدَ يستغفر وقال : هاك رقم سلطان وارسل له رقم حسابك
وصال : خلاص معي رقمه اصلاً
سطّام : موفق بنبدأ الصباح بكره لأن مالي خلق
وصال ابتسم وقال : ابد خذ راحتك اشوفك على خير بكره
سطّام : هلا هلا
طلع يمشي ويشيل الورقه اللي رسم فيها ، هو يقدس رسماته وم يرضى يخلي رسمة وراه ، ابتسم وقال : كوب الشاهي معي
وصال : عافية
سطّام : تعافيك
طلع من المكتب ورفع يتصل على صادق ويرسله الموقع لأجل يجيه ويرجع للبيت ، قفل وشاف اتصال سلطان ورد يقول : ارحب سليّط عمري
سلطان ابتسم وقال : البقى يالعنيف البقى
ضحك من فهم مقصده وهو معنى اسمه ، تقدم يجلس على كراسي أمام مكتب القانون والمحاماة وقال : لبيه ؟
سلطان : ضروري تجي الشركة
سطّام : والله م فيني بغيت شيء ؟
سلطان : لقينا حل
لجين نطقت بصدمة : ازعل ! انا اللي لقيته
ابتسم سلطان وقال : او بالأحرى لجين هي اللي حصلته
سطّام : اخلص وشهو ؟
سلطان ضحك وقال : واضحة قافله معك
سطّام : خلاص اذا رجعت للبيت تقوله حلها لي طيب ؟
سلطان : ابد اللي تشوفه
سطّام : ودعتك الله
سلطان : في حفظه وراعيته
قفل الجوال ومشى لصادق يركب معه ويتجه لبيته ، سحب جواله يتصل بمطلق ووصله صوته وهو يقول : مرحبا باللي عجزت القى عذاريبه
سطّام ابتسم وقال : البقى باللي تحبه كل اسبابي البقى
مطلق ابتسم وقال : لبى كبدك يالهَاجس أمرني ؟
سطّام : والله سلامتك وينك فيه كأن عندك صوت سيارة
مطلق : محرك للرياض
سطّام رفع ظهره من المرتبة ونطق : حلو ! تعال نسهر سوا
مطلق : دامها سهرة بدري اجيك ذالحين ؟
سطّام : ايه تعال
مطلق ابتسم وقال : معزوم بخلص واجيك
سطّام : اوه ! خلاص تم بس لا تحسب علي
مطلق : أعقب يرجال
سطّام ابتسم وقال : اشوفك قريب يبو مشبب ؟
مطلق : عيوني لك يبو وفاء
سكر سطّام ولفّ من دخلوا للبيت وشاف حليمة تضبط قعدته ، ابتسم لها وشافته وتقدمت تفتح بابه ونزل يقول : استريحي أمي حليمة استريحي
باس فوق راسها وقال : شخباركم ؟
حليمة ابتسمت وقالت : بخير وانت ؟
سطّام : اذا خذيت دش وبدلت ملابسي بكون بأحسن حال
حليمة : جهزت ملابسك خذ دش وتعال اكل غداك
سطّام ابتسم وقال : ابشري
دخل للبيت يطلع لغرفته ، مر من قدام المرسم وتذكر كل شيء صار بهذيك الليلة ، عضّ شفايفه ونطق : والحين بيننا حروب وبلاغات وقضايا وش نهايتها معك ي اسرار ؟ ليه احسك مليانه بالأسرار ليه اشوف بنظراتك انك غارقه وتستنجدين لسنين طويلة ليه احسك كاتمة حزنك وبوحك وأنينك لأيام مظلمة !
مشى يتمسك بالدرابزين يرقى لفوق ، دخل غرفته ومشى يدخل حمامه يأخذ دش حق الصباح الطويل ..
~ بيت عِقد ~
جالسين بالمجلس اسرار بعبايتها ونقابها وعِقد بعبايتها ، زفرت بملل وقالت : تصدقي أول مره البس عبايتي وانا م حخرج مكان !
اسرار : اجل تطلعين قدامه بلبسك ؟
عِقد : اصلاً متى حيوصل ؟
اسرار : شوفي فيه صوت اتوقع وصل
عِقد ابتسمت توقف وقالت : لأنُه ذيب والذيب يجي على طاريه
مشت تطلع للباب وضحكت بصدمة وقالت : شوفي سيارتُه ببيتي !
اسرار ضحكت وقالت : متعود بيتك على البورش والموستينق والجي كلاس ! خليه يجرب الدداسن شوي
عِقد مشت للي نزل من سيارته وقال : صرفت سطّام عشانكم
عِقد : احسن لك اش تبغى منُه دا بالله !
لفّت وراه وقالت : وي فين ضاحي وجازي وحلوى وسلوى ؟
مطلق : يعني م كنتي تستهبلين ؟
عِقد : اشبك ؟
مطلق مسك راسه وضحك بخفه وقال : امشي بس الشمس لعبت بأعداداتي
عِقد : بالعكس شمس العصر مره خييال
اسرار ابتسمت له وقالت : متفشله صراحة
مطلق دخل للمجلس يشوفها وقال : م حصل شيء اجلسوا وعلموني وش السالفة
عِقد : حكينا بالأول شايف تصرفات غريبة على بجاد ؟
مطلق : اووه حسايف جيتي والموضوع بجاد
عِقد ابتسمت وقالت : ياريت م تستعجل هو اللي سرق من خويك
مطلق رفع حاجبة وقال : أخوك يالهَاجس ! اسلم كيف عرفتوا ؟
اسرار : مجرد احساس لا تتكلم عندهم علطول
مطلق : وكيف جاكم ذا الاحساس ؟
عِقد : متل م جاء لخويك سطّام بالزبط !
مطلق : لا تقولون انه اللي رفع البلاغ عليك ؟
اسرار : للأسف وانا رفعت عليه أمس
مطلق ابتسم وقال : حلوى ي سلوى كليتوها مع بعض ؟
عِقد : اشبك تقول حلوى وسلوى مين هما !
اسرار ضحكت وقالت : يعني حلو
عِقد قربت منه وقالت : الله لا يشقيني حلو متعبتك شيء ؟
مطلق همس وقال : حلاوتك اللي متعبتني ومشقيتني
رجعت بمكانها علطول وهي مصدومة ، ابتسم يضبط نسفه شماغه وقال : وش الحل ؟
اسرار : ابد عينك على بجاد ووين يروح ويجي وعطنا خبر
مطلق : تم ازهلوني ، غيره ؟
عِقد : لا سلامتك
مطلق ابتسم لها وقال : الله يسلمك يبو مطحس
عِقد بتوتر قامت وقالت : م تقهويت ؟
مطلق : فنجال واحد يكفيني
اسرار قامت تشيل جوالها وتنطق : شوي وبجي
قامت من عندهم ، ودها تأخذ راحتها شوي بعيد عن سوالف البلاغات اللي بتصير قضية وبتبدأ بجلساتها قريب ، سحبت نقابها من على وجهها واخذت نفس طويل تمشي داخل البيت ، جلست عِقد بربكة وقالت : تبى حلى معاها ؟
مطلق ابتسم وقال : لا
عِقد : اسفه بس احسك مو مرتاح عشان اسرار راحت
مطلق : م فرقت معي
عِقد اخذت نفس ونطقت : متزوج ؟
مطلق : قريب ان شاءالله
عِقد : ماشاءالله مين العروس ؟
مطلق : م ودنا نفصح وتهجين
عِقد نطقت بأستغراب : اش تقول ؟
مطلق : سلامتك وأنتي ؟
عِقد : لا اش زواج انا باقي صغيرة
مطلق : ليه يحسرة كم عمرك ؟ عندنا وداد خذت وصال وهو أكبر منها بعشرين سنة
شهقت بصدمة وضحك يقول : امزح معك امزح !
عِقد : وبعدين كم مره حقولك م تجيب اسمُو عندي !
مطلق : كم عمرك ؟ وذا بيتك ولا بيت أهلك
عِقد : عمري تلاته وعشرين وايوه بيتي لوحدي بس اسرار تسكُن معايا أغلب الوقت
مطلق : أخو العيال تسكنين لحالك ؟
عِقد : ايوه اشبك مستغرب
مطلق عضّ شفايفه ونطق تحت انفاسه : حسايف أسميه رجال اللي تاركك هنيّا بدون ولي ولا والي ! حسايف انه م يغار على ظّلك ويخليك على هواك ، حسايف انه يدري بعيال الحرام وتاركك بدون شخص يحميك بعد ربك اي والله حسايف !
قام يترك فنجاله وقال : كثرت عليك ووجودي من أساسه غلط أنتبهوا للباب وللداخل والخارج
عِقد : لا والله مو غلط اشبك مطلق
مطلق : ولا فيني اللي مكفيني يبنت الحجاز
عِقد : خلاص م حزعجك اكتر اشوفك بعدين ؟
مطلق ابتسم وقال : وداعتك نفسك وبنتنا
عِقد : بعيوني زيتونه ولا يهمك
مطلق ابتسم وقال : نقول يحظ من هو في عيونك اي والله !
عِقد اخذت نفس تتأمل محاجر عيونه اللي تعكس لون عيونها بالضبط وأردفت : انتبه لنفسك وللطريق كمان
مطلق : قفلي الباب بعدي لعاد اشوفه مشرع للرايح والجاي
ابتسمت تمشي معه ورفعت راسها تشوف فرق الحجم بينهم ، يكثر الفروقات اساسًا وبالأصل م فيه ذرة شبه بينهم ، كأنها الصيف بحرارته وانتعاشه ولذاذته وكأنه الشتاء ببرودته وقسوته ونسيمه ، تشابه أشعة الشمس بمنظرها وأشراقتها ولونها وتصرفاتها ويشبه عتمة القمر بظلامه وهدوئه وسكونه ، تضاد بكل حاجه بس م تدري ليه تنجذب له وتنكر الفكرة بالرغم من كلامه المعسول لها ، بس هي ومطلق مستحيل م تدري هل بيحصل هالمستحيل ولا بينتهي قبل يبدأ ..
~ فالجبيّل ، قصر نهيّان ~
رجع هذام للبيت ولمح سيارات كثير ، زفر بملل وقال : أم الحلوين أهلها موجودين ؟
مشى يتكي على سيارته ولفّ وشاف سلمان نايم بسيارته ، ضحك بصوت عالي وقال : أبو رواف !
تحرك سلمان يفتح عيونه بشويش والتفت لهذام ، مشى يفتح باب الراكب ونطق : أجل مطولين ؟
سلمان تثاوب ونطق : اي بالله طولوا راحوا ولا لسى ؟
هذام : لسى يالشيخ ودك نطلع نفر الجبيل ؟
سلمان : باقي بملابس دوامي يخوي
هذام : أذن المغرب اساسًا امش نصلي فالمسجد ونطلع نتمشى
سلمان : سكر سيارتك وتعال
هذام ركب وقال : سكرتها حرك يبو رواف
شغل سلمان سيارته وهو يتثاوب ومشى يطلع من أسوار قصر نهيّان ، لفّ لشاشة سيارته من وصله اتصال من أبوه وفتحه علطول وقال : أرحب يبو سلطان
نهيّان : وينكم فيه ؟
سلمان : دوبي حركت من البيت
نهيّان : عارفين وش صاير مع سطّام ولا لا ؟
هذام رفع ظهره يركز ونطق سلمان : عسى ماهو بشر ؟
نهيّان : أخوك طايح بقضية واللي رافعتها بنت
هذام نطق بصدمة : شنو صاير !؟
سلمان : اعوذبالله ! وش مسوي ؟؟
نهيّان نطق بحدة : يويلك تفكر بأخوك وانه بيسوي شيء يمسّه ويمسّنا ! مغير سرقة لوحة وسوالف بشركته
زفر هذام براحة وقال : حمدلله أجل محلولة
نهيّان : انا معزوم عند أبو شهام بخلص واجيكم دوروا حجز
سلمان : الطيارة الخاصة ؟
نهيّان : فيه واحدٍ مأخذها ولا ناسي ؟
سلمان : مالك لوى نفداك رجعت اليوم العصر
نهيّان : حلو بنطلع الرياض بعد العشاء
هذام : بنصلي ونمرك
نهيّان نطق بعجلة : لا لا معي عبدالصبور بيوصلني
هذام : على هواك
نهيّان : بنتقابل بالمطار ودعتكم ربي
سلمان ابتسم وقال : في أمان الله يبو سلطان
قفل نهيّان ووقف سلمان عند مسجد حيّهم ، نزلوا يتوضؤن ويلبون نداء المؤذن للصلاة ..
~ في أحد مقاهي الرياض ~
جالس على طاولة لوحده ويدخن زقارته بهدوء ، يفكر ببنت الحجاز اللي شغلت تفكيره كله ولا لقى مخرج يخارجه منها بالعكس كانت كل الطرق تؤدي لها ، مسك راسه من حسّ بصداع أقتحم راسه بكل قوته ، أخمد نيران زقارته وسحب كوب الشاهي معه يطلع من المقهى ، زفر بضيق وقال : مدري ادعي على مكحولة ولا وادعي لها ؟
مسك جسر خشمه بأبهامه وسبابته يسوي له مساج ، سبب صداعه هو ضعف نظره والسبب الأساسي هو بحادث أبوه وأمه طار مطلق من السيارة وهذا اللي خرّجه سالم ، لكنه طاح وانضرب على عينه اليمين وصار يلازمه صداع دايم بدون حل وتبعه ضعف نظر ، زفر بضيق من زاد الصداع وعرف انه لازم يطلع نظاره جديدة بدال اللي كسرتها مكحولة ، مشى يركب الددسن وشغلها يمشي وهو مضيّق نظره من شدة الصداع ، سحب جواله من وصله اتصال ورد عليه يقول : مرحبا ؟
سطّام نطق بصوته الثقييل أثر النوم : هلا مطلق وينك ؟
مطلق : حولك
سطّام ابتسم وقال : تعال تعال الله يحيّيك
مطلق : الله يبقيك جاي
قفل الجوال ولفّ يدخل حيّ الصحافه ، مشى فيه وغمض عيونه لوهلة وفتحها وسحب فرامل بكل قوته من طلع قدامه بزران يلعبون ، أخذ نفس يناظر صدمتهم وأشر لهم يدخلون ومشوا يبتعدون عن الشارع ، زفر بصدمة ونطق : ربك ستر ي مطلق !
مشى يكمل طريقه ولفّ يدخل حوش سطّام ، نزل من سيارته وشافه واقف بشورته ويدينه بجيوبه ، مشى له وقال : أعقب وشذا اللبس ؟
سطّام ابتسم يسلم عليه وقال : لبس البيت
مطلق : ايه لبس البيت ؟
ضحك سطّام وقال : اجلس تبي شاهي ؟
مطلق هز راسه بنفي وقال : شوي
سطّام : علامك ؟
مطلق : مدري يولد ذابحني الصداع
سطّام قطّب حواجبه وقال : سلامتك من أيش ؟ وين نظارتك يمكن منها
مطلق هز راسه وقال : اني داري لكنها بلشتني انا ماني رجال أهتم وهي على ادنى حاجه تنكسر ولما جيت ابدلها سلخوني بالسعر !
سطّام رفع جواله وقال : تعرف مقاسك ؟
مطلق : معي المقاس بسيارتي
سطّام ابتسم وقال : عطني
مشى مطلق يفتح سيارته واخذ ورقة المقاس من الدرج وسكرها ورجع يجلس وقال : اسلم
سطّام مسكها ونطق بهدوء : الله يسلمك
مشت حليمة وقالت : اوه عندك رجال
سطّام لفّ لها وقال : ايه مطلق
وقفت حليمة بصدمة وقالت : انت مطلق ؟
مطلق نطق وهو يناظر سبحته : ايه
حليمة مسحت دموعها بصدمة وشوق وقالت : انا حليمة
مطلق رفع عيونه بصدمة يشوفها بنفس الهيئة بس الشيب تمكن منها ، ابتسم بهدوء وقال : جعل عمرك طويل ي حليمة
ابتسمت ومشت تجلس جنب سطّام وقالت : وياك يولدي شخبارك شعلومك منزمان عنك ؟
مطلق شّد ع سبحته وقال : والله على حالي
سطّام : مطلق يمكن عين ؟
مطلق رفع حاجبة وقال : عين كيف ؟
حليمة لفّت لسطّام ونطقت : تقصد حسد ؟ ليه وشفيه هو
سطّام : عشان لون عيونك يمكن ؟
حليمة : خلاص يأخذ عدسات بنية
مطلق فرك بين حجاجه بألم وقال : وش عدسات ذي ؟
سطّام : دام النظارات تقروشك ليه م تأخذ عدسات
مطلق توسعت عيونه بصدمة وقال بحدة : أعقب ! اخر عمري البس حقت النسوان ذيك !
سطّام ابتسم وقال : بأخذ لك شفافه محد بيدري انك لابسها حتى انت بتنسى منها
مطلق : ابدٍ امنعني منها
سطّام مسك ركبته وقال : طعني ي مطيليق !
مطلق أبعد يد سطّام وقال : قلت لك لا
سطّام : بطلبها ونجربها الليلة وعد مني اذا م اعجبتك ارميها
مطلق : م بجربها جربها لحالك
سطّام ضحك بخفه وقال : خير خير بنشوف
قامت حليمة من عندهم ، وطلب سطّام وقفل جواله يشوف مطلق منسدح وراسه على المركى ، نفسه مطلق الصغير م تغيير ، نفس الأسلوب ونفس الحركات والكلام ، لكن ماهو نفس الشخص تغيير وبشكل واضح ، يدري سطّام ان داخله كلام مستحيل يخلص وبداخله طفل تايه يدور لأمه ، هو من عرف مطلق وهو شايل أخوانه على كتوفه ولا عمره رحل وتركهم ، هو حتى الأكل يحسب لهم فيه ويدري سطّام ان الشخص اللي مغمض عيونه قدامه ضحى بأشياء كثيرة لأجل أخوانه ، تقدم ومسك ذراعه وفتح مطلق عين وحدة وقال : لبيه يالهَاجس ؟
سطّام : جيت تسمر معي ولا تنام عندي
مطلق قام بفشلة وقال : أعذرني وانا أخوك..
قاطعه سطّام من قام يضمّه ، مسح ع ظهره اللي يطابق حجم صدر سطّام ونطق : م بيننا أعذار يعيباه ي مطيليق
كان مرخي يدينه لكنه رفعها يحاوط ظهر سطّام ، أخذ نفس عميق من حسّ بحرارة بحنجرته ونطق : اخ
سطّام : اذكر الله يخوي
مطلق ابتسم بهدوء يخفي دموعه ، قام يبعد وقال : برجع لأخواني أشوفك على خير
كان بيتكلم بس غادر مطلق علطول يركب سيارته ويخرج من بيت سطّام ، شّد ع قبضته وقال : الله يجبر كسرك يعيون أخوك ويعطيك مرادك
جلس بهدوء يتأمل مكانه ومسبحته اللي تركها ، ابتسم يأخذها ويمشي داخل بيته ..
~ سيارة مطلق ~
ضرب الدركسون مرارًا وتكرارًا ، أخذ نفس عميق وزفره ونطق بحدة : تعقب م تبكي وأنت ولد مشبب وأخو ضاحي وظبيه وصافية تعقب !
هو من نطق بأسم صافية اللي كملت ثلاث اشهر م شافت أخوانها ، تذكرها وحسّ انها ممكن تشغله عن ضيقة صدره ، سحب جواله واتصل عليها لكن بدون جدوى ، م ردت عليه ونطق : لها اسبوعين م ترد وينها فيه ذي البنت ؟
قفل جواله يدخله بجيبه ومشى يرجع للديرة ، هو مازال يعيش مأساة فقدان والديه بحادث مروري ومازال يتذكر وقت خطوبته ورفض أحب البشر له سابقًا بسبب انه يتيم ، هو يخاف يحسّ بهالشعور مع عِقد اللي من الواضح له انها م تبي تتزوج وكل شيء تطلبه يجيها بعد لبيه وأمرك ، شّد ع الدركسون يكثر م ينخذل بهالحياة ، نطق بتعب وقال : تعدل ي حظي الردّي تعدل م ودي افقد الامل معها وانا م قد خضتها وحاولتها تعدل لأجلها ماهو لأجلي !
اخذ نفس طويل ولفّ يسحب جواله من وصله اتصال وقرأ اسم صافية ونطق : مرحبا ي وخيتي مرحبا ي ريحة أمي وأبوي مرحبا يالعودة !
سمع شهقة وبكاء بخفه وقال : أخوك ي صافية !
جوري أردفت ببكاء : خال مطلق.. أمي ماتت
توسعت محاجره لأقصى حد ، توقف العالم بلحظة ولا قدر مطلق يتحرك ، توو دعى ان حظه يتعدل ويجيه خبر وفاة أخته ذات الأربعين عام ، هو ماعاد وراه حيّل ولا قوة تسنده لخبر فقدان جديد ، كان الجوال عند اذنه ويسمع بكاء أكبر بنات صافية جوري وشهقاتها ، لفّ يعدل وجهته ونطق : اذكري الله يعيون خالك اذكري الله..
قاطعت كلامه الغصّة اللي تجمعت بحنجرته ، بلع ريقه بقسوة يحسّ انه يبتلع زجاج ، زفر بضيق وقال : جوري وين أخوانك وين أبوك
كانت ترجف وتبكي ونطقت : أبوي اللي قتلها ي خال أبوي ! سمعنا طلق رصاص وأنا مع خواتي داخل البيت
صرخ وقال : وش تقولين انتي هاه ؟ وش تقوليين !!
جوري بكت زيادة وقالت : بالغلط ي خالي أطلق عليها وهو يفرغ سلاحه !
مسك راسه بقوة من الصداع وقال : يالله ! يارب انا في وجهك انك خارجنا !
قفل الجوال علطول ومسكه يتصل على ضاحي ، لكن مرت دقايق وتقفل الجوال بدون رد ، أخذ نفس طويل وصرخ بأعلى صوته ، فك الطاره يعصب راسه بشماغه ودعس البنزين وم انتبه للمسمار اللي اخترق كفر موتره وطار مطلق وسيارته يتقلب بعيد فالبر وبهذاك المكان النائي ، صار عليه حادث بنفس موقع حادث أهله وبنفس السوء بحيث ان الحديد م رحم مطلق ابدًا وحطه بين يدين رب رحيم ورؤوف عليه ..
~ فالديرة ~
نزلت من سيارة ضاحي ونطقت : خلني لحالي
ضاحي نزل بسرعة وقال : اعنبو غيرك من مزعلك !
ظبيه : محد
مشت تدخل وحكّ راسه يناظر فيها ونطق : لا يكون مديرها ؟
مشى من شاف سلوى وحمد تاكين مع عيالهم فالدكة ، ابتسم وقال : سلامي سلامي وطيب الكلامي !
قفز يبوس على راس حمد ولفّ يحتضن سلوى ، ابتسمت تضمّه لها وتنطق : هلا بحبيب جدته
ضاحي : وشحالكم جميع
حريم أعمامه ردوا بمعنى واحد وأنهم بخير ، جلس قبال نجوى ونطق : وين عبداللطيف ؟
نجوى : خارج عشان دوامه
ضاحي ابتسم وقال : والله شكله معرس عليك
شهقت نجوى ونطقت صالحة بصدمة : وجع ضاحي وش ذا الفأل ؟
ضاحي كتم ضحكته وقال : انا اقول احساسي شفيكم ؟
نجوى ضربته وقالت : اعرف عمك م يسويها
ضاحي : يبنت الحلال يخسى يصير عمي
نطقت هديل بحدة : احترم نفسك وحشّم جدك وجدتك
انسدح بحضن سلوى ونطق : هي تسمح لي صح ؟
سلوى ضحكت وقالت : ايه جعل العرب يفدونك
ابتسم يبوس يدها ووقف وقال : أم بجاد وين العيال ؟
هديل رفعت راسها وقالت : مدري بس ظني انهم عند المزرعة
ضرب تحية لجده وجدته ومشى يركض ، سمع سلوى من بعيد تقوله : وين ظبيه م جات تسلم علينا
ضاحي نطق وهو يركض : متى م كيّفت أخت مطلق جاتكم
مشى متجه للمزرعة ووصل يدخلها ، لفّ بعيونه وشافهم بعيد ويتهامسون ، ضحك بسخرية وقال : خلّ نسمع فضايحكم دام مطلق ماهو بموجود يمنعني
تقدم ووقف وراء النخل يسمعهم ، كانوا يتكلمون عن فلوس بتجيهم بس فاته سبب هالفلوس ، وبعد دقايق انتشروا وطلع ضاحي يدندن ويقول : والله ان م وراء بجاد الا المصايب !
دخل بيتهم وانسدح بالمقلط وثواني وغفى علطول ..
~ بغرفة ظبيه ~
مسحت دموعها بعنّف وقالت : هو مصيرهم يسألونها شيء وم تعرف أجابته ومصيرها تنكشف
قامت وسحبت جوالها تشوف الاتصالات وميّلت شفايفها بحزن وقالت : ومطلق م دق علي !
كانت بتتصل فيه لكن وصلها اتصال من ' صفصف ' ردت علطول وقالت : ارحبي !
صافية وهي تلهث بفزع : الحقي على مطلق انتي وضاحي !!
ظبيه قامت توقف برعب وقالت : وشفيه ؟؟
صافية : زوجي اطلق رصاصه بالغلط وضحكت على بناتي وسويت نفسي مصابة ودقت جوري الكلبة عليه وهي تبكي واخلعت الرجال وظني معاد معه من العقل لحسّة !
ظبيه بحدة نطقت : طيب م دقيتي عليه تعلمينه ؟ وبعدين وقت ضحكك انتي وبناتك !
صافية : علمتك دقيت دقيت لين طلعت روحي م يرد علي
عضّت شفايفها السُفلية لثواني ونطقت : يويل كبدي على مطلق وين غدى ؟
صافية : صحي ضاحي كأني اشوفه منصرع فالمقلط
ظبيه : يالله يالله
صافية نطقت قبل تسكر : اسمعي طمنيني تراني حامل لا تخلوني اسقطه !
ظبيه صرخت بصدمة وقالت : يلعني م اخليك والحمل والولادة ! بس امسكوا بريك شوي !! حشى حتى حمود م كمل سنة !
صافية ضحكت بخجل وقالت : ظبيه !
ظبيه : لعنه !
قفلت بوجهها واتصلت على مطلق وجلست تكرر الاتصال لكن دون اي فايدة م وصلها رد ، مسكت عبايتها وسحبتها ومشت تركض للمقلط وفتحته ومثل م خمنت صافية كان ضاحي نايم بطريقة غريبة مثل عوايده ، صرخت وقالت : ضاااااااحي !
فزّ من نومته وقال : وجعااااه تسمعييين !
ظبيه : امش امش مطلق له ساعة م يرد
ركض يسحب مفاتيح الشاص وركض ولحقته ظبيه ، طلعوا وشافتهم سلوى ونطقت : وشفييكم ؟
ضاحي : مطلق مطلق
توسعت عيون حمد وانقبض قلبه ، كم يتمنى لو انه معهم يركض ويشوف وشفيه مطلق ، هو حتى م قدر يحرك اصبعه ويسأل ، أردفت سلوى ببرود : علموني وشفيه
ظبيه لفّت بصدمة ونطقت : متى صار يهمك ؟
سلوى : م يهمني بس نبي نشوف
ركبت ظبيه وصرخت على ضاحي اللي يحاول يشغل الشاص لكن من دون فايدة ، صرخ وقال : وشفييه ! انطمي شوي لو تكرمتي خليني اتفاهم مع الأكحل بهدوء
مسكت ظبيه راسها بقوة وسحبت جوالها تتصل بأسرار ووصلها صوتها وهي تقول : اهلين ؟
ظبيه بتوتر : اف اسرار تكفين الحقينا
اسرار فزّت من على الكنب ووقفت عِقد الفلم ونطقت : وشفيكم ؟؟ تكلمي
ظبيه برعب والغصة بحلقها : مطلق..
اسرار صرخت برعب : لا تفجعيني تكفيين ! وشفيه مطلق
فزّت عِقد وغطت منطوقها بصدمة ، ركضت اسرار تسحب عبايتها وعِقد تركض وراها وقالت : اشبو مطلق ؟
اسرار بتوتر نطقت : مدري مدري
سحبت المفاتيح لكن وقفتها عِقد وقالت : تبغي نوصل بعد يومين امشي على البورش
طلعوا يركضون وركبوا السيارة وانطلقوا لخطَ الديرة ..
~ الخرج ، بيوت آل عمر ~
دخل مشعل ومسك صافية ونطق : وش سالفة جوري تبكي ؟
صافية : مشعل اتركني شوي
مشعل : وش اترك ؟ صاحية انتي ؟
صافية لفّت له ونطقت : وش تبي تعرف ؟
مشعل : احد من اهلك صاير له شيء ؟
صافية عضّت شفايفها وبكت بدون صوت ، توسعت عيونه يضمّها له وينطق : ليه ليه ؟
حاوطت رقبته وهي تبكي ، شّد ع خصرها وقال : ليه ينظر عين مشعل ليه البكى ؟
صافية انهارت تبكي ونطقت : مطلق محد يدري وينه بعد م كلمته جوري وهي تبكي قفل جواله
مشعل ابتسم بهدوء يبوس راسها ونطق : الله يصلح جوري ويصلحك والمقالب
صافية اخذت نفس توقف بكاء ونطقت : م صار فيه شيء صح ؟
مشعل : مطلق أسد مشبب م يصير له شيء مطلق تراب ديرة قديم م يوجعه شيء لا تخافين
حضّنته بهدوء ومشى معها يجلس لأجل تهدي ..
~ طريق الديرة ~
كانت تسوق بسرعة جنونية واسرار تصارخ وتقولها : هدي يحيوانه !!
عِقد بتوتر نطقت : اسفه بس الموضوع فيه حياة وحياة مطلق برضو !
اسرار : انا وانا بنت عمه م خفت عليه !
عِقد : بس هوا وراه اهلُه وخطيبتُه !
اسرار صرخت وقالت : مطلق ماهو بخاطب !!
عِقد لفّت بصدمة وعلى لفّتها شافت سيارته ، شهقت تضرب فرامل وصرخت اسرار بصدمة ، ضرب راسها بالدركسون لأنها فاكه الحزام عكس اسرار اللي م أثر فيها الفرامل ، مسك راسها وقالت : أنا اوكيه معليكي !
سحبت منديل من حسّت بنزيف خشمها ، هي بالحالات ذي ممكن يغمى عليها لكنها تحملت وتمسكت ، نزلت تركض ولفّت اسرار وشهقت من شافت سيارته بعيد جدًا عن الخط ، ونزلت تركض ورا عِقد وهي تبكي وتقول بصوت عالي : يارب مطلق أرفق بمطلق !
عِقد وقفت من وصلت للباب وشافت يده ، صرخت وقالت بصوت باكي : مطلقق !!
فتحت الباب وطاح عليها ، صرخت برعب وقالت : لا ياربي اش اسوي ياربي !
ضمّته لها ومسكت راسه ونطقت : م حترُكه ! اتصلي بالأسعاف
رفعت اسرار جوالها وصرخت لعِقد : تكفيين م فيه ارسال
عِقد وقفت بكاء وحاولت تقوّي نفسها وتتجاهل اللي ينام بحضّنها والدم يسيل منه ، اخذت نفس وقالت : روحي على سيارتي للديرة حقتكو وتعالي بأهلِك !
اسرار : تمام
ركضت تركب السيارة وأنطلقت تبتعد عن عِقد ، أخذت نفس وبكت بدون صوت ، عضّت شفايفها تكتم شهقاتها ، تبكي على كتفه وشعرها على وجهه ، هو لو انه صاحي احتمال ينتهي ويموت بين يدينها ، ميّلت راسها وتحسست شعر لحيته على خدها ونطقت : م تروح تسمع وربي م تخليهم لوحدهم !
بكت علطول وقالت : اش صار فيك كنت بخير عندي اليوم !
كانت تشاهق وترجف ، هي م عمرها انتركت بمكان مثل كذا ولوحدها وم عمرها شافت دم بهالقدر ينزل من آدمي ، وهالآدمي تعرفه وبدأت الألفة بينهم وهي حاسة بهالشيء ومبسوطة فيه ، ابعدت شماغه عن راسه وغطت نفسها فيه وهي تبكي وقالت : م حترُكك والله م اروح وانت وراي
لفّته بصعوبة لثقل حجمه وشافت وجهه وصرخت تبكي ، كان الدم يغطيه حتى وجهه م ميزته ، اخذت شنطتها وأخذت منها مويه وصارت تغسل وجهه وهي تبكي بحرقة ، نشفت وجهه بطرف تيشيرتها وأردفت بدقن راجف : مطلق رد عليا أرجوك أرجوك ارجع لوعيك !
حطت جبينها على جبينه وهي منهارة وتبكي ، دموعها تنزل من محاجرها لوجنتيه ، رفعت راسها تشوف سياراتهم وسيارتها بينهم ، كانت ترجف وتشوفهم يركضون لها وله ومن ضمنهم ظبيه وضاحي اللي ميزتهم علطول من صراخهم بأسم أخوهم ، نزل ضاحي لهم ونطق : وشفيه وشفيه مطلق ! يويل كبدي علييك ي ابوي انت !
كانت ترجف بشكل مرعب ونطقت : م حيروح ويتركنا تسمعوني !
صرخت ظبيه تبكي ونطقت : تكفى ي مطلق لا تروح وتخلينا مالنا بعد الله الا انت تكفى لا تروح تكفى !
شّدت عِقد عليه ونطقت : ظبيه اسمعيني ! م حيروح مكان اشبك م يروح وانتوا بذمتو !!
تقدموا الرجال وابعد ضاحي ظبيه عنهم شالوه منها بس م تركته كانت متمسكه بيده ، لفّ أبو بجاد لها وسحب يد مطلق منها وطاحت ساعته بيدها ، بكت تشّد عليها وهي ترجف ولفّت بترجع ورفعت راسها من شافت هيئة شخص وراها ، كان وصال واقف وثوبه مليان دم من مطلق ومعه مفتاح سيارته وأغراضه ، بكت علطول وهي تشوفه واقف وأردف : بنت الحجاز
نطقت ببكاء : لا تقولي كدا ! م يليق الا على منطوقه !
وصال ابتسم بهدوء وقال : م يقرب لك يبنت أيمن ليه الدموع
شهقت تبكي وغطت وجهها بيدينها الغرقانه دم ، وانصعقت من حسّت فيه يضمّها ، وقفت بصدمة عن البكاء ورفعت عيونها بصدمة ونطقت : وصال !
وصال : اشش خلاص
كم تتمنى تحاوطه وتعيش بحضّنه دقايق معدودة تعتبرها حياة طويلة وسعيدة لها ، هي م وقفت عن حُبه بس قاعدة تجبر نفسها ، شّدت على قبضتها ونطقت : اش قاعد يصير ؟
شّد عليها يدخلها بضلوعه ونطق : تسرعت وجدا والله اني عارف بس تكفين قولي انك للحين تشوفيني مثل قبل
هي قلبتها براسها وسرعان م دفعته عنها ونطقت بصدمة : اش تسوي انت ! كيف تقرب مني وتضمني لك !؟
قرب من جديد وصفقته كف بيدها ونطقت بحدة وببحة أثر البكاء والصراخ : ابعد عني قبل احرقك هنا وادفنك !
ضحك وصال وقال : كرهتيني ؟
عِقد نطقت بصدمة : حسافة على وداد المسكينة !!
مشت تسحب شنطتها وتركض ولفّت من م شافت أحد حتى سيارتها ماهي فيه ، اخذت نفس ونطقت : طولك ياروح ! دحين بيقولي اجي معاه ؟
وصال أردف بسخرية : بنت أيمن تعالي معي
رفست الأرض بقوة ونطقت : حتتحاسب ي مطلق والله م انساها لك
مشت وركبت ورا وأنطلق وصال للمستشفى ، نزلت عيونها لساعته بيدها ورفعتها تحطها عند صدرها وهمست له بأدعية من أعماق قلبها ..
'
انتهى البارت ادعموني بنجمة وكومنت عشان اتحفز اكملكم 🩵
" بدأت للعواصف وبقوة ، وش رايكم يموت مطلق 🤣؟ لا تنسون النجمة وتعالوا أنستا تشوفون تشبيهاتكم 🥹 "
الانستا : Jwuiri .