الهَوى اسّرار وهَواجِيس واحّلام ... والىَ متّى واحّلام وصِلك بعّيده

البارت السابع

'
مشت وركبت ورا وأنطلق وصال للمستشفى ، نزلت عيونها لساعته بيدها ورفعتها تحطها عند صدرها وهمست له بأدعية من أعماق قلبها ..
~ مطار الدمام ~
دخلوا يمشون في صالات المغادرون ، لفّ هذام لعبدالصبور اللي واقف وبجانبه نهيّان وأشر لهم يقول : يبو سلطان
نهيّان لفّ والجوال بأذنه ووجهه شاحب ، وقف هذام يناظر بملامح أبوه ومشى بهدوء مع سلمان وسمعوه يقول : لا حول ولا قوة الا بالله !
سلمان فزّ ونطق : وشفيه يبو سلطان !؟
هذام شّد ع شنطته هو كان مقرر يروح ويجلس أسبوع عند سلطان وسطّام بس بدأ يتراجع ، يخاف مع الفقد ويخشاه جدًا ، قفل نهيّان ونطق : مطلق صار عليه حادث ولحد يدري عن وضعه
هذام انقبض قلبه وقال : لا اله الا الله !
سلمان : الله يقومه بالسلامة
نهيّان : وجبت السفرة لزوم نشوف أخوكم
سلمان : مشينا
مشوا يطلعون على أرض المطار يشوفون طيارتهم ، مسك نهيّان شماغه يضبطه وشّد على عصاته وهمس : الله يجبر بخاطرك ي بِكر نهيّان
ركبوا الطيارة وجلسوا بالمقاعد ولفّ سلمان لجهة هذام اللي يكلم سلطان ونزل عيونه يربط الحزام من أقلعت تغادر سماء الشرقية ..
~ بيت سطّام ~
طلع من الحمام مستعجل ويجفف شعره أثر السباحة من سمع صوت جواله يدق ، هو أشتهى يسبح بالمسبح بالرغم من البرد لكنه مقدر يطفي هواجيسه ولهيبها الا بهالشكل ، نزل عيونه وقرأ اسم ضاحي ورد علطول يقول : اهلاً
ضاحي مسح طرف خشمه وقال : هلا سطّام
سطّام : ارحب وشفيه صوتك ؟
انحنى ضاحي يبكي بدون صوت ونطق بصوته المبحوح : م..مطل..
شهق يبكي وطاح الجوال من يد سطّام ، وقف الدم بشرايينه من عرف الاسم قبل يكمل ضاحي ، هو م حسّ بنفسه الا وهو  بثوبه وبسيارته ومايحسّ بروحه اللي يحلف انها غادرت جسمه سرعان م عرف بالموضوع ، صار يقلب بشاشة سيارته وأتصل على الشخص اللي م يواطنه ولا يوّده لكنه دايم المرشد له ، أبوه ووالده وسنده وظهره والشخص اللي يكون سطّام بِكره ومن صّلبه ، وصله صوت نهيّان وأردف بدقن راجف : يبه مطلق ! يبه لا يصير له شيء
فزّ نهيّان يعرف م ينقال له ' يبه ' من منطوق سطّام الا والأمر يمسّه ، مثل أخر مره وقت توفى سكرتير سطّام السابق بحادث ، نطق بصدمة : يا أبوي ي سطّام وشفيه مطلق ؟
بكى مثل طفل تائه وضيع درب أمه وأبوه ، كان يشاهق ويقول بتكرار : مدري يبه مدري تكفى تعال تعال شوف معي وين مطلق ووش صار له يبه تكفى لا يروح مطلق ! لا يروح أخوي مثل م راحت أمي
نهيّان مسك قلبه وقال : جايك ي أبوي جايك اهدا انت ومطلق رجال قوي م يحصل له مكروه اهدا
فكّ ازرار ثوبه العلوية ونطق : اذا راح والله أموت يبه
نهيّان : لا حول ولا قوة الا بالله !
لفّ من شاف سلمان وهذام قدامه ونطق : أنا جاي جاي
قفل سطّام ورجع يتصل على ضاحي لكن م كان لضاحي رد ، عضّ شفايفه يكتم شهقاته ويثبت رجفة دقنه ، م يشوف الطريق من دموع عيونه ، يموت اذا صار لمطلق شيء ، ينتهي اذا اختفى طاري مطلق من الدنيا ، يختفي اذا اختفى أثر مطلق على الأرض ، اتصل على وصال وسرعان م رد وصرخ يقول : ويينكم !! وين مطلق ؟
وصال : اذكر ربك ي سطّام اذكر الله !
صرخ يبكي ويضرب الدركسون وينطق : وييينكم !
وصال نطق بصدمة : مستشفى *******.
قفل سطّام يتوجه للمستشفى بسرعة تضاهي رمش عينه ، يخاف م يلحق ويخاف يوصل على خبر يفجعه عمره الطويل ، دعى بصميّم قلبه ونطق : ‏لذاك الوجه اللي ذِكري يماري به و يطلق محيّاه يا جعل يومي ينكتب قبل يومه ! يجعلني م اذوق له ألم ولا حزن ولو يستوطن الحزن على قلبي والله اني راضي بس لا يمسّ مطيليق ذرة !
غطى وجهه يمسحه وينزل من السيارة من وصل ، ركض بكل سرعته وبجنونه بمعرفة خبر عن مطلق ، ومن بين الزحمة والدموع والخوف والذعر ألتقت عيونه بعيونها ، محاجرها اللي تغورقت بدموعها ووقف بصدمة يشوفها تركض له لحّد م وصلت له ونطقت : جيت !
ارتخى من سمع صوتها واطمئن قلبه ، م يدري شلون تحتفظ بهالراحة داخلها وتبعثها له بدون مجهود ، مسح شاربه ونطق : وينه طمنوني عنه
اسرار مسحت دموعها وقالت : صار عليه حادث بنفس مكان عمي وعمتي الله يرحمهم
سطّام انحنى بظهره يتساوى بطولها وينطق بتكرار : طمنوني عنه !
اسرار مسحت دموعها ورفعت كتوفها بعدم معرفة وقالت : ماندري
سطّام ابتسم وقال : طيرتوا قلبي عليه وين محله ؟
اسرار نزلت راسها وبكت علطول وقالت بصوت شبه مسموع : والله اسحب الشكوى والبلاغ بس مطلق لا يجيه شيء
سطّام ضحك يشوف البراءة بنطقها ومشى يتخطها وقال بجدية : بس انا م تهزمني العاطفة يبنت محمد ولا بسحب الشكوى الموضوع فيه سبعة مليون يورو ويفضل م نتكلم فيه بس قلت أذكرك دامه أول لقى بيننا بعد الشكوى وبعد المرسم
اسرار مشت معه ومسكت ذراعه وقالت بحدة صوتها وهي تناظر داخل عيونه : ولا هي اللي تهدمني كم كلمة تهديد وتكسر مجاديفي احرقك بحزني وأدمرك يولد نهيّان وارجع اقولك أنتبه
سطّام نزل عيونه ليدها ونطق : موافق ! وعلى حسب مقدرتك بنشوف لحّد إيش بتحرقيني
رفعت راسها بسبب طوله المبالغ فيه ونطقت : وين ودك ينتثر رمادك ؟
سطّام ابتسم بسخرية وقال : على لوحاتي اللي برسلها لك فالسجن
سحبت يدها بقسوة ومشت تتخطاه ومشى وراها يتبعها ، هي تتقلب وهي صعبة الفهم وهي مليانه بسرّ كبير ومليانه غرور ومليانه براءة هي مليون شخص بثانية وحدة هي أسرار مستحيل ينفهم وينتشر للعامة ..
~ فالجبيّل ، قصر نهيّان ~
صحت من سمعت أزعاج ونطقت بصوت ناعس : معقول رجعوا أهلها ؟
بدأت تستوعب ومن ركزت كان صوت رجل ولا هو من رجال نهيّان ولا نهيّان بنفسه ، مسكت مفرشها تقوم بهدوء وتسحب جوالها ومشت للباب وفتحته ، سمعت الصوت يقرب منها وسكرته بهدوء وبقت على فتحه صغيرة ، توسعت عيونها بصدمة من شافت رجل غريب متمسك بيد مضاوي اللي تضحك وراه وأردفت تحت انفاسها : مضاوي م عندها أخوان !!!
كانت واقفة ترجف بصدمة وتسمعها وهي تقول : لا ماهو موجود مسافر
شّدت على مسكة الباب ورجعت تقفله ، لفّت لجوالها وانصعقت من شافته يصور بنفسه ، هي متأكدة انها جات صدفه لكنها ابتسمت ونطقت : وش هالصدفه الحلوة ! اي والله محاسن الصدف
ضحكت ومشت ترجع على سريرها وقالت : بس عرفنا كيف نجيبك
دخلت الصور وبدأت تعدل عليه وتقصه بحيث م يتضح لمضاوي من وين كان مسجل ، وارسلتها لشهرزاد أختها ونطقت : بنت شوفي ابيك ترسلينه لمضاوي بس بأي رقم قديم عندك
عضّت شفايفها لثواني تنتظر رد من أختها وابتسمت من شافتها ' أونلاين ' وشوي وكتبت : أبشري تبين من رقم سواقنا الباكستاني ؟
ضحكت انفال وقالت : شوشو تعجبيني !
شهرزاد : ابك أبشري بعزك
قفلت جوالها وانسدحت وقالت : اتمنى انه زوج ثاني حتى لو هي متزوجة بس أهم شيء حلال !
غمضت عيونها ودخلت داخل نومها علطول ..
~ فالديرة ~
طلعت وداد بجلال صلاتها ومشت فالحوش حافيه ، اخذت نفس طويل وطلعت جوالها من وصلتها رسالة من بجاد وقالت : اف وقتك
فتحتها وحسّت بضربة على راسها من الصدمة ..
~ المستشفى ~
طلعت من حمام المستشفى تجفف يدينها من الماء ، هي غسلت نفسها وبدلت ملابسها وحتى عبايتها من الدم ، نزلت عيونها لساعة مطلق وقالت : حتطلع بخير وحلبسك ساعَتك !
رفعت عيونها وقالت بملل : حتتركني أتنفس ولا ايش تبى بالزبط ؟
مسك يدها وصال وقال : لا تكذبين عيونك فاضحتك !
سكتت تناظر عيونه وقالت : اش تقولك عيوني ؟
وصال : انك للحين تبيني
عِقد بسخرية قالت : تمام عندك سكين ؟ لأن صراحة م اتشرف بعيون كدا وحطعن عيوني لأني م اباها دام توصل لك كدا
وصال ابتسم يسحبها لحضّنه وينطق : طيب أحبك
ارتعدت وانتفض قلبها وارتعش جسدها من اعترافه ، ليه الحين وليه بالوقت اللي بدأت تجبر نفسها بالنسيان يرجع وبقوة وكأنه نادم منجد ، بغباء منها نطقت : لا تعورني وصال مره تانية !
وصال ابتسم يبوس طرف كتفها وينطق : تأمرين يبنت أيمن
بكت علطول من ضعفها وأشتياقها له ، هي جلست سنين تحبه واسرار تشبكهم وم كان عنده مانع ، كانت تصحى وتمسي على وجهه وصوته وسوالفه ، هي م قدرت تحاوط رقبته وتضمّه لها ولا قدرت تخليه يبعد ، هي ماتدري عاجبها ولا من أشتياقها معاد تدري ولا عندها مقدرة على التفريق ، ابعد منها ونطق : انا جنبك متى م بغيتيني قولي لي
عِقد اخذت نفس تمسح طرف خشمها ونطقت : خلك قريب
وصال ابتسم يرفع راسها وينطق : اقرب لك من روحك
ابتسمت بأشراقة ابتسامتها ومشى يتعداها ، زفر بقرف ونطق بهمس : خليك ضعيفة قبل الجلسة الأولى وخليني انهيكم من أول خطوة ونخلص !
لفّت تشوفه يمشي ونطقت : ياربي سامحني بس يارب مو قادرة ابعِدُو عني والله مو قادرة
مشت تدخل غرفة الانتظار الخاصة بالحريم مع اسرار وظبيه فقط ..
~ فالديرة ~
شهقت وطاح جوالها بحضّنها وطاحت هي معه تجلس ، لوحدها بهذاك الحوش الضخم وتناظر بمقطع وصال وعِقد ، همست بحرقة صدر : والله لا اندمك يالواطية ! أجل رجال متزوج وتتقربين منه
على الرغم من إن وصال قدامها هو الي أقدم وحضّن عِقد وكل شيء واضح لكن وداد م ترى عليه غلط ، رفعت راسها تشوف نهال ومنيرة وتسنيم يمشون جايين لها ، قفلت جوالها واخذت نفس وابتسمت تقول : جيتوا
منيرة جلست وقالت : طيب ؟
صدّت عن وداد وقالت : اسمعوني
جلسوا البنات حول بعض ونطقت تسنيم : وش ؟
منيرة : من منكم عندها علم باللي صار لمطلق ؟
وداد : محد ولا شايفتنا رحنا للمستشفى
منيرة ضحكت وقالت : زوجك هناك ورا م تسألينه ؟
وداد رفعت جلالها على راسها ونطقت : لأن يإختصار م يهمني مطلق
تسنيم شدّت على قبضتها وقالت : عادي اسأليه وشوفي
نهال ضحكت بسخرية وقالت : شكلك انتي الوحيدة اللي مهتمة لمطلق
تسنيم رفعت عيونها وشافت نظرة منيرة لها ونطقت : لا لا بس فضول
منيرة ابتسمت لها وقالت : امشوا ندخل طفش برا
تسنيم قامت وقالت : جدتي موصيتني اشوف كيس علاجها عطته ضاحي ونساه داخل
نهال : لا تبطين
هزت راسها بنعم ومشت ودخلوا الخوات مع بعض ، فتحت باب بيت مطلق وابتسمت بوسع ثغرها ونطقت : اخ ريحته تملئ المكان
مشت تدخل المجلس وشافت اغراض له ، تقدمت لها وهي غرقانه بتفاصيله ، هي تدري ان بينها وبين مطلق البين وانها صغيرة وجدًا عليه لكنها تهواه ، مشت تدخل وحصلت جوال ضاحي القديم فالمقلط ، تقدمت ومسكته وشغلته ونزلت بعيونها تدور رقم مطلق ، حصلته وسجلته ومشت تطلع من البيت وتقفله وراها وترجع لبيت أهلها ..
~ فالجو تحديدًا سماء نجَد ~
جالس يناظر مع النافذة ويهوجس ، هو خرج على عجلة وقت رجع البيت فالجبيّل ونسى اذا قفل أنوار المطعم ولا لا ، اخذ نفس وفتح جواله يتصل بولد عمه ، اخذ ثواني معدودة ووصله صوته وهو يقول : هلا والله هذام
هذام ابتسم وقال : هلا هلا عقيل بالله عليك تأكد لي من المطعم انا قفلت الأنوار ولا لا
عقيل ابتسم وقال : ويين انا مسافر
هذام : اسألك بالله ؟ طيب حسن ولا هاني موجودين ؟
عقيل : بتصل عليهم لا تشيل هم
هذام ابتسم وقال : م تقصر يالذيب
قفل الجوال ولفّ لسلمان جنبه وقال : لا تنكد على سطّام تسمع ؟
سلمان ابتسم ولا نبسّ بحرف واحد ، زفر بملل يلّف لأبوه اللي واضح شايل هم ، هبطوا على أراضي الرياض ومشوا ينزلون من طيارتهم ، دخلوا للمطار وابتسم هذام من شاف صادق ومشى له يسلم عليه ويركب السيارة وتبعوه نهيّان وسلمان ، انطلقوا لبيت سطّام وضيفتهم حليمة وجلسوا بأنتظار لجيّة سطّام ..
~ بعد ساعات ~
دخل البيت منهلك ويمشي بهدوء ، رفع راسه وشاف نهيّان ونطق : وصلتوا ؟ الحمدلله على سلامتكم
نهيّان تقدم له ونطق : يسلمك ربي كيف مطلق ؟
سطّام انحنى براسه على كتف أبوه وهمس : م شفناه ولا سمعنا عنه خبر
نهيّان مسح على ظهره ونطق : بخير بخير ان شاءالله تعال ريح
مشى مع أبوه وابتسم يضمّ هذام اللي مشى له ، شّد عليه وقال : بسم الله عليك اهدا يعيون أخوك
سطّام ابتسم بتعب وقال : تعالوا داخل
مشوا يدخلون وألتفت يدخل للمرسم ، مشوا للصالة وجلسوا وشوي ودخل سلطان للبيت وقال : الله وش المفاجأة الحلوة هذي !
ابتسموا يقومون له وسلموا عليه ونطق : وين سطّام ؟
نهيّان : والله من الدخولية والروقان شكلك م تدري وش صاير ؟
سلطان قطّب حواجبه وقال : لا وش صار ؟
سلمان ابتسم وقال : وهذا اللي يتعزوى به سطّام ويقول له ذراعه الأيمن ! امحق
هذام ناظر بسلمان بحدة واستحقره يقول : مطلق صار عليه حادث
شهق سلطان بصدمة ونطق : لا حول ولا قوة الا بالله ! هو طيب ؟
نهيّان نطق : م جانا علم
لفّ لدخول سطّام ونطقه : انا طالع بنام
مشى له ومسكه وقال : وشفييك ؟
سطّام : م فيني شيء صحوني الصباح اروح لمطلق
سلطان هز راسه ومشى سطّام يرقى الدرج ، صدّ ورفع جواله يتصل على ضاحي وسرعان م رد وقال : هلا سلطان ؟
سلطان : سلامات سلامات وش اللي حاصل وخارج من الشر مطلق طمني عنه
ضاحي ابتسم وقال : الله يسلمك ولا يجيك الشر والله منعونا من الزيارة وبنجيه اذا صحى والحين طالعين
سلطان : يعني مقدر اجي بكره ؟
ضاحي : م ظنتي لكن ان شاءالله يصحى الشيخ بكره ونجيه كلنا
سلطان ابتسم وقال : بإذن الواحد الاحد اجل ودعتكم ربي
ضاحي ابتسم وقال : في امان الله
قفل الجوال ولفّ يرجع للصالة ..
~ الخرج ، بيوت آل عمر ~
بعد الحادثة بـ ليلتين ، سلمت من صلاتها ورفعت يدينها تدعي لأخوها ، هي من عرفت عن حادث مطلق لا نهارها نهار ولا ليلها ليل ، تبكي وتشاهق وتحسّ بجمر ينزل على صدرها ، لوهلة هي نست القضاء والقدر وتشوف نفسها سبب بحادث مطلق ، مسحت دموعها وقامت وشهقت من حسّت بنزول حاجه مُبتله على فخوذها ، شهقت بألم ونطقت بخفوت : مش..مشعل !
م كان منه أجابه رغم انه معها تحت سقف واحد لكنه غارق بنومته وهي صوتها م اسعفها ، بكت علطول وقالت : مشعل
تحرك يلّف لجهة الصوت وفتح عين وهمهم لها ، مسكت مفرشها ونطقت بحدة : مشعل الحقني !
فزّ من نومته وكانت طايحه على المفرش وتبكي ، قام لها وسرعان م نزلت عيونه للأرض الغرقانه بدمها ، توسعت عيونه بصدمة وشالها بين يدينه وركض يطلع وصرخ : جووري روحي لحمود فالغرفة !
طلعت جوري وفصلت سماعتها عن راسها ونطقت : بسم الله وشفيكم بعد ؟؟
مشعل لفّ لبنته وقال : يبنتي روحي لأخوك ماهو وقته
جوري تقدمت وباست راس صافية ونطقت : أمي انتي بخير ؟
هزت صافية راسها بنعم وقال مشعل : خلاص امشي داخل اذا صار شيء كلموا جدكم ولا جدتكم
جوري : لا تشيل همنا أهلنا كلهم موجودين
طلع يركض بزوجته وركب السيارة ولفّ على صوت أخوه
علي : سلامات وش صاير ؟
مشعل نطق بتوتر : مدري بس ان شاءالله خير خلك عند الصغار وساعد جوري فالبيت
علي ابتسم وقال : بعيوني معليك
مشعل ركب سيارته وطلع يحرك للمستشفى ، لفّ علي له وابتسم يدخل البيت ونطق : جويّرتي
رفعت راسها بقوة وهي تمسح الدم بالغرفة ، شهقت تركض وتقفل عليها الباب بهدوء ونطقت : الله ياخذه الله ياخذه
رجعت خطوتين من سمعت صوته عند الباب وهمس : مشعل وصافية راحوا افتحي لي
شّدت على لبسها تتذكر اللي حصل لها مع أصغر اعمامها ، عضّت شفايفها وبكت بدون صوت ، هي من وقت م قرب منها ولمسها بطريقة بشعة عجزت تتقبل نفسها ، كانت تسمع صوته ومتقرفة من همساته ، شغلت أغنيتها ورفعت الصوت ع اخر شيء اخذت نفس ورجعت تمسح الدم ، هي سكرت على خواتها وحمود معها بالغرفة وم بقى لـ علي تهديد عليها ، ضرب الباب بقهر ومشى يطلع من البيت وهو يتهددها ..
~ المستشفى ، غرفة العمليات ~
شيكوا على كل شيء فيه بعد م صحى من غيبوبة دامت ليلتين فقط ، تقدم وابتسم الدكتور ونطق : لا طيب وبخير
مطلق ابتسم وقال بهدوء : ربك كاتبٍ لي عمر
الدكتور : الحمدلله ع كل حال فيك كسر بيدك اليمنى وشعره بالقدم اليسرى
مطلق : خير خير
الدكتور : اي والله خير الحمدلله دائما وابدًا
مطلق : يعني بطلع للقسم
الدكتور هز راسه بنعم ومشى يطلع ، نزل عيونه ليده المجبرة وملفوفة على رقبته بقماش أسود ، قام يمسك عكازته ويمشي بهدوء على رجله يطلع مع الممرض ، ابتسم باسل لمطلق وقال : تحس بشيء ؟
هز راسه بنفي وقال : لا تقول اني تحت التخدير ؟
باسل ضحك وقال : يعني فيه نسبة بنج بجسمك اذا راحت ممكن يبدأ معك الألم
مطلق : عز الله كدينا خير
باسل رفع عيونه وقال : شكلها وحدة من أهلك
رفع عيونه مطلق يشوفها مغطيه منطوقها بيدينها تكتم شهقاتها ، محاجرها الخُضر متببلة وبشدة ، مشت له وتقدم لها ونطق : بنت الحجاز !
عِقد ابتسمت وسط دموعها وقالت : الحمدلله على سلامتك ليّا قرابة التلات أيام مو قادرة أنام ودوبك دحين تقرر تصحى ؟
ابتسم وقال : المعذرة الظروف اقوى مني وانهد حيلي ولا أعقب اسهر عينك واتعبك
عِقد ابتسمت تبعد شعرها عن اذنها وقالت : لا ! حصل خير والحمدلله على سلامتك وخطاك البأس
مطلق : وين الجماعة ؟
عِقد : طلعوا من ساعة تبى أوصلك ؟
مطلق مشى ومشت بجانبه وقال : كنت بموت
عِقد شهقت وقالت : لا تقول كدا !
مطلق : اعلمك وش حسيت فيه
زفر بضيق وقال : خلاص بسكت
طلعت ساعته وقالت : اسمع كنت لابسها بيمينك صح ؟
لفّ يناظر بعيونها اللي باين عليها أثر السهر ، وعضّ شفايفه من نزلت دمعتها ونطق : ان بغيتيها بعقل يبنت الحجاز بقول خلي عينك تهل دموعها وش عليك ؟ أنتي خدّك ورد و دموع عينك ندى وان بغيتيها بقلب مطلق الصادق بقول ما يليق بخدّك الغض دمع الإنكسار دمعك أول دمع يمشي على سطح القمر !
ميّلت راسها تتأمل حروفه وجمال معانيه ونعومة حكيّه ، هزت راسها بالنفي ونطقت : لا تأمل ولا تأمن بنت المدينة وبنت البحر انا اجيك بيوم هايج ومليان كلام وحكي ماله سنين طويلة وبلحظة م تسمع عني خبر انا م اضمن لك وجودي الدايم وياريت تفهمني ولو شويا
كانت اجابتها القصيرة أثقل شيء سمعه مطلق ، هي رفضت كل حاجه وهي سدت كل مداخله وهي وقفت بطريقه ومنعته يكمل هي رفضته بالعلن وأفصحت برفضها له لكنه اكتفى بالقول : انتي بحر ؟ وانا ببحر بك وانا الغريق اللي فيك رفض نجاته !
عضّت شفايفها تمد له ساعته ونطقت : لا تفهم اوكيه ؟ وأتركني بحالي أنا وأنت ؟ مستحييل
نزلت ساعته ومشت تخليه وراها ، هي كانت خايفه يعترف لها بشكل غير مباشر ، هي بعد اعتراف وصال رفضت تسمع كلام ثاني من غيره ، بدأت تشوف الأمل بعيون وصال وانه بيتحقق اللي كان قبل احد احلامها ، ماهي صعبة يطلق ويتقدم لها ، مسحت دموعها بعنّف وقالت : احسن لي واحسن لُه
مشى للأستقبال وشّد ع قبضته ، هو شلون خسرها قبل يبدأها هي وقفت قدامه قبل يحاولها وقطعت سُبله قبل يوصلها ، زفر بضيق ونطق : الله المستعان
اخذ اغراضه وفتح الكيس يطلع جواله ، ابتسم وقال : ويبوني اشتري الجوالات الجديدة وعندي كشاف حتى بعد الحادث م جاه خدش واحد !
كان بيتصل على ضاحي لكن وصله اتصال من رقم غريب ، فتحه علطول وقال : مرحبا ؟
قفلت بوجهه علطول وشهقت تنطق : وربي انه هو !!
نزل جواله ونطق : لا حول ولا قوة الا بالله
شهق من تذكر صافية ، انتفض قلبه واتصل بضاحي ينتظر رده لكن م وصله رد ، ورفع الجوال يدق على سطّام وما اخذ ثواني الا ووصله صوته الناعس وهو يقول : ياهو تأثير النوم ولا انت صحيت
مطلق ابتسم وقال : مرحبا يبو وفاء
فزّ يناظر جواله ونطق : مطيليق !؟
مطلق : لبيه يالهَاجس
نطق بحدة : جايك جايك انتظر !
قفل الجوال واتصل على ظبيه ، ردت علطول وقالت : الو مطلق ؟
مطلق نطق : تكفين قولي لي ان صافية بخير
ظبيه شهقت تبكي ونطقت : بخيير بخير جعلها العافية كان مقلب لجوري وجوري انفعلت
مسك مكان قلبه يحسّ انه وقع ، اخذ نفس طويل وزفره ، رفع راسه وقال : يفداكم عمري اهم شيء انتوا
شهقت تبكي بشكل مرعب وقالت : حن أيش بدونك ؟ علمني والله نضيع انت أبونا وأمنا تكفى لا تخلينا وتسوي سواتهم
ابتسم يمسح طرف خشمه وقال : العافية م حصل شيء جايكم
ظبيه ابتسمت وسط رجفتها ودموعها وقالت : والله اللي مرحبا بك ي حبيب اختك
مطلق ابتسم وقال : بتنضربين ع الدموع ذي سامعة ؟ انا كبرتك عشان تبكين علي ؟
ظبيه ضحكت وقالت : ابكي من غلاتك اي والله ابكي
مطلق : جعل يومي قبل يومك يالظبي
ابتسمت وقالت : مجار ينظر عين الظبي
مطلق : ودعتك الله
ظبيه : لا تباطى علينا
مطلق : ابد جاي
ظبيه ابتسمت وقالت : ودعتك ربي الذي لا تضيع ودائعه
قفل الجوال مطلق يمشي بمعكازه للبوابة ، طلع يشوفها واقفة ولفّت له ونطقت : اركب حوصلك معايا
صّد مطلق يطلع بوكيت دخانه ، اشعلها وهو يتأمل عيونها ونطق : الله يستر عليك
ميّلت شفايفها وركبت سيارتها تتركه لوحده ، شّد ع عكازته وصّد يتأمل الطريق ينتظر سطّام وأردف : من بلاه الهوى ربي يعييّنه !
ضحك من عيشته ووضعه المُبهم معها ، قطعت الطرق بينهم وهو بدوي وعنده عزة النفس فوق الكل ، مستحيلة وهو عشق مستحيلها بس توقفت الدروب وبيوقف العشق غصب وبيجبر عمره ينسى ، ان زانت فهو لها وبيرجع يحاولها ويعشقها ويعيش معها الهوى بدربه الطويل ، وان م عادت وعاد هواها فمطلق حيّ م توقفت حياته عليها ..
~ حيّ الياسمين ، بيت عِقد ~
دخلت وشعشع النور من ابتسامتها من شافت سيارته واقفه بنص حوشها ، نزلت منها وقالت : وصال ؟
ابتسم ينزل من سيارته ومشى لها وقال : نتزوج ؟
توسعت عيونها بصدمة وقالت : واو وصال ! م انت حاسس انك مستعجل ؟
قرب من أذنها يهمس ويقول : لأني مقدر اتحمل بعدك اكثر ولا ارضى الحرام عليك قبل ارضاها علي
عِقد ابعدته عنها وضحكت تقول : نهاية الأسبوع ؟
وصال ميّل راسه ونطق : بعيييد الليلة ؟
ضحكت وقالت : اللي انت عاوزُه !
ضحك يسحبها مع يدها ويركبها سيارته ، ابتسم يركب بجانبها وينطلق لوجهته ، طلعت جوالها وأرسلت لأروى تكتب لها بفرحة : ي بنت ! حنتزوج
ردت علطول وكتبت : بلا عبط !! انتي وميين ؟؟
ضحكت بهدوء وكتبت : وصالي
أروى : واو واو صدق رجعتوا ! حتملكوا ولا أيش
عِقد : ايوه وانتي معاي
أروى ضحكت وارسلت : طالعه من البيت وجايه أرسلي لي موقعك
ابتسمت وكتبت : من اوصل حرسِلُه
قفلت جوالها ولفّت تشوفه جنبها ، يكبر فرحتها فيه ويكبر حُبها له ، ابتسمت ونطقت : وصال ووداد ؟
وصال : طلقتها
شهقت بصدمة وقالت : منجد ؟
هز راسه بنعم وقال : انتي الأولى والأخيرة تتوقعين اخذك عليها ؟ بس بشرط
لفّت عليه وقالت : اش هوا ؟
وصال : كلمت سطّام من عرفت بالقضية وهددته وقال يبي فلوسه ومسكته وجبرته يعطيني الدين وانا اللي اسدده ووافق عشان كذا ابيك تنسحبين م ابي اسمك فالقضية
رفعت حجابها تضبطه وقالت : يعني زيتونه م عليها بلاغ دحين ولا ايش ؟
وصال : يب م عليها شيء
ابتسمت وقالت : بس م معاي الابتوب حقي
وصال ابتسم وقال : معي انا عطيني معلوماتك
هي بدون تردد سجلت معلوماتها ودخل الموقع علطول وسحب اسمها من قضية اسرار وبقت بدون محامي على الرغم من أن اول جلسة بتكون بكره ، ابتسم وقال تحت انفاسه : غبية ! أنتهت القضية والربحان انا وبخمسة وثمانين ألف ريال !
قفل جهازه ولفّ ينطق : حسافة الدنيا مقفلة ؟
ضحكت وقالت : م قلت لك ؟ مستعجل وتبينا نتزوج اخر الليل
وصال : معليه نمر ناخذ قهوة وخليك جاهزة بكره تمام
هزت راسها بنعم وقالت : بأي وقت جاهزة وم ابى قهوة مو جاي على بالي أشرب
لفّ لها وقال : بزعل ! ترديني
هزت راسها بنفي وقالت : خلاص عشانك بس
ابتسم بسخرية ومشى يطلب لهم قهوة ويرجع فيها لبيتها ، اخذت القهوة وصورت تنزل فالسناب بفرحة ، وقف عند البيت ولفّ لها وقال : عيون وصال بكره تمام ؟
نزلت وقالت : تمام أنتبه لنفسك وللطريق وكلمني أول م توصل
وصال اشر بأصبعه ع خشمه وقال : ابشري على خشمي
ابتسمت وقالت : عليه الشحم ؟
ضحك يمشي وضحكت بسخرية تصدّ ، دخلت تركض لبيتها وهي ترقص بفرحة كبيرة تشابه العيد ارسلت لأروى فويس تقول فيه اللي حصل وحقيقة الزواج اللي م بيصير اساسًا ، قفلت جوالها تصمته وطولت على صوت سماعة البيت وصارت ترقص بفرحة ، ونطقت بحدة : تلعب على مين والناس نايمين ؟
ابتسمت لأنها لعبتها صح ودخلته على حساب قديم لها وكانت محملة ملف القضية فيه ، هو يحسب كل شيء انتهى بس بالحقيقة هي سابقته بمليون خطوة وبدون م يحس حتى ..
~ بيت منّير ، غرفة اسرار ~
تدور بالغرفة وتتذكر نظراته وكبرياءه وغروره ، والأهم ثقته العمياء انه بيفوز ، زفرت بغضّب وقالت : لو اني مو فالقضية كان حسّتك يالرسام !
جلست على فراشها اللي ع الارض ، فاتحه شباكها وجالسه بهدوء وتشرب شاهي وتفكر بكل شيء بيصير بكره ، هي من فرط التفكير ضاعت وخافت وطفت شمعة قوتها ، هزت راسها بنفي وقالت : خلاص اهدي وراك عِقد احد اكبر المحاميين فالمنطقة
مشت تسحب جلالها من على سجادتها ونزلت للطابق السفلي ، فتحت الباب الخلفي لبيتهم وطلعت تمشي حافيه ، انفتحت البوابات وغطت وجهها بجلالها الأسود ، دخلت الجي كلاس للحوش ووقف لأنه شافها قدامه ، ابتسم مطلق وقال : الله يهديك يبنت محمد
لفّ لسطّام ونطق : م قصرت يبو وفاء
سطّام كانت عيونه عليها ، يناظر فيها بحدة وبتحدي وبنفس الوقت بهيمان واضح على نظارته ، شافها تصدّ وتمشي لبيت مطلق ، نزل مطلق ونزل سطّام يساعده وقال : مطلق ماتت اليابانيه ؟
ضحك مطلق يمشي بمعكازه وقال : ايه وطارت الرابعة
ابتسم سطّام وقال : فالحديد ولا فالعضيد ي مطلق
مسك مطلق كتف سطّام ومشى معه للبيت ، دخلوا البيت وقال : اقلط
سطّام ابتسم وقال : لا والله وراي جلسة فالمحكمة بكره نتقابل بكره ؟
هز مطلق راسه بنعم وقال : اجل نشوفك على خير
ابتسم سطّام يرفع يده لمطلق يلوح له ومشى ، وصل ورا البيت وشافها جايه ، هي دقت الباب ومحد فتح لها وخمنت ان ظبيه نايمه عشان كذا عادت بأدراجها للبيت ، رفعت عيونها له ونطق : نشوفك بكره ؟
اسرار مشت تتخطاه بس مسك ذراعها مثل م هي سوت له فالمستشفى ، لكنه وبالخطأ سحب جلالها وطاح من على راسها ، سحبته ترجعه على راسها وهمست : أكسرها لك !
ابتسم يشوف عيونها الخُضر بوضوح بسبب نور سيارته ، مشت من قدامه وحكّ شاربه يرجع لسيارته ويركب وحرك علطول راجع لبيته ..
~ صباح الأحد ، المحكمة الجنائية العليا ~
دخلوا وصال وسطّام مع بعض ونطق : يعني وش خلاص ؟
وصال ابتسم وقال : ايه خلاص بس بنأخذ ختم القاضي وانه القضية تقفلت وخلاص نكون قفلنا وتحول لي الفلوس
سطّام ابتسم وصافح وصال ونطق : م قصرت..
ضحكت عِقد من وراهم وقالت : للأسف سبك وضايع ويحسب انو خلاص انتهى كل شيء !
لفّوا وتغيير وجه وصال مية وثمانين درجة ، ضحكت بإنتصار ونطقت : صباح الخير تفضلوا
لفّ سطّام بصدمة لوصال اللي انخطف لونه وصدّ يستغفر ووقف من طلعت اسرار بوجهه ونطقت : سلامات ؟ السيدات اولاً !
ابتسمت تدخل ومشت عِقد وراها وقالت : عشقي زيتونه
دخل يفّك ازرار ثوبه من حسّ بكتمة ، جلس ع مقعده وجلس وصال بجانبه وهمس له : طيب تخسى توصلك هللة وحدة
كان وصال مرتبك وجدًا ، واذا ارتبك يضيع عمره ويضيع وقت موكلة ودايم يطلع خسران ، زفر بضيق وقال : شلون صار وشلوون ! انا متأكد اني سحبت اسمها !
رفع عينه لأسرار بعيونها الضيقة دليل ابتسامتها الواضحة ، ولفّ لعِقد اللي أشرت له بأصبعها بمعنى ' الزواج ' وضحكت تصدّ وتوقف بملفها وبدأت المحكمة من جلس القاضي ونطقت : قضيتهم سرقة وقضيتنا اتهام باطل وتشهير ابدأ ؟
هز القاضي راسه بنعم وكملت عِقد تقول : اولاً اتهامهم باطل لعدم وجود اي ادلة تثبت سرقة موكلتي للوحة مثل م يدعي الطرف الاخر ، ثانيًا رفعت موكلتي قضية تشهير لأن الخبر انتشر وهي كمدعية عامة ممكن تتشوه سمعتها ، ثالثًا محامي الطرف الاخر عامل رشوة مع أحد الشهود اللي بيدخلون ومعاي الدليل لهالشيء ، أنتهى
القاضي : دليلك حضرة المحامية ؟
مشت عِقد تسحب ملف الأدلة ، وحطته قدام مساعد القاضي وشافه وهز راسه بالإيجاب ومدّه للقاضي يشوف وصال وهو يرشّي بجاد بأنه يكون شاهد ، رفع عيونه بغضّب وقال بحدة : عندك كلام ولا اعتراض ؟
هز وصال راسه بنفي وابتسمت تغمز لسطّام اللي وجهه محمّر وعروقه بارزة ، ضرب القاضي ونطق : من اول جلسة حُكم على سطّام بن نهيّان بن سلطان آل عقيل أما بالسجن لمدة ثلاث أعوام او بدفع غرامة مالية قدرها مائة ألف ريال لأجل الاتهام الباطل وأيضاً يتبعها عقوبة التشهير وهي سجن لمدة عام وغرامة مالية قدرها خمس مئة ألف ريال
مسح وجهه وشنبه ولفّ لوصال ونطق بغضّب : بدفعها
قام وصال ونطق : بندفع
قامت عِقد وقالت : قبل تغيب شمس اليوم
وصال بربكة نطق : تمام تمام
ابتسمت وانحكم على سطّام ووصال بالخسارة وطلعوا اسرار وعِقد ربحانين ، ابتسمت تضرب كفها بكف اسرار ونطقت وهي تحضّنها : ايوه زيتونتي وين ناوية نسافر ؟
اسرار ابتسمت وقالت : بشتري شقة فالرياض
ضحكت عِقد وقالت : عيب عليكي وبيتي ؟ والله يخدم
اسرار : طيب وشرايك اطلع سيارة ؟
عِقد : سيارتك جديدة اشبك م تعرفي تتخيري ؟
كانت بتتكلم بس لفّت من نطق سطّام بحدة وقال : بندمك ع اللي صار يبنت محمد تسمعين ؟
ضحكت وقالت : تبي نرجع ونقول انه يهددني ؟
مشى يقترب ووقف من وصل قدامها وأردف وهو يصر ع اسنانه : بصير اسوء كوابيسك
ابتسمت اسرار وقالت : وصلتني ريحة حريق صدرك أدفع تعويضي وبرسالة التحويل قولي وين تبي انثر رمادك ؟
شّد ع قبضته ومشى يتعداها ، ضحكت عِقد وقالت : مسكيين حزنتني صراحة
لفّت لأسرار ونطقت : نروح اسبانيا ؟
اسرار : حلو مدريد ؟
هزت عِقد راسها بنعم وقالت : مدريد اختيار موفق مدريد خيييييال !
اسرار ابتسمت وقالت : نجهز الشناط ؟ بنسافر بكره
عِقد صرخت بحماس وقالت : وصلت الفلوس !!
ضحكت اسرار وقالت : تشلوط ولد نهيّان
ضحكت عقد ومشت لسيارتها وتبعتها اسرار يطلعون من مواقف المحكمة ويتجهون لبيتهم ..
~ شركة 𝐻𝒶𝒿𝑒𝓈𝒮𝓊𝓁𝓉𝒶𝓃 ~
وقف سطّام فالمواقف ونزل يزفر بغضّب ، هو م خسر فلوس لأنه ست مية ألف م تعني له شيء بس هو خسر سيطرته وفرضه لشخصيته بأسوء وضع ، هو تواصل مع محامي م نطق بحرف واحد وقت المحاكمة ، دخل المصعد وضغط ع الطابق الثلاثين بينهي رسمة وبيسافر باريس يحضر المقابلة والافتتاح الرسمي لفندق أندريه خوسيه ، وصل للطابق ونزل علطول وقال بصوته الرخّيم والجهورّي : مشهور جهزوا لي لوحة رقم ١٧
مشهور فزّ ونطق : مكتملة ولا غير مكتملة ؟
سطّام دخل مكتبه ونطق : غير مكتملة
نزع ثوبه عنه وفتح دولابه الضخم بغرفته ، سحب شورت له ومسك المريول يلبسه ع صدره العاري وربط عيونه يعميها عن الرؤية ، مسك لوح الألوان وبدأ يرسم صورة يشوفها بمخيلته بس م يشوف خطوطها ولا حتى ألوانها ، هو يدري انها تتراوح بين الأسود والأبيض وهذا اللي مريح ضميره ، يرسم بحرقة صدر ووقف فجأة من مرّ طيف عيونها بالليلة الماضية ، زفر عصبيته وبدأ يشكل صورتها على اللوحة ، وهي ماسكه اللثام على وجهها وعيونها كُل م يُرى أمامه ، يرسم ملامحها وهو يحترق بغيضه ، ضحك بسخرية وقال بحدة وحرقة صدره : ‏حطتني عدو لها م تدري اني أبلش عدواني ؟وإني بخلي كل أيامها تستضيق عليها ، حدتني اضرب وانا لا ضربت اضرب بكف من حديد م يهمني احد ولو انه غالي علي أجفاه م رفّ لي جفن ! عطتني بمعرفتها درس والدروس بزماني من خسرني وخسّرني بالرخيص أبيعه بالتراب ولا عمري ألتفت للحسايف ، أحرق عيونك الخُضر وأطفي لونها برماد صدري
شال الشال عن عيونه يشوف اللوحة وملامحها قدامه ، انحنى يوقع عليها ويختمها بـ ' completed ' طلع ينادي مشهور ووصل عنده ونطق : خلصتها ارسلوها للفريق النشر والشحن
مشهور شالها ونطق : على خشمي
نزلت يركض ومعه اللوحة ، ورجع سطّام يتكي على مكتبه وكل تفكيره وين لوحته وكيف ينتقم من سبب خسارته وضياعه ..
~ حيّ الياسمين ، بيت عِقد ~
دخلوا للبيت ومشت ترتمي على كنبها بتعب ، ابتسمت لها اسرار ومشت تفتح الباب المطل على المسبح وترجع تجلس جنبها ، رفعت راسها وقالت : حقولك حاجه
اسرار : غردي
عِقد شابكت يدينها بيدين اسرار ونطقت : صراحة أتمنى م يزعل منِك أنتي كمان لأن مالك صلاح باللي صار
اسرار شّدت على كفوفها ونطقت : اذا تقصدين وصا..
قاطعتها وقالت : لا مو هوا وم حقولك مين الشخص بس فيه واحد اعترف لي بس بشكل غير مباشر..
قاطعتها اسرار من سحبت كفوفها ونطقت : وش الجديد ؟ يكثر اللي يعترفون لك يالبلاير
ضحكت وقالت : معفنه ! م اقصد كذا اشبك ؟
ضحكت اسرار تنسدح على رجولها وتنطق : كملي
عِقد : المهم انا م اشوفو حاجه اصلاً يعني مجرد شخص عادي لا اكثر ولا اقل ووقت اعترف رفضتو بطريقة غبية
اسرار رفعت عيونها وقالت : وانا وشدخل أمي في رفضك له ؟
عِقد زفرت بملل تقوم وطاح راس اسرار ع الكنب ونطقت : أنتي اصلاً مو مركزه معايا
اسرار : طيب نسحب ع سالفة رفضك ؟ لأني هونت م ابي مدريد
عِقد جلست وقالت : حلو اش تبغي ؟
اسرار : تبين مدينة ساحلية ؟
عِقد : صراحة تعرفيني قد أيش احُب البحر بس عشانو لزيتونتي م تفرق معايا أنتي اش ودك تسوي ؟
اسرار ابتسمت وقالت : أتزلج
عِقد زفرت بملل وقالت : برد اخ منك مو جوي اش مسوي معاكي الصيف ليش م تحُبيه !؟
اسرار : سهلة ولدت فالحر وابي اهج منه
عِقد ضحكت بسخرية وقالت : طيب تزلج حتوقعي وتبلشيني سوري
اسرار : وشفيك ؟؟ لعبتي
عِقد ابتسمت وقالت : عيوني نروح كاليفورنيا ؟
اسرار رفعت كتوفها بعدم معرفة وقالت : تعرفين شيء هناك ؟
عِقد ابتسمت وقالت : عييب عليكي ايوه اعرف وادي اسمو سكوا او سوكا على م اظن
اسرار ابتسمت وقالت : بسرعة نحجز
عِقد : اش رايك نأخد ظبيه معانا ؟
اسرار ضحكت وقالت : مطلق م يخليها ترجع معي من الجامعة تبينه يوافق ؟
زفرت بتوتر من طاريه وصدّت تطلع اللابتوب وبدأوا بالحجوزات على الفنادق والمطلات في كاليفورنيا ..
~ فرنسا ، باريس ~
قدام أضخم وأشهر المعالم في باريس ' بُرج إيفل ' جالس ويشرب قهوته بهدوء ، رفع عيونه لأندريه اللي مبسوط يتأمل صورة خاصة باللوحة وهي معلقة بمكانها المخصص في أستقبال فندقه اللي بيستفتحه الليلة ، كان ميت فرح وطاير فيها ، ابتسم بخفه ونطق بالفرنسي : qu'en penses-tu
*إذن ما رأيك ؟*
ضحك أندريه للغة سطّام الفرنسية وأردف : vous plaisantez j'espère !  c'est incroyable
*هل تمازحني ! إنه شيء لا يصدق*
ابتسم سطّام يترشف باقي قهوته ولفّ لأندريه اللي يستنشق سيجارته يستأذنه لأجل يتجهز للأفتتاح الليلة في أضخم فنادق باريس المطلة على أشهر شوارعها ، مشى يدخل شقته ويقفل الباب وراه ونطق : فيه أحد ؟
هو متأكد انه قفلها بس يمكن خدمة الغرف ، دخل داخل غرفته وشاف رسالة على السرير مشى لها بروقان وسحب الظرف يفتحه ويقرأ الرسالة اللي مكتوب فيها :
السلام عليكم ، سطّام صح ؟ اذا وصلتك الرسالة فأنت الشخص المقصود انسرقت منك لوحة قبل فترة قصيرة وأنا أعرف مين اللي سرقها ، بعطيك مهلة تشوف كاميرات مراقبة بيتك يمكن فيها دليل وأن م حصلت أول شخص طرى لك وأتهمته هو دليلك .
قفل الرسالة وجلس بهدوء على طرف السرير يقلّبها براسه ، مين المرسل وليش قاعد يأشر بكل وضوح على اسرار وأنها هي دليل سطّام ، ضحك بسخرية وقال : الحين ذا الشوّو كله عشان م أرجع اتهمها ؟
قسمها نصفين بين يده وبدأ يقطعها لأجزاء صغيرة ، قام يدخل الحمام ويأخذ شور يجهز فيه نفسه للحفل الليلة ..
~ فالديرة ، عزبة مشبب ~
تاكي ويعّد إبل أبوه ، صدّ ينزل عيونه لبوكيت دخانه وابتسم بهدوء ينطق : من بلاه الهوى ربي يعييّنه صابه الهم ولا مات مغبوون ، هأني ذيا صابني الهم وشكلي بموت مغبون الله حسيبه غنوج المدينة لعب فيني لعب
تقدم ضاحي ونطق : منهو ؟
مطلق لفّ عليه وقال : بو مطحس
ضاحي زفر بملل وقال : والليل مع أبو مطحس وبعدين انت م قالك الدكتور تهجد فالبيت ؟؟ من ثالث يوم قدك سارح للغنم ؟
مطلق : يصبني الهم من البيت
ضاحي جلس يقول : والله م اعلم وانا أخوك هو من البيت ولا صابك الهم من الهوى
مطلق جلس وقال : مابه الا كل خير
ضاحي : ان شاءالله
عمّ الصمت بينهم لدقايق معدودة ونطق ضاحي : سطّام م قال انه بيخطب ؟
مطلق ابتسم وقال : عز الله العزيز انك جبتها يبو مشبب !
ضاحي ابتسم وقال : أبشر بي !
سحب جواله وأتصل على سطّام لكن م وصله رد ابدًا ، زفر بملل وقال : تهقاه هوّن ؟
ضاحي : بكسر خشمه ظبيه أغلى منه
مطلق : صادق والله بس م ظنتي يسويها
ضاحي رفع جواله وقال : مابه أرسال ولا كان دقيت عليه واتس
مطلق : معليه ماحن مستعجلين والبنت م عندها علم نتشاور وبعدها نشوف
ضاحي قام وقال : اجل مشينا طبختني الشمس
قام مطلق ومشوا راجعين للبيت ..
~ فالديرة ~
لفّت بملل لتسنيم اللي تسولف بنفس الموضوع لها فوق ساعة بدون بريكات ، مسكت راسها وقالت : تسنيم !
لفّت تسنيم لظبيه ونطقت : سمّي ؟
ظبيه : أخواني جايين يعني لو تكرمتي
تسنيم : يختي عليك حركات ! اصلاً محد منهم يدخل داخل
ظبيه ابتسمت بكلافة وقالت : ايه ذاك قبل بس الحين مطلق داخل طالع عشان اصاباته
تسنيم زفرت بملل ورفعت حجابها على راسها وقالت : اذا طفشتي تعالي تعرفيني ماعندي الا بتال ولا هو يجلس فالبيت كثير وماعندي خوات يسلوني مثلك ننبسط مع بعض تمام ؟
ظبيه بتسليك أردفت : اكييد اكيد أخلص من مطلق واجيكم
تسنيم طلعت مع الباب الخلفي وزفرت بغضّب من م حصلت أحد ومشت تركض لبيتهم ..
~ باريس ، فرنسا ~
يضبط بدلته الرسمية ويحاول جاهد يربط عُنقه بربطة ، زفر بقرف يرميها ونطق : ضيعني الثوب السعودي ! حتى نسيت كيف اسويها
ترك ازرار قميصه مفتوح ومسك الجاكيت يلبسه ، سحب ساعته يضبطها على يده ومشى يلبس شوزه ويطلع متوجه للفندق ، وصل بعد ربع ساعة من الزحمة لأجل الافتتاح ودخل داخل بين الضيوف والضجيج اللي يصير قدام مدخل الفندق ، مسكه البوديقارد يستوقفه وينطق بالفرنسي : Où est votre carton d'invitation, monsieur ?
*أين هي بطاقة دعوتك ، سيدي ؟*
سطّام زفر بضيق من الزحمة ونطق : English please !
*الانجليزية لطفًا !*
ابتسم البوديقارد بلطف ونطق : sorry sorry no English
*المعذرة المعذرة لا إنجليزية*
مسح وجهه وشنبه وقال : وش الحل ؟
أشر البوديقارد على نسخة من الطاقة ونطق : Card ?
*بطاقة*
ابتسم له يستوعب وسحبها يوريه وسجلوا حضوره ومشى يدخل علطول ، توسعت عيونه بعجّب هو يهوى هالأماكن اللي الكل مشغول بنفسه ابتسم يشوف الكل متجمعين عند لوحة عيونها والتصوير وبرامج التلفزيون المتنوعة والصحافة تأشر على المالك أندريه خوسيه وهو قاعد يشرحها بكل حُب ، ابتسم ونطق : تحتفل باريس كلها على دق رمشك وتفرح أوروبا بكبرها لأجل عينك !
'
انتهى البارت ادعموني بنجمة وكومنت عشان اتحفز اكملكم 🩵
" ي صباااااح الخيير ، نزلت لأني بقطع فترة طويلة لأجل سفرة ودي أخذ راحتي فيها ، لا تنسون النجمة يحباااني وودعناكم الله 🩶🩶🩶"