الهَوى اسّرار وهَواجِيس واحّلام ... والىَ متّى واحّلام وصِلك بعّيده

البارت الثاني والعشرين

'
دخلت ريم وبناتها ونطقت : لا اله الا الله يادرة الحسن !
ابتسمت بوسع ثغرها ونطقت : كييف ؟
أنهار صرخت بحماس وقالت : وقسم بالله قمر !
أزهار ابتسمت وقالت : والله أقمر من القمر
ضحكت أبرار وزغرطت مع أمها وخواتها ، ابتسمت اسرار ونطقت : تسبقوني ؟
ريم ابتسمت ومشت تحصّنها ومن أنتهت باست جبين بِكرها ونطقت : ودعتك الله
اسرار ميّلت شفايفها لثواني ونطقت : ماودي أبكي
ريم ابتسمت ابتسامة عريضة وقالت : يويلك
سنجار : ننزل معك ولا كيف ؟
اسرار : انتظروني عند الدرج
مشوا كلهم يطلعون وتقدمت بخطواتها تطلع من غرفتها ، وقفت بمُنتصف الممر وأخذت نفس عميق ومشت تنزل بهدوء خطواتها ، لحّد ماوصلت للطابق الأول ، ابتسمت تدخل ذراعها بذراع أيار اللي مشى معها ، نزلت وهي تشوف سنجار وجينار ينتظرونهم بآخر الدرج ، مشوا يرفعون طرف فستانها ويدها بيد أيار ، ابتسمت تشوف نظراته لها وهي تمشي له ، بدأت تقرب ووقف أيار ووقفت معه ، رفعت عيونها للقمر الواضح من انفتح السقف وطاحت الورود البيضاء عليها ، ابتسمت من تقدم لها ورفعت بيدينها تحاوط رقبته ، ابتسم يحاوط خصرها وينطق : يزهاك الكريستال والالماس والله إنه يزهاك يازاهيه !
ابتسمت بوسع ثغرها ونطقت : أحبك ي بِكر نهيّان
سطّام ضحك بخفه وقال : تبًا للأكسجين ي بِكر محمد أنا أهواك وش تبين بعد ؟
ضحكت معه وتمسكت بذراعه ومشوا سوا  يطلعون للحوش الخلفي ، صرخوا الضيوف من شافوا العرسان طالعين تحت نور القمر والشموع الخافته ، النور الخفيف الأبيض يقودهم للكوشه ، ابتسمت تشوف دموع ريم وبكاء خواتها وصراخهم وتصوير أبرار لكل لحظة ، وصلت لنهيّان اللي احتضّنها وكأنها أحد بناته وقبّل جبينها ونطق : زادت حياتي بهجة بمجيئك أنتي غيرتي أشياء كثيرة بداخل بِكري ! قبل عشر سنوات خلت إني فقدته لكن تغيير كل شيء من عرفك سطّام تغيير ! أنتي وفاء لقلبه وأصدق أمانيه وأجمل أحلامه وأهّون هواجيسه يكبر حظوظ سطّام فيك يابنت ريم !
ابتسمت من نطق بأسم أمها وقالت : أنا المحظوظة فيكم ي أبوي !
ابتسم سطّام وقال : مابنطول ترا
هزت راسها وألتفتت من تقدمت ريم تسلم عليهم ، ضحكت ومدّت باقتها لريم اللي وقفت ونطقت : أشبك ؟
صرخوا الحضور البنات من تقدم نهيّان لها ، توسعت عيونها بصدمة وقالت : اش حيصير ؟؟
ضحكت اسرار وسطّام معها ونطقت : حتتزوجي
سطّام ابتسم وقال : أموت يالثغر الحجازي !
ابتسمت له تشّد على ذراعه ، ابتسمت ريم ونطقت : وصراحة نهيّان لقطة ماحخليه يفوتني !
ضحك نهيّان بفرحة وصرخ سلمان من خلف الأسوار : الله أكبر !!
ضحك سطّام وقال : الشيخ عند الباب
مشت ريم وهي تضحك بصدمة ونهيّان معها ، ابتسم سطّام يتلفّت لها وينطق : والحين بخطفك
شالها بين يدينه وصرخت عِقد بحماس كبير رغم شتم مطلق من خلف الأسوار ، صرخت اسرار بصدمة ونطقت : يامعتوه نزلني !!!
سطّام ابتسم وقال : بصير حمار بعد لو ما استغليت الفرصة وهربت
نزلها عند الباب وفتحه ، مشت بخطوات ثابتة للسيارة وركبت ، ابتسم سطّام ونطق : مبارك عقد قرآنك يأبو سلطان ودعناكم الله
نهيّان ابتسم وقال : الله يحفظكم
مشى ووصل لباب سيارته وركب معها ونطق : مشينا ؟
ضبطت العباية البيضاء عليها ونطقت : ايوه تنتظر شيء ؟
هز راسه بنفي وشغل سيارته ومشى يبتعد عن القاعة ، ابتسم وقال : بنريح اليوم وبكره بنسافر
اسرار : على هواك
سطّام ابتسم وقال : أنتي الهوى كله
ضحكت بخفه وشابكت يدها بيده ، شّد على كفها وكملوا طريقهم للفندق ..
~ أمام القاعه ~
خرجوا كل الضيوف من القاعه وانتهى عرس الدهر ، عرس خفيف لكنه يحمّل مشاعر وتفاصيل تُخلد بالقلوب ، عرس منتظر وجاء وحمل معه البهجة والسرور لقلوب الكثير ، وقف سلمان ومشت انفال وبيدها رواف وركبت بجانبه ونطقت : رواف تعبان
سلمان ابتسم وقال : أسد أبوه عطيني ياه
مدّت رواف لأبوه وشاله ونطق : حرارة ؟
انفال هزت راسها بالايجاب وقالت : ايوه
سلمان : البيت ولا المستشفى ؟
انفال : والله قلقانه
سلمان ابتسم وقال : للمستشفى
هزت راسها ومسكت رجول ولدها اللي نايم بحضّن أبوه وفسخت شرابه وجزمته ، رفعت عيونها لسلمان ونطقت : تعبان ؟
سلمان ألتفت لها وقال : مين ؟
انفال ابتسمت وقالت : أنت
سلمان هز راسه بالنفي وقال : لا ليه ؟؟
انفال : أجل مرهق
سلمان ابتسم وقال : لا يابنت بس حوسة العرس بس
انفال ابتسمت وقالت : ان شاءالله تكون حوسة عرس
سلمان ضحك بخفه وقال : ياحلوك
شّدت على ذراعه وركزت على طريقهم للمستشفى ..
~ بسيارة نهيّان ~
عبدالصبور يسوق السيارة ، نهيّان بالخلف وريم بجانبه ، ابتسم ونطق : سامحينا يابنت خالد ما لقينا فرصة نتعرف عليك
ريم ابتسمت ابتسامة عريضة وقالت : عادي والله
نهيّان ابتسم وقال : ولا يجي بخاطرك شيء اي شيء ماهو معجبك قولي لي وأي شيء خاطرك فيه بعد قولي لي
ريم ابتسمت وقالت : ماتقصر والله
ابتسم نهيّان يشوف كمية العوض اللي تنهمر عليهم من دخلت اسرار لحياتهم ، عادت أشياء كثير كانت فكرة عودتها مستحيلة ، علاقة سطّام بسلمان عادت ، عاد سطّام يتنفس هوى ومحبة وخرج من هاجوس عام الألفين والحادية عشر ، قدر يتخطى معها كل الصعاب وتزوجوا بهالليلة الفريدة والكل شهّد على حُبهم اللي يخرج من انعكاس نظراتهم ، ويصرخ خارج من صدورهم ، الليلة حملّت مشاعر كثيرة وفرحة كبيرة ، وقفوا عند قصر نهيّان ونزلوا كلهم ، دخل نهيّان ونطق : هذام جيتوا كلكم ؟
هذام هز راسه بالايجاب وقال : ايه بس سلمان راح للمستشفى
نهيّان رفع حاجبة وقال : عسى ماشر فيهم شيء
هذام : رواف تعبان شوي
نهيّان ابتسم وقال : جعله بضلوعي
هذام مسك كتفه ونطق : بعيد الشر عنكم
ألتفت من دخلت ريم ونطق : أهلين يالعمه البطلة الحين سؤال
ريم ضحكت بخفه وقالت : ايوه ؟
هذام : يجوز لك تتزوج أم زوجة ولدك ؟
نهيّان رفع حاجبة وقال : من درسك دين عشان أعيد تأهيله معك
ضحك هذام وقال : تصعيد خطير ! مبروك لكم بروح أنام
مشى يركض للمصعد ، ضحكت وقالت : فين غرفتنا ؟
نهيّان : فوق بآخر الممر
هزت راسها ومشت ووقفت بمُنتصف الدرج ونطقت : أنت ؟
نهيّان : مايهنى نومي لحّد ما أتطمن على سلمان
ابتسمت وقالت : تمام حبدل ملابسي وأجيك
هز نهيّان راسه ومشى يجلس بالصالة ويتصل بسلمان ..
~ الفندق ~
دخلوا العرسان وابتسم سطّام يشوف مطلق ونطق : ماشاءالله كيف سبقتونا ؟
مطلق : طلعنا علطول وبعدين وش الصدفة ذي
سطّام ابتسم وقال : ليتها ماصارت انتوا تطلعون لي من كل مكان
مطلق رفع حاجبة وقال : ياشينك أنت اللي طلعت لنا !
ضحك بخفه وقال : أمزح لا تشخصن
مطلق : حتى أنا أمزح المهم فطوركم الصباح علي
سطّام ابتسم وقال : على خشمي
وردد تحت انفاسه يقول : إذا لقيتني !
مشى يأخذ كرت الغرفة ويطلع مع المصعد ، ابتسمت عِقد وقالت : جاء الرسام
اسرار ابتسمت وقالت : بشوفك اصلاً
هزت عِقد راسها ومشت اسرار مع سطّام لغرفتهم ، تقدم مطلق ونطق : الصراخ ماشاءالله وش داعيه ؟
عِقد ضحكت وقالت : تعرف حماس وكدا
مطلق هز راسه وقال : اهاا حماس قلتي ؟
عِقد عضّت شفايفها تكبح ضحكتها ونطقت : مو طبيعي غيور !!
مطلق : تعرفين يعني ؟ وتخليني أحترق
عِقد ابتسمت ابتسامة عريضة وقالت : يادلوع بنسافر قريب وبلبس أطقم صيفية حتجلس تغار كدا ؟؟
مطلق رفع حاجبة وقال : ايييوه ؟ وش أطقمه بعد
عِقد : فستا..
قاطعها من سحبها له وقال : فكينا وطلعي الفكرة من مخك
عِقد ابتسمت وقالت : تعرفني حسويها عشان كدا مالو داعي كثرة الهرج !
مسح وجهه وشنبه وقال : بتموتني يناس ذي بتموتني !!
عِقد ابتسمت ابتسامة عريضة وسندت راسها على كتفه وقالت : اسم الله على قلبك !
مطلق ألتفت لها وقال : وأطقمي أنا ؟
عِقد : قلت لي تشجع الهلال صح ؟
هز مطلق راسه بالايجاب وكملت تقول : وأنا أحُب الأتي عشان بابا !! وعشان كدا حلبسك البينك أول يوم فالسفرة !
مطلق زفر بضيق وقال : وش بينك ذا ؟ وبعدين وشدخل العميد يلبس أصفر وأسود !
ضحكت بسخرية وقالت : لأنو البينك مره يناسب أني أنتقم
مطلق نزل من المصعد بدون رد ، مشت تتبعه وسكنت شوي تحسّ إنها زودتها ، فتح باب الغرفة ونطق بهدوء : قفليه
قفلته وراها ومشت تتبعه ومن دخلت شافته ينزل ثوبه وينسدح ويغطي نفسه باللحاف ومعطيها ظهره ، عضّت شفايفها السُفلية لثواني ونطقت تحت انفاسها : ماسويت حاجه غلط ومستحيل أعتذر أو أغير من نفسي عشانو !
شّدت على شنطتها الصغيرة اللي بيدها ومشت للحمام تتجاهل كل شيء ، رغم قلبها اللي ينقبض على مطلق لكنها رفضت رفض قطعي تتنازل قدام مشاعرها ، أخذت دش طويل وطلعت تلبس بجامتها وترطب جسدها وتتعطر بالمسك الهادي ، مشطت شعرها وجدلته ومشت للجهة الثانية من السرير ونامت والغصّه تحرق حنجرتها ومستحيل تسامحه لأنه تركها ونام بدون أي تبرير ..
~ قبل ساعات ، القاعه ~
دخلت المجلس الصغير ومعها أنهار بنتها ، شافت الشيخ جالس ونهيّان وقصي وسلمان معه ، جلست على الكنب وبدأ الشيخ يتلو آيات من القرآن الكريم تدل على الزواج وأنه سنه من سنن الحياة ،، أنهى ماقرأ ونطق : كم سن المرأه ؟
ريم ابتسمت بخفه وقالت : أصغر عمري ؟
أنهار ضحكت وقالت : ماما !
ريم ألتفتت لنهيّان ونطقت : سبعه وأربعين
الشيخ : تبارك الله إذا أنتي ولية آمر لنفسك هل تقبلين الزواج بـ نهيّان سلطان وأن يكون لك سندًا وفخرًا عمركم الباقي ؟
سلمان ابتسم وقال : طولة العمر ان شاءالله يأبو سلطان
نهيّان ابتسم من سمعها توافق وتقدموا يوقعون ، كتبت شروطها وأولها هي " عدم الإنجاب " ومن ثمٍ كتبت أشياء بسيطة جدًا ، وافق نهيّان على شرطها لكن يكون بينهم ومحد يدري هو أخذها عشانها هي وهي بعد ، لكن أثنينهم مايفكرون بولد يكون أخ لسطّام ولأسرار بعد ، الشيخ تقدم يسلم ويبارك لهم ونطق : أصبحت زوجتك يا نهيّان
نهيّان ابتسم وقال : على البركة يارب
مشى الشيخ وتقدم نهيّان يسلم عليها بعد ماسلمت على بنتها وقصي وحتى سلمان اللي اكتفى بالمصافحة ، وتفاجئ من حاوطته مثل اسرار بالضبط ، ضحك بخفه وقال : عقلي أنحاس وأنشغل بأسرار والقلب تركته عمد للريم !
ابتسمت وقالت : ايوه بنتي ماهي طماعه ، مبروك لنا وعساك يارب عند الهقوه
نهيّان أبتعد ونطق : بإذن الله ياريم
مسكت ذراعه ومشت تطلع معه ونطقت : ما أبي شيء صراحة كبرنا مره عن الفنادق والحاجات هدي نروح لبيتك علطول ؟
نهيّان شّد على عصاته يثبت نفسه مع السلالم ونطق : ايه أكيد وبيتنا كلنا ماهو لنهيّان بس
ابتسمت تمشي للجهة الثانية وتركب السيارة معه ..
~ الفندق ، جناح سطّام ~
علق بشته بجانب فستانها وتقدم يجلس بجانبها ، سحبت له نودلز من اللي معها ونطقت : أفتح
سطّام ابتسم وقال : عطيني
مدّت له وأكل معها ، ضحكت من تغيرت ملامح وجهه أثر حرارة النودلز وكح بكل قوته ونطقت بصدمة : بشويش يالرسام !
سحبت له مويه من اللي قدامها ومسكت فكه واندفع لها وشهقت من تلامست خشومهم ، وقف يناظرها ووجهه أحمر وتحسّ بحرارة أنفاسه ، حطت المويه على صدره ودفعته بها ، مسكها منها وفتح العلبه وشرب علطول ومن أنتهى نطق بصدمة : أنتي ياصغيره تأكلين ذا ؟؟
اسرار ابتسمت وقالت : ايه لا يغُرك حجمي عندك بس والله لذيذ !
سطّام رفع حاجبة وقال : أي لذيذ وأي خرابيط الحرارة أحرقت أم اللذه !
اسرار ابتسمت بوسع ثغرها ونطقت : لقيت شيء أهزمك فيه
سطّام ألتفت لها وابتسم ينطق : فردوس عيونك جهنم لقلبي ويكفيني هالهزيمة وش باقي بتهزميني به !؟
اسرار ضحكت وقالت : تصدق ماكنت أحب عيوني
سطّام : ليه ؟
اسرار زفرت بهدوء ونزلت كرتون النودلز وتقدمت تحطّ ركبتها على ركبته ، ابتسم يثبت يدينه خلف ظهرها وينطق : سواليف الماضي ؟
اسرار : ماعمرها كانت ضعف بنقول كل شيء هدّنا ونبني منه قوة وثقة لأننا تحدينا كل شيء وصرنا واحد
سطّام ابتسم وقال : يعجبني الي يقول دُرر
ضحكت بخفه تصدّ عنه ونطق بضحكه : اسلمي ي بِكر محمد
اسرار ابتسمت وقالت : يعني بقولك ذا إني اللي ببدأ
سطّام هز راسه بالايجاب وقالت : اوكيه كانوا يتنمرون علي ويقولون عدسات أو أجنبية يعني ماني سعودية
سطّام : طيب أنتي ورثتيها من جدك ؟
اسرار ابتسمت وقالت : كان الظن بجدي لكن طلع الواقع أبوي
سطّام ابتسم وقال : جعله بالجنة تذكرت اصلاً أمك قالته لي
اسرار ابتسمت وقالت : تصدق ماباركنا لهم
سطّام : أنا باركت لهم قبل أطلع اسلمي
اسرار ابتسمت وقالت : الله يسلمك المهم عانيت من هالوجع للثانوي
سطّام توسعت عيونه وقال : فوق عشر سنين !!
اسرار هزت راسها بالايجاب وقالت : بعدها لقيت عِقد وكانت تكبرني بسنة
سطّام ابتسم وقال : ياذا العِقد اللي ماخذتك كلك !
اسرار ابتسمت وقالت : كنت ثاني ثانوي وهي طالبة جديدة وتدرس ثالث ثانوي أول مالمحت عيونها ابتسمت وردت الابتسامه وبدون مانتكلم بعدها شوي شوي بدينا نجلس مع بعض وقالت لي أشياء صدمتني فيها وقلت إنها أقوى بنت شفتها بحياتي
سطّام انسدح على فخذها ونطق : ووش هي الأشياء ؟
اسرار : سطّام تخيل إنها صارت مستقله وببيت خاص فيها وبسيارة وهي بسّن الثمنطعش !
سطّام ابتسم وقال : ماشاءالله والله طلعت ماهي بهينه
اسرار ابتسمت وقالت : بعدها عرفت إنها من المدينة وعرفت عني أشياء كثير وعزمتني أطلع معها وخفت صراحة تعرف السواليف اللي منتشره
سطّام هز راسه بالايجاب وقال : ايه ايه ويقولون جايبه عيال ينتظرونك فالبيت كملي ؟
ضحكت اسرار وقالت : آخ أحبك تدري ولا لا ؟
سطّام ابتسم وقال : صرتي تقولينها واجد ماصارت عقدة عندك وتحبسينها داخلك وتحرمين مسامعي ؟ غيابي سوا كذا ؟ أجل بغيب أكثر يمكن أرجع وتقولين أبي نجيب وفاء
ضحكت بصدمة وقالت : أسحب كلمتي
ضحك ودفن وجهه ببطنها ، ضحكت تحاوط راسه وتسمعه يقول : الحجم ياناس الحجم !
حاوط خصرها ورفع وجهه يشوفها تضحك ، ابتسم لها وسحبها بسرعة وشهقت من حسّت بشنبه يلامس خدها ، قبّله بعمق وأبتعد ينطق : آخ يا اسرار
اسرار ابتسمت وقالت : بسم الله عليك
سطّام ابتسم وقال : والله مو بيدي سامحيني قطعت سالفتك عشر طعش مره !
اسرار مسك شعره من قدام وبدأت تلعب فيه وتنطق : عادي
سطّام ابتسم وقال : كملي يابعد وفاء أنتي كملي
اسرار : بس يعني ماتقبلت عيوني الا من بعد عِقد لأنها نادتني زيتونه من وأنا بسّن السبعطعش ! وحبيت الدلع ذا مرره
سطّام : بعدين جاك سطّام وناداها بالفردوس
اسرار هزت راسها وقالت : توك قلت !
سطّام ابتسم وقال : الله عليم إنها بصدري من زمان
اسرار ابتسمت وقالت : وأنت ي سطّام وش كانت أكبر مخاوفك
سطّام : وفاء القلب وخسرتها
اسرار ابتسمت بضيق وقالت : بس أبوك موجود
سطّام : وأنتي لو ماحصلت الشوشره بحياتك وعشتي مع ريم ومحمد حياة طبيعية بتقدمين أبوك على أمك ؟
اسرار ميّلت شفايفها لثواني ونطقت : ماقد شفت أبوي ولا عشت مع أمي سامحني مقدر أختار
سطّام : وإن وقع الاختيار !
اسرار عضّت شفايفها السُفلية لثواني ونطقت : بختار سطّام
شعر بتوقف نفسه لثواني وسكن بجانبها ، ألتفت يشوفها تبكي وتضحك بنفس الوقت ، هي اختارته فوق أبوها وأمها اختارته لأنها شافت فيه الحنيّة والأمان قبل ريم حتى ، سحبها لحضّنه علطول ومسح على شعرها ونطق : يابخت سطّام !!
قبّل كتفها واستنشقه وهو يحمّل عطرها ، حاوطته وهي تبكي ونطقت : صرت لي حنان الأب وعطف الأم تسمح لي أصير لك وفاء وعهد ومستحيل أخذلك وأنت فاهمني !
تقصد بكلامها تصير وفاء القلب له ، ابتسم ونطق بهدوء نبرته : أنتي الوفاء والحبيب ورأس المال وكل شيء تقدرين وماتقدرين تكونينه كنتيه !
شّد على خاصرتها وابتسمت بوسع ثغرها وقالت : أنت فعلاً مو عادي أبدًا ولا بتصير عادي أنت اللي علمتني شلون أحب وأهوى وأرجع أثق من جد وجديد !
سطّام ابتسم وقال : لأنك الهوى يا اسرار
اسرار ابتسمت وقامت توقف ، مشى معها للسرير وانسدح يسحب كراسته وينطق : نامي نامي برسم حاجه وبلحقك
ابتسمت ونثرت شعرها على الوسادة ، تتأمله وهو يرسم وماتدري إنها محتوى الرسمة ، نامت عيونها وابتسم يبدأ برسم عيونها النائمة ، شعرها المنثور بلوحته يزيينها ويجَملها ، ابتسم من انتهى وقفل الكراس وحطه فوق شنطته ، انسدح بجانبها وخلخل أصابعه بشعراتها يلاعبها لحّد ماغفى بجانبها ..
~ قصر نهيّان ، غرفة هذام ~
دخل للغرفة وابتسم يشوفها مركبة سماعة بأذانيها وترقص ، ممكن حماس مابعد الزواج مايدري ، تقدم يقفل الباب وراه ونطق من تمايلك : الله لا يبيح العدو وخصرك !!
فزّت تفصل السماعة اليمنى وتنطق : قلت شيء ؟
هذام ابتسم بصدمة وقال : حلو بتكملين ؟
شهد : ايه تبي شيء ؟
هذام هز راسه بنفي وضحكت بخفه ، رجعت تتمايل وترقص على الأغنية اللي تسمعها ، عضّ شفايفه ومشى للسرير يعطيها ظهره وهو يتأمل انعكاسها بالمرايه ، ألتفت لها ونطق تحت انفاسه : العسل ماوده يرحمني !
مستغرب الشعور اللي يسكن داخله ، هو تقبّل الحُب بصعوبة وخذاها لأجل الحُب ليه هالشعور المزعج قاعد يضايقه بكل مره تميّل شهد ، شّد على كفه ومشى للحمام ودخله يقفل الباب وراه ، سكرت الأغاني ومشت للسرير ، ضحكت بخفه مصدومة من اللي صار ، طلع من الحمام وابتسم يشوفها جالسه لكن سرعان مافزّوا أثنينهم من ارتفع صوت سلطان ، طلع هذام يركض ونطق : سليّط ! وشفيه ؟
سلطان ألتفت له ونطق وهو ينزل : رواف تعبان مره
هذام توسعت عيونه وركض وراه ، طلعت شهد ونطقت : يالمغرور ؟؟ عسى ماشر ؟
هذام : أرجعي بجيك بجيك
وصلوا للصالة وشاف نهيّان وريم معه بعبايتها ، ابتسم وقال : عروسنا ارتاحي
ريم ميّلت راسها وقالت : عيب عليك ما أخليكم
سلطان عدّل شوزه وركض وهو يقول : عجلوا علي !!
نهيّان : هذام رح معه بنلحقكم مع عبدالصبور
هذام هز راسه ومشى يطلع يركض مع سلطان ، قلوبهم خايفه على أول أحفادهم رواف ، أرسلوا لسطّام لكن ماوصلهم منه رد ..
~ المستشفى ~
حاطه وجهها على صدر سلمان وتبكي ، ابتسم يمسح على ظهرها وينطق : بنت سعود ! مافيه شيء
انفال مسحت دموعها ونطقت : فيه جرثومه بالدم شلون تقول مافيه شيء ! أب أنت ولا شنو !
ضحك بخفه يضمّها ورجعت تبكي ، دخلوا سلطان وهذام مع بعض ونطق : أبو رواف سلامات ؟
سلمان : يارجل بس حرارته مرتفعه
انفال رفعت عيونها لسلطان ونطقت : أنت عمه أكيد بتفهمني
سلطان ابتسم وقال : أفا تبكين يابنت عمي ؟
انفال ببكي نطقت : فيه جرثومه بالدم !!
هذام رفع حاجبة وقال : طيب بسيطه ان شاءالله !
دخل نهيّان ومشت انفال له تضّمه وتشكي له ، مسح على ظهرها ونطق بغضّب : وعّلة أنت وياه محد قوى يهديها ؟؟
ضحك سلمان ونطق : يأبو سلطان بنت أخوك دلوعه
نهيّان رفع حاجبة وقال : اهاا الحين صارت دلوعه ؟ نسينا ما كلينا ؟ محد بغى يموت عندي قبل سنة عشان يأخذ الدلوعه ذي ؟؟
ضحكوا العيال على سلمان اللي اكتفى بالابتسام ، ريم مسكت انفال ونطقت : طيب كيف وضعو الحين ؟
انفال : لسى ماقالوا لنا شيء
ريم ابتسمت تضّمها ونطقت : بخير ان شاءالله
سلمان ألتفت للعيال ونطق : هيّ أنت وياه
رفعوا أنظارهم له وكمل يقول : وين سطيّم ؟
سلطان : فالعالم الموازي مع بنت محمد
ضحك سلمان ونطق : ومتى السفرة ؟
سلطان : بكره بعد العشاء
هذام : أبوي بيسوي غداء لسطّام ؟
سلطان : أنا اللي بسويه
هذام ابتسم وقال : حيّ اللي يرد الجمايل حيّ آخر العنقود
ضحك سلطان وقال : لبى عيونك
وقف سلمان من طلع الدكتور ونطق : ماتخافو البيبي بخير وكويس الحمدلله بس لازم يكون تحت الملاحظة أربع ليالي
سلمان زفر بقرف ونطق : يقلع الحاله طارت السفرة
توسعت عيونها تسمعه وقالت بحدة : وخير ان شاءالله !!
سلطان كبح ضحكته وصدّ هو وهذام ونطق : سوالف متزوجين
سلطان : أحلف وشهد وش تكون ؟
هذام عضّ شفايفه من تذكر الموقف اللي حصل ونطق : عسل
سلطان ابتسم وقال : ما بنأجلها دفعنا دم قلوبنا فيها إذا تعافى روافي تلحقونا
انفال هزت راسها بالايجاب وقالت : ماكنت راح أخليكم تأجلون اصلاً
سلمان : خلاص أجل الحقونا وإن طاب ولدي لحقتكم
هذام : والأسعد لا تلحقنا ماودنا ننشغل بالورعان
سلطان ضربه وهو يضحك ونطق سلمان : على كذا بسافر غصب
ضحكوا العيال وتقدم نهيّان ينطق : سفرتكم كم يوم ؟
سلطان : حجزنا منتجع أسبوع واحد بس
سلمان : حلو تكفيني ثلاث أيام
هذام مسك كتفه ونطق : نمدد لعيونك كم عندنا سلمان ؟
سلمان ابتسم وقال : ترقع ؟
ضحك هذام وسحب كفه من ضربه سلمان ، انفال ابتسمت بحُب تشوف كيف أجل سلمان السفرة وهي تدري إنه أكثر واحد محتاجها بعد ضغط الشغل والأحداث اللي مرت عليه ، مدّت كفها له وابتسم يمسكه بدون شعور أحد فيهم ، ياكم تحسّ بالأمان والحنان بلحظة مامسك يدها ، وقف نهيّان بتعب ونطق : طمنوني أنا هلكان بروح أريح شوي قبل الغداء
سلطان ابتسم وقال : كلنا بنمشي
سلمان : خذوا انفال معكم
ألتفتت له ونطقت بصدمة : لا بجلس عند ولد..
قاطعها صوت نهيّان وهو يقول : تعالي بدلي فستانك ومكياجك وأرتاحي أبوه عنده
عبّست بملامحها وحاوطت رقبة سلمان ، ابتسم يحاوط خصرها وينطق بهمس : وبعدين حامل أرتاحي شوي
ابتسمت تهز راسها بالايجاب وتنطق : ودعتكم ربي طمنوني
سلمان : أبشري
مشت مع ريم ونهيّان وألتفت للعيال ونطق : وش باقي تسوون ؟
سلطان : تحتاج شيء منا مناك ؟
سلمان ابتسم وقال : سلامتكم نتقابل بالغداء بكره
هذام مسك كتفه ونطق : على خير
طلعوا من المستشفى وبقى سلمان مرافق مع بِكره ..
~ الفندق ، صباحًا ~
مشت مستعجلة وهي بالروب وماسكه بيدينها عبايتها المغسولة ، زفرت بغضّب وقالت : سطّام !
ألتفت لها من أنتهى من صلاة الفجر ونطق : عيونه ؟
اسرار : تعال شيل البشت وفستاني إبي أعلق عبايتي عشان يمدي تنشف قبل الظهر
مشى سطّام وشال الفستان والبشت وحطها على الكرسي ونطق : وش تبين تفطرين ؟
اسرار ركضت تطلع ملابسها اللي جهزتها لـ ثاني يوم ، فستان أحمر ناعم بفتحة ظهر واسعة ، طلعت الكعب والاكسسوارات ومجفف الشعر والميكب وحطتها على الطاولة ، ابتسم يتأمل حوستها اللي تكون بالنسبة له منظمة ومرتبة ، تقدم يمسك ذراعها وينطق : بِكر محمد ماودنا تطيحين ! أكلي حاجه ترا عندك سوابق
ضحكت وهي تحاول تأخذ نفس ونطقت :أي حاجه بأكل على ذوقك
سطّام ابتسم وقال : أجل دقايق وأنا عندك
مشى يلبس شوزه وسحب له تيشيرت من الدولاب ومشى للباب ونطق : لاتفكين لأحد البطاقة معي
ابتسمت له وقالت : المؤمن مايلدغ من نفس الجحر مرتين وأنا خذيت درسي يا بِكر نهيّان
ابتسم يطلع ويقفل الباب خلفه ، بدأت تلبس وتحط ميكب خفيف وتلبس اكسسواراتها وفستانها ، ألتفتت للمرايا تشوف فتحة ظهرها ونطقت بسخرية : بينهار الغيور
ابتسمت تمشي للمراية وتجفف شعرها ، رفعت عيونها تشوف كيف ركض الوقت فيها وصارت الساعة قريب على أذان الظهر ، ألتفتت من سمعت صوت البطاقة ودخل سطّام والأكياس بيده ، ضحكت وقالت : ماشاءالله صار غداء
سطّام زفر بقرف وقال : ياشين الزحمه !!!
تأفف بغضّب وابتسمت تتقدم له ، قبضت على كتوفه وصارت تهمزه بهدوء وتنطق : أدعي عليهم ؟
ابتسم سطّام يلفّ عليها ويحاوط ظهرها ، عضّت شفايفها من توسعت عيونه بصدمة ، لفّها وضحك بصدمة ونطق : ماشاءالله وعساك ناويه تطلعين كذا ؟
اسرار : بلا عبط بلبس عبايتي
سطّام مسك راسه ورجع يجلس ونطق : سوي اللي تبينه
اسرار ابتسمت وقالت : مابتزعل من اللي أبيه ؟
سطّام ابتسم يغمض عيونه وينطق : وشلون بزعل من شيءٍ اسرار ودها فيه وتبيه بالعكس ، بحسده لأنك تبينه !
اسرار ضحكت ومشت تنحني ، قبّلت خده ورفع عيونه لها وشاف انحناءه اللي برز معالمها قدامه ، نطق بحدة : اووها يا بِكر محمد !
وقفت بصدمة ونطقت : علامك ؟
سكنت ثواني وسرعان ما دوّت ضحكتها فالغرفة من فهمت ، مشت تجهز الأكل ونطقت : شايفني بليلة مطلق فكنا من السواليف ذي عاد !
ذكرته بالوصَل وكيف حدث ، وصَل استحالة ينساه ماحييّ ، تقدم يجلس ونطق : ايه بس ترا الرجال طماعين وجشعهم مخيف وكان من الممكن إني أطمع فيك من اللي شفته توو لكن مايطاوعني أخالف سلطان وأتركه بدون حضور !
ضحكت بصدمة تجلس وتمدّ الأكل وهي ملاحظه أنه مايطالع فيها أبدًا ، ممكن زعل عشان لبسها وممكن سالفة الطمع هي سبب عدم وجود نظرات بينهم ..
~ غرفة مطلق ~
صحت بفزع من صوته العالي ، فتحت عيونها تشوفه يكلم على الجوال ويهاوش ، زفرت بغضّب وقالت : يارب صباح خير يارب !
ألتفت مطلق لها وأبعد الجوال عنه ونطق : اي صباح لبى قلبك ؟ قومي بسرعة الغداء بعد عشرين دقيقة
توسعت عيونها بصدمة وقالت : ايشش !!
مطلق آشر لها تسكت وتقوم ، وقفت تركض للحمام ورجع مطلق يهاوش بـ ضاحي اللي ما أنتظر ورجع للرياض ليلة أمس بعد الزواج ، عضّ طرف شنبه ونطق بحدة : ياويلك مني ي ضويّحي !
قفل في وجهه الإتصال ومشى يجهز نفسه للغداء ، طلعت بالروب وهي تركض ومستعجله ونطقت : ليش ماصحيتني ؟
مطلق : كنت أحاول اروق
عِقد تذكرت اللي حصل أمس ونطقت : ماصار حاجه اصلاً ولا ؟
مطلق : يهون قسم بس فكيني من البينك حقك
ضحكت وحطت أصبعها على عيونها ونطقت : عيوني تمام بلبسه أنا يمكن يناسب
مطلق ابتسم يمشي لها ، مسك وجهها وقبّل محاجر عيونها ونطق : ما أقولك أبوسهم أجيك على وجهي وأبوسهم !
ابتسمت بوسع ثغرها ونطقت : أحُبَك
مطلق ابتسم وقال : آخ ، لو أدري يتغيير مودي كامل بكلمة صحيتك تقولينها بدال الزقاره اللي أحرقت جوفي !
عِقد : خدلك دش ريحتك تكتم
مطلق : مفروض تحبينها مني
عِقد ابتسمت وقالت : لو أحُبها ماتركتها أبدًا ولا ؟
مطلق : واثقه ؟ مافرقت
مشى وهو يضحك من الشتايم اللي خرجت من جوفها وانهمرت عليه ، نطق قبل يقفل باب الحمام : الله يسامحك جرحك وصل
ضحكت بسخرية وقالت : حكمل عليك أطلع يالشايب !!
ضحك بصوت خفيف وقفل الباب يدخل ، تأمل الشيّب براسه وده يقولها إنه مايحب الشيّب لكن أجبر يسكت ، وعند عِقد طلعت ثوبه وشماغه وشمرت أكمامها الأورنج ونطقت بتركيز : يويلك تحرقيه !
ثبتته وشغلت المكواه وبدأت تمررها بهدوء على ثوبه ، عضّت شفايفها ترفع شعرها وتنطق : ياحظي كم طولو دا ؟
توسعت عيونها من طول الثوب وعُرضه ، أنتهت بعد وقت طويل ونطقت : مطلق لا تطلع !
ابتسم وهو يحلق عوارضه ونطق : مطول اصلاً
ابتسمت تسحب شماغه وتثبته ، حطّت المكواه وصرخت من حسّت إنها علقت ونطقت : لا ياربي أرجوكي لا !!
شافت الشماغ بنص عين وتنفست الصعداء من شافته سليم ، كملت تكوي وخلصت بشكل رسمي ، سحبت المبخرة وحطّت العود الأزرق الموجود بشنطته ، خلصت منه وبدأت تبخر شعرها وتنشر ريح العود على خصلاته ، طلع من الحمام وألتفتت وسرعان ما انرسمت ملامح الدهشة عليها من شافت حلاقته ونطقت : نعيمًا ياروح عِقد !
ابتسم مطلق يتقدم لها ونطق : عوده ؟
هزت راسها بالايجاب وكمل يقول : تعالي طيبيّني وحبيني
ابتسمت تتقدم له وتقبّل ثغره ، ابتسم يحاوط ظهرها ويبادلها ، أبعد من طلبته ونطقت : قسم بالله أحُبَك أكتر من أيمن !!
ضحك بصدمة ونطق : يارب أحفظ قلبي وعقلي يارب
ابتسمت تبخره ونطقت : كيف تعرف إنك وصلت أعمق نقطة فيني لمن أقولك كدا !
ابتسم مطلق وقال : وصلناها اخيرًا ! لي من عرفتك حول الست أشهر وأنتي متعمقه ولا عمرك صرتي سطحية ! أنا أحمد ربي على وصال اللي زعلك وعلى معاذ اللي ناداني بهذيك الليلة وشفتك وتأكد شعوري لك !
ابتسمت وهي تبخر شعره الشبه طويل ونطقت : مين معاذ ؟
مطلق : صبي صغير دعاني يقول عِقد تبيك
ضحكت بصدمة من تذكرت الموقف وقالت : يالله !! فينو دحين أقولو أننا تزوجنا
مطلق : وش عرفني
ضحكت تمشي وتلبس عبايتها ، ابتسمت بوسع ثغرها من سمعته ينطق : يجعل يدينها ماتمسّ النار ياجعلني فدا لها
ألتفتت تشوفه عند ثوبه ونطقت : شدعوة ماسويت حاجه
مطلق نطق بحدة وهو مبتسم : والله بعضّك والله ! أنتبهي لنفسك مني صايره طعييمه وأنا ما أقوى حلّاك !
ابتسمت له وسحبت شنطتها وقالت : هيّا تأخرنا
مشى يلبس ثوبه فوق ملابسه الداخلية ووقف يقفل ازرار ثوبه ويلبس طاقيته وفوقها شماغه ، ثبّته بالعقال ونسفه وسحب عطره يتعطر منه وينطق : مشينا يالروح
مسكت ذراعه ووقفت عند المرايه تصور وقفتهم ، ابتسمت تمشي ومشى معها لقصر نهيّان ..
~ قصر نهيّان ، الظهر ~
دخل سلطان وهو عاضّ على طرف ثوبه والصحن بيدينه ، وقف هذام يضبط السفرة ونطق : ذيبان
نزل الصحن ومسك فكه بألم ونطق : ياذيبان الصحون تنتظر من يشّلها
هذام ابتسم وقال : وتنتظرني ؟ أنت اللي مسويه صح ولا لا
سلطان طارت عيونه ونطق : ياللي ماتستحي !
نهيّان نطق بحدة صوته : هذام ! قم مع أخوك
فزّوا أثنينهم وما شعروا الا وهم بمُنتصف الحوش ، ضحك سلطان ونطق : اللهم لا شماته نفضّك نهيّان
هذام : حبيبي هذا نهيّان ماهو سلطان لازم تفرق
سلطان زفر بقرف ونطق : ياشينك
هذام مسك ضحكته ومشى يدخل بالصحن للداخل ، ابتسم يشوف كشخه شهد ووقفتها بمُنتصف الصالة ، ألتفتت له ونطقت : أصبرررر ! البنات هنا
هذام نطق وهو فاهي بجمالها : عيني عليك أنا عيني عليك !
ابتسمت تتقدم وسحبت الصحن منه ، شهقت وفزّ يشيله منها ونطق : حار !!
شهد هزت راسها وهي تضحك وقالت : هاته
هذام : أنتبهي أمسكيه مع الطرف
مسكته ومشت تدخل ، عضّ شفايفه ونطق : ألعن عدوينك يا هذام عرفت تختار !!
رفع ثوبه ومشى يركض يساعد سلطان ، طلع للحوش وشاف سلمان ينزل من سيارته ورواف معه ، ضحك بخفه وقال : لا يكون صدق بتسافر معنا ؟ البلشة
سلمان ضحك وقال : أنتبه لا ألتفت لك !
مشى نهيّان للباب يشوف عياله فالحوش ونطق : هات حفيدي هات حبيب جده
مشى سلمان برواف اللي يمتصّ اللهايه لأجل مايبكي ، ابتسم نهيّان وقال : ما كأنه كبير عليها ؟
سلمان : الا والله بس أشغلني يبكي يبي انفال
نهيّان تقدم يشيله وسحبها منه ، رفع رواف عيونه ونطق : ددو
ابتسم نهيّان ونطق : عيون جدك ؟
سلمان : أبو سلطان لا هنت دخله داخل
نهيّان هز راسه بالايجاب ومشى يأخذ الشنطة من سلمان ودخل للداخل برواف ، ألتفتوا العيال لسيارة مطلق الي دخلت ، سلطان ابتسم ونطق : النسيب جاء !
سلمان : بدخل أبدل وأجيكم إتصلوا على سطّام
هز هذام راسه بالايجاب وسحب جواله يتصل وهو ماشي لمطلق لأجل يسلم عليه ..
~ بيت مطلق ، الرياض ~
قفل جواله ورماه بعيد عنه ، زفر بضيق من الهم اللي اجتاحه ماوده يفصّح عن شعوره ويلقى الرفض أقسى من مايتصوره وخايف يعيش بالشعور ذا ومن طرف واحد بس ، هو شافها بزفاف سطّام واسرار ، لقى الشقراء اللي يتمناها وأجمل بعد ، لكنه مايدري هي مين ولا يعرف عنها شيء ، عضّ شفايفه بغضّب ونطق : مايدري إني هجيت من الشرقية عشانها !
مسك راسه وضحك بصدمة ، مايدري هي متزوجه ولا لا ولا في باله فكره أبدًا ، فتح الباب حمد اللي صعد على المصعد ومشى لغرفته ، ابتسم يوقف ونطق : سمّ يأبو محمد ؟
حمد : وش عندك أنت والله مانت بطيب !
ضاحي : صادق تعبان شوي من المسافة
حمد هز راسه ونطق : ريح شوي دقيت على مطلق ولا دق عليك ؟
ضاحي ابتسم وقال : دق وغسل شراعي بعد
حمد ضحك وقال : علمتك تعطيه خبر بس ماسمعت مني
ضاحي : يمون ولد مشبب يمون على رقبتي
حمد : ريح بصحيك العصر
ضاحي هز راسه ومشى حمد يطلع ، قفل باب غرفته ورمى نفسه على سريره من الضيق اللي يشعر فيه ، صرخ بكل قوته مقهور من وضعه ومتحسف إنه ماقدر يتأملها أكثر من الثواني اللي صارت ، هو تغلبه تربيته وخوفه على بنات الناس من خوفه على خواته ، ماقدر رغم فتنتها يتأمل ، هو شال عينه علطول وطلع منفجع ومخروش وركب السيارة وبدون شعور رجع لـ نجَد هارب من الأفكار ومن الأنثى اللي سلبته شعوره ، أنثى بكامل التواصيف والشعر الأشقر الأحب له ، غفت عيونه واستسلم للنوم ..
~ الفندق ، الجبيّل ~
مسح فمه من الأكل ووقف ، قامت تشيل الأكل والسفرة وتمشي للمطبخ ، ألتفت تشوفه شايل منشفته ، توسعت عيونها بصدمة وقالت : بتأخذ شور ؟
سطّام ابتسم وقال : وشفيك مصدومة مني ؟ معك مهووس نظافة
اسرار : مو عن بس تأخرنا !
سطّام : أحسب لي دقايق يبو محمد
دخل وهو يضحك ، ابتسمت تلبس عبايتها وتنطق : معتوه
رفعت جوالها وبدأت تصور وتنزل بالسناب الخاص فيها ، نزلتها وقفلت جوالها وألتفتت لخروجه من الحمام ، بشعره المبلول وقطرات المويه على صدره لأسفل بطنه تتجه ، ابتسمت توقف وتنطق : اوه سطّام طالع نار !
ألتفت لها بطرف عين يشوف ابتسامتها ، ضحك بسخرية وبلل شفايفه ينطق : أقربي وأعلمك النار صدق
اسرار حطّت أصبعها على شفايفها ونطقت : أوب ! بسكت خلاص ألبس وخلص
ضحك يمشي للغرفة وسحب ملابسه يلبسها ، ألتفت يشوفها معطيته ظهرها وتكلم على الجوال ، لبس ثوبه وسكر أزراره وثبت الكبك بأكمامه وقفله ، مشى يلبس الجوتي حقه ومشى لها ونطق : مشينا ؟
هزت راسها بالايجاب وقفلت تنطق : ظبيه تقول أبطينا
سطّام : صادقه والله خلينا نستعجل
هزت راسها ورفعت نقابها على وجهها ، ربطته وضبطته ومسكت ذراعه ، مشى يطلع معها ونطق تحت انفاسه : بسم الله على عيونك من كل حاسد ! يارب إنها في وداعتك
شّدت على ذراعه من وصلت للمصعد ونزلوا عمالة الفندق ، ابتسم يحطّها وبدون ماتشعر خلف ظهره ، ركبوا ونزلوا لسيارتهم ، ركب السيارة وركبت بجانبه ونطقت : نمت كويس ؟
سطّام : وش هالسؤال ؟
اسرار : أمس كنت ترسم متأخر واليوم صحيت قبلي
سطّام : معليك نايم
اسرار ابتسمت وقالت : كويس عشان السفرة الليلة
سطّام زفر ونطق : نسيت منها !
اسرار : بس ما بتكنسلها ؟
سطّام : عشان يخنقني سليّط
ضحكت وضحك بخفه ، طلعوا على الطريق وألتفت لها ينطق : حزامك أمانك يا بِكر محمد
اسرار كبحت ضحكتها ونطقت : يخسى مالقيت مثل أمانك !
ربطته وهي تضحك ، تدري أنها تذبحه بردودها ذي ومستمتعة فيها جدًا ، ألتفتت تشوفه يلعب بشنباته ويفتّلها ، ابتسمت ابتسامة عريضة وقالت : وشفيك ؟
سطّام عضّ شفايفه ونطق : سلامتك
ابتسمت تصدّ عنه وتتأمل الطريق الطويل لـ قصر نهيّان ..
~ قصر نهيّان ~
دخلت سيارة سطّام للحوش ، وقف وسكر سيارته ، فتحت حزامها ومشت تنزل ، ألتفتت له وهو يناديها ، مشت من قدام السيارة ووصلت له وقالت : بسم الله !
ألتفت لها بعيونه الحادّة أثر الشمس ونطق : علامك ؟
اسرار : حتى بالكعب اللي كسر رجولي ماوصلت ربع طولك !
سطّام ضحك يصدّ عنها وينطق : تدلين الصالة ؟
هزت راسها وهي تبتسم له ونطق : اسبقيني
مشت تتخطاه وتدخل للبيت ، ابتسمت تشوف نهيّان والعيال فالمجلس ، وقفوا كلهم ونطقت : أستريح يا أبوي
مشت له وابتسم نهيّان يفتح ذراعينه لها ، حاوطته وقبّلت كتفه وراسه ونطقت : شخباركم ؟
ابتسم سلمان ونطق : بخير بخير
مطلق تقدم لها ومن قرب وقف ونطق : وش حالك ؟ مبطين عنك
ابتسمت لمطلق ونطقت : تعال معي
مشى مطلق يطلع من المجلس وهي معه ، طلعوا للحوش ووقفوا تحت الشجر ونطقت : آخ يامطلق
مطلق رفع حاجبة وقال : احتزمي يابنت عمي !
اسرار : للحين في بالي بداياتنا وكيف كانت حياتنا فالديره
مطلق ابتسم بضيق وقال : جعل من أوجعنا الوجع !!
اسرار مسحت كفوفها ونطقت : مات ؟
مطلق هز راسه بالايجاب ، عضّت شفايفها وبكت بدون صوت ، اللي حرمها حسّ ووجود أبوها لقى حتفه ، ماتنكر أنها مبسوطة بس طاري الموت والفقد يرعبها بشكل أكبر ، رفعت عيونها من مسك مطلق كتفها ونطق : تبكين وأنتي تدرين وش دموعك عند الهَاجس ؟ تدرين إنه بيحرق بتال وبيطلع جثته من قبرها عشانه بكاك !
ابتسمت تمسح دموعها وتنطق : ليتك أنت أخوي ، ياليت السنين اللي مضت مع وصال قضيتها معك ومع ضاحي ومع ظبيه ياليته كان كذا ! محظوظه اللي تملكك يامطلق
مطلق ميّل راسه بحزن ونطق : أنا أخوك ولو قسّت ظروفك وتقفلت البيبان بوجهك أنا سندك وذراعك والله ما أردك أنتي مازلتي في وجهي ماقلتها عشان فتره وعشان بتال قلتها عُمر طويل ! ياجعل من جابك الجنة يابنت محمد
شدّت على ذراعه ونطقت ببكي : ياجعلني ما اخلا ولا اعدمك
شهقت تبكي وسندت راسها على كتف مطلق ، ولأول مره مايردها مطلق ويبعد لأجل الدين والعادات ، مسح على ظهرها ونطق : لحّد يوجعني ! بس جعل يومي قبل يومك بسّك دموع
شدّت على كتفه بيدها وهي تبكي ، تبكي حسرة كتمتها فترة طويلة ، هي ضيعت مطلق معها وحاسته شعورًا وفكرًا ، عرفته على عِقد وذاق المّر منها ومن معاملتها ، حبّها ولا قدر على قلبه ، كان يتصل ويرسل لأسرار ويسأل كيف وضعها مع سطّام ، يخاف عليها ويخاف يكون تسرع ورماها على سطّام ، جربت حنان الأخ من مطلق وصار أقرب لها من الناس كلهم ، مسحت دموعها بحرقة ونطقت : أسفه لكل شيء مُر قسّى عليك
مطلق ابتسم يمسك كتوفها ويهزّها وينطق : عسل على كبدي يا أختي لا تقولين كذا !!
ابتسمت تضحك بخفه وتنطق : بقول لعِقد تضّمك لي
مطلق : وصل ياجعلني فداك
تقدم سطّام وهو مصدوم ونطق بحدة : بِكر محمد ؟
ألتفتت له ونطق مطلق : عويذ الله من شرك وخر والله ماتمسّها
سطّام زفر بغضّب وقال : ماقلنا شيء
ألتفت بنظراته الحادّة لها ونطق : ليه تبكين ؟
اسرار رجعت خلف مطلق ونطقت : ولا شيء
صدّت ومشت تدخل للصالة ، رفع عيونه لمطلق وقال : ماتحّل لها يامطلق وش قاعد تسوي ؟؟
مطلق رفع حاجبة وقال : أختي وأسلم عليها مبطيٍ عنها !
سطّام دفعه بغضّب ونطق : خل عنك سواليف أختي وما أختي والله مايحصل لك طيب إذا فكرت تعيدها !!
استغفر مطلق يصدّ ويمسح شاربه ، دخل سطّام وداخله يغلي ويتوّعد فيها ، مشى يسلم على أخوانه وأبوه ، من أنتهى وقف بالمنتصف ونطق : بدخل أسلم
سلمان هز راسه بنفي وقال : لا وأنا أخوك خلهم يأخذون راحتهم
نهيّان جلس ونطق : وسلمان صادق
زفر بغضّب وجلس ورفع عيونه لمطلق وقت دخل ، ماوده يقسى عليه بس سطّام مارفع عينه لعِقد من صارت حَرم مطلق هذا وهي كاشفه وماتتغطى ، شدّ على قبضته ونطق بحدة تحت انفاسه : خلاص بالهداوه بنحلها !
سكن شوي ومن بدأوا بالسوالف مع بعضهم نسى تمامًا من اللي حصل ، مو لسخافة الموضوع بس هو أرغم نفسه على النسيان ..
~ الصالة ، قصر نهيّان ~
كانوا جالسين ويسولفون سوا ، ألتفتت لبنتها ونطقت : ما أنتي على بعضك صار شيء ؟
اسرار ابتسمت وقالت : لا يا الغاليه
ريم : متأكدة ؟
اسرار اكتفت بالإيماء وانشغلت بجوالها ، لوهلة اندفعت لمطلق وأنهارت عنده ، من فترة طويلة ماجلست معه وأخذت علومه وأخباره ، ألتفتت لعِقد اللي نطقت : اش صار بينك وبين مطلق ؟
ارتخت ملامحها برعب ، شلون وصلها العلم ، عدلت جلستها ونطقت : وش تقولين ؟
عِقد رفعت حاجبها وقالت : لا تنكري ماحسوي لك حاجه بس ريحتو تفوح منك !
توسعت عيونها بصدمة وقالت : بسم الله عليك !!
ابتسمت عِقد وقالت : حتقولي ؟
اسرار هزت راسها بالايجاب وقالت : تراكمات ولعلّي أنفجرت عليه
عِقد : وكيفك أحسن ؟
اسرار ابتسمت وقالت : جدًا ! محظوظين بمطلق كلنا
عِقد ابتسمت ابتسامة عريضة وقالت : حبيبي هو
اسرار : شوفوا التفهم ياناس ! مو مثل الرسام أحترق
عِقد : أنا بس اللي بتتفهم لأني أعرفك كويس غيري بتفهم غلط وبتحرقك ! وبعدين ما ألوم سطّام ياكتر مايتحمل ويسكت
ضحكت اسرار بصدمة وقالت : حييوانه وش تقصدين ؟؟
عِقد اخذت نفس تكبح ضحكتها وقالت : ولا حاجه أنتي حلوه وهوا غيور !
اسرار : بتجون الليلة ؟
عِقد ابتسمت بسخرية وقالت : حبيبي أنا ! مجهزه الشنط من قبل أسبوع !
ضحكت اسرار وقالت : آخ يارب تكون سفرة على قد الانتظار والتجهيز لها
عِقد : واضح كرفوا العيال عليها وشكلها حلووه وبعدين ألبانيا شهادتها معروفه ومني كمان أعطيها فوق العشرة !
اسرار ابتسمت وقالت : أجل الله ييسر
مشت ظبيه لهم ونطقت : حياكم الله على كرامة اسرار وسطّام
ابتسمت اسرار وقالت : كثر خيركم
مشوا يطلعون لغرفة الحريم ، جلسوا على الصحن ونطقت عِقد : بيبو في دجاج ؟
ضحكت ظبيه وقالت : أقول أعتاشي وخلي مني الدلع !
عِقد زفرت بغضّب وأخذت السلطات وبدأت تأكل من الأرز وتترك اللحم ..
~ الحوش ، قصر نهيّان ~
جالسين جميعًا ويقضون آخر عصرية فالسعودية سوا ، ابتسمت انفال من سألها نهيّان ونطق : بتروحون يابنتي ؟
انفال : حمدلله رواف تحسن وكثير بس ماقدر أخاطر وقررنا نسافر بعدهم بيوم
نهيّان : حلو خذوا وقتكم
هذام دفع بلسانه خده من داخل ونطق : حمدلله يارب
سلمان سحب فنجاله ورماه عليه بدون مايرّف له رمش ، صرخوا البنات وطاح هذام على ركبة سطّام يضحك ، ابتسم سطّام ونطق : ياكلب لا تستفزه
سلطان نطق وسط ضحكاته : أهرب جاااك !
فزّ هذام يركض وسلمان وراه والشرقية بيده ، رماها بكل قوته على ظهر هذام اللي من الضحك صار بطيء ، شهق من ضربت الشرقية حقت سلمان بظهره ونطق : خلاص أتوب والله أتوب
سلمان زفر بغضّب وقال : من أمس وأنت تناشبني !! قرف
ضحك هذام ووقف يقبّل جبين أخوه وينطق : نمازحك ي أخوي !
سلمان : فكني
هذام : ياحساس والله ماتروح
سلمان ابتسم وضحك هذام ينطق : الحلوه زعلانه
سلمان ضحك بصوت عالي وقال : ياكلب وش الحلوه ؟؟
هذام ابتسم وقال : على سياق الأغنية
سلمان : دز
هذام مشى معه وقال : أبشر
رجعوا يجلسون ونطق نهيّان : فشلتونا قدام حريمكم
ضحكت شهد بصدمة وقالت : بالعكس غيروا جونا !
نهيّان : اهجدي خليني اهاوشهم
ضحكت وضحكوا البنات معهم ، ابتسمت ريم وقالت : متى ماشين ؟
سطّام : بعد العشاء بتقلع الطايرة
نهيّان : والحين وش جدولكم ؟
سطّام وقف ونطق : بروح مشوار مع مطيليق
رفع مطلق عيونه لسطّام اللي مبتسم ويمدّ ذراعه له ، مسكها يوقف معه وينطق : احتزم
ابتسم سلطان ونطق : لا تسحبون
سطّام : لا مابنطول
لبس الجوتي حقه ومشى مطلق يلبس زبيريته ، ألتفت لها وقال : بِكر محمد أمانه عندك يأبو سلطان
نهيّان ابتسم وقال : بعيوني والله ماتشتكي شيء
اسرار وقفت تمشي له ونطقت : زعلان ؟
سطّام صدّ عنها ونطق : في أمان الله مابنطول
شدّت على قبضتها ورجعت بخطواتها ، تدري إنه زعلان منها ولا مستحيل يروح ويحطها أمانه عندهم ، زفرت بغضّب وقالت تحت انفاسها : وذا صاير زعول بآخر فتره !!
رجعت تجلس على السجاد الأحمر بمُنتصف الحوش تسمع سواليف العيال على نهيّان والبنات بين بعضهم ..
~ سيارة سطّام ~
ركبوا أثنينهم وربط سطّام حزامه ، تمسك مطلق بالمساكه اللي أعلى الباب ونطق : مايحتاج نربط احزمتنا
سطّام : على هواك
شغل السيارة ومشى يطلع من الكراج الخاص بـ قصر نهيّان ، ألتفت مطلق عليه وقال : وش عندك ؟
سطّام : بخطفك واذبحك وادفنك ولامن سمع ولامن درى
مطلق ابتسم وقال : يفداك دمي يأبو وفاء
ضحك سطّام بخفه وقال : شاهي ؟
مطلق : وزقاره ؟ اووف
ضحك سطّام وقال : فكنا
مطلق : أمش بس
سطّام ابتسم وقال : لا يالخفوق بننزل في طعوس والشاهي أنت اللي بتسويه
مطلق مسك راسه وقال : الله لا يوفقك ياشيخ ! طعوس مع العصر ! ووين الطعوس اللي فالجبيّل ؟
سطّام ضحك بخفه وقال : وخير ؟ أقولك ثقه معليك
مطلق : أجل دندن وغن
مشوا لأقرب مخرج وطلعوا من الجبيّل ، توسطوا خط نائي ولفّ سطّام عليه من نطق : نروح لـ  ᥊ ᥊ ᥊ ᥊ ؟
سطّام ابتسم وقال : تم وينها ؟
مطلق : حول بسوق أنا
سطّام وقف على جنب ونزلوا ، مشى سطّام من قدام سيارته ومسكه مطلق ينطق : يويلك خاطرك لو يشيل علي شيء !
سطّام : مايمسّني شيء من مطلق ولا يمسّ مطلق شيء مني ، نسيتها ؟
مطلق : بعدي يالهَاجس !
ابتسم سطّام ومشى لباب الراكب ، وركب بجانب مطلق اللي مشى علطول واتجه لوجهتهم ، وبعد نصف ساعة نزلوا ومشى سطّام يأخذ الفرشة من سيارته ، تقدم مطلق يساعده ونزلوا العفش والعزبه كاملة ، ابتسم مطلق وقال : تصدق الجو حلو
سطّام ابتسم وقال : ربك يحبنا
مطلق ابتسم يساعد سطّام ويفرش معه ، ثبت السجاد بالمراكي ومشى مطلق يشغل الغاز ويركب بالشاهي ، أنتهى وتركه يطبخ ، رجع يجلس ونطق : وش لنا بديار الكفار والله لو ماخسرتوا مبالغ فالسفرة ذي إني ما أجي
ضحك سطّام وقال : نغيير
مطلق : أمحق
ضحك بصدمة ونطق : إذا ماودك أجلس
مطلق ابتسم وقال : ايه عشان تزنطني مع رقبتي بنت أيمن
ابتسم سطّام وقال : مين كان يتخيل إننا بنتزوج كلنا ورا بعض وبنفس السنة
مطلق : هو كل واحد شغل الثاني معه
سطّام : صادق
مطلق ضحك وقال : باقي ضاحي
سطّام : اي بالله في أحد ببالك
مطلق عدل جلسته ونطق : لا يرجال اقرفني بالشقراء
ضحك سطّام بصدمة وقال : من هي ؟
مطلق ابتسم وقال : حرام إني ما أعلم
ضحكوا وسرعان ما شهق مطلق من طلع صوت الشاهي وفار على الغاز ، ضحك سطّام ونطق : أعقب يأبو مشبب !
مطلق طفى الغاز ونطق : فيه واحد بيتروش بالشاهي
سطّام ابتسم وقال : أمزح وشفيك
تقدم مطلق ينزله ويصبّ لسطّام ، ابتسم ونطق : دم غزال
سطّام ابتسم يأخذ بيالته وينطق : انشهد
مطلق جلس وسحب البوكيت وأخذ زقاره ، شغلها وسحب منها ونفثه ينطق : كم المشوار ؟
سطّام : حاجه وتسع ساعات أظن
مطلق شدّ على فخذ سطّام ونطق : أنا في وجهك يالله !!!
ضحك سطّام وقال : وشفييك ؟
مطلق : لا لا ما بقدر يالهَاجس وش تسع ساعات !! أنا من ينبع للرياض بغيت أموت
ضحك سطّام وقال : الله يعينك أجل
مطلق : بجلس جنبك فكني من بنت أيمن بتمسك أمي طقطقه
سطّام أشر على خشمه ونطق : على خشمي
مطلق ترشف من الشاهي ونطق : عليه الشحم يأبو وفاء
كملوا جلستهم على هالنهج والسوالف الخاثرة لحّد ماغابت الشمس ومشوا راجعين لـ قصر نهيّان ، يلحقون السفرة وقبلها صلاة المغرب مع الجماعة ..
~ قصر نهيّان ~
دخلوا العيال راجعين من المسجد بعد الصلاة ، ابتسم نهيّان يشوف البنات بالسيارة مع عبدالصبور ونطق : خلاص ماشين ؟
سلطان ابتسم وقرب بينطق لو يدّ سلمان اللي مسكته تمنعه وتعطي الأولوية لسطّام ، ابتسم سطّام متعجب من حركة سلمان لكن ما أستغربها وقال : ايه توصي شيء يالغالي ؟
نهيّان ابتسم وقال : سلامتكم وسلامة بنياتي وعِقد منهم ! اي حاجه خاطرهم فيها ماينقال لهم الا أبشري وامرك وتم سامعين ؟
سطّام مسح وجهه وشنبه وقال : كدينا خير
مطلق : أنا أقول ياعمي ماتحسب عِقد معهم
نهيّان سحب عقاله وضحك هذام يمسكه ويقبّل راسه وينطق : وصل أبشر
سلمان : عاد ياعيال نبي مصداقية إذا ماجازت لكن الديار قولوا لي أهجد
مطلق ابتسم وقال : من الحين ماعجبتني
سلطان : وربي أن تعجبه ذا الشايب وبيقول لنا نمدد
ضحك سطّام وقال : حلفت !
سلطان مسح وجهه وشنبه وقال : تكفى قول إنها أعجبتك مافيني من صام
ضحكوا العيال كلهم ونطق نهيّان : دربكم خضر وتذكروا أن البنات معكم وماهي سفرة عزابية
سطّام : وشلون ننسى اصلاً ؟
سلطان : ودي أقول ليتنا عزابية بس ماقدر بدونها
مطلق مسك كتفه ونطق : حشم أخوها
سلطان ابتسم وقال بهمس : آخ يامطلق وش سويت لك عشان تسوي فيني كذا ؟
مطلق ابتسم يدري بأخته ، مشى معه ونطق : ياسعّد حظه من تهنى بالظبي بعضهم سنين يتعنى ولا تهنى بها
سلطان رفع حاجبة وقال : منهو ؟؟
مطلق ضحك بخفه وقال : الله يستر عليه
زفر سلطان بغضّب ومشى يركب ، ركبوا جميع السيارة ومع بعضهم ، سطّام بجانب عبدالصبور ، هذام خلفهم وظبيه بين سلطان ومطلق ، واسرار وشهد وعِقد بالخلف ، ألتفت عبدالصبور لسطّام ونطق : يمشي بابا ؟
سطّام هز راسه بالايجاب وقال : توكلنا على الله
مشى عبدالصبور يوصلهم للمطار في الدمام ..
~ أمام قصر نهيّان ~
عضّت شفايفها بتوتر ونطقت : هنا ؟
أزهار : ايوه أبرار أشبك
أبرار : وماما تزوجت وطارت ونستنا
ضحكت أزهار وقالت : عشرين سنة تربي اش باقي تبغي منها
أبرار ميّلت شفايفها السُفلية لثواني ونطقت : يحزن ماكنت أبغى والله
أزهار ضحكت وقالت : مو صاحية
أبرار رفعت حاجبها وقالت : لا تخليني أبدأ أشتمك وأشتم شعرك الأشقر دا معاك !
أزهار ابتسمت تغيضها ونطقت : حارّك شعري ؟
أبرار : حيتنتف مني سامعه ؟
شهقت من أنفتح الباب وطلع سلمان ، صغّر نظراته يدقق فيهم ونطق : مضيعين ؟
أبرار مسكت شعر أزهار ونطقت : شفتي قلت لك !!
أزهار شهقت بقوة وقالت : اتركي شعري يامجنونه !!!
أبرار تركته ونطقت بفشلة : لو جلسنا عند أنهار مو أصرف ؟
أزهار زفرت بغضّب وقالت : بيت ريم هنا ؟
سلمان ابتسم وقال : قصر نهيّان
أزهار ابتسمت ابتسامة عريضة وقالت : ايوه ابويا بالقانون
ضحكت أبرار بصدمة من سحبتها أزهار وتعدوا سلمان ولا كأنه واقف حتى ، حكّ راسه وزفر بهدوء ينطق : ياحظكم ياعيال اللذين !
قفل الباب ومشى يركب سيارته ويطلع للخارج ..
~ مطار الملك فهد الدولي ، بالدمام ~
نزلوا وابتسم سطّام يودع عبدالصبور ويأمنه على البيت ومن ذا الكلام ، أنطلق يدخل يتبعهم ووقف يشوف صدمة العيال وسكونهم ، سلطان ضحك بصدمة ونطق : دوبنا ماقلنا صلوا على النبي !
سطّام : شسالفة ؟
مطلق : البنات أختفوا
هذام ابتسم وقال : الحين يبدلون ولا يتكشخون مشينا نتقهوى
سلطان نطق بغضّب : لا تستهبل أنت ؟؟ أي قهوة وأي خرابيط باقي ربع ساعة وتقلع !!
هذام ابتسم وقال : كنسل الحين وقت الصراخ
أنطلق يركض وينادي بأسماءهم وسلطان معه ، سطّام ابتسم بصدمة ونطق : بن مشبب
مطلق ألتفت له ونطق : أرحب يالهَاجس ؟
سطّام : راحوا يسار نروح يمين ؟
مطلق رفع طرف ثوبه وقال : مشينا
سطّام ابتسم ينزل ثوبه وينطق : مطلق والله مابنركض ورا ناقه ولا تيس عشان تتشمر ترا مطار وبنات
مطلق : أحلف ؟
ضحك سطّام بخفه ومشى للجهة اليمنى ، مطلق رفع جواله الكشاف ونطق : الحين ورا مانتصل بدال الدوشه ذي
سطّام : ياخطير كيف مافكرنا ؟ صاحي أنت مستحيل يردون
مطلق : بنت أيمن بترد
ضغط على رقمها يتصل عليها وفعلاً ما أخذت ثواني الا وصوتها واصله وهي تقول : ايوه حبيب قلبو ؟
مطلق ابتسم وقال : وينك فيه ؟
عِقد عضّت شفايفها تركز وهي تضبط حجاب ظبيه ونطقت : أشبك ؟
مطلق : مابني شيء وينك أنتي ؟
عِقد ابتسمت وقالت : مره حلو شوفي
مطلق زفر بغضّب وقال : بنت !
عِقد : معاك حبيبي معاك
مطلق رفع صوته وقال : وينكم الطيارة مابتستنى ياصاحبات السمو ؟!
عِقد ابتسمت تنزل جوالها وتمشي لأسرار ، بقى مطلق على الخط يصارخ وأحترقت أعصابه وبدون أي إجابة منها ، قفل الجوال ونطق سطّام : ايوه ؟ بنت أيمن وشفيها ؟
مطلق نطق بحدة : ورب الكعبة لو ماتسكت
ضحك سطّام ومشى من شاف سلطان جاي لهم ، تقدموا له ونطق : ماحصلناهم لا بحمام ولا بحفرة ولا بمطعم !!
سطّام : مشينا للبوابة مصيرهم يسمعون النداء ويجون
هذام : وش عنده الشيخ مروق قلنا عريس بس مو لهالدرجة
سطّام ابتسم يمشي للبوابات ، وبمنتصف الطريق أنطلق أول نداء للطائرة ، هذام مسك راسه ونطق : تأكدت إن سطّام ماسك شيء على المطار والطيار والطاقم
سطّام ضحك بخفه وقال : خاف ربك
سلطان نطق بغضّب : ترا بديتوا تنرفزوني البنات وين ؟؟
ظبيه ابتسمت وقالت : هنا
ألتفت والعيال معهم لهم ، بأطقم ناعمة ومتناسقة طويلة ومرتبه ، عِقد تاركه شعرها يأخذ حريته وشهد معها بس لابسه كاب ، اسرار وظبيه متحجبات وكل وحدة فيهم لابسة ماسك ، شّد مطلق على قبضته ونطقت عِقد : طبعًا الحجبات لأنهم لسى بالسعودية
اسرار ضحكت تمشي وتسبقهم ، هذام مشى ومسك ذراع شهد ونطق : وشو له ذا الزين كله ؟ لمين
شهد ضحكت وقالت : لنفسي ونص لك
هذام ابتسم وقال : راضي بالنص حقك
شهد ابتسمت تشّد على ذراعه وتمشي ، مشت عِقد لمطلق ونطقت : اش رأيك ؟
مطلق : مدري والله بس وش رأيك نأخذ طفايه ؟
عِقد ابتسمت بدهشة ونطقت : لأني هوت أكيد
مطلق : أيه يحيوانه ولصدري اللي قام لحرايقه صوت !!
ضحكت تمسك ذراعه وتنطق : تعود حبيبي
مطلق مشى معها ونطق بغضّب : بتعود ؟ لا والله إلا بكسر خشم اللي يرفع عينه لك غيري أنا
عِقد : والله لو كتروا مين مثلك أنت ؟
مطلق ابتسم يمشي معها ويتبع العيال ، وقف سطّام يمدّ البوردينق للموظف ومن أنتهى مشوا للطيارة ، ابتسم سطّام ونطق : أبو مشبب جاهز ؟
مطلق : أطلق حجاجك الله يفكنا منها
ضحك سلطان بصدمة ونطق : لا عاد ! تخاف ؟؟
مطلق شمَر أكمام ثوبه ونطق : يقولك يأبو نهيّان من خاف سلم !
سطّام : الله الله !
هذام ضحك بصوت عالي وقال : سطّام الكلب يتشمت
سطّام ابتسم يصدّ يكمل مشي بالممر الخاص بالطائره ، وصلوا وصعدوا على متنها ، ابتسم مطلق يجلس بجانب سطّام وينطق : قلته صح ولا لا ؟
سطّام : حياك أن ما أسعك المحل تشيلك عيوني ويا أسعك الصدر والضلوع
مطلق ابتسم وقال : لبى كبدك يالهَاجس
مشت اسرار وبدون ماتوقف ولا تسأل ليه حصل هالتغيير كملت طريقها وجلست بجانب عِقد اللي نطقت بفرحة : أشكر أمك !
ضحكت بخفه وقالت : لا تسألين وش حصل بس حمدلله جات منهم
ابتسمت عِقد وقالت : مستحيل اسأل الشايب يخاف ويعقدني معاه آخ أحُبو
ابتسمت اسرار ونطقت : مجهزه شيء ؟
عِقد : دامك بجنبي أكييييد !
ابتسمت اسرار وقالت : يسعد أمك !
ضحكت عِقد بسخرية لأن اسرار تقلدها ، رفعت الايباد حقها ونطقت : رعب ؟
اسرار : عشان يخنقني الرسام من صراخي ؟ فكيني
عِقد ضحكت وقالت : قولي خوافه وأختصري
اسرار : بشيل فكك ترا
ضحكت عِقد بصوت عالي ، ابتسمت اسرار تضحك معها وتنطق : انطمي بيجي مطلق الحين !
'
انتهى البارت ادعموني بنجمة وكومنت عشان اتحفز اكملكم 🩵
" وييييك أند سعييد يحباااااني ، النجمة لا هنتوا 🩵🩵🩵🩵🥹 "