مشت ايام وجت ايام وفي اليوم هذا راما حتسافر لتركيا
راما: جهزت حوايجها وطلعت الشنطه قدام الباب
محمد (عمها): وين ماشيه
راما: مسافره
محمد: وين وبدون ماتاخذي رأي حد شن انتي معندكش اهل
راما: وانتم شن تطلعوا وتخشوا وتدهوروا ومتقولوش عندنا بنت خو بروحها في الحوش كلموها تغير جو معانا اما اهل تحكي عليهم
محمد: قليله التربيه هكي تحكي مع عمك
راما: بعد وفاة اهلي مفيش حد ضمني ورباني ربيت روحي بروحي وكسبت الحنان من نفسي منراجيش فيك تقيمني
يونس: كنكم صوتكم طالع
راما: خذت شنطتها.. نشوفكم ع خير
يونس: وين ماشيه
راما: طلعت وسيباته يكلم فيها دخلت شنطتها في السياره وطلعت لحوش فراس وصلت واتصلت بيه.. الو
فراس: وصلتي
راما: اها
فراس: هي طالعلك
راما: تم.. سكرت.. طلع فراس
فراس: سلم عليها.. وينك ليا واجد ماشفتك شن في من مزعلك
راما: اول مره تبكي قدام حد
فراس: لالالا غير كنك بس
راما: من يحسابوا رواحهم هما يحكولي هكي
فراس: فهم كل شي... اششش خلاص فوتيهم
راما: مسحت دموعها.. هيا تشيلني للمطار
فراس: بسيارتي؟
راما: اها وسيارتي خليها عندك هاك المفتاح
فراس: هي تعاالي لسيارتي
حازم(خو فراس) : رمرم وينك ي الغلا
راما: حازم اهلاا
حازم: وين مغيبه
راما: قرايه وخدمه
حازم: حاس روحي نحكي مع راجل ازح😂
راما: لا ياراجل😂
حازم: وحق ربي بس هكي احسن البنت في الوقت هذا لازم تكون شخصيتها قويه
راما: هيوااه
فراس: راما هيا
راما: هي
حازم: توصلي بالسلامه
راما: تسلم وخيي
وخيي؟
لحظه حازم من وفراس من وشن عرف راما بيهم 🤓
༺فلاش باك༻
منى: راما ي ماما تعالي
راما: نعم مامي
عادل: عمك سامي جا
راما: فراااث و حاذممم 😭💛💛
عادل: هذا يلي هامك😂😂
منى: اصحابها 😂
راما: وينهم
منى: في المربوعه
راما: مشت تجري.. فرااث
فراس: راما صحبتي
راما: صاحبي.. حضناته..(اصحاب الطفوله وايامها محلاها😭💛)
فراس: تعالي نلعبو
راما: حاذم وين
فراس: اسمه حازم
سامي: 😂😂.. راما تعالي سلمي
راما: نسيت😅
سامي: يلي هامك فراس وحازم انتي
راما: اها صحباتي هما
فاطمه: خير ي سمحه
راما: عميمه تامي
فاطمه: نجك لياا 😂💛
حازم: راما ي بارده
راما: مشتله تجري.. وين كنت
حازم: شن دخلك
سامي: حازم عييب توا كانت تسأل عليك
حازم: خير ي راما شنجوك
راما: حول غادي
وكملوا هدرزه ومشاكل واكيد عرفتوا ان اهل فراس واهل راما اصحاب 💛
༺الحاضر༻
راما: في المطار.. فراس هذينا افلوس عطيهن لنيرمين وناديه
فراس: تم
راما: مره مره ابرم عليهم بالك تنقصهم حاجه
فراس: انتي غير امشي واسكني وطمنيني عليك
راما: تمام.. مشت لصاله الانتضار لين اعلنوا ع رحلتها ركبت للطياره واول ما مجلست رقدت من كثر التعب طلعت من حدود ليبيا ومرت على عدة دول لين وصلت لمطار أزمير نزلت راما ومشت بالTaxi يلي وصى عليه فراس وصلت لشقتها رتبت حوايجهاا لقت الشقه مش ناقصها شي طلعت خذت شفره وردت للشقه... الوو
فراس: ياهلا
راما: كيف عرفتني
فراس: ع اساس عندي حد يعبرني بره انا
راما: والله
فراس: اها شن صار سكنتي
راما: اها ليش متعب روحك موصلي السياره يلي بتاخذني من المطار
فراس: مفيش تعب والله شن عجباتك الشقه
راما: اهاا ديكورها حلو وطلتها ع العالم يلي بره حلوه
فراس: ديكورها اسود هذا عليش عجبك
راما: اها اللون يلي نحبه
فراس: راما
راما: نعم
فراس: شن يلي غيرك
راما: الظروف
فراس: مش قلتلك اي شي يصير معاك قوليلي
راما: تنهدت... لازم نتعود ع يلي قاعده فيه وانا الحمدلله مش محتاجه شي عندي شخصيتي واسمي يلي تعرفه بنغازي كلها وعندي فلوس وعندي حوش وعندي خدمه وقريب حتكون عندي شهادة جامعيه خلاص حياتي قريب حتقعد كامله
فراس: ربي يكمل عليك بتفكيرك هذا
راما: انشاء الله
فراس: بس ليش معايا انا وحازم اسلوبك مش نفس يلي بره
راما: ناسي انا كم عندي نفسيه؟ 😂
فراس: ملكه النفسيات😂
راما: اهمم
فراس: ملكه ال15 شخصيه
راما: قولها بطريقه حلوه تره
فراس: #فتاة بخمسه عشر شخصيه
راما: نجكك😂😂
فراس: تمنيت تكون عندي اخت
راما: انا اختك ولا مش سادتك
فراس: لا مكفيه وموفيه
راما: خلاص معناها
فراس: توا نخليك اتريحي هي سلام
راما: سلام.. ورقدت
_____
بنت
الشريف💗
_____
محمد: امي
ساميه: نعم
محمد: راما سافرت
ساميه: ربي ينور طريقها
محمد: كنتي تعرفي
ساميه: لا
محمد: وعادي عندك
ساميه: راما ماينخافش عليها تعرف كيف تتصرف مش نفس باقي البنات راما تهني علي روحها تعرف مع من تمشي ومن تخط عليه تعرف مع من تضحك ولمن تقلب وجهها
محمد: يعني نحنا بناتنا مينفعنش
ساميه: كل واحد يشوف تربايته ويشوف بنته مع من تمشي تشوفو فيها راما انتم متضحكش لا لراجل ولا لبنت تخدم وتقرا في نفس الوقت مش نفس بناتكم يلي تنخطب ادير دور ثاني راما تخدم وخدمتها حسابات وحدود وميناء وقصه وتقرا طب يلي كيمياء وانجليزي صعب تخصصها ومستواها قاعد مشاء الله هذي اخر سنه وتتخرج
يونس: تي باهي مفروض البنت نتابعوها
ساميه: اتابعوها بعد شن بعد كبرت وبنت مستقبلها شوفوا سيارتها حقها 85 الف شرتها بفلوسها وتعبها شركتها هياا يلي بنتها بعد ماساعدها خالها في بنيتها وهيا مشت جابت وحدين يشتغلوا معاها بدت من الصفر وشوفوا توا مستواها اعلى منكم اسمها يهز بنغازي كلها
ابراهيم: غير اهدي وانتي ماشيه اسمها يهز بنغازي قالتلك تي هذي كان ما تغطي شعرها نعرف كيف نغطيه لها
ساميه: مدخلكش بيها تعري راسها ولا جسمها الشي هذا مدخلكش هيا عقلها في راسها
علي: باهي نحنا بناتنا ع الاقل لبسهن محتشم ووشاح وراسهن في الوطى وقت يجي راجل قدامهن وجوهنن مفيش عليه مكياج مش هذي تقول عيون فرعون وفمها الاحمر وين ماشيه بيه هذا كله
ساميه: هييي وين بناتكم وجوهن مفيش عليه مكياج امس ايلاف خشت عليا وقت بتمشي للجامعه مهناك حاجه ماحطتها ع وجهها
يونس: ايلاف بنتي عندها خطيبها خلاص منخافش عليها
ساميه: نهدرز لبكره والله مافيكم واحد يفهم هيا كل واحد يمشي لمراته فكوني من وجهوكم قدامي ماتجيبوا الا الغصايص
أنت تقرأ
فتاة بخمسة عشر شخصيه(روايات ليبيه)
Фэнтезиروايتي بأسم {فتاة بخمسه عشر شخصيه} 🤍 اكيد نصدمتو من الاسم 😂 بس حتكون روايه بأحداث حلوه نبدو في التقديم🤍🤍 روايتنا الجديده تتكلم على بنت كانت ام قلب طيب وكانت رقيقه وااجد لدرجه ان على ابسط حاجه تصير دموعها ينزلو بسرعه حتى ع اتفه الحاجات وكانت دلوو...
