أشوفك في سواد الليل نور شع قدامي

Part1

(الشخصيات والاحداث خياليه لاتمد للواقع باي صلة)

يوم زواجهم قامت بعد ليلة كانت مليئه بدموعها قامت تسبحت وبدلت ونزلت ولقت الكل يجهز لزواجها والكل مبسوط الا هي تتفرج عليهم وبنفسها: اهخ لوتدرون وش حقيقة الامر
جت امها وخواتها: يلا يلا مشينا
طلعو يتجهزون لليلة عرسها
تسريع الاحداث انزفت وتصورت وتزيف البسمه طول الوقت وتصطنع الفرحه وهي مو قادره تبلع ريقها من الغصه لكن تجاهلت مشاعرها وتصنعت الفرحه عشان اهلها وكملت الليله عادي وصار وقت انها تمشي زفوها لبرا وركبت السياره بكل هدوء سلم عليها وساعدها بفستانها وسكر الباب ولف على ابوها واخوانها وهم يوصونه عليها ومشى متجهه للفندق نزل وبيده بشته وينتظرها تنزل وهي بالغصب نزلت بسبب فستانها وبداخلها تسبه:ليش واقف! على الاقل شيل الزفت ذا عني افف
نزلت بعد عناء ومشت وراه اخذ كرت جناحهم وطلعو وطول الوقت مستغربه من تجاهله لها لكن ارتاحت من ناحيتها
دخلو الجناح نزلو اغراضهم سحبت شنطتها الصغيره ودخلت الحمام وجلست على الارض تبكي بصمت لكن للاسف شهقاتها فضحتها
عند سلمان فصخ بشته وثوبه وبدل ملابسه لشيء مريح وراح للدولاب يعلق ثوبه وبشته وانتبه لصوتها وقرب للباب وهو يسمع بكاها حزن عليها وراح انسدح على السرير يحاول ينام لكن اخذه التفكير عن سبب بكاها فتح جواله يشتت تفكيره ومر الوقت ولا طلعت ناظر الساعة: يبوي شفيها ذي ثلاث ساعات ورا ماطلعت!
قام ودق الباب: تولين؟ تسمعيني؟
تولين سحبت نفس وبصوت باكي: وش تبي؟
سلمان: قلت بتاكد لايكون صارلك شيء لك ثلاث ساعات بالحمام
تولين: شوي وطالعه
سلمان: زين فيك شيء؟ تبغين شيء؟
تولين:لااا خلاص قلت لك شوي
سلمان: طيب طيب خذي راحتك
رجع انسدح ينتظرها مرت نص ساعه وطلعت علقت فستانها ورتبت اغراضها التفت بسرعه لها يتاكد وانتبه لخشمها المحمر وعيونها المنتفخه لفت عليه وصدت بسرعه وهو سوا نفسه مانتبه: طفي النور بالله بنام اذا خلصتي
تولين طفت النور بدون ماتقول شيء وترددت تنسدح وهو انتبه لها انعكاسها بالشباك واخفى ضحكته من شاف ترددها انسدحت بطرف السرير من بعييدد
مرت ليلتهم بهدوء سلمان وحزن تولين اللي ماهناها بنومها
اليوم الثاني قامت على صوت جواله وبانزعاج قامت وناظرته للحين نايم وجواله يدق وازعجها هزته بخفيف: سللماانن رد على جوالك والا قفله
ماتحرك وقامت صمتت جواله ورجعت تحاول تنام لكن عجزت من صداع راسها قامت تسبحت وجسمها يرجف لبست بسرعع وجلست تنشف شعرها ولازالت رجفة جسمها موجوده تلفتت تدور اي شيء تاكله ويرجعها لوعيها مالقت غير المويه والقهوه سوت لها فنجال وجلست تنتظر سلمان يقوم ويفطرون فتحت جوالها وجلست تتفرج على مقاطع زواجهم وتعليقات الناس وتصاميمهم فتحت احد التعليقات وتشوف كيف ردود المعجبين والمعجبات وضحكت على تعليق(ياحظه اكيد عن حب شوفو شلون يرقص ومبسوط) تنهدت والتفتت للي جاء وهو يفرك عيونه: صباح الخير يلا تجهزي بنطلع للمطار
قامت تجهز اغراضها والتفتت لشنطته المحيوسه وكل اغراضه برا تنهدت ورتبتها عشان مايتاخرون وطلعت كل شيء برا وجلست تنتظره لبس وطلع بسرعه اخذ الشناط وراح للمصعد قامت لفت حجابها ولبست شنطتها وقامت وترنحت رجلها وحست برجولها ماعاد تشيليها استندت على الجدار شوي وسحبت نفس تحاول توقف عند سلمان وصل الاصنصير وطولت ماجت: يلا تولين بنتاخر اخلصيي
غصبت نفسها تمشي رغم رجفة رجولها
سلمان: اخلصي يلا
ماردت على اسلوبه رغم استفزازه لها لكن الشيء الوحيد اللي مشغل بالها هو انها لاتطيح من طولها
نزلو سوو تشك اوت وطلعو للمطار قص البوردنق وشحن الشناط ومشى يدور البوابه ويمشي بسرعه عجزت تلحقه تولين اللي بالغصب تمشي وقفت تلتفت تدور اي مكان تجلس تاكل فيه قبل يغمى عليها مشت قدام لقت ستاربكس وهي متجهه له لف سلمان: تبين قهوه؟
تولين هزت راسها بايه وهي تتمايل واستغرب وفجاه فز مسكها: وش فيك!
تولين ماردت وهي ماعاد تشوف غير السواد
مسكها بسرعه سلمان وجلسها على اقرب كرسي وحس ببرودة يدينها ورجفتهم: وش فيك يابنت الناس ردي
قام بسرعه اخذ كوكيز وحطه بفهمها وشوي وبدت تصحصح جاب سلمان قهوه وساندوتشات وجلس ومد له الساندوتش:سمي
صدت وهي تحضن نفسها: مابي شيء
سلمان بينه وبين نفسه: وشبها ذي
اخذت قهوتها وشربتها كامله
خلص اكله وقام: يلا يلا وقت رحلتنا الحين
اخذ الاكل معه وقهوته ومشو
تولين لفت شالها عليها اكثر من حست ببرد ومشت بسرعه وراه تحاول تلحق خطواته
وقفت وهي تلهث: لاتركضض ماقدر الحقك
سلمان: ماركضت! انتي سلحفاه
خزته وسحبت نفس تحاول تهدي انفاسها بعد ماركضت وراه نص المطار
ركبو وهي عند الشباك وهو بالوسط والكرسي الثالث فيه عجوز حرمة
جلسو وبدت تقلع وتولين طلعت علكها تاكله عشان اذونها وبخت عطر من حست بلوعة الاستفراغ وبطنها كله قهوه قامت بسرعه للحمام واستفرغته كله وطلعت بعد ماغسلت وجهها ورجعت لمكانها
سلمان: وش فيك انتي تعبانه؟
تولين: لا بس استفرغت
سلمان: بعذرك قلت لك كلي احد يشرب قهوه على بطن فاضي! خذي خذي جبته معاي كلي لقمتين تصحصحك
تولين اخذته واكلت لقمتين ونزلته وطول الرحلة تناقر سلمان اللي كانه قاعد على كبدها زعلت منه ولفت على الشباك وهي تتذكر موقفها مع اهلها وترجع تصيح
وهنا تورط سلمان مو عارف يتصرف:ءءانا اسف تولين ماقصدي ترا امزح معك
بعدته: خلاص ابعد عني
سلمان: اسف والله ماقصدي
مسحت دموعها بسرعه وسكتت
وصلو وجهتهم بعد وقت طويييللللل
ووقفو ينتظرون شناطهم
سلمان: شنطتك ماوصلت للحين خل نروح الفندق وبرجع اخذها لاوصلت
تولين: متى توصل؟
سلمان: يقولون الرحلة الثانيه
تولين: للالاااا مطولين ابي اغراضي!
سلمان: خلاص تعالي بدبرلك انا تعالي
راحو للفندق وفتح سلمان شنطته:سمي هذا شورت اتوقع بيجي مقاسك وتي شيرت اذا ماعجبك خذي اللي تبين بنزل انا اجيب لنا اكل وكم غرض وبجي
تولين: شكرا
سلمان: العفو
نزل وجاب لها اساسيات فرشاة شامبو غسول جسم يعني الاساسيات اللي يتوقع انها بتساعدها الين تجي شنطتها وراح للوبي طلب اكل لغرفتهم ومشى فوق دخل وفز على صوتها: سلمان لاتجي!!!!
سلمان: بسم الله طيب
وقف عند الباب صاد ينتظرها تخلص
سلمان: خلاص؟
تولين: ايه
دخل وانفجر ضحك على شكلها الشورت اللي وصل لركبتها والتي شيرت لفخذها
تولين:لاتضحك!! حاولت القى اصغر شيء عندك مالقيت!
سلمان: لا لا حلو حلو يجنن خذي هذي
تولين: شكرا
سلمان: العفو
فتح الباب واخذ الاكل: تعالي كلي لاتدوخين
تولين: خلاص لاتمسكها علي
سلمان: ابي افهم بس وش العناد ذا ليه ماكليتي!
تولين: مو عناد بس ماكان لي نفس
من قالت جملتها بدت تقلب اكلها ولاكلت الا شوي
سلمان: كلي يابنت الحلال
تولين: خلاص شبعت، قامت واخذت جوالها وراحت للبلكونه وجلست تهوجس الين دمعت عيونهها بحزن كل ماتذكرت
خلص اكله وتمدد على السرير وانتبه لها جالسة وتفكر والهواء يلفح بشعرها وانتبه ليدها واضح تمسح دموعها: تبكي! ليه؟ ياربي هالبنت عجزت افهمها لايكون حزينه بسببي! سلمان اعقل بنت الناس خاف الله فيها خلاص تزوجتها مافيه امل انك تسوي خطتك ابد وانت مرتاح معها خلاص استمر بحياتك ويمكن تحبها وتحبك ماتعرف خلاص اسكت اول شيء اعرف سبب حزنها وزعلها
نام وهو يفكر وجلست تولين بالبلكونه الين نشفت عيونها التفتت لقته نام دخلت وسكرت البلكونه وانسدحت وخذتها الافكار الين غفت مكانها

...... يتبع