أشوفك في سواد الليل نور شع قدامي

Part 15

( الاشخاص والاحداث خيالية)

___________________
لاصار خصمك هو حبيبك لاتحارب
كيف تنقل جرح من روحك لروحك
___________________

تولين: مسكين توه مايفهم بهالاشياء معليه يتعلم يتعلم اصبر عليه
سلمان: ماقلتي لي؟ متى تجون؟
تولين تنهدت: مدري يمكن اسبوعين ثلاثه
سلمان: كثير يادُرة فؤادي
ابتسمت بحب من اللقب الحنون: لا ياقلبي انت تحمل شوي كلها كم يوم
سلمان: اسبوعين بالكثير مالك غيرهم
تولين ضحكت: ابشر سم
سلمان: سم الله عدوك تآمرين على شيء؟
تولين: سلامتك فمان الله
سلمان: الله يحفظكم
تسريع الاحداث
مرت شهور وبدا ابنهم يخطي اول خطواته
واقفه تولين ومعها الكاميره توثق اول لحظاته وامامهم سلمان اللي فاتح يدينه يشجع ابنه يتقدم له ويخطي خطواته الاولى
يطيح ويحاول يوقف ويعيد محاولاته بدون ملل 
سلمان: ليه مستعجل ياولدي اصبر اول تحبي بعدين تمشي توك تحبي ليه مستعجل
ضحكت تولين تغلق فمه بكفها:خله ولدي طموح شوف شلون يطيح ويرجع يعيد المحاولة حبيبي انا يلا حاول حاول
قلب عيونه يسحب ابنه لحضنه: خلاص شوفي شلون تعب
والتفت لولده: وانت بعد مو غصب تمشي كل شيء بوقته يلا تعال نلعب؟
رفعه على كتوفها وغيث يضحك من ابوه اللي يتمايل فيه
مسكته بسرعه تولين بخوف:يمه لايطيح تكفى سلمان 
نزله على الارض ورفعها يدور فيها تعلقت برقبته وتضحك: يييممههه!!!
نطق ليغيضها: وجعتي ظهري انزلي بس
حركت شعرها تردها له: وجعتك عظامك يالشايب؟
سلمان: لاتخليني اعصب عاد!
نزلت ترفع ولدها من الارض: بشويش على عظامك !
ماقدر يعصب او يكون جدي وانطلقت ضحكته
تولين: عمتي كلمتني تقول انه اليوم بتكون جمعتهم بالمزرعه خل نطلع بعد الغداء ودي نروح بدري
سلمان: زين
خلصو غداهم وطلعو للمزرعه حيث جمعة اهل سلمان
دخلو للخيمة وهي وراه وبحضنه غيث: السلام عليكم
الكل: وعليكم السلام
الجد: ياهلا ومرحبا هاته عندي هاته
نزله بحضن جده وراح يسلم على اهله
عذوب: هلا يمه هلا الحق اخوانك راحو يجربون الفرس جدك شرا فرس جديده
سلمان: جد! على البركة جدي
تولين: على البركة ياجد
الجد سلمان: الله يبارك فيكم ياعيالي
تولين: سلمان بجي معك
سحب كفها تمشي بجانبه: تعالي يلا
نزلت غيث بكرسيه ومشو يلحقون البقية
عند الخيل كان فيصل فوق السور ويحاول يركب على الفرس العنيده وزياد يساعده في تثبيتها ومن ركب وثبت نفسه على السرج حتى قفزت مرارا عشان تطيحه لكنه ثبت وكان اخر حل انها توقف على اقدامه وترجع على ورا وفجاه سقطت على جمبها بقوه وصرخ فيصل من الم رجله: اهههخخخخ ززييااااددد الحقني رجليي
فز زياد بخوف يحاول يبعدها ويسحب اخوه اللي متألم من رجله ولحسن حظه رجله ماكانت كامله تحتها بس كانت تضغط عليها وتوجعه
صحك سلمان اللي شهد على الموقف: احسن ماتبيك تركبها وشوا له تعاند؟
طلع فيصل اللي متكي على كتف زياد وكشر لسلمان:انت اسوء اخ بالعالم
سلمان: شكرا حبيبي وانت كمان
فيصل: العفو
تولين: مسكين اكيد توجعه
سلمان: المفروض روضها اول وتعامل معها وواضح انها عنيده ليش يكمل؟ الله يستر لاتكون كسرت له رجله
تولين: تعال خل نشوفها
سلمان: وش تشوفين؟ لا تعالي لاتسوي لك شيء
طنشت تولين كلامه ودخلت تحاول توقف امام الفرس اللي تهرب منها ضلت تلحقها وتمسح على راسها وتحاول تتقرب منها الين ماسمحت لها بالاقتراب تحت صدمه سلمان: شمسويه لها انتي!؟
تولين ضحكت تداعب شعر الفرس: ماسويت شيء بس هي شكلها حبتني!
واقتربت تقبل خدها: حتى انا حبيتك
ابتسم يسحب شعرها عن وجهها: من مايحبك ياتولين؟
ضحكت تعانق الفرس: محد!
رفع حواجبه بذهول: واثقه بعد
تولين اقتربت تضيق عيونها وتكتفت: شتقصد؟
رفسته الفرس لانه كان واقف وراها ولكنها جت صدفة لجملته لتولين وطاحت تضحك والتفتت للفرس تقبلها:شكرا لك يستاهل! عدو الفرحة
سلمان سحب نفسه يبتعد عنها متألم من بطنه حقد عليها وابتعد غاضب من الفرس
عضت تولين شفتها تهمس للفرس: شكله زعل!
صهلت الخيل وعقدت تولين حواجبها: ايش! يبقى حبيبي ترا صح انه غلط بس هذا مايخليني اقسى عليه! بخليه يعدل غلطه!
ضحكت من الفكرة اللي جتها: ولا يضر شوي من الدلال ومحاولاته لرضاي صح؟ شرايك انتي؟ اعذبه او احنّه؟
ابتعدت الفرس تبدي عدم اهتمامها وتركتها تولين تروح:ماعجبتك سواليفي! اكيد مليتي ههه يلا باي
رجعت للخيمه تشوفه جالس على جواله بهدوء جلست جمبه بهدوء وتراجعت عن خطتها الشريره من شافته عاقد حواجبه: توجعك؟
سلمان: شوي
تولين: اشوفها؟
سلمان: ليش خليتيها ترفسني!
فتحت عيونها بصدمة: سلمان شدخلني انا وانت ترا كنت وراها اكيد خافت او انزعجت منك انا مالي دخل اذا معصب منها روح طلع حرتك لكن لاتعصب علي عشان فرس رفستك! وتبي الصدق؟ احسن تستاهل كيف تقولي واثقه؟ شقصدك؟ ما انحب يعني والا شلون؟
الجمته بسرعه ردها وكيف انهلت كلماتها ورا بعض:تدرين اني كنت امزح!
تولين: والفرس كانت تمزح!
سلمان: خلاص مانبي نتهاوش وقفي الكلام
تولين: وتبي تسكتني بعد! انت البادي سلمان لاتحطني الغلطانه واللي تبي هواش!
سلمان: خلاص اسف حقك علي
صدت بوجهها تشرب فنجالها متجاهلته
ضحكت من ضحكة ولدها اللي تتعالى وهو يهرب من حم اللي يحبي وراه يلعبه
مدت يدينها له ترفعه عن الارض: يمه بسم الله على وليدي
حمد: عمه ليش مايوقف؟
تولين: باقي صغير اذا كبر زياده يمشي ويلعب معاكم
سلمان: اقول تعالي نطلع بيشب فيصل الحطب الحين وبيعجج علينا ننكتم
اخذت ولدها بحضنها وطلعو يمشون
سلمان: شرايك نجيب نونو ثاني عشان يصير قريب من عمر غيث ويلعبون سوا
تولين: الموضوع مغلق الى وقت لاحق
ضحك: لييش؟؟
تولين: ابدا لا غيث باقي بيبي باقي صغير وتبي زياده!
سلمان: طيب خلاص ولاتزعلين
تولين: اقول ابونا شرايك نسحب عليهم ونرجع البيت؟ وننام ونتعوذ من الشيطان
سلمان: ياحبك للنوم اقول لا تونا جاايين
تولين: اوف طيب شيل غيث عورتني يديني
اليوم انت راح تسهر معاه وتنومه وانا بنااامم
سلمان: عادي نسهر سهرة شباب صح بابا؟
ابتسم لضحكته: ماتدري شقول بس تعزز هاه؟
قبل خدوده مراراً: اههخخ هالخدود ماحلاها!
احتضنت ذراعه: الله لايحرمنا منك سلوم
قبل راسها: ولامنك ياحلى توته! شافتها عيني
تخصرت تقرص بطنه: من شفت غيري!
سحبها يحتضنها وهو يضحك: ماشفت احد انتي لحالك جننتيني توته العصبيه وتوته الحنونه وتوته الحبيبه وتوته الصديقة انتي كل التوتات في حياتي
صنمت لدقيقه من شرحه وضحكت بخجل تحتضت خصره: سسللماانن!!! ترا بصيح!
سلمان: لالا لاتصيحين تكفين اتغزل فيك وتبكين وش يفكني من ابوي
تولين: تدري انك ضواء روحي وحياتي وشمعة دنياي
سلمان: اسمحي لي انهي الغزل مايصير يصير غزلك افضل مني
تولين: ياربي الغرور!
سلمان: افا ابي ادلعك
تولين: يلا عطني
سلمان: اشوفك في سواد الليل نور شع قدامي
تولين: تحاول تقلدني! هاهاها احبك والله بكل حالاتك صح انك عبيط لكن انت العبيط حقي
سلمان: يلا خلاص قبل نتهاوش على الغزل ويجلدنا جدي كلنا امشي خل نرجع غيوثي ينعس شكله والا طفش منا
تولين: افا مايطفش من ماما وبابا صح غيوثي؟
مارد وهو ينعس على كتف سلمان: لا صدق نعسان حبيبي مااخذ ولا غفوة من قام مسكين خل نرجع واعطيه رضاعته قبل ينام
ورجعو للخيمة يجتمعون مع باقي افراد عائلتهم جلسة حنونة تجمع الاحباب والاهل مع بعض

النهاية💕

___________________________

- استغفر الله🩷
- الحمد لله🩷
- الله أكبر 🩷
- لا إله إلا الله🩷

كنت متردده شلون ابي انهيها لكن انهيتها خلاص ماعاد فيه احداث اكثر من كذا حبيت اوقفها هنا
سامحوني على القصور 🙋🏻‍♀️
في أمان الله حبيباتي💕👋🏻

نشوفكم حبايبي في الرواية القادمة بإذن الله وراح تكون افضل ولها منحنى آخر وقصة مختلفة لاشخاص مختلفين