أشوفك في سواد الليل نور شع قدامي

Part11

( الشخصيات والاحداث خياليه لاتمد للواقع بصلة)

"وثقت في حبّه مثل راعي الطير
لا هد طيره فـ الهواء واثقٍ منه."
_________________

نطقت بهدوء وهي تلعب بشعره: سلوم وش فيك تعبان؟ رحت المستشفى؟
سلمان: ايه نزلة برد عطوني كيسة علاجات بس مالي نفس بستفرغ
قامت: معليه يابوي بسوي لك شوربة تدفي بطنك ومابتستفرغ معليك نام وبجيك
سوت شوربة وحطت علاجاته وجلست جمبه شرب شوي واكل علاجاته وضلت تبخ عطر في يدها وتحطها عند انفه: شم عشان لا تستفرغ
تمدد بتعب وهو يغمض عيونه: طفي النور
طفت النور وطلعت تركته ينام
بعد صلاة العشاء
رجع من الصلاة وجلس ينتظر العشاء
قربت عذوب تتحسسه: تولين تقول تعبانه كيفك ياحبيبي؟
سلمان: احسن الحمدالله
عذوب: الحمدالله ريح نفسك وابعد عن المكيف لاتنام قدامه
سلمان هز راسه: ابشري
حضرو الاكل واكل بسرعه وقام اخذ علاجه وراح غرفته دخل للغرفه بوسط الظلام فتح الشباك يدخل هواء للغرفه وارتمى على السرير يغمض عيونه بتعب
عند الحريم خلصت اكلها بدري وقامت مع ندى وجلسو برا ينتظرون الباقين يخلصون اكلهم ويجون
ندى: وشبك ماكليتي زين
تولين: مالي نفس والله
ندى: الله يهديك لازم تكثرين اكلك عشان ماتجهدين وتتعبين
جت جوهره على سالفتهم: وش بك تولين؟ لايكون تعبانه؟ عاد انتي تغذيتك زي الزفت
ضربتها تولين على كتفها جوهره: اييي وهذا الصدق لازم نغصبك بالاكل والا ماتاكلين
تولين استندت على ظهرها: شسوي يختي حايمة كبدي ماقدر اكل زياده عاد اذا اشتهيت بقوم معليكم لكن الحين والله ماقدر اكل شيء ابدد شبعت خلاص
ندى: الله يعينك عاد
تولين تنهدت: ااامميينن
جوهره: الا اقولكم وش نسوي لبكرة؟
تولين: بكرة مالي خلق اقابل احد خلوني بالمطبخ اهتم بالتحضيرات وانتو اقعدو مع الضيوف
جوهره: هذاك اول حبيبتي بكرة ماتقدرين بكرة جايين يشوفونك اساسا
تولين باستغراب: شدخل!؟ هي مو جمعة؟
جوهره: الا بس بالاساس يبون يشوفونك وفيه حرمة بالذات هي جايه تبارك لك بحملك وزواجك كانت برا تتعالج وهي صديقة امي مره الروح بالروح وتوها رجعت قبل فترة وتبي تشووفك
تولين:ياربيي يلا على خير الا وش تتعالج منه؟
جوهره: كان فيها ورم حميد والحمدالله تشافت منه
تولين: الحمدالله
ندى التفتت لحمد اللي جاها يمشي بهدوء ووجهه ذبلان حط وجهه بحضن امه بنعاس يبي ينام مسكة وجهه ندى بترفعه:يمهه ولدي تعبان!!!
مسكته تولين تتحسس جبهته: اشوف...يوه والله حار ياقلبي عليك ياحمودي
ندى شالته بحضنها: ياربي الله يعين يلا تصبحون على خير بروح اسبحهه وانومه
تولين وجوهره: وانتي من اهله
تولين: يلا انا بعد بقوم سلوم تعبان بروح اشوفه
جوهره مسكت يدها: لا تكفيينن اسهري معي ندى مع ولدها وانتي بتروحين اقعد لحالي؟
تولين: طيب خليني اشوف سلمان واجيك
جوهره: اكيد!!؟
تولين ضحكت: اكيد شوي وجايه
دخلت للغرفه وهب الريح على شعرها ووجهها ابتسمت للجو اللطيف اللي يحمل نسمات باردة
قربت لسلمان وشغلت الابجورة وهزت كتفه: سلوم قوم كل علاجك
فتح عيونه بنعاس وانكمش من البرد: اكلته
قامت وهي ترفع عليه اللحاف: زين تعدل شوي خل اقيس حرارتك
حطت الجهاز باذنه: زين نزلت يلا نوم العوافي، غطته زين وطلعت
جوهره: صراحة ماتوقعت ترجعين
تولين: ياجاحده اقول قومي بس خل نمشي شوي تعبت من الجلسة وطفش
جوهره: يلا
جوهرة حطت عليها جلالها وصارو يمشون
اخذتهم السوالف ومر الوقت
وقفت جوهره بتعب تتنفس بعمق: خلاص تعبتت خل نرجع
تولين ضحكت على شكلها: مين الحامل الحين انا والا انتي؟
جوهره رمقتها بنظره: اقول امشي بس يالحامل ماشاء الله عليك كل ذا ولا تعبتي!
تولين: الصدق الا بس احب امشي
ارتمت جوهره على الكنبه بتعب وهي تتامل السماء: النجوم حلوه طفي النور بالله معك
قفلت نور البلكونه وجلسو بالظلام
جلست تولين وهي تمدد رجولها وشبه متمدده وتراقب السماء معاها ويسولفون
فزو بخوف من حسو باللي واقف وراهم
جوهره وتولين: بسم الله!!!!!
ناظرهم بهدوء وكمل طريقه لتولين وجلس جمبها
جوهره: وجععع سلماااان خوفتنا!!
تولين ماسكة قلبها بخوف: سلمااننن!!!!!
سلمان:بسم الله عليكم ماكنت اقصد خلاص اسف بس اسكتو تكفون راسي يوجعني
تولين بقلق: وش فيك؟
سلمان نزل راسه بحضنها: تعباان
تولين: اجيب لك مسكن؟
سلمان هز راسه بلا: اكلت بس خليك جمبي
جوهره قامت بعد ماحست ان وجودها ماله داعي ودخلت داخل: بجيب قهوه وتكمل السهره
تولين تنهدت وهي تشوفه نام بحضنها مدت يدها تمسح على شعرها وتحسس اذانيه البارده نزلت عليه جلالها وانكمش على نفسه من البرد وغط بنومه جت جوهره بالقهوه وتقهوت هي وتولين الين الفجر اذن الفجر وقامو راح سلمان يصلي وتولين وجوهره دخلو لغرفهم
عند تولين صلت ودخلت للحمام اخذت دش ووقفت تسوي سكين كير دخل سلمان وهي بالحمام تسوي سكين كير
قفل باب الغرفه وراه وهو يتسند على الجدار وماسك بطنه دخل للحمام وهو يبعدها عن المغسله واستند عليها وهو مكشر وكانه بيستفرغ قربت منه تمسح على ظهره
ثواني واستفرغ وهو كان يحاول يمسك نفسه قد مايقدر لكن بالنهاية ماقدر واستفرغ
غسل وجهه راح يغير ملابسه وتمدد يشد المفرش عليه من البرد وينام
خلصت تولين عنايتها وجففت شعرها وطفت النور تمددت على السرير تتصفح جوالها سحب الجوال منها وقرب يحتضنها: نامي وارتاحي وراك عزيمه
تولين بتذمر: سلمانن بقعد شوي!مافيني نوم نام انت انت تعبان
سلمان: بيجيك نوم وجوال مافيه يلا نامي
تولين: افف طيب بعد عني كتمتني
بعد سلمان لكن لازال قريب منها استعدلت بسدحتها ونامت
اليوم الثاني
الساعة 12:30pm
قامت وجسمها تعبان ومالها خلق اي شيء راحت للحمام غسلت وبدلت وصلت الظهر جت الخادمه ترتب الغرفه ومدت لها كوب عصير اللي طلبته: ماما لازم انتي ياكل انتي قول مايبغى بس احتياط انا سوي ساندوتش انتي حبي جبنه حلوم سويت هذا حلوم
ابتسمت تولين وهي تشم الريحه الزكية: شكراً ماري ريحته حلوه مره
اكلت لقمتين منه ونزلته بعد ماحست بالشبع وشربت عصيرها وهي تستمع بنسمات الهواء اللي تلفح شعرها
خلصت ماري شغلها وطلعت بعد ماخذت الصينيه معها وضل العصير بس مع تولين تشربه وهي تحط مكياجها دخل سلمان وتمدد على السرير: السلام عليكم
تولين: وعليكم السلام سلوم خل اقيس حرارتك، اخذت الجهاز وتوجهت له عقدت حواجبها من شافتها زادت: سلوم ٣٩ قوم خذ شور بسرعه
قام اخذ منشفته ودخل للحمام عقد حواجبه بتعب من حس بدوار استند على المغسله وسحب نفس وهو يتوازن
مشى تحت الدش وفتح المويه يحاول يصحصح خلص ولف المنشفه على خصره وطلع للغرفه لبس وتجهز وطلع مع ابوه يجهزون الذبايح لعشاء اليوم
ركب السياره ووجهه ذبلان ناظره ابوه بقلق: وشبك ياولدي باقي تعبان؟
سلمان: لا بس مصدع شوي
حمد: انزل انزل اسوق انا
سلمان: لالا مافيني شيء بس مصدع يلا مشينا لانتاخر
ركب ابوه وهو مو عاجبه وضعه كملو مشوارهم اخذو الذبايح وودوها للمطعم وحجزو لهم دورهم ورجعو للبيت على العصر دخل مستعجل اخذ شور بعد ريحة الذبايح ولبس ثوبه ونزل يستقبل الضيوف مع ابوه واخوانه
نروح عند تولين شوي
في المطبخ تحوس مع جوهرة
تولين: ياربيي جوجو وين حطيتيها!!!
جوهره: مدري دوريها معي تكفين امي بتجلدني توها شاريتها
تولين: وشو له تشيلينها ياربي ياجوجو
دخل سلمان وهو ينزل الترمس: عطوني قهوه ثانيه بسرعة
تولين: ياربي اصبر شوي ماري تكفين سوي قهوه وعطي بابا
... يتبع

---------------------------------------
سبحان الله
الحمدلله
الله أكبر

- أهلاً أهلاً كيفكم؟ وين الناس مختفيه؟🌚
نزلت لكم بارت رغم انشغالي لكن ماقدر اطول عليكم🙈💖
دعواتكم لي الفتره هذي تعدي بسلام 🩷🩷🤲🏼

- توقعاتكم وآرائكم حبايبي؟