أشوفك في سواد الليل نور شع قدامي

Part 8

"شخصيات واحداث خياليه لاتمد للواقع بصلة"

قراءة ممتعه✨

- وانا يالطيف الروح تراك دواه
مريض الهوى ماينفعه كود محبوبه

بعد ساعات بدت تكبيرات العيد والكل قام يعايد وريحة البخور وصوت الصغار يركضون ويلعبون وتكبيرات العيد تصدح في انحاء البيت
طلع سلمان ووراه تولين رايحين للصالة: السلام عليكم كل عام وانتم بخيير
الكل: وعليكم السلام وانتم بخير
عايدو الجد والجدة واهل سلمان
قاعم الجد يعايد البنات ٥٠٠ وقف سلمان وراهم
الاب: فيه دخيل معهم يتفضل برا
سلمان يتلفت ماكانه هو
ضحكت جوهرة وهي تسحبه. انت انت لاتسوي ماتشوف اطلع
ضحك وهو يبعد: شفيكم باخذ حقت تولين واعطيها
الاب: يارجاللل ههههههههههه
تعايدو ووزعو الحلى والقهوه وقامو الرجال يروحون للصلاة
الجده: يلا يابنات بنمشي الساعة ٦:٣٠ نعايد
الكل تجهز ولبسو وطلعو يعايدون
تولين مسكت بطنها وهي تحس بالم : افف تكفين لاتجين الحين
لبست عبايتها وطلعت وهي مكشره ويدها على بطنها
جوهره: وش فيك؟ جتك!
تولين: احس بتجيني بموت عندك مسكن؟
جوهره: ايه ايه بجيبه واجي اسبقيني
تولين: لاتطولين!؟
جوهره وهي تركض: معلييكك
نزلت تحت وهي تشوف سلمان واقف ينتظر فوق راس الجد اللي يكلم وعذوب جالسه تسولف مع الجده وينتظرون الباقين ينزلون
جلست بهدوء جمب عذوب وهي تنتظر جوهره تجي
عايدو القريبين والحارة ورجعو للبيت ريحو وانتظرو الرجال يرجعون من معايدة القريبين
سلمان فتح الباب: يلا يابنااتت مشيناا
عذوب: جينا جينا يلا
ركبو السيارات وبدو يعايدون بيت بيت الاقارب والمعارف والجيران
رجعو البيت الساعة 2:00pm الكل نعسان وتعبانين بعد مالفو الدنيا كلها يعايدون
دخلو بيتهم وبدت غيبوبة العيد الكل متسدح في كل مكان ونايمين
تولين مسحت مكياجها ولبست بجامة مريحه وانسدحت بتعب وهي تتكور على نفسها تحاول تنام وتتناسى الم بطنها
سلمان: وش فيك انتي اليوم؟
تولين: وش فيني؟
سلمان: مدري بس فيك شيء هادية بزياده
تولين: ولا شيء بطني يوجعني بس
سلمان:سلامتك ياروحي تبغين نروح المستشفى؟ او الصيدليه؟
تولين هزت راسها بلا وهي تنسدح: ابغى انام
بدت غيبوبة العيد ونام الكل والبيت هدووء
المغرب قامت وراسها مصدع مسكت راسها بالم تستوعب هم وين والساعه كم
ناظرت الساعة وقامت للحمام تغسل ووضت تصلي المغرب
خلصت صلاتها وجلست على سجادتها تسحب نفس تحاول تتحكم بنفسها قبل لاتستفرغ
التفتت لسلمان اللي لازال نايم هزت كتفه بهدوء: سلمان سللمالنن
همهم لها بنعاس، تولين: قوم صل المغرب
فتح عيونه وجلس: قمت
تولين: صحصح سلمان بنزل انا
هز راسه بايه وهو يقوم للحمام وهي اخذت جلالها ونزلت
وطلعت للبنات برا بالبلكونه جلسو يتقهوون وهي ساكتة ومنفسه
جوهرة: وش فيك منفسة توك قايمه؟
ناظرتها وهي مالها خلق تكلم احد ورجعت تكمل قهوتها
جوهره: وش فيك متضايقه؟ تعبانه؟
تولين: مافيني شيء مصدعه بس
جلست معهم شوي وقامت غرفتها وهي ماسك حلقها تحاول تتماسك اول مادخلت الحمام استفرغت
فز سلمان وجاء يسندها على الغساله وهو يبعد شعرها ويمسح ظهرها: بسم الله عليك
غسلت وجهها ولفت عليه تحضنه وتسند راسها على صدره بتعب همست بضعف من حست برجولها ماتشيلها:مافيني
شالها للسرير ونزلها وهي تتكور على نفسها
راح للمطبخ وجاب لها مسكن وفواكه وعطر كل شيء ممكن يجي في باله انه يساعدها
جلسها وعطاها حبتين بنادول وفواكه: كلي لك شيء يقويك يابنت الحلال
تولين دفت يده بخفيف: سلمان والله مالي نفس بستفرغ بعده عني
مد لها المويه: طيب اشربي مويه
شربت شوي ونزلتها على الكومدينه ورجعت تنسدح: طف النور
طفى النور وجلس على جواله عندها مرت ساعة وهو لازال عندها
فزعلى صوتها وهي تناديه بتعب: سلماان
قام وفتح الابجورة: سمي
لفت عليه بتعب: راسي يعوررنييي
مسكها وهو يسندها توقف: تعالي غسلي وجهك وخل نطلع شمي هواء شوي
وقفت واستندت على صدره وغمضت عيونها: استنى دايخه
وقفو شوي ثم مشو لبرا وهو يحط على ظهرها الشال ويغطيها مشو حول البيت شوي
التفت لها بعد مدة: احسن؟
هزت راسها بايه: خل ندخل
رجعو للغرفه وجلست على السرير وهي تحس بدوخه مسكت راسها وهي تسمعه: بروح اجيب مسكن واجيك
مسكت راسها بوجع من حست الدنيا تدور: ياربيي صبرني وش ذا
اسندت راسها على يدينها وهي تشد على شعرها من شدة الالم ثواني وفقدت وعيها وطاحت جمب السرير
رجع سلمان اللي راح يجيب مسكن وفز من شافها طايحه وقف قلبه لثواني قرب بسرعه وشالها للمستشفى
-
جالس امام غرفة الفحص مايدري كيف جاء وكيف وصلو للمستشفى 
وقف من وقفت امامه الدكتوره: وتين الـ*** ؟؟
هز راسه: انا زوجها
الدكتوره: المريضه كويسه والجنين كويس كمان وبدت تصحصح الحين ونشوف وش الوضع
قاطعها بنفي: لا مو حامل
الدكتوره ابتسمت: ماتدرون!؟ الف مبروك اجل المدام حامل هي الان تقريبا بالشهر الثاني
فتح فمه من هول مايسمع وكل هالوقت ماحس عليها
حست بملامح الصدمه على وجهه: طبيعي جدا ان الوحم يتاخر
وقف بتوتر: يعطيك العافية
وطلع مسرع باتجاه غرفتها ودخل وهو يدورها بعيونه ابتسم قلبه قبل شفاه من شافها جالسه والواضح انها درت حضنها لصدره بحب:ماتدرين انتي وش عطيتيني الحينن
قام يدور وهي بحضنه بفرحه تعلقت برقبته بفرحه وخوف: لاتطيحني!
ابتسم وهو ينزلها وقبل راسها قبله عميقه وصلت لها كل مشاعره الملخبطه الان
رفعت عيونها له: الف مبروك لنا
سلمان ابتسم: والله يبارك لنا فيه
طلعو لبيتهم بعد ماخلصو الاجراءات
تولين: سلمان لحد يدري بالخبر الحين
هز راسه بايه ومد يده يسندها دخلو البيت وراحو غرفتهم وطلع سلمان يجيب لها اكل ونزله على السرير: تولين قومي كلي لك لقمتين
استعدلت بجلستها اكلت شوي وقامت تغسل ورجعت تنام وشال سلمان الاكل للمطبخ ورجع ومعاه قوارير مويه وفواكه وحطها كلها جمبها: تولين حطيت لك جمبك اكل اذا اشتهيتي يعني او جعتي وجبت مويه
مدت يدينها له: تعال
فصخ شوزه وانسدح جمبها وهي تحضنه: احبك
سلمان: وانا احبك يابعد الدنييااا
نامت على صدره
لحفها باللحاف ونامو
اليوم الثاني قامت من بدري وجلست تتامل السقف مكانها لفت على اتصال جوالها: هلا سلمان
سلمان: هلا حبي صباح الخير قومتك
تولين: صباح النور لا قايمه من زمان
سلمان: زين اسمعي فيه استراحة بالليل بس ترا العصر بنمركم ناخذكم نسلم على خوالي ونعايدهم ومن بعدها بنروح من هناك للاستراحة تجهزي على هذا الاساس
تولين: تمام
سلمان: يلا مع السلامة كلي زين شوفي ارسلت لك صينيه عندك
التفتت تولين وشافت الاكل مغطى على الطاوله وابتسمت بحب: زين حبيبي شكراً
سلمان: العفو ياقلبي يلا مع السلامه
تولين: فمان الله
قامت وهي مالها خلق شيء وودها تبكي سرحت وهي تاكل تحس باشياء كثير غريبه
حطت يدها على بطنها تستوعب اللي صار رجعت تاكل بصمت وتحاول تبعد النفسيه عنها وتنبسط بالعيد
خلصت وقامت كشخت وطلعت لهم ولقت البيت مليان بزارين وناس وحريم والمجلس مليان: بسم الله متى جو ذولي كلهم!
هربت للمطبخ ماودها تقابل احد قعدت تجهز القهوه والشاهي وجلست بالصاله مع البنات: متى جو؟
جوهره: يوووهه من الصباح يتوالدون وايه ترا بنروح نعايد العصر ومن هناك نروح لاستراحة العيد بالليل
تولين: اي قالي سلمان
جوهرة: زين وينك مافطرتي معنا اليوم جهزنا فطور يحببههه قلبكك على البلكونه
تولين: كنت نايمه والله تعبانه بعد امس
جوهرة: مالومك امس كان حوسة ومتعب
اذن العصر وقامو يتجهزون وطلعو كلهم بسيارة زياد والشباب كلهم بسيارة سلمان
وبدو يعايدون
عند اخر بيت طلعو وهم يوادعون اهله
قرب سلمان لتولين وهو يسحب كفها وهمس: تعبتي؟
هزت راسها بلا
سلمان: تبين نمر للبيت؟
تولين: لا مايحتاج كل شيء معي
سلمان: زين
اذن المغرب صلو وتوجهو للاستراحة اللي جمعت احبابهم واهلهم كلهم البعيد والقريب كانت ليله مليانه مشاعر العيد وتوزيعات وفرحة الاطفال
طلعو البنات للحوش يلعبون بالنطيطات الهوائيه مع الاطفال
جوهره: تولين تعالي جربيها والله حلوه ههههههه
زحلقت تولين مع جوهره وطاحو على بعض
صرخت تولين من حست انهم بيطيرون اذا وصلو لنهاية الزحليقه: يمه يمه لااا هيه بنطيح على الارض
طاحت تولين فوق جوهزه وفزت بسرعه: يمه اشوى عليك ولا على الارض
جوهره: ظهري ياوصخههه
ضحكت تولين وهي ترفعها: اسفه اسفه يلا قومي خل نروح ناخذ اسكريم معهم ونجلس مابي العب
جلسو ياكلون وتولين عينها على جوهره:تصدقين توني انتبه انك ماتشبهين سلمان ابداً ماكانك اخته
جوهره: ايه كلهم يقولون لي ماشبه اخواني انا اشبه جدتي ام امي
تولين: وريني صورتها اذا عندك
ورتها جوهره تولين: ياربيي ماشاء الله تجنن
جوهره: شفتي كيف جدتي ملكة جمال زمانها
تولين: وكل زمان بعد
تولين وهي تاكل: اقولك شيء؟
جوهره: قولي
تولين: بتمسكين السر؟
جوهره: توته قولي اخلصي علي
تولين: فيه ضيف معنا
جوهره التفتت: مين؟
... يتبع

--------------------------
استغفرالله
سبحان الله
الحمد لله
الله أكبر

اهلاً اهلاً✨💗🙈 هالمره قلت مابزعلكم وبنزل بدري 🌚
فيه بنت كاتبه كومنت بالبارت اللي قبله تقول انه بتزعلون لو طولت😅 ابي ارد عليك هنا لان كل ماكتبت كومنت ينحذف🤨مدري ليه
المهم وديي والله انزل لكم لكن التفاعل مايحمس كثير😔🥺
اذا شفت التفاعل زاد ابشرو بالبارتات ومن عييوونيي🙈💗💗