أشوفك في سواد الليل نور شع قدامي

Part13

( الشخصيات والاحداث خيالية لاتمد للواقع بصلة)

__________________

" يوم شفتك فز قلبي لك سلام
أي مسمى ممكن أسميك فيه

أنت تنهيده بعد شرح الكلام
أو شعور بداخلي وآهيم فيه؟ "

__________________
ركبو للسياره مره ثانيه وتمددت تولين ونامت مره ثانيه وهي ماصدقت يهجد ولدها ويقلل حركته غطت بنومها وسلمان مغطيها بالبطانيه ومو باين منها شيء وفيصل اساسا ماراح يناظر وسلمان متاكد من هالشيء
ثواني وغط سلمان بنومه معها
جوهره بنعاس: كم باقي بنوصل ودي انام
فيصل: نامي طريقنا طويل
جوهره: واخليك لحالك! مستحيل!
فيصل: بكيفك
كملو الين قربو يوصلون ووقف فيصل وهو ينزل ويدق الشباك على سلمان اللي فز: بسم الله وشبك!؟
فيصل: ماعاد اقدر بنام قم كمل انت
ركب سلمان ورجعت جوهره ورا ونامت مع تولين وسلمان يسوق وفيصل جمبه نايم وصلو الرياض واخيرا على الفجر وقفو عند المسجد ونزلو يصلون
سلمان: تجون معي بيتي؟ وعاد الصدق مافيني اوديكم لبيت امي
تولين: اي حياكم الله تفضلو ارتاحو ثم نروح جميع لعمتي
نزل فيصل بدون مايناقش: يلا افتح
سلمان بضحكه: طيب قول لا شيء
فيصل: اخلص ابي انام داييخخ
نزلت جوهره وساعدت سلمان وفيصل بالشنط وفتحت تولين الباب ودخلو العفش للصالة وتخصر فيصل يناظر لسلمان: فيني نوم والله شوفوا لي مكان ابنام
سلمان: خل ناكل اول شيء
جوهره بنعاس: انتو بكيفكم انا ابي انام تكفون وين انام؟
سلمان: تعالو تعالو فوق في غرفة يمين الدرج وفيه غرفة هنا جمب الصالة
ركض فيصل: انا تحت
جوهره: احسن اكون بعيده عنك
طلعت فوق تجر شنطتها ضحك سلمان وهو يشيلها عنها: خليها اخذها لك انا
جوهره ابتسمت وهي تبوس خده: شكراً
ورفعت صوتها: يا افضل اخو فالدنيا
فيصل: سمعتتككك
اما عن تولين راحت للمطبخ تشوف وش فيه تقدر تجهزه عشان ياكلون رفعت جوالها وطلبت فطور بسيط ياكلونه قبل ينامون
جهزت الشاهي والاكواب والسفرة وطلعت تصحي جوهره وسلمان وطقت باب فيصل لبست جلالها ونزلت جلسو كلهم وملامحهم كاسيها النوم والنعاس ومو قادرين ياكلون صفقت الفنجال بالصحن وفزو: بسم الله
تولين: كلو زي الناس ثم نامو يلا اشوف
سلمان: سمي
فيصل: مسيطره زوجة اخوي
سلمان: ابلع لسانك
فيصل: سم
جلست تشرب شاهيها وهي تناظرهم شلون مفهين من التعب فزت من حست بنغزات بطنها
نزلت كوبها وقامت: الحمدالله
همست لسلمان: بروح اريح شيل السفرة اذا خلصتو بليز
هز راسه بايجابيه وابتسمت: الزوج المثالي
ضحك على كلمتها وقامت لغرفتها ترتاح وتنام
اما عن الباقي خلصو وكل واحد راح غرفته
العصر
الكل قام وجالسين في الصالة
جوهره جالسه بينهم بطفش وهي تشوفهم يلعبون وماهم حولها التفتت لسلمان: وين تولين للحين نايمه!؟
سلمان: ايي طولت شوفيها
جوهرة: وين فشلة روح شوفها انت
سلمان: الحين صار فشلة؟ وانتي كل يوم قاطه معنا؟
جوهرة: انننن اقول انقلع بروح اشوفها ابرك منكم
طلعت جوهره ودخلت بعد مادقت الباب ولاسمعت رد: توته؟ ادخل؟
سمعت صوتها النعسان: هلااا ادخلي
استعدلت بجلستها وهي تشوف جوهره داخله الغرفه: وشبك للحين نايمه تعبانه؟
تولين: كم الساعه؟
جوهره: ثلاث العصر
تولين: تعب الخط شكله خليني انام شوي بعد وقوميني قبل المغرب بالله
جوهره: ابشري خلاص ارتاحي وبرجع لك
نزلت للصالة وجلست تتفرج على جوالها
ساعه ونزلت تولين بعد ماتسبحت وتجهزت ونزلت لقتهم  جالسين يتقهوون: السلام عليكم
جلست جمب جوهره اللي تتفحص وجهها الذبلان وواضح عليها التعب: وشبك؟
تولين بهمس: والله مدري تعبانه كذا هلكانه
جوهره: اخاف بتولدين! كذا كانت ندى
تولين خافت: لا بسم الله علي باقي
جوهره: متاكدة؟
تولين: اي يختيي متاكدة يجيني مغص كذا احيان عادي طبيعي
انتهوالشباب من لعبهم بفوز فيصل اللي صرخ بحماس: ييييسسسسس سسسيييي!!!!!
سلمان: يارجال فرق واحد بينا
فيصل: فزت والا مافزت؟ فزت خلاص
سلمان نزل الايادي وقام جالس على الكنبه: روح روح البس  راح لغرفة يردد: صفر واحدد صفر واحدد صفر ايش؟ واحد
ضحك سلمان: خبل
راحو جوهرة وسلمان لغرفهم يتجهزون عشان يروحون لاهلهم اليوم
انتبه سلمان لملامحها وقام جلس جمبها وهو يبعد شعرها خلف اذنها: وشبك للحين نايمه؟ غريبه عليك
تولين: تعب الطريق عاد شنسوي
سلمان: اكيد؟
هزت راسها بايه ونزلت راسها على كتفه ويده تلاعب كفها قربها لفمه وطبع قبله رقيقه على يدها وهو يشد عليها: اذا تعبانة نقعد
تولين: لا وين عيب خالتي تنتظرنا
سلمان: يعني تعبانه!
تولين: مو للدرجة ذي مافيني شيء لاتخاف
سلمان: زين انا بطلع ابدل
قامت وراه: يلا بلبس عباتي انا
رجع جلسها: ارتاحي بجيبها انا لك
تولين: شكرا حبيبي بس ابي اتجهز بعد
سلمان: تدورين القومه انتي؟
تولين ضحكت وهي تستند على ذراعه طالعه على الدرج: شفيك انت تبيني اروح كذا؟
سلمان: وش فيك وش حلوك
تولين ابتسمت بحرج: اي والله يازيني
سلمان: اوف اوف!
تولين لفت وهي تضيق عيونها وتناظره: وش قصدك!، ورفعت سبابتها بتهديد: انتبه لنفسك ياسلووممم
سلمان: سمي
بعد نص ساعة
طلعو لبيت اهل سلمان
دخلو وسلمو والكل تحمد للثاني بالسلامة
جلسو يتقهوون و تضايقت تولين من الالم والتعب اللي يمشي بجسمها ويزيد عليها استعدلت بجلستها وهي تتنهد بتعب ومو معاهم بالسوالف ولاحظتها ام سلمان قربت وهي تجلس جمبها ويدها ورا ظهر تولين: وش فيك يمي تعبانه؟ ادخلي داخل ارتاحي
ابتسمت: لا بس متعبني بطني صاير مايهجد الله يهديه جنني
ضحكت وهي تلمس بطنها وتحس برفساته:ياحيااتيي انا جربي تكلمي معه يمكن يهدى لاسمع صوتك او صوت سلمان جربي
انا فيصل ماكان يهدى الا على صوت اختي تخيلي! كل ماتوجعت دقيت عليها تجيني
تولين: شكلي بجربها اليوم لعلي انام واخلي سلمان يسولف عليه ههههههههه
ضحكت عذوب معها والتفت سلمان عليهم:ضحكوني معااكم
عذوب: سوالف خاصة يلا يلا قم قم خل مرتك ترتاح استوجعت من الجلسة وانتي تسولف!
سلمان لف عليها بسرعه يفحصها بنظراته:متوجعه؟
تولين: شوي مو مره
سلمان: نمشي اجل
تولين مسكت ذراعه وهي تلف لخالتها: لالا مافيه شيء بس تعب بسيط استحي خالتي نقوم واحنا مالنا عشر دقايق جايين
عذوب: مافيها شيء يابنتي اهم ماعليك راحتك والا قومي داخل ارتاحي
تولين: لالا مافيني شيء لاتخافون مرتاحه كذا خلوني اذا حسيت بشيء بقوم داخل كذا تمام؟
عذوب: زين على راحتك خذي هالمخاد وراك احسن تريح ظهرك
قامت عذوب تستعجل العشاء
مر الوقت وتولين يزيد ألمها لفت لسلمان وهي تنظم انفاسها عشان ماتفجعه:سلمان خل نرجع خلاص ماتحملل
جت هنا ام سلمان تقومهم للعشاء التفت لامه ورجع يناظر تولين اللي متغيره ملامحها وحتى لونها انخطف
قامو كلهم بهدوء لكن سلمان مسك امه على جمب: يمه يسلم هاليدين بس لازم نمشي والله تولين تعبانه مره اخاف انها بتولد
مشت بسرعه من سمعت كلامه للمجلس وهي تشوفها ماسكة بطنها بألم وتنتظر سلمان قربت لها بسرعه تتفحصها: يمي وشفيك! بسم الله عليك
تولين نزلت دموعها في هالحظه وهي مو قادره تتحمل اكثر: بموتتت خالتي ماقددررر
ركضت عذوب تاخذ عبايتها وجت تسندها مع سلمان
وصلو لعتبة البيت ووقفت تولين وهي تشد على ذراعه من الالم اللي سرا في ظهرها ورجولها ماعاد تشيلها مسكتها عذوب ونزل سلمان يشيلها للسياره ومشو طالعين للمستشفى دخل سلمان وهي بحضنه وركضت عذوب للاستقبال تسجل بياناتها ودخلوها لغرفه الولاده وجت عذوب بعد ماخلصت الاجراءات وهي تشوف ولدها اللي جالس بتوتر ينتظرها جلست جمبه وهي تحضنه وتطمنه: تطمن يمي بيجي بالسلامه هو وامه وتبشر به
سلمان: امييينن يارب اميين
طلعت الممرضه بعد ساعه وهي تجر السرير اللي يستوطنه صغير الحجم الهادي
قرب سلمان وعيونه تلمع من الفرحه قرب يأذن باذنه
قربت عذوب بكل حنية وهي تلامس وجناته:ياااروحيي انا ياقلبييي نورت الدنيا ياحبيب جدتك حي الله نور عمري
قرب سلمان يبوسه ويتأمله ونزلت دموعها وهي تشوفهم قربت تشيله وتحطه بحضن سلمان اللي توهق: صبر يمه اخاف يطيح
عذوب: ماهوب طايح لاتخاف
ضمه لحضنه وهو يشم ريحته ويقبل وجناته وللحظه تجمعت الدموع بعيونه وهو يناظر له:مابغيت تجي ياوليدي؟
الممرضه قطعت اللحظه: سوريي لازم روح حضانه سوي شاور البس ملابس
عذوب اخذته وهي تنزله بالسرير والتفتت للممرضه: وماما كيف؟
الممرضه: مدام فوق الحين خلاص هي روح غرفة مال هيه
عذوب: زين
اخذت سلمان وراحو يسألون عن رقم الغرفه وطلعو لها دخل سلمان اول وراحت عذوب تمشي شوي وتتطمن على حفيدها وتركتهم ياخذون راحتهم دخل سلمان للغرفه وشافها متوسطه السرير بتعب وتنعس
ناظرته وهي تقوس فمها ببكيه مدت ذراعينها له واحتضنته وهي تنزل دموعها بصمت ماقدرت تعبر عن مشاعرها اللي تحس فيها الحين اكتفو بحضنهم اللي يعبر عن كل شيء في هاللحظه ابتعدت عنه وهي تناظر عيونه: شفته؟ ماخلوني اشوفه زين
سلمان: اي ياروحي شفته واخذوه للحضانه بيغسلونه ويبدلون له ويجيبونه تشوفينه الين تشبعين
قرب وهويبوس راسها وكفها اللي بين كفوفه :الحمد لله على سلامتك ياروحي
تولين ابتسمت وهي تشد على كفه: الله يسلمك
غمضت عيونها بتعب وهي تسند راسها : ابي انام شوي اذا جاء قومني
سلمان: زين ياروحي ارتاحي
نامت وقام سلمان على الكنبه وتركها ترتاح
مرت نص ساعه ودخلت الممرضه وشافتها نايمه: اووو ماامم سوريي لازم سوي رضاعه اول بعدين نوم
فتحت عيونها بنعاس وتعب شديد لكن ماخفت بسمتها وفرحتها لشوفته فتحت يدينها بلهفه للطيف الوجه وصغير الحجم
حطته بحضنها وهي ترضعه وغطت بالبطانيه وسلمان يتأملهم من بعيد والممرضه تعلم تولين اللي توهقت
رفع جواله يوثق اللحظه ومبتسم للحظه الحنونه اللي هو فيها الان
ثواني ودخلت عذوب وبيدها شنطة ملابس لتولين: السلام عليكم
قربت تحضنها وتبوس راسها: الحمد لله على سلامتك يابنتي والف مبروك ماجاكم
تولين: الله يسلمك ويبارك فيك مبروك لك ياحن جده فالعالم
ابتسمت عذوب: الله يبارك فيك جبت لك من كم لبسة تدفيك على ماترجعين البيت
تولين: اي صح جهزت شنطتي على الفاضي شكلي هههه شكراً ماقصرتي خالتي
عذوب: العفو ماسويت شيء
طلعت وهي تكلم جوهره تجهز البيت لتولين
خلصت رضاعة ابنها وجت الممرضه تاخذه
وقامت تولين: سلمان تعال شوي
وقف يساعدها تمشي للحمام: ادخل معك؟
تولين: لالا مايحتااج
سلمان: اكيد؟ انا هنا اذا بغيتي شيء ناديني
تولين ابتسمت: تمام ياقلبي
استند على الجدار متكتف ينتظرها دخلت عذوب وشافته واقف: وشبك
سلمان: انتظر تولين تتسبح
عذوب: زين خل اجهز لها الملابس على ماتخلص
جهزتها وطلعت تولين لافة المنفشة على كاملل جسمها وماسكة بطنها بألم بسبب الخياطة
فز سلمان يمسكها وجت عذوب انتبهت لملامحها: يوجعك الجرح؟
هزت راسها بايه: شويي احس انه بدا مدري
اخاف سويت شيء غلط
عذوب: لالا هوا الحين البنج بيبدا يخف ويوجعك خليني انادي الممرضه تجيب لك مسكن احسن وترتاحي تنامي
تولين: تمام راحت عذوب تنادي الممرضه وجلست تولين على السرير: سلمان اطلع ابغى البس والممرضه لاتدخل الين اخلص
سلمان: تمام خليني اساعدك طيب على الاقل مابشوف بس بساعدك
تولين: شلون تساعدني الله يهديك انت بعد اذا بغيتك بناديك يلا سلمان اطلع بردت
سلمان: سمي سمي 
طلع وبدلت بصعوبه بسبب الالم
خلصت وجلست على السرير والتفتت لسلمان اللي فتح الباب: خلصتي؟
تولين: ايوه خلاص
لفة المنشفة على شعرها تجففه ودخلت الممرضه بيدها كانيولا ومغذي: يلا مادام سوي كانيولا جديد لازم
مدت يدها لها وهي تغمض عيونها بنعاس شديد تبي تنام خلصت الممرضه وتلحفت تولين بتنام بعد مافكت شعرها ولمته من النص قربت عذوب وهي تطلع بطانيه جابتها معاها وحطتها فوقها: ماتدفي بطانية المستشفى تدفي زين لايدخلك برد
ابتسمت بامتنان لخالتها ونامت بعد هالتعب كله واخيراا
سلمان : يمه اوديك البيت ترتاحين؟ بكرة بنجي اساسا
عذوب: لالا اقعد مع حرمتك السواق تحت ينتظرني برجع البيت اجهزه لتولين وحفيدي سلمان: زين
قرب وهو يضم امه: مانحرم منك ياحن واطيب قلب فالعالم ياحظي فيك يمه
ابتسمت عذوب وهي تربت على ظهره:حبيبي انت حظي فيك انا ياروحي رح رح نام وارتاح يلا بروح اشوف حفيدي وبطلع يلا فمان الله
سلمان: الله يحفظك
رجع للكنبه وتمدد ونام مكانه
اليوم الثاني
الساعة 10:30am
قامت ومالقت سلمان موجود قامت وهي تستند على اللي حواليها وراحت للحمام غسلت وتجهزت ولمت اغراضها بمساعدة الممرضه وجلست تنتظره
دخل ومعه كرسي متحرك: صباح الخير ياروحي كيفك؟
تولين: صباح النور الحمدالله احسن وابي اطلع مليت
سلمان: امداك تملين هههه يلا الحين بنطلع هذي كل اغراضك؟ 
تولين: ايه خلاص لميتها كلها
سلمان: تمام يلا تعالي اجلسي بيتعبك المشي
هزت راسها بايه وجلست لانها فعلا مهلكه
وداها للسياره وركبت ورجع ياخذ ولدهم
وحطه بالكرسي الخاص فيه
تولين لاحظت الطريق:وين بنروح؟ لا تكفى تعبانه بروح البيت مابي اقابل احد تكفى
سلمان: امي مجهزه لك البيت وتبي تنتبه لك اذا ماتبين نرجع عادي
ناظرته لوهله ورجعت ارتخت:ماقصرت فكرة حلوه بس اخاف اتعبها واشغلها فيني
سلمان: بالعكس امي حلفت تاخذك عندها
تولين: سلمان انا برتاح مع امي ف تكفى بنقعد عند خالتي الين توصل امي تمام؟
سلمان: اللي يريحك سويه
ارتاحت ورجعت نظرها للطريق بهدوء
وصلو وكان باستقبالهم عذوب وجوهرة اللي تقدمت واخذت ولد اخوها وعذوب ساعدت تولين تمشي للغرفه جلست تولين على السرير ونزلت جوهره ولدهم في سريره جلست عذوب جمب تولين وهي تحضن كفها بايدها: اسمعي ياتولين انا ادري انك تبين امك وماترتاحين الا معها وانا حبيت اجهز لك واهتم فيك واقوم فيك الين تقومين على حيلك اذا تبين تقعدين توسعك العين ان ماوسعك المكان وان بغيتي تروحين لامك الله يحفظك ويسهل دربك انا ابي راحتك اهم شيء راحتك انتي وين ترتاحين سوي تمام ياروحي؟
هزت راسها تولين وهي تحضنها تعبر عن امتنانها لها: ماقصرتي معاي ابد الله لايحرمني منك بس مابي اثقل عليكم وامي مابترتاح اساسا الا وانا قدام عينها وانا برتاح اكثر مع امي انا ماشفت منك شيء ابداً بس تعرفين الام غير ابيها تكون جمبي فهالفترة
عذوب: اكيد اكيد خذي راحتك تماما بس تقعدي عندي الين توصل امك وتاخذك من عندي سلّم واستلم ههههه تمام؟
هزت راسها تولين بايه: تمام
عذوب: اتفقنا اجل بطلع واخليك ترتاحين وترا سلمان ماشاء الله عليه مابقى شيء الا وجابه لك هذي شناطك رتبتها لك جوهره والخدامات وهنا اغراض حبيب قلبي
تولين: تمام الله يعطيكم العافيه
عذوب: الله يعافيك يلا ارتاحي انتي وانا برسل عليك الفطور بعد شوي مافطرتي صح؟
هزت راسها بلا:زين برسلك الحين لين عندك
طلعت وسكرت الباب وقامت تولين خذت شورر وسوت سكين كير وجلست تفطر وبدلت لولدها وحضنته وهي تتأمل ملامحه وجهه:بسميك ياروح قلبي انت غيث ياغيث قلبي وايامي
دخل سلمان وهو مبتسم: هلا بالشييخخ صاحي؟
تولين: سلوم اسمح لي سميته غيث
سلمان ناظره: اشوف لالا يليق عليك يابوسلمان ماشاء الله تبارك الله
ناظره وهو يبتسم ضحكت تولين وهي تناظره: ضحكك ضحكك ياروحيي انا
قربت وهي تقرص خدوده بخفيف:افف ابي اعطيه كف!
سلمان: بنت!!
تولين: تكفى بخاطري خل اعطيك انت
ضحك بذهول: اقول ابعدي
تولين لوت فمها بزعل: امانه سلووم!
سلمان: تمزحين صح؟ لا طبعاً 
تولين عبست وهي تناظره: اقول انقلع بس وهات ولدي اكفخه
سلمان ضحك وهو يسحبه منها وبحركه سريعه ضربته كف خفيف وهربت
سلمان: بببنتتتتت وضحك من سمع ضحكتها وهي تمشي مبتعده عنه ولف على غيث: امك مب صاحيه الله يعينك ويعيني هههههههه
رجعت وهي ترفع يدينها باستسلام: نسيت اني بنام هات ولدي بننام
سلمان: نامي انتي باخذه معي  الصالة لانام جبته لك
ماعارضت لانها صدق تعبانه وتحتاج تنام: طيب انتبه له تكفى خلك مع عمتي لاتطيحه خذه بالجلاسه حقته اخاف يطيح او شيء
سلمان نزله بكرسيه وخذاه: سمي
نزل لامه تحت والكل تجمع عليه يلاعبونه
عذوب: يااارووحح قلبي انتي ياعمررييي ياروح جده انت اشوف اشووفف العيون الحلوه
سلمان: يمه يشبهني صح
ضربته جوهره على كتفه: على كيفك؟ مابانت ملامحه توه
الجده: خلاص اسكتو خل انيمه لحد يزعج
سلمان كشر: لاتنومينه يمه ماشبعت منه!
عذوب: مانت بصاحي ياوليدي اشبع منه وهو نايم بزر ذا يحتاج ينام ويرتاح
سلمان: مسرع نسيتي ولدك يمه
عذوب ضحكت: ما اغلى من الولد الا ولد الولد
ضحك سلمان وهو يحب راسها وجلس جمبها وهو يراقب ملامحه الين نام بحضنها وسلمان يناظره وابتسامته ماراحت من على وجهه
صورته جوهره توثق لحظتهم اللطيفة
المغرب قامت بعد ماقطعت نومتها اكثر من مره تقوم ترضع ولدها بدلت وغسلت ولبست فستان ناعم قطن يدفيها ووسيع شوي وشرابات ونزلت تحت تدور ولدها 
دخلت الصاله بابتسامه من شافته على كرسيه نايم بهدوء وعذوب تصلي جمبه قربت تشيله لحضنها: امميي انا وابوي
دخل سلمان اللي توه رجع من الصلاة وشافها عنده جلس جمبها ومد يده وراها وهو يلاعب ولدهم اللي بحضنها: كيفك؟
ابتسمت وهي لازالت تلاعب ولدها:الحمد لله على العافية

...... يتبع

صورة للاب وابنه🥺:

_____________________________

- استغفر الله🩷
- الحمد لله🩷
- الله أكبر 🩷
- لا إله إلا الله🩷

- اطول بارت انزله حول ٢٤٠٠ كلمة! تستاهلون حبايبي🫵🏼🩷
- ارائكم وافكاركم العسل مثلكم وتفاعلكم اكيد 🫶🏻