بداية
بسم الله الرحمن الرحيم نبدا بتعريف الشخصيات الاساسية الان ومع الوقت بنتعرف على ناس اكثر
الجد سلمان
الجده غاليه
الاب: حمد
الام: عذوب
ندى & زياد = نهى - حمد
سلمان & تولين
فيصل
جوهرة
اهل تولين
الاب: يزيد
الام: عذاري
عبدالله
تالين
الين
شخصيات...
" لولا الضلوع اللي على القلب حرّاس يمديه قلبي جاك من زايد الشوق "
__________________
دخلت الصاله بابتسامه من شافته على كرسيه نايم بهدوء وعذوب تصلي جمبه قربت تشيله لحضنها: امميي انا وابوي دخل سلمان اللي توه رجع من الصلاة وشافها عنده جلس جمبها ومد يده وراها وهو يلاعب ولدها اللي بحضنها: كيفك؟ ابتسمت وهي لازالت تلاعب ولدها:الحمد لله نحمد الله على العافية سلمان: الحمد لله سلمت عذوب والتفتت لتولين: يمي سويت لك ترمس هناك اشربيه كله لازم يدفي بطنك ابتسمت بحب من رعاية عذوب لها:تسلمين خالتي ابشري من عيوني عذوب: الله يسلمك ويسلم عيونك اخذت سجادتها وراحت غرفتها اما تولين وسلمان قاعدين في الصالة لوحدهم يلاعبون ولدهم اللي اخذ حيز بقلوب الكل وشع البيت حب وحنان وسعاده للطفل اللي اضاء البيت كله وغير جوه جت الخادمه بالقهوه والحلى وتجمع الكل في الصالة وكالعادة الكل فوق راس غيث يلاعبونه فيصل تربع عند رجول الجده: جده تكفين حطيه بجضني نزلته الجده بحذر: لاتتحرك وتطيحه شاله بحذر وهو يلاعبه ويضحك له سلمان: ابعد وجهك لاتروعه فيصل التفت لغيث: الله يعينك وانا عمك سلمان: الله يعينه عليك انت الجده خذت غيث من حضنه: الله يعينه عليكم كلكم وانا امك هات بس فزو من بكاه وكلهم قامو يرقصون له ويصفقون والجده تضرب ظهره بخفه: عمري انا عمريي شكله جوعان وقفت تاخذه تولين: عطيني ياجده اخذته بحضنها واخذت بطانيته وطلعت لغرفتها وهي تهزه بخفيف بحضنها:حبيبي وقلبي بس بس الحين نغيرر ونشبع بطننا وننام رفعته امام وجها تقبل انفه وعيونه: بس يا حبيبي انا لاتصيح بصيح ترا تكفى غيرت له وغيث معبس ودموعه على طرف رموشه حزنت عليه واسرعت غيرت له وخذته بحضنها ترضعه: ليه ليه الدموع ياماما ليه؟ دخل سلمان وهو يشوفها تمسح دموعها اللي متجمعه بعيونها من بكى غيث: شفيك؟ صاير شيء؟ تولين ناظرته ببكى: يبكي رمش بعدم استيعاب وقرب يمسح على راسه:وشفيه؟ تولين: مافيه شيء بس قلبي وجعني عليه جوعان بس لازم اغير له وجلس يبكي سلمان ضحك وهو يحضن راسها: مشواارناا طويلل يام غيث باقي بيكبر ويحبي ويطيح ويركض ويلعب ويتهاوش مع البزارين وش فيك انتي من اولها صياح؟ تولين سحبت نفس وهي تبعد عنه: تراك ماتساعدني ابدا ضيقت صدري مابيه يكبر ابيه بحضني دايم اخاف عليه من كل شيء سلمان: خالتي ماكلمتك؟ تولين: الا تقول ماتقدر تجي لكن تبيني اروح لها واحسن ياسلمان برتاح اكثر في بيت اهلي وجمب امي ماقصرت خالتي والله بس استحي ماقدر اخذ راحتي هنا واترك خالتي تخدمني وانا تعبانه ياسلمان مافيني اجامل سلمان تنهد: خلاص تجهزي ادور لك حجز متى ماتحسنتي تروحين تولين: ابيه بكرة ناظرها باستغراب: توك ولدتي استهدي بالله تولين: سلمان تكفى ابيه بكرة اذا تبي راحتي ابيه بكره ابي اروح لامي خلاص مافيني حيل اشيل نفسي كيف تبيني اهتم بولدي ناظرها باستسلام وهو فعلا عارف انها فعلا تقاوم نفسها وتعبها: خلاص ابشري تمدد وفتح لابتوبه يدور لها حجز: اقرب شيء بكرة الصبح الساعة 10:30am تولين: زين احجزها استغربت من شافت تذكرتين وكمل يرد عليها: بوصلكم وارجع تتوقعين بخليك تروحين لحالك؟ ابتسمت بحب وهي تحضنه: ياربيي سلماانن سلمان: ولو اني ماودي لكن عشان راحتك رفعت نفسها تقبل جبهته: الله لايحرمني منك سلمان: ولا منكم يلا قومي ارتاحي ورانا سفر نزلت غيث جمبه بعد مانعس: انتبه له ولا تلمسه قرب ينام بروح ارتب الشنط نام وهو حاضن غيث وحووالينه المخاد عشان مايطيح وتولين ترتب الشنط وكلمت امها تبلغها بمجيئها الساعة ٧ الصبح جففت شعرها وحطت ميك اب خفيف وطلعت تجهز لهم فطورهم نزلت تحت ولقت عذوب صاحية: صباح الخير خالتي وش محصيك الحين؟ عذوب وهي تنزل العصير بالصينيه بيد الخادمه: صباح النور قمت اودعكم يمه يقول سلمان بتمشون وقلت اجهز لكم فطوركم ابتسمت بحب وهي تتقدم لخالتها وحضنتها: الله لايحرمني منك خالتي عذوب: ولامنكم يلا روحي قومي سلوم بتجيب الخادمه الفطور وراك يلا طلعت للغرفه نزلت الفطور على الطاوله والتفتت لسلمان النايم: سلوومم يلاا جلس يفرك عيونه بكسل: عطيني منشفتي تولين: قووم افطر اول بيبرد الاكل يلا قامت اخذت غيث بحضنها ترضعه سلمان ياكل وعيونه مقفله: كم الساعة؟ تولين: توها ٧:٣٠ شرب كوب العصير دفعه وحده وقام للحمام يتسبح دقيقتين وطلع لابس مشط شعره وتعطر:يلا؟ تولين: يلا توكلنا على الله اخذ الشناط وهي شالت غيث ونزلو جلست بالصاله من شافت عذوب تصلي تنتظرها عشان تودعها وسلمان راح يركب الشنط السياره خلصت صلاتها وابتسمت من شافتها: بتمشون الحين؟ تولين وقفت تحب راسها: اي طيارتنا عشر بنروح بدري عذوب: استودعتكم الله عطيني حبة عيني ابوسه اخذت غيث بحضنها: وه بسم الله عليك استودعتك الرحمن مع السلامه ياروح جده انت دخل سلمان: يلا يمه فمان الله اشوفك على خير عذوب: فمان الرحمن حبيبي الله يحفظكم اخذ غيث بحضنه وطلع: يلا لانتاخر عذوب: طمنوني اذا وصلتو سلمان: على خشمي طلعو للمطار راح سلمان ياخذ قهوه وتولين على الكراسي تنيم غيث جاء سلمان جلس ومد لها قهوه: جبت لك قهوه سمي تولين: شكرا سلوم نزلها على الطاولة انيم غيث واشربها سلمان اخذه من يدها: عطيني اياه بشتاق له خل اشبع منه ابتسمت بحب وهي ترفع جوالها تصورهم وهو ينوم غيث على صدره ويمسح على ظهره بهدوء مدت له البطانيه: غطه عن البرد الجو بارد عليه جلست تشرب قهوتها وتسولف معاه بعد دقايق طويله وصلت طيارتهم وتوجهو للبوابه واخيرا بعد عناء وتعب وصلو ماكانت المده طويلة لكن جرح عملية تولين اوجعها والسفر مع طفل مولود متعب جداً ومرهق نزلت متشبثه بذراعه بتعب ويدها على جمبها همست بألم: سلمان جرحي يوجعني التفت عليها بخوف: انفتح؟ تولين: لا مدري بس يوجعني اسرعو خطواتهم لحمامات النساء ودخلت تشيك على جرحها شهقت من شافت بعض الخياطه مفتوحه شيء بسيط لكنه كان فيه نزيف مكانه وكانت ماخذه احتياطاتها حطت لاصق قوي( لاصق يشد الجلد على بعضه كانه غرزه لكنه لاصق مؤقت) وغطته بقطعه شاش لاصق ونزلت بلوزتها عليه وطلعت للي ينتظرها بقلق فالخارج: وش صار؟ تولين: جرح صغير خل نروح المستشفى تشوفه الدكتوره احسن سلمان: يلا يلا طلعو مسرعين اخذو لهم سيارة ومشو لاقرب مستشفى تولين: لاتنزل خلك هنا مع غيث سلمان: لا بجي تولين مسكت ذراعه: حبيبي المكان مو مناسب لطفل صغير خلك هنا تراه جرح صغير ماياخذ وقت دقيقه وجايه سلمان: زين طمنيني كل شوي تولين: تمام نزلت للمستشفى ودخلت على الدكتوره: اهلا انسه تولين؟ تولين: اهلين دكتوره الدكتوره: من ايش بتشكي؟ تولين رفعت بلوزتها: انا تو ولدت قيصري وانفتح جرح العملية الدكتوره وقفت بقلق: لالا كويس تمددي على السرير نشوف الوضع بدت تفحصها وتتاكد انه مجرد جرح بسيط: الحمدلله كل شيء بخير لكن الغرز انفتحت فقط لازم تنتبهي على نفسك وترتاحي اكثر لان الجرح يحتاج اهتمام اكثر جرحك صار حساس اكثر الحين خصوصا اننا خيطنا نفس المكان مرتين المره الجايه حيكون اصعب اننا نخيط كمان تولين: تمام دكتوره يعطيك العافيه الدكتوره: ماتشوفي شر حكتب لك تعليمات ووصفه اتبعيها وراجعيها مع دكتورتك للتاكد اكثر تولين: تمام خلصت وطلعت للي ينتظرها بقلق: شقالت؟ تولين: اجهدت نفسي وانفتح الجرح بس الحمد لله انفتح شيء بسيط سلمان: الحمد لله انتبهي على نفسك اكثر مشو لاهل تولين نزلو واستقبلتهم ام تولين عند الباب عذاري: مرحبا الففف حي الله عياالليي قرب سلمان يقبل يدها: الله يبقيك ويسلمك كيفك خالتي؟ عذاري: الحمدلله كيفك انت مقاطع خالتك من يوم خذيت بنتي وانت ماتسأل عني سلمان: سامحيني ياخاله والله مالي عذر ابشري على خشمي من اليوم ورايح بنشب لك عذاري: يابعد راسي ، والتفتت لغيث بحضنه وهي تاخذه لحضنها: اميي وابوي ياجعلني فدوه هالرجيلات تولين ناظرت سلمان بحزن مصطنع: نست ضناها شفت الجحده كيف من بدايتها كذا ضربت راسها بخفه: كلكم احبكم ادخلو يلا ادخلو حياكم الله سلمان: الله يحييك عذاري: يقولكم ما اغلى من الولد الا ولد الولد تولين حضنتها: انتي الغاليه والله نزل سلمان غيث بحضن جدته وجلسو يتقهوون شوي جت الخادمه تبلغ عذاري الغداء جاهز عذاري: الغداء جاهز تفضلو تولين: وين ابوي واخواني؟ البنات موموجودين؟ عذاري: ابوك واخوانك مسافرين بيجون اليوم بالليل والبنات طالعين ماعلمتهم انك بتجين قلت افاجئهم تولين: زين تغدو وقام سلمان بعد فترة: تسلم يدينك خالتي كثر خيركم والله يستر عليكم عذاري: بالعافيه يمي وينك بتروح توك جاي ارتاح شوي جهزت لكم الغرفه فوق سلمان: عندي شغلة بخلصها قبل امشي رحلتي المغرب عذاري: وشو له العجله الله يهديك ريح ونام ثم سو اللي تبيه سلمان: ماقدر والله عندي دوام ياخالتي عذاري: الله يعين فمان الله ياوليدي طلع مستعجل يخلص شغلته قبل يمشي للمطار العصر دخل ووراه الممرضه شاف الخادمه قدامه: وين تولين؟ الخادمه: مدام فوق بابا كله مدام تولين ومدام عذاري هز راسه وطلع فوق ووراه الممرضه طق الباب وفتحه: ادخل؟ معي ضيف تولين: مين؟ فتح سلمان الباب: تعالي ادخلي تولين: مين هذي؟ سلمان نزل اوراقها عند تولين: هذي ممرضه تهتم فيك طول النفاس وتساعدك عذاري ابتسمت بحب لبنتها وقامت طلعت اخذت الممرضه معها:تعالي اوريك اغراض البيبي وغرفته وقفت تولين تحضنه بحب ونزلت دموعها: ياربيي سلماانن احبك ضحك وهو يحاوطها: كم عندي توته؟ اهم شيء عندي راحتك ابتعد وهو ينزل لغيث اللي على السرير ويقبل انفه ووجهه كله: انتبه لماما وخلك رجال زين؟ ورجع باس راس تولين: يلا استودعتكم الله بمشي طيارتي بعد اقل من ساعة تولين: الله يحفظك حبيبي فمان الله طلع سلم على خالته وودعها وطلع متوجه للمطار قفلت الباب بعد ماودعته وعبست ملامحها فورا ورفعت راسها شافت امها وراها مبتسمه برضا فتحت يدينها تحضنها: الله يحفظكم يمي ويديم عليكم المحبه تولين: شفتيه ماما ؟ جاب ممرضه عذاري: شفته ياماما شفته يلا تعالي خل نشوفها ونعلمها الشغل طلعت مع امها لغرفتها والممرضه معهم في الليل الساعة 11:30pm تولين تنهدت بتعب: واخخخييررااا نام عذاري: يلا نامي انتي قبل يقوم وتسهرين الليل كله بجيك الفجر اشيك عليه تولين: زين ماما طلعت عذاري من الغرفه وتمددت تولين وهي تتأمل غيث بجانبها فزت بخوف لايقوم من اتصل جوالها:الو؟ سلمان: هلاا توته كيفك؟ تنهدت برعب: اووهه سلمان روعتني كان بيقوم سلمان: اسف، قام؟ تولين: لا ابشرك سلمان: زين، وش تسوين؟ تولين: ولاشيء على جوالي انت وش تسوي؟ سلمان: ابد تو جاي من العيال مالي مزاج بالقعده تولين: ليش مالك مزاج؟ اطلع غير جو سلمان: مشتاق لك سكتت بخجل ثواني ثم نطقت: وانت وحشتني سلمان: استوحشت حتى غرفتي بدونك والشيخ غيث تولين: امداك سلوم تونا اليوم مع بعض وش تقول بعد اسبوع؟ سلمان: لاتوجعين قلبي اكثر وجعني قلبي من الحين بشتاق لك ولا القاك من غير شر يقولك الشاعر واعذاب اللي بغاك ولا لقاك أسهر الليل وقمر طيفك بعيني تولين: الله صاير رومانسي بالحيل وشاعر بعد هههههه سلمان: لعب فيني الشوق ياروحي شسوي هيض شعري تولين: زين ياشاعري تصبح على خير نعست وابي انام سلمان: نوم العوافي فمان الله قفلت ونامت بينما سلمان قعد يتقلب بالغرفه لحاله مستوحش المكان بدونهم تنهد بتعب وهو يردد بنفسه: الدار بأهلها اي والله الدنيا خاليه من رحتو مرت اسبوعين طويلة على سلمان اللي قضاها بكل فرصه يروح لهم الى ان انشغل وانتهت فرصه للذهاب ومقابلتهم ليلة ممطر باردة محتضن فروته على اكتافه وجالس بهدوء بسيارته امام البيت يتأمل فديو غيث بحب وتتسع ابتسامته من ضحكته ردا على تلاعب امه معه تنهد باشتياق له هذه المره العاشره التي يقوم بها باعادة اللقطة وتزداد ابتسامته حتى تحولت لضحكات وهو يتأمل كل انش في ابنه وتفاصيل محبوبته التي تخفي نفسها من الكاميره التفت من اللي يدق الشباك فيصل: ذبحك الحب انزل انزل سلمان قفل سيارته ونزل: وانت تطلطل؟ فيصل: لا ماشفت شيء بس شفتك لك ساعه على جوالك تتبوسم وتضحك قلت الولد ميت وله اذا مشتاق روح خذهم سلمان تنهد: ليتها بيدي هانت مابقى شيء ويرجعون فيصل: كيف الشغل معك؟ تبي اجي اساعدكم؟ سلمان: لا استاذ فيصل ريح انت حستنا الاسبوع اللي فات وللحين في دوامه نصلح اللي سويته فيصل حك موخره راسه: اسف غلطة شاطر سلمان ضحك بعدم صبر وهو يمسح وجهه:غلطة شاطر! يلا تكبر وتتعلم طلع لغرفته وتمدد بوسط السرير ابتسم من اعتلى اسمها شاشة هاتفه فتح الاتصال وهو يضع الهاتف امامه: افتحي الكام تولين عدلت شكلها وهي تفتحها وبحضنها غيث النايم: شوف مين نايم معاي اليوم سلمان: هو كل يوم معاك تولين: لا ماما ماتخليني دايم تاخذه هي والممرضه سلمان: متى تجين ترا ضاقت ضلوعي من الشوق تولين نزلت واسها من وصفه لشوقه لها عجزت عن الكلام وهي تحاول ترد لكن غيرت الموضوع بتردد: وينك ماجيت؟ سلمان: انشغلت ماقدرت اجي تولين: مضغوط؟ سلمان: مررهه فيصل الله يهديه قدم مساعده وليته ماساعد حاسنا حوس ولنا اسبوع نعدل اللي سواه تولين: مسكين توه مايفهم بهالاشياء معليه يتعلم يتعلم اصبر عليه سلمان: ماقلتي لي؟ متى تجون؟ تولين تنهدت: مدري يمكن اسبوعين ثلاثه سلمان: كثير يادُرة فؤادي ابتسمت من اللقب الحنون: لا ياقلبي انت تحمل شوي كلها كم يوم سلمان: اسبوعين بالكثير مالك غيرهم تولين ضحكت: ابشر سم سلمان: سم الله عدوك تآمرين على شيء؟ تولين: سلامتك فمان الله سلمان: الله يحفظكم
........يتبع
سلمان وغيث🥺:
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
_____________________________
- استغفر الله🩷 - الحمد لله🩷 - الله أكبر 🩷 - لا إله إلا الله🩷
