Lesson 15
Unsa bay gihisgotan sa kapitulo 5?
Diri gihisgotan ang imoralidad nga nahitabo sa simbahan sa Corinto. Gibuyag ni Pablo ang simbahan tungod kay imbis nga ilang buyagon, ila hinoong gipasigarbo! Iyang gitudloan ang simbahan sa Corinto kung unsay angay himoon sa simbahan sa ingon ani nga problema.
Kabalo ta nga "rampant" kaayo ang immoralidad sa Corinto tungod sa geographical location sa maong lugar. Daghan ang opportunities sa trabaho ug tungod niini misaka usab ang mga ngil-ad nilang mga binuhatan. Usa sa nakaanghit lang tungod kay hasta ang simbahan (mga magtutuo) mi compromise sa mga binuhatan. Ang simbahan mao untay tinubdan sa maayong binuhatan, usa ka ihimplo sa kamatuoran.
1 Gidungog na nga may imoralidad diha kaninyo ug hilabihan kini kangil-ad nga bisan gani ang mga dili magtutuo wala makabuhat sa ingon. Gisuginlan ako nga may usa ka tawo nga nakigpuyo sa iyang ina-ina.
Gidungog - buot pasabot, kini na hibal-an sa tanan, dili kini secreto. Unsay nahibal-an?
Nga naay "imoralidad diha sa simbahan"
Ang pulong "imoralidad" sa orihinal nga pinulongan gitawag kini ug "pornia" diin diri gikuha ang english word nga "porn o pornography"- malaw-ay nga pakighilawas. Nahimo siyang malaw-ay tungod sa imong pakighilawas sa dili nimu asawa o bana. Ang bana ug asawa nagpasabot kini sa "kasado" sa mata sa balaod.
Busa, adunay imoralidad nga nahitabo sa simbahan nga bisan gani ang mga dili magtutuo wala nakahimo ani- adunay tawo nga nakigdulog sa iyang ina-ina (step mother). Adunay balaod ang Roma kaniadto nga "dili ka pwede makighilawas sa imong inahan kay kini usa ka ngil-ad nga binuhatan. Technically, ang ikaduhang asawa sa imong papa nga mao imong step mother, imo gihapong inahan. Ug tungod ani, bisan pa gani ang mga dili magtutuo wala makahimo ani sa ingon. Ug unsay dili pa gyud nakawalay aayo ani tungod kay nahitabo kini sulod sa simbahan.
2 Unya nagpasigarbo hinuon kamo! Angay unta nga masubo kamo ug papahawaon gikan sa inyong pundok ang nakabuhat niini.
Imbis nga maguol sila, imbis nga madugmok ang ilang kasingkasing tungod sa gihimo niining mga tawhana, nahimo pahinoon silang mapasigarbohon sa ilang gibuhat- ila hinoong gitolerate imbis nga ilang badlongon.
Ang rekomendasyon ni Pablo nga kinahanglan nga papahawaon sila gikan sa pundok (sa panagtigom)
Ang pangutana, unsay rason nga kinahanglan mang papahawaon man sila?
v5
3 Bisan tuod layo ako kaninyo, kauban gihapon ako ninyo diha sa espiritu ug sa ngalan sa atong Ginoong Jesus, gihukman ko na ang naghimo niining mangil-ad nga butang, sama ra nga uban ako kaninyo.
4 Sa inyong panagtigom, uban ako kaninyo diha sa espiritu pinaagi sa gahom sa atong Ginoong Jesus nga nakig-uban kanato.
Apan sa wala pa mitubag si Pablo, gisultian usa nila siya unsay rason nganong gihimo niya kini. Unsay hinungdan?
Nga bisan layo sila kaniya, sama ra nga kuyog sila niya diha sa espiritu pinaagi sa gahum ni Kristo-Hesus. Importante kini nga masabtan nila tungod kay dili lang sila ang maapektohan kundili siya usa- bisan tuod wala siya kauban personally apan pinaagi sa espiritu (ang iyang kaugalingon espiritu) sama ra nga kauban niya sila.
5 Itugyan kining tawhana kang Satanas aron laglagon ang iyang lawas ug ang iyang espiritu maluwas unya sa pagbalik sa Ginoo.
Ang rason nganong kinahanglan nilang papahawaon kini aron maluwas kining mga tawhana sa pagbalik sa Ginoo.
Apan sa unsa bang bahina kini sila mahibalik sa Ginoo?
Una daan, dinhi ang gigamit nga pulong mao ang "pagtugyan kang Satanas aron laglagon ang iyang lawas"- ang lawas dinhi dili mao ang lawas (body sa english, pisikanhon nga lawas) kundili ang unod o mas nindot nga translation mao ang flesh. Ang unodnon nga bahin nato ng maoy mobati sa kalami sa sala aron motulod nato sa pagbuhat sa maong sala. Busa ang ideya sa pagtugyan kang Satanas aron malaglag ang iyang lawas mao nga aron mabati niya ang kasiryoso sa maong sala ug nga aron maluwas ang iyang kalag pagbalik sa Ginoo.
