Lesson 30
Unsay atong makat-onan sa chapter 12?
1. Dinhi atong mga hiyas sa Balaang Espiritu.
2. Unsa ang hiyas.
3. Para asa ang hiyas
4. Specifically, atong masayran unsa ang "speaking in tongues" along side sa "hiyas sa interpretation".
5. Adunay lain laing gasa, apan gihatag kini sa Dios alang sa kaayohan sa simbahan.
1 Mga igsoon, buot ko nga masayod kamo sa kamatuoran mahitungod sa mga hiyas gikan sa Espiritu Santo.
Karon, sa akong giingon, atong makat-onan ang nagkalainlaing mga hiyas sa Balaang Espiritu Santo. Si Pablo mismo nag-ingon nga kinahanglan masayod kita sa kamatuoran sa Balaang Espiritu—sa laing pagkasulti, dili kita dapat mahimong ignorante sa mga hiyas sa Balaang Espiritu Santo.
Ngano man? Tungod kay kini sagad na "misuse" sa daghang kasimbahanan karon, ilabi na sa mga Pentecostal Churches.
Unsa man kini nga pulong "hiyas" o "hiyas sa Balaang Espiritu Santo"?
Sa uban nga mga hubad sa Bibliya, ang pulong "hiyas" gihubad nga "gasa" o sa English "gift". Ang Greek word nga nagpasabot sa "gift" gi-translate kini ug "charisma," diin nato gikuha ang atong expression nga "kusog ka ug karisma." Ang hiyas, gasa, o "gifts" usa ka abilidad sa paghimo sa usa ka butang nga wala nimo gi-master o gitun-an. Mao nga mosulti kita sa usa ka tawo nga "kusoga sa karisma"—buot ipasabot, bisan wala kay porma o kapasidad nga makahimo, pero makahimo ka karon tungod sa imong karisma.
Kini mao ang ideya sa hiyas sa Balaang Espiritu: gihatag kini sa Dios aron makahimo ka sa butang nga dili nimo mahimo alang sa buluhaton sa Dios ug sa iyang kahimayaan.
Kung maghisgot ta ug hiyas, mga higala, kanunay nako mahinumduman ang "Encantadia," diin ang mga Sang'gre adunay mga brilyante nga ilang kaugalingon nga hiyas. Dili sila makahimo og talagsaon nga mga butang kung wala ang hiyas sa apoy, lupa, tubig, ug hangin. Mao usab kini sa Balaang Espiritu; dili pareha sa Encantadia, ang hiyas sa Balaang Espiritu gihatag alang sa kahimayaan sa Dios. Ug usa pa sa mga butang nga atong dapat masayran mao nga ang Balaang Espiritu gasa sa Dios. Tungod kay ang pulong hiyas "gasa" o regalo, dili kini atong hinagoan. Sama nga nakabaton kita sa "gasa sa kaluwasan," mao usab kini ang "gasa sa Balaang Espiritu." Ug tungod kay gasa man kini sa Dios, nagpabilin kini nga "property" sa Dios ug dili nimo "property" nga daw ikaw mao'y tag-iya.
2 Nasayod kamo nga sa inyong pagkadili magtutuo kaniadto nahisalaag kamo sa nagkadaiyang paagi sa pagsimbag mga diosdios.
3 Busa kinahanglan nga mahibaloan ninyo nga ang tawo nga gimandoan sa Espiritu sa Dios dili makatunglo kang Jesus ug walay makasugid nga si Jesus mao ang Ginoo, gawas kon mandoan siya sa Espiritu Santo.
Sa wala pa gipailaila ni Pablo ang mga gasa sa Balaang Espiritu, gipahimangnoan niya sila bahin sa natural nga bunga sa tawo nga gimandoan sa Balaang Espiritu. Dili sama sa ilang karaang kinabuhi nga mao ang "paganism", ang tawo nga gimandoan sa Balaang Espiritu dili makatunglo kang Hesus! Ngano? Tungod kay ang Balaang Espiritu nagpromote kang Hesus ug dili nagtunglo. Busa, sa dihang gidawat nato si Hesus (ato kining nakat-onan sa nilabay nga kapitulo), gimandoan na kita sa Balaang Espiritu, diin si Pablo nagsulti nga ang atong lawas templo na sa Balaang Espiritu. Dili ta makasugid nga si Hesus Ginoo kung dili kita gimandoan sa Balaang Espiritu sa atong kinabuhi. Ang pulong Ginoo nagpasabot ug "Master". Si Hesus na karon ang atong "Master" sa atong kinabuhi.
Ako nagtuo nga ang rason ngano ang tawo dili makasunod sa Dios tungod kay wala kini gamhi sa Balaang Espiritu.
Sa dili pa ang tanan, kinsa ba ang Balaang Espiritu? Mas maayo nga diri kita magsugod aron nga masabtan pa nato pag-ayo ang Balaang Espiritu.
