I Will Make You Mine(Completed)

Part 15

#Unicode

Spain ကနေပြန်လာပြီးနောက်အရင်ဆုံးလာဖြစ်သည်က မိသားစုရှိရာကိုပင်ဖြစ်သည်။
Jungkook ကလဲ သူပါလိုက်မယ်ဟု ဂျီကျနေ၍ခေါ်လာခဲ့ရသည် ။
တကယ်ဆိုရင် Taehyung တို့မိသားစုနေတဲ့ အိမ်ကျဥ်းကျဥ်းလေးက Jungkook ရဲ့အခြေအနေနှင့် များစွာကွာခြားနေသည်မဟုတ်လား ။လက်ထပ်ပြီးနောက် Jungkook က သူတို့မိသားစုကို အိမ်ဝယ်ပေးမယ်ဟုပြောခဲ့သည် .. သို့ပေမဲ့ Taehyung ဘက်က ငြင်းဆန်ခဲ့တာဖြစ်၏ ။ အခုလိုမျိုး လိုလေသေးမရှိအောင်ထားပေးတာကပင် ကျေးဇူးတင်ဖို့ကောင်းနေပြီမဟုတ်လား ။
တစ်နှစ်လေးအတွင်းမှာ သူ့ဘက်ကနေ အခွင့်အရေးတွေအများကြီးယူဖို့မသင့်တော်သည်လေ ။

"ဟယ်... သားတို့ရောက်လာပြီပဲ"

Taehyung ၏အမေက တံခါးဖွင့်ပေးရင်း ဝမ်းသာအားရကြိုဆိုရှာသည် ။
Taehyung ၏အဖေနှင့် ညီမဖြစ်သူ Jiyoonကလဲ အိမ်ထဲကနေ ထိုင်စောင့်နေကြပါသေးသည် ။

"ညစာကို အကောင်းဆုံးချက်ထားတယ် ။ သားတို့ကို ခံတွင်းတွေ့စေချင်လို့လေ"

"ကျေးဇူးပါ အမေ"

Jungkook က Taehyung ၏အမေကိုပြုံးပြရင်း ကျေးဇူးတင်စကားဆိုသည် ။
ဘာရယ်ကြောင့်မသိပေမယ့် Taehyung ၏ရင်ထဲတွင် ကြည်နူးမှုလှိုင်းလေးဖြတ်ပြေးသွားကာ သိမ့်ခနဲခံစားလိုက်ရသည် ။

ညစာအတူစားတော့လဲ Jungkook က ဘာမှဂျီးများမနေပေ ။ အဖေ၊အမေနှင့် ညီမဖြစ်သူထည့်ပေးသမျှ ဟင်းတိုင်းကို ပြုံးပြုံးရွှင်ရွှင်နှင့်စားသည် ။ Shooting မှာဆိုရင် အစားရွေးလွန်း၍ မန်နေဂျာ Woo Young မှာ အမြဲတမ်း အလုပ်ရှုပ်ရသည် ။ အခုတော့ အဲ့ဒီ အစားရွေးတဲ့ Jungkook နှင့်ကွဲပြားစွာပင် ကောင်းကောင်းမွန်မွန်စားနေသည် ။

အမေတို့မေးသမျှကိုလဲ မငြီးမငြူနှင့်ဖြေပေးနေသေး၏ ။
ပုံမှန်ဆိုရင် Jeon Jungkook က အခုလိုမျိုးမဟုတ်ပေ .. သူစားသောက်နေတဲ့အနားကို စကားလာပြောလျှင် သေလောက်အောင်မုန်းတာဖြစ်သည် ။ တစ်ခါကဆိုရင် ထမင်းစားနားနေစဥ်မှာ မန်နေဂျာ Woo Young က စကားလာပြောမိ၍ Jeon Jungkook က Taehyung ရှေ့မှာတင် ထမင်းပန်းကန်ကိုပေါက်ခွဲပစ်ခဲ့ဖူးသည် ။

အခုတော့ အဲ့ဒီလိုမဟုတ်ဘဲ ပျော်ရွှင်နေတဲ့ကလေးလေးတစ်ယောက်လိုဖြစ်နေသည်။
မင်းသားဆိုတော့လဲ သရုပ်ဆောင်တော်သည်ပေါ့လေ ။
ဘာပဲဖြစ်ဖြစ် သူ့မိသားစုအပေါ် မရိုင်းပျတာကိုဘဲ Taehyung ကျေးဇူးတင်နေမိပါ၏ ။