~مشاحنات قد ابتدت~
"ظن انه سيكون المسيطر ولا مجال للاعتراض، مسكين لا يعلم ان روح التحدي لدى النساء تفوق الرجال باضعاف"
-
-
طلع ايمن و هو مبسوط و بصفر..اما استاذة شيماء وشها اتلون من الخوف و قالت "الولد دا مالو؟!!"..
"مالو قال ليك شنو؟"..
اتلفتت ناحية المديرة و قالت ليها "لا ولا شي..اها كنتي عايزاني في شنو؟" و جات قعدت في الكرسي القصادها..
المديرة اخدت نفس بعداك قالت "الاولاد في العمر دا بكونو راس هوس..لو ما اتكلمتي معاهم بي لين ما بسمعو كلامك..كان عاندتيهم حيركبوا راس..عشان كدا ماف داعي تستعملي الاسلوب الرف معاهم لانه ما حينفع"
"و ليه ما ينفع؟ ما هدا الطلبة التانيين لما هرشتهم جو الفصل..ليه ديل ما يسمعو الكلام؟ اسمحي لي اقوليك يا استاذه ديل كدا حيركبو فوق راسك عديل و حيكسرو القوانين حقت المدرسه كلها..بالذات الولد الاسمو ايمن دا"
"ايمن دا تصرفاته تصرفات مراهقين بس..لكن لو اتعاملتي معاه براحه بسمع ليك"
"والله العندي قلتو ليك يا استاذه...كلهم محتاجين تشدو معاهم..انتي عشان مدياهم الحريه يعملو العايزنه هم بسوو كدا..ما قصدي اسيء ليك لكن الموضوع بقى فيه اساءة لسمعة المدرسه..ترضي يحصل كدا ولا مستواها ينزل؟"
المديره سكتت ما ردت..قامت استاذه شيماء على حيلها و قالت "عموما دي وجهة نظري يا ريت تتفهميها"
جات عايزه تمشي قامت المديره نادتها..اتلفتت عشان تسمعها..
"في احتفال عايزين يعملوه طلبة تالت لي طلبة اولى...عايزة احملك مسؤولية الاحتفال كامله بتقدري؟"
ابتسمت و قالت "اكيد"..و طلعت..
رجعت الفصل لقت الطلبة كلهم قاعدين..درست حصتها و بعد انتهت قالت ليهم "يا تالته ركزو معاي..انا زوله بتكره الدك و ما بسمح لي زول انه يدك حصتي..عشان ماف زول بعدين يجيني في المكتب يقول لي اشرحي لي الحاجه الفلانية انا ما فاهمها..من هسي لو دخلت لقيت الفصل ما تامي كل الفصل حيتعاقب...عشان كدا بتمنى ما يحصل تصرف زي دا تاني"
قالو ليها "ان شاء الله"..
"يلا اقعدو عندي موضوع ظريف عايزه اتكلم معاكم فيهو..
بعد قعدو الكانو متعاقبين قالت "شايفه في احتفال حيتنظم لي ناس سنة اولى..انتو الحتقومو بيه..عايزين نتناقش نشوف العندو افكار جميلة يطلعها لينا بالله"
احمد قال بحماس لايمن "دي جاتني في ملعبي" و رفع يده عشان يشارك..
ايمن عاين ليه بقرف و قال "الو؟ بترفع يدك؟ عايز تشارك؟ ولد مهذب عديل"
استاذة شيماء قالت ليه "ايوه يا طالب اتفضل"
احمد اتردد بعد كلام ايمن قام نزل يده و قال "اوبس..الفكره طارت من راسي" و قعدو يضحكو هو و ايمن..
