~جلسات تحقيق(١)~
"ظنو مقلبهم السخيف مضحكا..حسنا مقلبي سيكون مضحكا اكثر"
-
-
مسك القضية دي واحد من معارف استاذة شيماء و اسمه ناصر..
دخل مكتبه بعد م طلب من صحبه انه يدخّل ليه واحد من الطلبة السته...حيحقق مع اي زول على انفراد لحد م ينتهي منهم كلهم..
لقى واحد من الاولاد هو القاعد..
قعد في مكتبه و استقر نظره عليه و بعد مسافه قال "السلام عليكم"
"و عليكم السلام"
"اسمك منو؟"
"ايمن الفاتح"..
"طيب يا ايمن الفاتح..نحنا بنتأسف لانه طلعناكم من المدرسة بالطريقة دي..بس قريبة المرحوم اصرت انه التحقيق يتفتح هسه..عايزه تعرف باي طريقه اخوها دا مات كيف.."
قاطعه ايمن "قلت لي اخوها؟؟"..
"م تقاطعني..اي اخوها"..
سرح ايمن بعيد..و بعد مسافة رجع ركز مع ناصر...
"ح نخش طوالي في الاسئلة..انا بسالك و انت بتجاوب.."
"تمام"..
"كدي ظاهر عليك ما تمام مالك؟"
"ذكرتوني بي صحبي فجاه و في يوم عيدميلادي..معقوله ما اتضايق؟"
"بنعتذر تاني..طيب اول سؤال..بما انه عمر الله يرحمه ما طول شديد من اتوفى..يعني ليه زي تلاته شهور كدا..اكيد بتقدر تتذكر انت كنت وين يوم الحادثة صح؟"..
"طبعا..كيف انسى حاجة زي دي..كنت مع اصحابي احمد و مصعب في بيت مصعب..اساسا وصلنا خبر الوفاة و احنا هناك بطريقة غريبة شديد"
"كيف كدي اشرح اكتر"
"يعني اتخيل معاي تكون انت و صحبك امبارح قاعدين في الجبنة سوا بتتونسوا و تضحكوا..تجي اليوم البعدو يدوك خبر وفاته و مش كدا و بس لا انتحار كمان"..
"هل صدقت لما قالو ليك انتحار؟"
"طبعا لا..في الاول استنكرت الحاجة دي شديد..بس بعد تفكير و كدا..اتذكرت انه عمر اصلا حالته الماديه ما كانت تمام..في اغلب الوقت كان بحتاج قروش و كدا..م عارف هل الفقر دا سبب يخليه ينتحر او لا بس.."
"اي طبعا ممكن الفقر يكون ليه دور اساسي في الحاجة دي..بس م كانها غريبه فجاه ينتحر كدا؟ هل كان بشكي من وضعه؟"
"م للحد البخليه ينتحر"..
"امم طيب قبل م ينتحر في الفترة ديك هل لاحظت عنده تصرفات غريبه او كدا؟"
ايمن رجع بذاكرته لورا و بعداك قال "ابدا..حتى كان بحكي لينا عن اخته الممتحنة شهادة..و انه بعمل باقصى قوته عشان يهيء ليها الجو المناسب للقراية..كان مبسوط يعني"..
