~مقلب سخيف~
"من اكبر الحماقات التي قد يرتكبها الشخص..اضحاك نفسه بازعاج الاخرين"
-
-
بالليل في الكورة،،
كانو بيلعبوا في الميدان الجمب بيت احمد..بعد انتهى الشوط الاول قعدو في الكراسي و طلعو قوارير الموية..
احمد شرب قارورة الموية كلها و بعداك رماها في الارض بقوة..ايمن قال ليه "لا كدا م صح..رفقا بالقوارير"..
لز ليه وشه بالجهة التانيه و قال "خلي الظرافة..دا حديث م تلعب بيه على كيفك"
"وحلاتي كدي عيد جملتك دي"
"قلت ليك اسكت مني قبل اكب قارورة الموية حقتك دي في راسك"..
"خلاص اهدا..كدي وريني مالك يستحيل تكون متضايق كدا ساي"
كان بيمشي يدينه في شعره بضيق و هو ساكت..قام ايمن لكزه "هيي بتكلم معاك انا في شنو"
"ياخ ماف شي..المفروض ارجع البيت شوف زول غيري يتم القيم"
"ليه عندك شنو في البيت"
"داير اكتب الكيمياء دي"
"انت قاعد في المدرسة لحد خمسه بتسوي شنو؟ مش كنت بتكتب؟"
احمد نزل راسه تحت و م رد...ايمن ضربه في راسه و قال ليه "بتكلم معاك انا ارفع راسك دا..قعدت تسوي شنو"..
"اخخ انسى لو وريتك حتضرب راسي المرة الجاية بالكورة م بيدك"..
"احسن توريني لاني كدا كدا حاضرب راسك بالكوره".. و مسك ليه راسه بيدينه الاتنين..
غمض عيونه و قال "كنت بكتب لي لين" و بقى منتظر الضربه الحتجيه في وشه..
و فعلا م انتظر طويل ايمن طوالي اداه كف و وقعو في الارض بقى بتشاكل معاه و بضربو على خفيف كدا و قال ليه "الليله اصلو ما بخليك"..
احمد كان بحاول يلزو منه بس بلا فايده..استناه لحد م تم هبالته دي و سابو براه بعداك قام على حيله و نفض هدومه من التراب..
بقى بطقطق في ضهره و قال و هو مكشر وشه "ايمن لو وقعت فوقي تاني بالطريقة دي والله اكسر ليك راسك..ياخ وزنك كم ياخ"
"لو وزني ١٥٠ برضو حاركب فوقك..عشان تاني كل ما تفكر تسدي خدمة لي لين تتذكر انه ضهرك حيوجعك بسببي"
قعد احمد في الكرسي بتاعه و هو متالم بعداك قال "المشكله اني المره دي جدجد ندمت"
"ليه حصل شنو تاني"
"كنت بحكي ليها الموضوع بتاع استاذة شيماء قامت فجاه غيرت الموضوع"
"احنا مصاحبين لين لينا سنتين و ليوم الليله انت م عارفها؟"
"والله قايلها حتتغير"
"الناس م بتتغير..اي زول بيفضل زي ما هو من ما يتولد لحد م يكبر و يموت..اذا في حاجة ممكن تتغير ف هو طريقة تعامله مع الناس فقط..هل هو عايز يظهر شخصيته الحقيقيه و لا يتعامل مع اي زول بشخصية مختلفه و يحتفظ بشخصيته لنفسه..و هنا دا بنسميه عديم الشخصية..و بما انه لين اكتر زول انا بعرفو عنده شخصيه في الحياه و فنفس الوقت شخصيتها زباله..مستحيل تتغير"
