ضحية المجانين

١٠

~جلسات تحقيق(٢)~

بصوت لين،،

بعد النقاش العقيم الاتناقشته مع احمد..مشيت الحمامات اغسل وشي..في اللحظة دي تحديداً كنت خايفه..الكنت شايفاهم اصحابي..حسيت بيهم اعدائي لوهلة..

حسيت بيهم ح يختوها فيني..و يتفقوا و يتآمروا علي..

م تلوموني لاني فضحت احمد لناصر..

انا كنت بحمي في نفسي بس..عشان يعرفوا كويس انه لو حاولوا يوقعوني في مشكله..انا ما ح اسمح ليهم ابدا..

مرقت من الحمام و فجاه طلع لي ناصر في وشي..قال لي "تعالي في المكتب عايزك"..

مشيت وراه و انا ساكته لحد م دخلنا و قعدنا..سالني "لما عرفتي بخبر موت عمر ليه ضربتي لاصحابك و م ضربتي لصحباتك؟"..

"كيف؟"..

"حسب الاجوبة الاخدتها من الباقين..انتي ضربتي لاحمد و وريتيه هو و اصحابه انه عمر مات..اما اساور و اسيل ضرب ليهم مصعب"..

"هه بس انا م ضربت لاحمد..ولا اصحابه..م عارفاهم عرفو كيف اصلا"..

ناصر عقد حواجبه باستغراب و قال "يعني هم بيكذبوا؟"..

"ما عارفاهم والله يمكن ما متذكرين زي الناس..بس انا لما عرفت من ابوي تلقائيا مشيت بيت عمر عشان اتاكد براي..لقيت بيته فاضي..و جيرانه وروني الخبر"..

"ياتو جيران بالضبط..متذكراهم منو؟"..

"اي العلى يمينهم طوالي..راجل اسمو جمال و مرته نرمين"..

ابتسم ناصر كانه اقتنع بكلامها..بعداك قال "العزاء قام في بيته يعني"..

"اي"..

"طيب كنتي اول الحاضرين في اصحابك؟"..

"اي بعداك بمسافة جو الشباب و مصعب ضرب لاساور و اسيل بتذكر الحاجه دي كويس..في نص الكواريك و الجوطة و البكى لقيناهم جو و هم ما فاهمين شي"..

فلاشباك لذكرى من ذكريات لين#..

طلعت برا البيت نسبة لاني ما كنت قادره اتماسك..حسيت اني حافقد اعصابي في اي لحظة..

دا كله حصل كيف و متين ما عارفه..صوت البكى حيشلني و يقطع لي راسي..مستغربه ليه الناس دي بتبكي؟..

عمر ما مات على فكره دي ما حاجه الزول يقولها ليك كدا و تصدقها..

كنت عايزه اضرب لاصحابي اوريهم بس م عرفت اجيبها ليهم كيف اصلا..اقوليهم عمر مات؟ حيقفلوا الخط في وشي..

فجاه لقيت ايمن و احمد مندفعين ناحيتي و ظاهر عليهم مصدومين..طيب شكلهم عرفو بالخبر..

ايمن سالني بصوت عالي "الحصل شنو يا لين"..

"م..م م حصل شي..انا ما عارفه اصلا الناس ديل ببكو في شنو"..

احمد سالني بهدوء "انتي مالك قاعده هنا براك؟"..