~حفل الاستقبال~
الخميس(الونيس)/8.9..
الصباح في المدرسة..
علت اصوات الاغاني..و ارتسمت الفرحه في وجوه كل الحاضرين..
استلمو طلبة اولى ساحة المدرسة..و اي واحد كان بيعلق على اوتفيت التاني..و كانو جايبين ليهم فوتوغرافرز مخصوص عشان يصوروهم صور تذكارية بعلقوها في المدرسة (مدرسة الهناء و السرور والله)
استاذة شيماء كانت ممسكة وحدة من بنات فصلها الفعاليات..اسمها ثويبة..
مسكت ثويبة شغلتها على اكمل وجه..اساسا عندها روح القائية ممتازه..و صوت مذيعه مميز..
كل الفعاليات دي كانت في المسرح..و موقعه في الساحه برا المدرسه..
جوا كانت لمى مشرفة على الاكل..و بتتاكد انه اي شي في محله..
جاها احمد داخل و هو بعاين لاصناف الاكل الموجودة في البوفيه...كان مكتف يدينه و لسه بعاين..قالت ليه "في مشكله في الاكل؟ ولا عايزه يكون باللون الازرق برضو؟"..
"حسك الفكاهي متدني جدا"
"ما من هواياتي اني اكون فكاهية ابدا..عندي حاجات اهم"
"مش مفروض يكون في بيتزا مع الاكل؟ دا شنو البوفيه الغريب دا؟"
"انا عايزاه يكون غريب و مميز..ليه نعمل حاجات تقليديه"
ضحك ضحكة ساخره و قال ليها "غريب دا تعمليه بعدين في عرسك..ختي ورق عنب في الكوكتيل حقك..لكن هنا دي مدرسة ما تخالفي قوانينها..اساسا كل سنه البوفيه ما قعد يتغير"
"يمكن لانه السنين الفاتت كانو ماسكين النظام ناس مختلفين..بس هنا الماسك النظام هو ام فصلنا..و هي عايزه يحصل كدا..انا طلبت على الاساس الهي عايزاه"
ضرب بقبضة يده الطربيزه الجمبه و قال "الام و بنتها..ح تشلوني..ح تشلونا كلنا والله..ناوين على شنو انتو؟"
ردت و هي بتضوق في ورق العنب "حنكون ناوين على شنو و احنا بنخت ورق عنب بدل بيتزا في البوفيه؟" و طلعت من الكافتريا و هي مبتسمه..اما هو كان شوية و ينفجر من الغضب..
عاين ناحية الطباخين الجوا و قال ليهم "ارمو ورق العنب دا كلو..عايزكم تعملو بيتزا هسه"
"الوقت ضايق..بيتزا شنو البنعملها و الاحتفال اصلا بدا؟"
"خلاص ارمو ورق العنب دا..ما عايز اشوفو في البوفيه بعدين.."
جاهو صوت استاذة شيماء من وراه و قالت "و تحت امر منو انت بتدي رايك دا يا طالب؟"
غمض عيونه و زفر بضيق و قال "دا الناقص"..اتلفت عليها و قال "دا امر مني انا"
"احمد انت مالك متضايق كدا؟ قلت ليك الاحتفالات الجايه بتمسكها انت براااك و العايز تعملو فيها اعملو..لكن الاحتفال دا انا المسؤولة منه..و انت م ليك حق تعارضني فيهو ابدا..بالله حب السُلطة دا خليه"
