بطلة حياتى ل صفية صالح

٢

٢

** تركب أميرة مع أدهم فى سيارته الذى يقودها بسرعه ويصلان لبيتها وتفتح الباب وتدخل باحثة عن سارة فتسمع صوتها بالمطبخ فترى سميرة ملقاه على الأرض وبجانبها سارة منهارة من البكاء والخوف ..

سارة : أميرة..إلحقينى ..ماما وقعت ومش عارفه فيها إية

أميرة _بخوف : ماما .. ماما ردى عليا

سارة : مش عايزة تفوق كلمى دكتور كلمى أى حد ..

** تربت أميرة على وجه أمها لكى تفتح عينيها وينظر أدهم لها ثم يتدخل ويقول لهم ..

أدهم : مش هينفع كده لازم تروح المستشفى

** يحمل أدهم بذراعيه سميرة ويخرج من البيت وخلفه أميرة وسارة ويضع سميرة بالباب الخلفى من سيارته على الأريكه وتجلس سارة بجانبها ثم تركب أميرة بجانب أدهم ويتوجهان للمشفى ..

** بعد ساعة تقف أميرة وسارة وبجانبهم أدهم يهدأهم وهما ينظرون على سميرة التى ترقد بالعناية المركزة ويخرج منها دكتور ثم يلتفتون إليه بتوتر وحزن..

أميرة : خير يا دكتور مالها؟

الدكتور : والدتكم عندها السكرعالى جداً ودخلت فى غيبوبة هتحتاج تقعد معانا ل بكره

أميرة_ بتعجب : ماما معندهاش السكر جالها إمتى وإزاى؟

الدكتور:ممكن يكون زعل وأكيد كان عندها أعراض ما أهتمتش بيها عايزكم تطمنوا مش هتمشى من هنا غير وإنتوا مطمنين عليها

أدهم: إعمل اللازم كله يا دكتور آشعات وتحاليل تشيك آب كامل

أميرة_ بإحراج: أنا بس كنت عايزة أنقلها مستشفى حكومى عشان ..

أدهم _ يقاطعها: إعمل اللازم يا دكتور عايز والدتهم تخرج من هنا بصحة كويسة جداً

الدكتور: إن شاء الله عن إذنكم

** يبتسم الدكتور لهم ويدخل العنايه ل سميرة بينما تقول أميرة ل أدهم ..

أميرة : أنا مش عارفه أشكرك إزاى بس ننقلها أحسن فى مستشفيات حكومه كويسة

سارة : تتحسن طيب يا أميرة ونطلعها

أدهم _ بهدوء: أميرة ممكن ماتشيليش هم حاجة والدتك تخرج الأول بالسلامه لا حكومه ولا خاص تشغلى بالك بيهم من مائة ألف ل مليون المهم سلامتها

** تتفاجئ كلاً من أميرة وسارة من كلام أدهم وينظران لبعضهما ويتعجبان من مساعدته لهم بمنتهى السهولة وهو غريب عنهم بينما هو كل ما كان يفكر فيه هو أن يهون على أميرة حزنها وأن لايرى دموعها وخوفها على والدتها .. بعد ساعتين ترى أميرة خطيبها سامح يأتى إليهم من بدايه الطرقة التى يقفون فيها فيظهر على وجهها الغضب وتقابله بجمود..

سامح : طمنينى يا أميرة

أميرة_ بغضب : إنت لسه فاكر تسأل وتطمن أنا مكلماك من إمتى وقايلالك أنا فى المستشفى