بطلة حياتى ل صفية صالح

٥

٥

** تدخل أميرة بيتها ترى سارة ونهى يجلسون بالصاله ويرحبون بها ويمزحون معها لكنها على غير عادتها سلمت عليهم بهدوء..

سارة : الهانم جت أخيراً 

نهى : إنتى فين يا هانم من الصبح ؟

أميرة : عاملين إية ؟ وماما فين ؟

سارة : كويسين ماما فى أوضتها كده أصحى يوم الأجازة مالقكيش كنتى فين؟

أميرة : كنت مع أدهم فى شركته

نهى _ بخبث : الصنارة غمزت ولا إية؟

أميرة : لا أبداً مقابله عادية

سارة : أمال مالك؟

أميرة : مفيش بس حاسه إنى مش مظبوطة

نهى : إية يا مرمر شربك حاجة أصفرا ؟

أميرة : ده راجل محترم  

سارة : فعلاً هو كويس أوى

نهى : ياختاااااى من الراجل الكويس أوى ده بيبقى من بره حاجة ومن جوة حاجة تانيه شكله أصلاً نسوانجى  

أميرة _ بإعتراض: خالص يا نهى بنقولك محترم

نهى : يا حبيبة قلب نهى المحترم ده يطلع منه بلاوى ومش بعيد يفضل يرسم دور الهادى المحترم الشيك لغاية ما يوقعك فى صنارته 

** نظرت أميرة ل نهى وبدأت تفكر فى كلامها وهذا ما تتمناه الأخرى لكى تبتعد عن أدهم وتقلق منه فقالت سارة لنهى بسخرية..

سارة : الكلام ده للى عايز يقع دى يا حبيبتى مفيش منها فايدة 

نهى : والله أحسن ولا تعبره ولا تديله حتى فرصة .. أنا شوفت كتير فى مجال السياحة معاهم فلوس زى الرز بيتجوزوا مره واتنين وتلاته شرعى وخد عندك بقى كام ورقه عرفى على كام سهرايه حلوة محدش يعرف عنها حاجة 

سارة : أكيد مش كلهم كدة 

نهى : الرجاله عموماً مش مضمونة معاها فلوس أو معهاش

سارة : والله لو هيعيشنى فى مستوى كويس مش هيفرق معايا هيبص ل مين ولا هيعمل من ورايا إية المهم إنه معايا ومش هيخلينى عايزة حاجة 

أميرة _بتعجب : إزاى يا سارة أمال هيبقى إسمه حب ليه لو ما أستكفاش بواحدة بس 

سارة : يا أميرة البلد والعيشة مش عايزة غير فلوس وبس دا المستقبل لكن الخيانه والنزوة بيروحوا مابياخدوش وقت الوقت كله للزوجة وللشغل 

نهى _ بإعجاب : الصراحه يا سارة أنتى بتفكرى أحسن من أميرة بكتير مرمر حالمة أوى وفى حته تانية خالص فاكرة الناس كلها طيبة زيها لكن أنتى عمليه وتعرفى تصطادى الفرص كويس

أميرة : أتخلقنا مختلفين وكل واحدة ورأيها هدخل أسلم على ماما 

نهى : بسرعة عشان تيجى تفكرى معانا نتغدى إية