تقدم مطلق لبيته ودخل وهو يحس الدنيا تدور فيه ابتسم بخفه من شافها جالسه وبيدها كوب الشاهي تهوجس ارتمى بجنبها على الكنبه وغمض عيونه نطقت باستغراب:شين وقوي عين جاي بجنبي؟
نطق مطلق بهدوء:قمري حبي خليني ارتاح بعدين يصير خير
عقدت حاجبها ومدت ايدها تشوف هل فيه حراره وفعلاً كان يغلي:يويلي تغلي!!
ماكان بوعيه ابد وكان بس يبي ينام لكن فز من صرخت:قمم!!!
مطلق:يا بنتي شبلاتس!!!
الجادل بحده:قم يلا خذ لك دش
مطلق رجع ينسدح :ابي انخمد يرحم والديتس
الجادل ميلت شفتها من حست بتعبه:طيب قم داخل
نطق بصوت ثقيل :بنت خليني انخمد مو انتِ تكرهيني واني انسان حقير رامي مو مهتم ف خليني انام واموت
فتحت عيونها بصدمه:بسم الله فال الله ولا فالك قم ارتاح يلااا
وقف بصعوبه ومشى لغرفتهم وارتمى على السرير وغمض عيونه وصرخت للمره الثانيه:ابعد !!
فتح عيونه:حشى عسكريه هي!!!
ناظرته بحده:ابعد مكاني!!
مطلق: ارحموا من في الأرض يرحمكم من في السماء
الجادل :صدز مريض؟؟
مطلق نطق بتعب:لا امزح تستهبلين!!
الجادل قربت منه تحط جبينها على جبينه وسرعان ما ارتخى من ريحة عطرها وابعدت :لا بس اتاكد اذا صدز تعبان
مطلق انسدح بتعب ونطق بهلوسه:يالجادل انتِ حلوه
رفعت نظرها له وكمل :لا صدز حلوه الحين كل ذا الحلاوه لي؟
ناظرته بحده:تحسبني اكل يالطيب؟
ناظرها لثواني ونطق:مذهله!!
شتت نظرها:ماتقدر تراضيني ذي المره!
صدت تمشي عنه لكن التفت من مسك يدها ونطق بصوت مبحوح:لاتروحين وتتركيني!!
بلعت ريقها من نبرته ونطقت:نعم شتبي! يا مطلق خلاص
مطلق شد على يدها وثبت عيونه في عيونها وطال نظره حست في كلام بعيونه كثير وحست بخذلان وحست ان ورا كلمة "لا تروحين " معاني كثيره نطقت:مطلق قم خذ دش وعلاجك
هز راسه بالنفي وسحبها له كانت بتصد لكن نظراته حسستها بشعور غريب حط راسه في حضنها وطال نظره يتاملها يتامل تقاسيم وجهها وتفاصيلها يحبها ويعشقها لكن مو بيده خايف يجرح احد مايحب يترك احد محتاج له الا ويساعده بلع ريقه ونطق :سامحيني,مو بيدي
رفعت راسها وصدت عنه وسرعان ماحست براسه ارتخى نزلت نظرها له فعلاً كان نايم اتسع ثغرها تتامل ملامحه انحنت تقبل خده :والله اني احبك بس حيوان لازم تتادب!
رفعت راسه من حضنها وابتسمت تحط راسها على صدره وسرعان ما غفت
