"ဒေါ်ဒေါ်တုတ်..ဒေါ်ဒေါ်တုတ်ရှိလားဟင်"
"ဝေ့ ခြံဝကဘယ်သူတုန်း အထဲဝင်ခဲ့လေကွယ်"
"ကျွန်မပါဒေါ်ဒေါ်တုတ်ရဲ့ တစ်ယောက်တည်းဘာတွေချက်နေတုန်း"
ကွမ်းတစ်ဝါးဝါးနှင့်အမယ်အိုကြီးမှစူးစိုက်ကာမော့ကြည့်လာခဲ့သည်။ဆံနွယ်ရှည်များတစ်လွင့်လွင့်ဖြင့်သနပ်ခါးပါးကွက်ခပ်ပါးပါးလေးသာကွက်လို့ ရင်ဖုံးအင်္ကျီချည်ထမိန်ဝမ်းဆက်နဲ့အလှကျူးနေသူမိန်းကလေးကိုတွေ့သည့်အခါမှခပ်ရေးရေးပြုံးပြကာ..
"သရဖီပဲ..ဘယ်ကလှည့်လာသလဲ ထိုင်လေ"
"ဘယ်ကမှမလှည့်ပါဘူး ဒီကိုပဲသပ်သပ်လာခဲ့တာ ဟို မြတ်ကျော်ဘယ်သွားလဲဒေါ်ဒေါ်တုတ်"
"အေး ညည်းသူငယ်ချင်းကတော့သိတဲ့အတိုင်း အပေါင်းအဖော်တစ်သိုက်နဲ့ထန်းတောသွားလေရဲ့"
"ဟယ်တော်..ဒီအကောင်ကတော့လေ "
ကျိတ်မနိုင်ခဲမရဖြစ်နေတဲ့မိန်းကလေးကြောင့်အဖွားကြီးကပြုံးစစလုပ်နေခဲ့ရင်း..
"ငကျော့်ကိုပြောစရာရှိလို့လား"
"မဟုတ်ပါဘူး သူနဲ့ချိန်းထားခဲ့တာ ရွာထိပ်ကစေတီမှာပုတီးလေးသွားစိပ်ချင်လို့လေ ဒေါ်ဒေါ်တုတ်လည်းသိတဲ့အတိုင်း ရွာထိပ်ကမိန်းကလေးတစ်ယောက်တည်းသွားမကောင်းလို့ သူ့အဖော်ခေါ်မယ်လုပ်ပါတယ် သူကထန်းတောရောက်နေပြီ ဒီလိုတွေသိလို့ကြိုပြောခဲ့တာကို ဒင်းတော့လား"
"ဟားဟား ပြန်လာမှာပါသရဖီရယ် ညည်းနှယ် ငါ့သားတော်မောင်ကိုကြိမ်းဝါးနေလိုက်တာ"
အဖွားကြီးစကားကြောင့်သရဖီဆိုသည့်အမျိုးသမီးကလေးမှာရယ်ကျဲကျဲလေးဖြစ်သွားရသည်။
"ဟီးး ပြောလို့ရတာမဟုတ်ဘူး အဲ့ဒီ့ကောင်ပေါင်းနေတဲ့ကောင်တွေထဲမှာ တိုးအောင်တစ်ယောက်ပဲစိတ်ချရတာ ကျန်တဲ့ကောင်တွေကလူမိုက်လိုလိုဘာလိုလိုတွေ လူရမ်းကားတွေချည်းပါပဲ"
" လူရမ်းကားတွေဆိုပေမယ့်သူငယ်ချင်းကိုတော့ချစ်ရှာပါတယ်..အခုလည်းသူတို့ပဲလာခေါ်သွားတာ"
"အမေ..အမေရေ..သားပြန်လာပြီ ဟိုကောင်တွေလည်းပါလာတယ် ဒီမှာသားတို့ဂဏန်းတွေနှိုက်လာတာပြုတ်ပေးပါအုံးအမေရ ငပိရည်တို့စရာနဲ့စားချင်လို့ပါ"
YOU ARE READING
~မေတ္တာလုံ၍နွေးစေချင်~(On going)
Romance~မေတ္တာတွေဟာမခြုံခင်ကတည်းက လုံနေခဲ့ပြီးသား...~ 23.2.2023