يا حـيّ اللـي خـذا قلبـي ، وخـذانـي
كانت قاعده في سيارتها وتصيح صياح بشكل هستيري تصيح وهي تدق سكان السياره ، ومب مهتمه عالازعاج اللي قاعده تسويه سمعت صوت الجامه تندق طالعت الجامه وشافت واحد يدقها لها ماتعرفه ولا تعرف هو منو وشو يبي منها ، قاعد يترجاها تبطل له الجامه ، بطلت الجامه
سلامه : نعم؟ في شي؟
..: سلامات اختي شفيج شو اللي صاير معاج تصيحين؟
سلامه بنهيار : شدخلك انت؟ سييير من هني
يت بترفع الجامه حط ايده
..: مب هادنج غيير يوم تفضفضين لي وتطلعين كل اللي فقلبج اعرف انج تبين تفضفضين انا مستعد اسمعج للنهايه المهم مابيج جي تصيحين ماحب اشووف حد يصيح جي انا حاب اني اساعدج بس واخفف عنج
سلامه : انا ماعرفك ولا انت تعرفني ليش تبا تعرف شو فيني وافضفض لك
..: لاني ماعرفج ولا انتي تعرفيني وبكون مجرد عابر لج جربي وفضفضي لي ابيج ترتاحين بس ويوم بتكونين زينه بروح عنج خسرانه شي انتي؟
سلامه : لا
..: بتفضفضين؟
هزت راسها ب هيه ، راح للباب الثاني ، بطلت له الباب وقعد حذالها ، كانت متوتره منه ، بنفس الوقت دموعها تطيح
..: شفييج شو اللي وصلج جي؟
سلامه : ماعرف شو اقولك بس ماباك تحكم علي من اول مره
..: قوولي؟
سلامه : بنات عمي متكلمين عني ومطلعين عني رمسه ما صارت ولا استوت فيني ، و وصلت السالفه عند امي ، امي خبرت ابووي ، وابوي ماقصر فيني هو واخووي ، اول مره ادخل المركز وابلغ عن ابوي و اخوي عاللي سووه فيني ، ابوي يا المركز وانكر باللي سواه فيني ، ونحن طالعين من المركز قالي انتي مب بنتي ولا اعرفج ، ابوي تبرى مني بسبت سالفه ماصارت ولا استوت فيني
..: اول مره يمدون ايدهم عليج؟
سلامه : لا مب اول مره اكثر من مره ، بس هالمره مارحموني ربيعتي دخلت فكره اني ادخلهم المركز يمكن يوقفون ضرب فيني بس اللي صار انه ابوي تبرى مني ، يقولي مابيج اتين عندي البيت ولا ابا اشووفج تمرين صوبنا "تصيح" ماعندي حد ومابا اسير عند حد واكون ثجيله عليهم امي ماكلفت ع نفسها حتى تسال عني للحين مرات احسهم مب اهلي الصدقيين احسهم مربيني
..: اكيد بتسال عنج هاي امج مافي احد ينسى ظناه جي بس هم الحين معصبين منج وماخذين فكره عنج ، صبري يمكن الحين بتدق لج
سلامه : ماراح تدق اعرف امي مابتدق اللي سمعته عني مب شوويه انا للحين مصدومه منهم كييف يتكلمون بشرف الناس ويبتلون عليهم وهم اوصخ منهم ماشي ماقول غيير حسبي الله عليهم ، يارب ايي يوم واشوفهم في مكاني عسب يعرفون انه الله حق خسرت اهلي بسبتهم وسبة غيرتهم وحقدهم علي خسرت اهلي على شي لا صار ولا استوى
..: بي يوم وبينكشف كل شي انتي لا تضايقين روحج واهلج ماعرفوا قيمتج الحين بي يوم وبيعرفون انهم هم غلطانين وندمانيين على كل اللي سووه فييج كييف يحكمون من طرف واحد بس ! كييف ماعطوج فرصه تبررين فيها؟
سلامه : مابيصدقوني وعمرهم مابيصدقوني
..: ماعندج مكان تروحين له الحين؟
سلامه : لو عندي جان ماتميت واقفه هني في مكاني
