لا يمكن بدون أمل

الفصل السابع(إجـابـة مُـصـدمـة)

الفصل السابع"إجـابـة مُـصـدمـة"
روايـة (لا يُـمـكـن بـدون أمــل)

وَقَد يَجمَعِ اللَهُ الشَتيتينِ بعدَ ما
يظُنّان كُلَّ الظنِّ أَلّا تلاَقِيا
- قيس بن الملوح

---------------------

تعجبت ”أمل” من جلوس ذاك الغريب لذا قالت بنبرة جامدة:
" أنتَ ايه حكايتك بقى كل شوية تظهرلي في مكان؟!"

وجه ”علي” نظراته لها غاضبًا ثم عقب بنبرة جامدة:
" ده أسلوب يا ”أمل” تكلمي بيه ضيف في بيتنا؟، معلش يا ابني هي بس أحيانًا بتكون متعصبة كدا من ضغط الشغل"

شعر ”يونس” بالضيق ولكن أخفى ذلك ليعلن عدم استسلامه فنظر إليها بمكر وعقب قائلًا مقلدًا طريقتها في أول صدفة جمعتهما:
" ولا يهمك يا عمو، أنا مقدر آنسة ”أمل” ممكن تهدي ونقعد نتكلم بهدوء، علفكرة العصبية حاجة مش حلوة أبدًا، خدي الأمور ببساطة، وحاولي تتعاملي مع الأمور بهدوء، ايه المشكلة يعني دلوقتي، ما يمكن ربنا يجعل بينا قبول ونبقى سند لبعض"

عقب ”علي” معجبًا بحديثه:
" عين العقل يا ابني، اقعدي يا ”أمل” اتكلموا وأنا هروح اعمل حاجة نشربها كلنا"

ذهب والدها باتجاه المطبخ لتجلس ”أمل” بمسافة بعيدة عنه وعقبت قائلة بعصبية:
" نعم عايز ايه؟، أتمنى تقعد شوية وتتوكل على الله، ومنشوفش وش حضرتك تاني"

قال هو بنبرة جامدة مستخفًا:
" ولازمتها ايه حضرتك طيب، وبعدين أنا بمشي بنصيحتك وفعلًا الحمد لله بقيت أهدى، فجربي أنتِ كمان تعملي بالنصيحة، صدقيني فرقت جامد"

" أنتَ مفكرني مغفلة؟!، أنا يعني هصدق الشويتين اللي أنتَ عاملهم دول، وعامل فيها هادي وبارد"

رد هو معقبًا على حديثها مستخفًا:
" سمعت بنصيحتك يا ستي، اليوم ده كان بس مزاجي وحش، بس بصراحة مقدرش أنكر ”تيام” ليه دور كبير لو أنتِ شفتيني بارد"

نظرت له ببلاهة ثم سألته مستفسرة بنبرة غاضبة:
" ”تيام مين”؟، أنتَ بتقول ايه؟!"

" لأ ”تيام” حكايته طويلة هبقى احكيهالك بعدين" عقب بذلك ثم دخل علي في تلك اللحظة حاملًا في يده صينية كبيرة تحمل عليها ثلاثة أكواب من الشاي وبعض الفاكهة
" ها يا شباب بتقولوا ايه وحكاية مين؟"

أخذ ”يونس” الشاي بعد أن ناوله ”علي” بذلك، ثم عقب قائلًا:
"واحد بيسكن معايا حاليًا في الشقة اللي أنا فيها"

ثم علقت ”أمل” بمكر بنبرة حنقة:
" يعني في الآخر رضيت يسكن معاك، والقيامة مقامتش يعني"

ابتسم ”يونس” على تذكرها الحوار وقبل أن يجيب استفسر ”علي” عن ما تقصده:
" يعني ايه مش فاهم، هو أنتَ مكنتش عايزه يسكن معاك ولا ايه؟!، أكيد ولد بتاع مشاكل"