~بَـيْـن أَيْـدي الـنُـخْـبَـة الـحَـاكِـمــة 🖤
#365_days_in_men's_prison ⚰️
Part...1🖋️#Sya_blm
........ســــنـــة 1995🌱
🍂~ الـمـغـرب ، إمينتانوت ~🍂
وقف الطوبيس فتيرمينيس ، تحل الباب و خرجو الركاب.. رجال و نساء بنسبة قليلة مقارنة بالطلبة لي تيقراو فالمدينة.. نزلات بنت فمقتبل العمر دايرة زيف و لابسة كبوط و دايرة القب دياله ، ايديها مخشيين فــليݣات سخان من البرد و هازة صاك فيه حوايجها ، توجهات ناحية الكيوسك لي تما.. عاطية منو ريحة أتاي و القهوة....
بابتسامة بشوشة قابلاتو .. عمي ابراهيم ! أراد واحد الكاس دأتاي
شاف فيها السيد بابتسامة و قال .. هيا اللولة أ تيتريت تدوار ، كنتي فالمدينة ؟
تيتريت {نجمة} .. ايه أعمي و هانا رجعت دروك راه شدينا العطلة
ابراهيم .. الله يوفقك ابنتي {مد ليها لكاس} هاكي بصحة !
نجمة .. شكراا
شكراته و توجهات جهة الطاكسيات ، بقات تتقلب بعينيها حتى لمحاتو واقف مع جماعة من الشبان شادين أتاي و القهوة و تيضحكو ، مشات نيشان وقفات حدا لبيكوب ديالو و منزلة راسها ، لمحها واحد من الدراري و قالها ليه...
الشاب .. صطوف راه تيتريتنم حطها الكار ههههه
حط الكاس و خنزر فيه .. هنينا اصحبي
توجه عندها بخطوات سريعة ، وقف قدامها داير يديه فالجيب ، بابتسامة خجولة .. السلام عليكم
نـجمـة بادلاتو الابتسامة .. و عليكم السلام ، لاباس ؟
مُصطفى .. الحمد لله ، ياله طلعي نوصلك راه وصاني الحاج
دارت للباب لآخر و طلعات حاطة صاكها قدامها ، طلع تاهوا و شد الشرجم على حساب البرد ، دار أمارش و توجه للدارهم لي جات لدااااخل و الطاكسيات ما تيوصلوش لديك الجهة...
طول الطريق و هوما ساكتين ، هيا عقلها مشغول تتفكر و هوا فرحتو لا توصف ، فكرة أنها راكبة معاه خلات قلبو يدق بعنف ، مدة ساعة قل ربع كانو قدام الدار ديالهم ، نزل و نزلات تاهي و مشاو جهة الباب الكبير لي كان محلول ، دخلات بعدما شكراتو و قالت ليه بسلامة و هوا بقا حدا الباب شوية و رجع أدراجه.. وقفات وسط الدار لي كانت كبييرة شيئا ما و هضرات بجهد..
نجمة .. أنا جييييييت
خرجت ماماها من الكوزينة فرحانة برجوع بنتها لي تتغيب عليها أسبوع كامل و تجي نهار السبت و ترجع الأحد ، أما دابا شدو العطلة اطول معاه فالجلسة ، مشات عندها و عنقو بعضياتهم ...
حبيبة .. مرحبا مرحبا بالحنينة ، على سلامتك ابنتي
نجمة .. الله يسلمك أ ينا ، فين بابا و بَّــا ؟
أنت تقرأ
365 يوم في سجن الرجال (في طور الكتابة)
Acción#365_days_in_men's_prison ♕︎بَــيْـن أيـدي الـنُـخْبَـة الـحَـاكِـمـة...♕︎] _أتمنى مِمن لا يؤمن بما أكتب ان لا يكلف نفسه عناء قراءته... كما ارجوا مِمن يملك قلبا مرهفا عدم القراءة ايضا... و شـكراا..🖤 أبطال استثنائيين ، شاءت الاقدار و لاقاتهم فسجن ال...
