|بَـيْـن أَيْـدي الـنُـخْـبَـة الـحَـاكِـمــة|🖤
#365_day ⏳
#في_سجن_الرجال 🔥
#Sya_blm .... Part...42
سايمون .. حيت بكل بساطة ملي غاتشدد الحراسة فشي منطقة غايديوك لمنطقة أخرى لي مطلوق فيها اللعب شوية باش تا حد ما يعرفك ، و من الأفضل أنك تختار شي اسم مكسيكي تقولو ليهم حيت سميتك العربية كتجلب الانتباه و هو لي مابغيناش
قاطعهم واحد من الحراس لي جا كيجري ، لقا التحية و قال كينهح..
الحارس .. سربيو راني أمنت الطريق باش يدخل ، ماعندناش الوقت بزاف
شافت زهرة فأنطونيو مخلوعة .. هاد التالي لي قرب حدا ودنها و قال بهمس...
أنطونيو .. لي سولك على سميتك ݣوليه لويس ، وياك تكشف على هويتك الحقيقة لأي واحد كيما كان نوعو ، رد البال مزيان بالليل و ماتيق فحد
ومات براسها ليه و جرها الحارس كيزرب .. ماحدها كتقرب للباب و دقات قلبها كيتسارعو كثر و كثر.. حتى دخلو و تسد الباب....
فالمقابل كان أنطونيو حاضيها حتى غابت عن نظره شاف فدوك الجوج شحال و ابتسم ليهم ابتسامة عريضة لي غير شافوها طلقوها بضحكة و قصدو السيارة كاملين...
...
تسد الباب و لقات راسها فكولوار طويل مظلم .. البرودة لي كانت تما خلاتها تحس بالتبوريشة.. جرها الحارس لواحد الغرفة تما و جبد ليها لبسة خاصة بالسجن .. سالوبيط برتقالي .. بدات كتحيد حوايجها بشوية و مخلوعة.. بقات قدامو بضوني و شورط حد الركبة فالبيض... شافت فيه كترمش و قبل ما تنطق قاطعها ..
الحارس .. لبس خلاص راه ماعندناش الوقت
تبسمات دغيا و لبساتها فوقهم .. كانت خايفة أنها تحيد حوايجها قدامو .. كيفما كان الحال كتبقا بنت و عمرها تعرات قدام شي حد .. حتى من البحر قلييل فين كتعوم و الا عامت كتلبس شورط تحت الركبة و نص كم .. أصلا كتزورو مرة فعامين..
كملات اللبس و جرها داك من واحد الكاضر باش يشوف واش عندها شي حاجة ديال المعدن .. كانت عندها سنسلة وحدة ديال النقرة رقيقة فيها نجمة فضية صغيرة .. بغا يحيدها ليها و شدتها بيدها
#يتبع....
|بَـيْـن أَيْـدي الـنُـخْـبَـة الـحَـاكِـمــة|🖤
#365_day ⏳
#في_سجن_الرجال 🔥
#Sya_blm .... Part...43
زهرة .. عفاك خليها ليا ما نقدرش نفرط فيها
الحارس .. واخا ياله دوز ݣلس هنا
جرها لكرسي تما و لوا عليها فاصمة فراسها .. دار شوية بيطادين من هنا و هنا باش يبرر سبب خروج سجين فداك الوقت..
دار ليها المينوط و نوضها و خرجو من تما.. مشاو مع داك الكولوار المظلم تال اللخر ديالو.. و دخلو مع باب آخر.. طلعو فالدروج و سبقها هو حل الباب طل بشوية ..
بقا قدامو حارس آخر خرجها ليه و وقف هو بلاصتو.. كمل بيها الحارس لاخر الطريق و هو ساكت .. مرة مرة يخنزر فيها بنص عين تا وصلو لواحد الباب حديد ..
مشا للجنب دار البصمة ديالو و تحل الباب.. بداو غاديين مع واحد الكولوار طويل آخر.. منظره كيجيب الدوخة .. الزنزانات كتار و كيبانو مصديين ..
الأرض قهوية و كتبان ليها غبرة كحلة فحال الرملة محطوطة فشي قنات... بلعات ريقها و هي حالة فمها فداك المنظر.. عمرها توقعات هادشي...
كان واحد الهدوء فشكل.. هدوء كيخلع .. كضور عينيها هنا و هنا و صوت تنفسها المتسارع مسموع بوضوح...
شاف فيها الحارس و قال و هو باقي غادي ..
- واحد بحالك شنو جابو لهنا ؟ باينة عطاوك مبلغ كبير باش دوز عامين من حياتك محبوس
زهرة بخنقة .. ماكانش عندي كل آخر ، يا إما ندخل للحبس ولا القبر ، لذلك ختاريت هنا
الحارس بتعجب .. علاش ماشي دخلتي بمقابل مادي ؟
زهرة بإستغراب .. لا ، انا ضربت ولد ريكاردو بالخطأ و خيرني بين يقتـ.ـلني ولا ندخل للحبس فبلاصة ولدو و قبلت العرض التاني ، حيت ضربت دييغو و تسببت ليه فغيبوبة
سكت الحارس كيتعجب فهضرتها حيت ماشي لي هادشي فراسو... و أخيرا بعد مسافة طويلة وصلو لزنزانة منفردة .. حل الباب و شاف فيها..
الحارس .. غاتبقا هنا تال الصباح .. فاش يحلو عليك غاتقول بلي تخاصمتي مع شي واحد و جابوك الحراس للسجن الإنفرادي هادي يوماين مفهوم ؟
زهرة .. اه فهمت
الحارس .. ياله دخل
شافت لداخل فديك الظلمة و دخلت .. بلاما تزيد تفكر مزال .. شافت فالحارس و هو كيسد الباب حتى كمل ...و قبل ما يتحرك قال ..
الحارس .. شنو سميتك بعدا ؟
زهرة بهدوء .. لويس
الحارس .. مرحبا بيك فالجحيم أ لويس
#يتبع...
أنت تقرأ
365 يوم في سجن الرجال (في طور الكتابة)
Acción#365_days_in_men's_prison ♕︎بَــيْـن أيـدي الـنُـخْبَـة الـحَـاكِـمـة...♕︎] _أتمنى مِمن لا يؤمن بما أكتب ان لا يكلف نفسه عناء قراءته... كما ارجوا مِمن يملك قلبا مرهفا عدم القراءة ايضا... و شـكراا..🖤 أبطال استثنائيين ، شاءت الاقدار و لاقاتهم فسجن ال...
