بقلم: يمنى منجد
بعد مرور ٧ شهور **
ريفان فجاة فتحت عيونها بي خلعة و قلبها من الخوف كانو ح يطلع من مكانو و العرق بنقط من جبهتها .. اتربعت في نص السرير غمضت عيونها و زفرت بي ضيق
(بينها و بين نفسها):
" م كنا قفلنا الصفحة دي !
لي بتجيني تاني في احلامي ! احلام ! المعنى الحرفي لي كوابيس م احلام دي "
زفرت بي ضيق و ختت يدها في جبهتها زحت الغطا و طلعت لقت نايف و ياسمين بتونسو و بضحكو
من غير م تقول ولا كلمة مشت و قعدت جمب ياسمين و حضنتها
نايف : امشي انط في البحر انا احسن الحركات بقت عينك عينك بتي واحدة و م بتحبني
م اتحركت من مكانها ياسمين عملت ليهو حركة بي عيونها انو اصبر
نايف: ريفو!! كويسة انتي !
اكتفت انها تهز راسها
ياسمين: في حاجة حصلت !! الشغل ماشي كويس صاح!!!
ريفان: اممممم
عدلت قعدتها و عاينت ليهم مسافة
نايف: يعني عارفين نفسنا سمحين لكن م لي درجة تقعدي تتاملي فينا
ريفان: والله انت خارجية متحركة
قامت مشت جابت كوباية موية و بقت بتشرب فيها و هم بعاينو ليها بي استغراب ختت يدها في نصها و عاينت ليهم مسافة
نايف: مالك ي بت !
ريفان: هسي خلوني اسالكم دقيقة يعني
ياسمين: انا قلت ليك كل م ليها بتغير ال شي ال بتشربو من زمان بقول ليك نفحص ليها م صدقتني شغال لي تربية حديثة و تربية بتاع
نايف: اصبري ياخ انتي م صدقتي
ريفان: على الهبشة
و ضحكو مع بعض و ياسمين تقلب في عيونها
نايف: اها اها
ريفان: هسي انتو كيف عايشين مع بعض السنين دي كلها يعني د سؤال بجي في بالي دايما شوفتكم بتتشاكلو زمان كتير شديد و مع مرور الزمن خلاص يعني كانو موضوع الشكل بقى م بخصنا نحن و بقى بخصكم انتو مشاكلكم كدة بقت منكم و فيكم و زاتو مشاكل خفيفة شديد انا باكل د و انا م باكل د و لي م اخدت الدوا داك و هكذا
ياسمين ضحكت مسافة و عاينت لي نايف هو زاتو ضحك و شال كوباية القهوة
ياسمين: انتي عارفة انو اصلا نحن عرسنا بعض و في اختلافات كبيرة شديد بيناتنا ابوك كان يجري وراي بالرسايل م صدق وافقت بيهو العوير و انا اصلو م كان داخل بالي بس وافقت ساي كدة
نايف: م تكضب عليك هي ال رسلت لي رسالة و كانت ح تموت اعاين ليها عشان كنت مكسر بنات الحلة كلهم
