أعز العابرين في عمري

9

بقلم: يمنى منجد

مشت للبنات و لحقت قبل المواعيد بي زي دقيقة بس .. و بعدها بي ٥ دقايق جات جارية ميسو ميسو ..بس م كانت بتضحك او ملامحها عادية كانت زهجانة و صارة وشها .. و تقريبا دي حاجة ركزو ليها مريم و ريفان عاينو لي بعض و خلاص ع اساس الناس كلها مركزة زيهم م ح يعملو العباطة حقت العقاب و كدة ..

لكن فجاة هوازن قبلت على سمر

هوازن: اخيرا زول ح اقدر انفذ فيهو العقاب

و ضحكت ضحكة وي (هي وي م خطا مطبعي بتتقري وي بفتح الواو و تسكين الياء😂🤝 ال هي بمعنى زي )

وي كانها ضحكة شر كدة ..

جيهان قبلت في نفس اللحظة و عاينت لي سمر ضيقت عيونها و ابتسمت ابتسامة بالجمبة كدة و هزت راسها بي معنى ايوا ..

تالين كانت ماسكة سندوتش بي يد و ماسكة التلفون بتصور باليد التانية نظام انها تصور العقاب ...

و ريفان و مريم بعاينو بس..الدراما دي كلها وقفت بي سمر بتبكي طبعا كلهم عيونهم بقت قدر الفنجان

هوازن: سمر !!😳

سمر : م قادرة الليلة اقعد معسلامة ..

و م اتلفتت و طوالي على الشارع ..

ريفان: كملو انتو الليلة م تنتظرونا انا ح الحقها

مريم: خلاص بمشي معاك ..

ريفان: لالا انا زاتي م ح ارجع البيت خليكم هنا و اخير اتنين يفوتو القراية من تلاتة ... بكرة الصباح بنجي ..

جيهان : خلاص تمام تمام

ريفان شالت مفتاح العربية و طلعت... بيت ناس جيهان لي جوا في حلة م فاتح على الظلط ف اول م طلعت كانت شايفة سمر و هي ماشة م قطعت مسافة كبيرة ..طوالي دورت العربية و لحقتها ..

وقفت جمبها و فتحت ليها باب العربية ..

ريفان: اطلعي ..

سمر وقفت عاينت لي ريفان و عاينت للعربية و تاني قبلت عيونها كانت مليانة دموع ..

سمر: م دايرة ..

ريفان: اسمعي الكلام م عاوزة اسالك زاتو الحاصل شنو.. لو م عاوزة تحكي م مشكلة بس م تمشي كدة في الشارع... الوقت اتاخر

سمر فضلت واقفة م اتحركت ولا ركبت العربي بس دموعها جارية .. ريفان لفت عيونها و نزلت جرتها دخلتها العربية و قفلت الباب و رجعت ركبت في العربية ختت ليها علبة المناديل في رجلينها مشت لي قدام شوية وقفت في بقالة .. جابت ليها موية و ادتها ليها و دورت و طوالي على الكافيه ..

لاقت مزن سلمت عليها و طوالي على فوق ..

م حصل وصفت ليكم فوق عامل كيف ..

__

عبارة عن مساحة كبيرة شويتين يعني نقول زي مساحة غرفتين مع بعض كلها بالابيض بي في حيطة فيها علامات يدين و حيطة فيها زي الطابعات بتاعت الحيط دي .. فراشات كتيرة بالدهبي كدة و بالرغم من العشوائية دي الا انو المكان لمن تعاين ليهو بتحس حقيقي بالهدوء ..