ريفان قبلت على هوازن بي عدم فهم ..
و الكل كان في حالة صدمة ..
.......
في مطعم قريب من الصيدلية بتاعت هوازن ...كانو ال تلاتة قاعدين في تربيزة و التلاتة متوترين شديد ..
ريفان فصلت التوتر و الصمت بتاعهم كلهم ..
ريفان ( بي تساؤل) : م قلت لي انو جايي لي هوازن ..
سهم : اممممم حاولت اتصل عليك و ارسل ليك بس تلفونك مقفول ..
اكتفت بي انها تهز ليهو راسها بس ...
هنا هوازن ضحكت بس حاولت تسيطر على ضحكتها بعدها ..
هوازن: طيب استاذن انا ..
ريفان : لا ماشة وين !!
هوازن: يبت انا عندي دوام طلعت خليتو على فكرة .... كنت دايرة اشوف الاجواء بس لكن شكلكم كويسين ..
ريفان اتصدمت بي كلام هوازن و فتحت عيونا كبار ..
م كانت عاوزاها تمشي كانت مُشَكِلة ليها درع من انو سهم يقول اي خارجيات..
هي م عارفة ح تقول شنو اذا بقو براهم على الاقل هسي في موضوع ..
عاينت لي هوازن و هي بتطلب في المساعدة بي عيونا انو عليك الله اقعدي
هوازن ضحكت شوية و هزت ليها راسها بمعنى لا ..
هوازن: ها يلا .. بعدين اتصلي لي تمام !
ريفان (بي استسلام): طيب ..
و دنقرت راسها و طلعت نفس ..هوازن شالت حاجاتها و طلعت ..
___
ريفان كانت قاعدة و بتعاين في اي حتة الا سهم..... و شوية بتمسك التلفون و شوية تختو و ترجع شعرها ورا اضانها ..
اول مرة تحصل ليها حاجة زي دي م كانت فاهمة او عارفة هي المطلوب منها تعمل او تقول شنو قلبها بضرب بي طريقة م طبيعية خلتها بس بتفكر انو الحاصل شنو ! هي حتى م خايفة
و بالجهة التانية كان قاعد سهم و بهز في رجلو من تحت التربيزة لانو راسو ح يطق م قادر يفهم كان متكل على التربيزة و يد خاتيها في رجلو و اليد التانية في في حنكو و السبابة قافل بيها خشمو ..
(بينو و بين نفسو ):
" هي قالت اوكي و قالت انو ح نتتفق ... بس من اليوم داك اختفت كانها ابرة و وقعت في كوم قش"
كاان يوميا بجي الكافيه و بسال مزن عنها و بحاول يتصل و يرسل بس هي كانها اختفت من العالم كلو ..
كان م عارف هو زعلان منها ولا لا!!
قلبو بقول عكس كدة م قادر يسيطر عليهو زي زمان من اليوم ال قال ليها فيهو انو بحبها .. فقد السيطرة ..
