انا حرفيا منهاره تعب ومتضايقه وايد حضنته ' هو كان ورا صوبي ' واحس روحي بتطلع تميت اصيح واصيح واصيح لين تعبت وقمت عنه وهو ما تكلم ابدا هو كان حاضني بالقو عمي كان يحس فيني كلنا متضايقيين وكلنا نقص على بعض مافي شي تمام كل شي يسير عكس الي توقعته سبحان الله كيف كل شي يستوي بلمحه وحده وبدون ما نحس بشي راحو امي ويدتي بلمحة بصر انا للحين مب مستوعبه بس ! قضاء الله وقدره ان لله وان اليه راجعون....
بعد التفكير العميق والصمت خليفه حب يغير الجو وقال
خليفه : يلا عاد فارس تعبنا من المستشفى نبا نرد البيت
فارس : اي مستشفى نحن ف الموتر وتراك تسوق فينا بعد
خليفه : فهييييتتت
انا وعمي ضحكنا على فهاوته وبعدها تمينا ساكتين لين ما وصلنا عمي الخيمه وخليفه بركن ف البيت وساعد فارس انه يدش البيت وبعدها غصبنا فارس يريح شوي وبعد ما تسدح بثواني رقد علطول
انا : وبعدين يتفلسف ويقول انه مب تعبان
خليفه : حسسيتيييي
انا : ها غبي لازم ننتبه عليه
خليفة : هييه انتي اكثر الوقت عنده لازم تنتبهين وعاد تعرفين رقمي دقي لو صار شي
انا : يب يب عندي
خليفه : هي صح كيف يبتي رقمي هاك اليوم
انا : خلاص ماعليك المهم انه عندي ' تذكرت انه امها الي طرشت رقمه بالغلط '
خليفه : نزين عن تاكليني
انا : ع طاري الاكل يوعانههه
خليفه : وضعي من وضعج مب ماكل شي من الصبح ويوعانننن
انا : يلا بنطبخ ' كنت ابا اي شي يلهيني وينسيني سالفة العزا '
خليفه : شو نطبخ خلنا نطلب يوعانننن
انا : خلاص بنتفق بنسوي حق عمارنا اي شي ناكله وبنطلب سويت
خليفه : نزين يلا اول شي بنطلب وبعدها نسير المطبخ نجوف لنا شي ناكله
انا : نزين يلا خلنا نطلب بطل طلبات ولا دليفيرو عشان نجوف لنا سويت نفس الناس
خليفه : نزين ها اندوج شو تبين نطلب ' عطاني فونه وهو مبطل ع دليفيرو '
انا : همممم ابا اسكريم وسويت وكوفي وكل شي
خليفه : ول ول ول مب بطن عليج غول عوذبالله
انا : ايييي بطنييييي ' استهبل عليه '
خليفه : بسم الله عليج شو ياجج
انا : خلوف اذكر ربك بليز
خليفه : طع الطفسه تستهبل وانا اتحرا صدق
انا : جب خلوف خلنا نطلب يوعانه
خليفه : خلاص بطلب وانتي ذوقي وجوفي لو عيبج الي طلبته ولا ، لو ما عيبج لج 1500
انا : مابا مابا ابا اسير سيفورا وتسوي تحدي العشر دقايق هناك وتدفع الحساب
خليفه : وللللل نفس هايييج الطلعهه
انا : بسرعه هي لا بدون لا نطولها
خليفه : خلاص هي اتفقنا
انا : نزين يلا
بعد خمس دقايق جي
خليفه : خلاص طلبت كل شي خلينا نسير نسولنا شي
انا : وين المطبخ
خليفه : اونههه ماتعرفيييين
انا : اول مره ايي هني ولما ييت يعني ما كان فيني احاوط بعد
خليفه : هيييه زين يلا تعالي براويج
انا : يلا
رحنا المطبخ وعلطول يا فخاطري اسوي باستا
انا : خلاص قررت
خليفه : شو قررتي
انا : خاطري ف وايت باستا صراحه
خليفه : تقرييين افكاري
انا : ليش ، يا فخاطرك ؟
خليفه : هيييه والله
انا : خلاص زين بنسوي باستا
خليفه : جدامممم
انا : تعرف وين الاغراض ' المكونات باستا وغيره '
خليفه : سالتي الشخص الصح اهنيج لاني اعرف قطعه قطعه ف ها البيت
انا : وابويه عليك
خليفه : لا يكثر يلا شو تبين حق الباستا
انا : تاكل خضره ؟
خليفه : الاخضر واليابس
انا : نزين لازمنا طبعا باستا و فلفل رومي ' بارد ' و ذره وكريمة طبخ وجبن موزريلا وجبن غرشه و ماجي وبهارات مشكله وبهارات خضروات وملح وفلفل اسود وبس
خليفه : بحاول احفظهم ، اول شي خلنا نجييك ف الثلاجه
انا : نزين يلا
جفنا الثلاجه وحرفيا كل شي كنت اباه حصلناه ف الثلاجه وبرع من بهارات وغيره وبدينا نطبخ
انا : يلا الماي فار بحط الباستا
خليفه : زين انتبهي عن تحترقين
انا : لا ماعليك ما انحرق ' حطيت الباستا '
خليفه : ولللل وايدددد حطيتييي مب بطن ادمي بطن بعيير ' والله بموت منه يوم من الايام بسم الله عليه '
انا : اول شي اذكر ربك ثاني شي ترا زدت عشان فارس لاني ما اعرف حاله ولو مأكل شي ولا
خليفه : ماشاءالله تف تف ' تفل صدق '
انا : ييععععع شي من تفالك ع ويهيييييي
خليفه : عن الحسد والعين لاه
انا : والله براويك ' كنت يايه ازخه وشرد '
خليفه : لو قدرتي عاددددد
انا : خليفه والله بزخككككك
خليفه : احلميييي
تم يركض وانا الحقه الين طحت
انا : ايييي
خليفه ركض صوبي : شو ياجججج
انا لما هو يا صوبي قرصته بالقوووو
خليفه : اححححح يا المنحوسسه
انا : تستاهل ويوووووو
خليفه : انا براويجج
قمت من مكاني نفس الصاروخ وركضت وهو يلحقني ويتحلف لي رحت حجرة فارس وبدون لا ادق الباب دشيت وخليفه كان بعده يراكض ع الدري انا جفت فارس وركضت بسرعه ووقفت وراه وبعد ثواني
دش خليفه الحجره خليفه جاف انه فارس ناش وسحب عليه يلست عيونه ادورني وبعدها قال
خليفه : صح النوم طمني عنك ولد العم
فارس بصوت مبحوح : بخير بشرني عنك
خليفه : بخير بخير ' يلس يتلفف جنه يدور شي او بختصار يدورني '
فارس : ادور شي ؟
خليفه : هيهه ريم مختفيه
فارس فهم الوضع : محد دش حجرتي قبلك
خليفه : اهااا
فارس : هيه
خليفه : زين زين يلا انا بطلع وتلبس بعدها انزل بترياك
فارس : زين يلا ما بطول عليك بس اطلع ، اكيد ما تباني اتفصخ جدامك
خليفه : ههه جب جب
طلع خليفه وانا تنفست بالقو لف علي فارس والي لما جفته شهقتت
فارس : بسم الله عليج
انا : فارس ما انتبهت كنت شارده منه
فارس : نزيين ما تكلمتت
انا : خليفه يالس يلحقني يبا يضربني لاني قرصته
فارس : ما عاش من ضربج
انا : فارسسس اسفه
فارس : عادي عادي ماعليج
طبعا كلكم بتنصدمون مني ليش يالسه اتأسف وايد السالفه هي انه فارس كان توه طالع من الحمام ماخذ شاور ولاف الفوطه ع خصره بس انا ما انتبهت لانه كل همي اشرد من خليفه طبعا بدون لا ارمس زياده طلعت من الحجره علطول وترييته ف الصاله وهو بعد دقايق طلع وكان لابس جلابييه وشعره منكش
انا : فارس عادي تنزل ويايه اخاف من خليفه
فارس : زين يلا خلنا ننزل لاني وايد يوعان ' جوعان '
انا : ما عاش اليوع ' الجوع '
فارس : يلا نزلنا
نزلنا وجفنا خليفه يلعب بفونه اول ما نزلنا رفع عينه عن الفون وجافني انا وفارس نازلين ونطق
خليفه : يا الحيوانههه ويين كنتيييي
فارس : كانت وياي تفضفض عنك
خليفه : قاص على ربييعك
فارس : البنت كانت بتنهار من الخوف خفت عليها
خليفه : وابويه عليها
انا : لا يكثر خلنا نجوف الباستا اكيد ماتت ف الماي
رحت المطبخ واستوت الباستا صفيتها ويبت تاوه ' طاوه ' وحطيت زيت الزيتون ونص ماجي وبعدها نزلت الخضره لين ما ذبل الفلفل وبعدها ضفت عليهم الباستا ومكستهم وبعدها ضفت البهارات وبعد مكستهم نزلت كريمة الطبخ ومكستهم وحطيت قبشة ' خاشوقه ، ملعقه ' كبيره جبن غرشه ومكستهم وحطيت الملح والفلفل الاسود اخر شي لانه يبرز الطعم واخر شي رشة جبن موزريلا خلصت الباستا وحطيت لهم
خليفه : يارب ما نتسمم من ها المكونات الغريبه
فارس : تسلم ايدج ماتقصرين
ضربت راس خليفة خفيف وقلت
انا : احم احممم
بدينا ناكل وعاد الصدق كانت لذيذذذه وعيبتهم وايد
فارس : لا عاد طلعت تعرف تطبخ
خليفه : وايددد لذيذذذ صدق تسلم ايدج الحلوه
انا : لا داعي لا داعي
خلصنا الاكل ورحنا فوق وبعدها بدقايق وصل السويت
انا : خلوففف
خليفه : هااا
انا : جفته جفته سير اييب الاوردر
فارس : شسالفه
خليفه : طالب سويت وشكله وصل عسبت جي
فارس : هيييي زين زين
راح خليفه ييب الاوردر وحطه ع الطاوله وبدا يبطل الاجياس
انا : امبييه وي وي وايد كشخهه وييت بصور ستريك
خليفه : هاكم بس
صورت وكل شي تمام وبدينا ناكل
فارس : ذوييق ربيعي
انا : هي والله الصراحه يمييييي
خليفه : لا داعي لا داعي
انا : خلاص اطمن ماشي طلعة سيفورا لانك فزت
خليفه : حمدلله
خليفة : استسمحكم بروح انا العزا عند الرياييل يمكن عمي محتاي شي
كلمة عزا كلمة وايد قويه ، قوية ومب واقعيه فكرة انه الشخص الي تحبه فارقك بلحضة وما بيرد مره ثانية بمجرد التفكير تضيع بالهواجيس والتفكير الي ماله باب نهاية كلامي يوصف باب دخلته ولما ييت اطلع اختفى وبمجرد التفكير يكون كل شي وهم ماشي باب وماشي نهاية ! الي مات الله يرحمه والحياة مستمره بس كيف استمر في ها الحياة وروحي مرفوعه للسماء ؟ قاطع حبل افكاري فارس وهو يقول
فارس : خليفه راح وتمينا روحنا
انا : هيه ههه
فارس : شوفيج؟
شو اقول وشو اخلي ها السؤال له اجابات بالملايين احس جنه قلبي يقول وش اقول ووش اخلي مات مضنوني وملزوم انساه وكيف انساه وهو منحوت بشرايين قلبي ؟ رديت رد بسيط وما كلفت عمري بس !
انا : ماشي
فارس : قولي شوفيج ؟
انا : شو تتريا مني اني اقول ؟
فارس : الي تحسين فيه والي فقلبج
انا : احس اني ابا اموت مارد شي روح روحي ارتفعت للسماء لما انرفعت روح امي
فارس : ماينفع جي تقولين ماينفع موليه
انا : شسوي انا كيف اتصرف كيف تقولي ماينفع هاي اميي امي ماتت اميييي امي ماتت قبل لا تجوف عيالي
فارس : استهدي بالله
بدييت اصيح واصيح واصيح وهو ساكت ما بيده شي شو يسوي وشو يقول وبعد دقايق من الصياح وياني خمول وقلتله
انا : فارس بسير انام وبعد ريح روحك تعبان
فارس بصوت مبحوح : زين سير نامي
" سامحني على قلة حيلتي الي فيني فوق طاقتي "
يتبببع (:
أنت تقرأ
لِك يا هنوف الخِصال مْحبِّةٍ في دْماي
General Fictionرواية اماراتية لِك يا هنوف الخِصال مْحبِّةٍ في دْماي الرواية بتكون تجربه واتمنى تعيبكم وتستانسون عليها لو عيبتكم ادعموني وشجعوني اكمل وبس انجوي لو كان شي اي غلط او عندكم اي فكره ترومون تعرضونها علي وتكلموني 🌷
