ပြန်လည်မွေးဖွားလာသောဧကရာဇ် (book 3)

Arc 4🗡60🗡ထူးဆန်းတဲ့ ရတနာရဲ့ အငွေ့အသက်

Chapter (60) Arc 4
ထူးဆန်းတဲ့ ရတနာရဲ့ အငွေ့အသက်

ဟိုအရင်တုန်းကတော့ သူတို့ဟာ တခြားလူတွေကို ဘောင်မဝင်တဲ့ လူတွေလို့ မှတ်ယူခဲ့ကြပေမယ့် အခုချိန်မှာတော့ သူတို့ကိုယ်တိုင်ကသာ ဘောင်မဝင်တဲ့ အမြောက်စာများသာ ဖြစ်ကြောင်း သိလိုက်ရလေပြီ။

လုရွှမ်ကတော့ အံ့သြမှု သိပ်မရှိပုံဖြင့် လှည့်ကြည့်လိုက်သည်။

သူ့မျက်လုံးတွေကို အဂ္ဂိရတ်ပညာရှင် အဖွဲ့တွေဆီကို ရွှေ့လိုက်၏။ ယခုအချိန်တွင် အဂ္ဂိရတ်ပညာရှင် အဖွဲ့မှ လူတိုင်း၏ မျက်နှာများမှာ စိတ်ဓာတ်ကျနေမှုများ​ဖြင့် ပြည့်​နေပါပြီ။ သူတို့ရဲ့ စိတ်ပျက်အားငယ်နေတဲ့ မျက်လုံးတွေက လုရွှမ် အဂ္ဂိရတ်ပညာရှင် အဖွဲ့ကို နောက်တစ်ကြိမ် ဖြိုချတော့မယ့် အတိုင်းပင်။

အင်အားကြီးမားသော အဂ္ဂိရတ်ပညာရှင် အဖွဲ့၏ ခေါင်းဆောင်သည် ပြေးထွက်လာပြီး အသတ်ခံခဲ့ရသလို လျှိုဝှက်ထားတဲ့ အကြီးအကဲကြီး လေးဦးကလည်း သူ့နဲ့ တွေ့ဆုံပြီးနောက် အသတ်ခံခဲ့ရသည်။

ယခု နောက်ဆုံးတွင် ဧကရာဇ်အင်ပါယာ၏ အဂ္ဂိရတ်ပညာရှင် အဖွဲ့မှ သခင်တစ်ဦးကို စေလွှတ်လိုက်ပြန်သော်လည်း အဆုံးတွင် သူ့လက်ချက်ဖြင့် လွင့်ထွက်သွားခဲ့​ပြန်သည်။

ချွေး​အေးတွေက မိုးရွာသလို ပြန့်ကျဲနေပြီး အဂ္ဂိရတ် ဆေးဆရာတွေ အားလုံး ရင်တွေတုန်ရင်း အမြင်တွေပါ ဝေဝါးလာကြသည်။ လုရွှမ်ရဲ့ မျက်လုံးတွေကို ဘယ်သူကမှ စေ့စေ့ မကြည့်ရဲကြတော့ပါ။

သူ့ပုံစံက ကြည့်လိုက်ရင် ဒီလောက် ထက်မြက်တဲ့ပုံ မပေါ်ပေမယ့် သူတကယ် လူသတ်လိုတဲ့ အချိန်ရောက်ရင်တော့ ထူးထူးခြားခြား အရှိန်အဟုန်တွေနဲ့ ပြည့်နေတတ်လေတယ်။

လုရွှမ် သူ့ခေါင်းကို အနည်းငယ် ခါယမ်းလိုက်သည်။ အဂ္ဂိရတ်ပညာရှင် အဖွဲ့ဆီက သူ့အကြည့်တွေကို ကောင်းကင်သူတော်စင် လျိုမိသားစုဆီကို တစ်ချက် ရွေ့ကြည့်လိုက်သည်။

ဒီမိသားစုကို သူမနှစ်သက်တာက အဂ္ဂိရတ်ပညာရှင် အဖွဲ့ထက်တော့ ညံ့မည် မဟုတ်ပေ။