شّعُور

الشّعور الثَالث|رُبمَا حُب؟

شّعُور
الشّعور الثَالث|رُبمَا حُب؟
كِتابة: وصال
__________

غريب حقًا أنّ أشعر بِالخوف بِالرغمِ مِن أنني أُحبك
_

فتحت سارة عيونهَا بِصدمه و هي تشوفله كيف قعد يشوفلها بِبرود شديد خلا مِن قلبهَا يغلي غلي و هي تقول: كيف نمشي مش قتلي حَتلقى حل كيف تبيني نمشي توا؟

إبتسم زياد بِسخرية و هو يشوف لِـ هاتفه اللي رجع يرن ثاني قبل ما ينطق بِبرود زاد إستفزهَا ثاني و هو يقول: بِالسيارة عرفتي كيف حتمشي توا؟ هيا إنزلي

عضت سارة على شفتهَا بِقسوة و هي تشوفله بِغضب شديد كيف قاعد مبتسم بِسخرية لآذعة و هو يشوف لِـ ملامحهَا المُستهجنة لِـ كلامه قبل ترمش و هي تنزل فِي أنظارهَا لِـ إيد جيلان اللي شدت علىٰ إيدهَا بِالقوة و هي تهز فِي رأسها ليها بِالنفي منعًا ليها علىٰ إنهَا تُنطق بِآي شيء تستفز بيه زياد اللي رجع نطق بِهدوء و هو يشوف قادمه: إنزلو!

زفرت سارة بِغضب شديد منه قبل ما تسحب إيدهَا مِن جيلان اللي فتحت الباب و نزلت و لحقتهَا سارة اللي سكرت الباب بِالقوة عمدًا عشان تستفزه و نجحت لما شافته كيف فتح الباب و فنص فيها بِغضب شديد و هو يقول: أنتِ ناوية تخليني نكفر فيك الليله و لا ناوية؟

لوت سارة شفتها بِسخرية و هي تشوفله مِن فوق لِـ تحت و هي ناوية ترد عليه إلا إنّ إيد جيلان اللي سحبتهَا مِن مرفقهَا سكتتهَا و هي تشوفلها كيف عقدت حواجبها بِنرفزة و هي تقول: الله يربحك ساد! راك مش ناقصة سارة تحطي في رأسك بِرأسه ليش؟ متوقعه روحك حَتقدريه؟

زفرت سارة و هي تمسح علىٰ وجههَا بِالقوة قبل ما تنطق و هي ترد عليها و قالت: باهي تبيني نسكتله؟ قوليلي نسكتله و هو ما خلا مَا قال لسانه زي السم يقول اللي يبيه و لا هامه و لا معدل و لا معبر تقول اللي قادمه حجر مش بني آدم نهائي!

مدت جيلان شفايفها لِـ الأمام و هي تشوفلها بِتأسف قبل ما تمد إيدهَا و هي تمسح علىٰ ذارعهَا بِخفة و هي تقول: باهي شن تبيه يدير سارة؟ راهو اللي شافه مش ساهل ره أقسم بالله ما هو ساهل اني مش قادره ننسى تعابير وجهه لما شاف الصور ملامح وجهه بهتت و هو يشوف لِـ أول مره نشوف زياد ضايع هكي و مش قادر يدير شيء سارة!

هزت سارة رأسها بِالنفي و هي تحاول تمنع دموعها مِن النزول قبل ما تبلع ريقهَا و هي تتتفس بِحدة و قالت: مهما كان مش من حقه يتصرف معاي هكي ره! اني شادة روحي بالسيف مِن أول النهار باش ما نفضحش روحي و نبكي يعني تشوفي فيها هاينه عليا نفسي باش ننذل هكي و قادمه هو؟ راهو أقسم بالله العظيم واقفة علىٰ رجليا بِالسيف و هو جي بدون لا رحمه و لا شفقة يهزب و يهين ليش؟ بس فهميني ليش؟

سكتت جيلان و هي مش عارفه شن ترد عليها باش تفهمها أن اللي شافه مش ساهل صورهَا اللي شافهم و التهديدات الوضيعة اللي قراها هاذي كلها مش حاجات ساهله على اي حد يقراهم و يقعد عادي و يتصرف كما لو إنه ما في شيء!