ياختيار القلب قبل العين🥹✨

بارت ٧

لفت مره ثانيه وشافته يسرع بخطواته لها و شهقت و ركضت برعب ركض وراها الرجال يبي يوقفها ركضت وهي تتمنى باب البيت فاتح حتى تدخله ومايهمها اهله بكت برعب من شافته يركض وراها وبأي ثانيه ممكن يوصلها
لفت له وشافت انه يأشر بيده وزادت بركضها بدون ادراك وهي تتمنى تضيعه شافته يأشر بيده بشىء م فهمته وفجاة اصطدمت بجدار بشري وكانت بتطيح لولا اليد اللي مسكتها بسرعه من خصرها و ثبتتها
شهقت وكانت بتبعد يده عنها بس من رفعت عيونها لوجهه ومن عرفته لاشعوريا زاد بكاها و ضمته بقوة
توسعت عيونه بصدمه و علقت يده بالهواء لا هو اللي نزلها ولا هو اللي لفها حولها وضمها له ناظر لشخص اللي وقف وهو يلتقط انفاسه
ومن اخذ نفس طويل رفع راسه وبأسف:معليش ما قصدت اخرع اهلك بس لي ساعه أناديها واأشر لها بس ما وقفت الا ركضت الله يصلحها
طلع فلوس من مخباته:هذي فلوسها نستها عند السوداني وكنت ابي اعطيها اياها بس هي ما وقفت
ما كان منتبه له ولا مركز باللي قاله وقف عقله عند "اهلك"
وناظره وهو يرفع يده ويحط الفلوس بيده:هذه فلوسها ومشى عنه
ناظر ليده وللـ50ريال وهو مو مدرك لشىء وما فاق من الذهول واللاوعي الا من حس بدموعها على كتفه وشهقاتها اللي تصدر منها بشكل يعور القلب
فهد بصوت حنون:البخت انتي بخير!
بكت خوفها وبكت ألم بطنها بكت امها اللي تركتها لحالها وبكت الرعب اللي تعشيه من البارح بكت لانها احتاجته
غمض عيونه وكرر يقرأ عليها ويسمي عليها بين الثانيه والثانيه ولا فكر يبعدها لحد م تهدأ وتحس بالأمان
--------------✨✨✨✨
لندن_الساعه 9 صباحا
فارق التوقيت بين المملكة ولندن ساعتين
.
جالسه على الكنبه وبيدها كوب فيه كوفي ضامه رجولها لصدرها والكوب ماسكته بيديها و مرجعه راسها للوراء والواضح انها غارقه بتفكيرها مو منتبهه لاخوها اللي طلع من الغرفة وقرب منها
ولما شافها تناظر السقف وما انتبهت له جلس بجنبها وحط راسه على ذراعها اليمين
فزت ولفت له:إياس خوفتني
إياس شد نفسه لها وبهمس:اسف
إبـراق رفعت يدها ولفتها حول كتوفه:فيك شىء؟
إياس: افكر بالريس
سكتت وناظرت لكتبها تحثه على الكلام
إياس:احس ان احنا سوينا شىء غلط
إبـراق:ليه!
إياس:ليه خلينا الشرطة تاخذه مو المفروض نصبر مثل دايما لحد ما يطلع ابوي باسل
إبـراق:تبي نصبر اكثر من سنتين ؟!
إياس:انتي تقدرين
حكت جبينها اليسار بضيق:تعبت إياس وانا اصبر عليه وعلى حركاته معنا صح هو طيب ويساعدنا كثير بس يضايقنا
إياس: خايف يطلع ويضرنا
إبـراق:بنروح لسعودية قريب وما راح نرجع هنا
إياس بحزن:نهج منه؟
إبـراق:لا بس لازم نرجع لوطنا الأصلي ما تعبت من الغربة؟
هز كتوفه بمدري:ما احس بالغربة
إبـراق باست راسه:نسيت ان حنا جينا وانت بعمر 10 مدري 9 السنوات وآيه صغيره مره
إياس:اذ رحنا هناك من فيه؟
إبـراق:خوالنا وعمانا
إياس:وجدي؟
إبـراق:لا جدي لاا اصلا بنروح لشمال على طول
إياس:تعرفين احد هناك؟
سكتت ثواني وثم قالت:يكفي ان الريس ما يعرفنا اذ رحنا هناك بسوي فطور روح صحي آيه تمام
بعدّ عنها وناظرها:ما راح نروح المدرسه مثل امس؟
هزت راسها بلا
إياس وقف ومشى للغرفة المشتركة بينه وبين آيه
ناظرته وتنهدت بضيق مقدر اخليكم تروحون لحد ما يجينا فارس ويعلمنا وش صار
وبهمس:له يوم ونص ولا جاء معقولة الريس سوا المدير شىء ولا قدروا عليه!!
مشت للمطبخ وهي تتمنى قصة الريس بحياتها تنتهي اليوم قبل بكره لازم تروح لسعودية قبل جدها يعرف انها السبب بسجن الريس بس فارس م جاء ولا حتى دق تذكرت وقت نزلهم وكانوا بيدخلون
لولا انه مسك يدها وبحذر"انتبهي تفتحين الباب لأي احد او تردين على الاتصالات يمكن يكون لريس اتباع ما مسكناهم ويجون لكم غيبي اخوانك عن المدرسة هاليومين لحد ما اجي انا تمام؟"
ومشى بعد ما تاكد انها دخلت لشقتهم وقفلتها اخذت نفس طويل وحطت الإبريق على النار دق جرس الباب بهذي اللحظة وخافت الريس !
لا ياربي ماهو يارب
اخذت السكين بهدوء ومشت للباب لفت بسرعه لإياس واللي طلع من الغرفة ويديه بيد آيه:إياس روحوا للغرفة بسرعه
إياس:انا بفتح الباب
إبـراق:إياس لا تكثر حكِي وادخل
ناظرها ثواني ولف دخل آيه وسكر الباب وقف هو عند الباب وناظرها بان على وجها الضيق وعيونها امتلت دموع من عناده اللي مو وقته:إياس عشاني ادخل
دق الجرس بشكل مطول دليل ان صاحب الطق متنرفز لفت لإياس اللي باقي واقف ولفت للباب وبخوف:مين؟
ما سمعت رد وخافت اكثر وناظرت لإياس اللي تقدم منها
هزت راسه بلا:ارجع إياس يمكن يكون الريس
إياس:انا بفتحه وخري
إبـراق بخوف:لاااا إياس
دق الجرس وبلعت ريقها وبصوت اعلى:مين؟
..: افتحي انا فارس
غمضت عيونها براحة وتنهدت تنهيدة طويلة ناظرت لإياس اللي يناظرها ومستغرب تنهيدتها :إياس
بهدوء:انتي خايفه ليه
مشت للباب وفتحته بدون لا ترد على سؤاله دخل فارس وهو شبه متنرفز من تأخرها بفتح الباب بس لما فكر شوي انها ممكن تكون خايفه عذرها رفع عيونه ووقف عن المشي
إبـراق ناظرته باستغراب!
لاول مره يشوفها بدون حجاب وجاكيت طويل واسع شعرها القصير وخصرهاا النحِيل
وجها الخالي من العيوب لبسها اللي كان عباره فستان صوف اخضر
صح له سنه بدولة أجنبيه ومتعود بس منها هي كان شىء غريب ولذيذ رفع عيونه لوجها وتحديدا لعيونها ورموشها الكثيفة مع شعرها القصير كانت رسمه ربانيه جميلة للعين
استوعب تأمله فيها ورمش باحراج:ليه طولتي !
إبـراق انحرجت من نظراته فيها واستوعبت انها فتحت له بدون لا تغير لبسها القصير
نزلت عيونها:فكرتك شخص ثاني
ناظرها:الريس؟
سكتت وناظرت لإياس اللي وقف وجاء لمه:وعليكم السلام
ابتسم باحراج ودنق عليه وباس راسه:اعذرني
السلام عليكم
انحرج إياس من بوسته لرأسه وهو كان يستفزه: وعليكم السلام
وبعد عنه ووقف بجنب اخته اللي كانت مبتسمه: ادخل اجلس
مشى للكنبه وجلس وناظر لشقه الصغيرة والفخمة بنفس الوقت ألوانها وتصميمها اجنبي بحت
لف لاخوها اللي جلس بجنبه وبأخته اللي للحين واقفه:اجلسي؟
إبـراق:وش تشرب ؟
فارس:لا مابي شىء جيت اقول اللي عندي وأروح
عقدت حواجبها:يخص الريس؟'
هز راسه بايه
إبـراق:سويت الفطور وللحين ما أفطرنا تفطر معنا قبل لا تقول اللي عندك؟
سكت ثواني:مو مشكله
ابتسمت ومشت للمطبخ وهي خايفه ان الريس قال شىء يخصها او يخص اخوانها مع انها حاسه انه ما راح يتكلم من نظرته الاخيرة لها بس مع ذلك ما استبعدت هالشىء
صففت الصحون على الطاولة مع الحليب والشاهي و سوت كوفي على السريع له
نزلت اخر صحن ولفت لهم:الفطور
قام إياس ينادي آيه ومشى فارس لطاولة الصغيرة بالمطبخ
وقف وابتسم الكراسي ثلاث والأكيد على عددهم
هو وين راح يجلس !!
ناظرته وابتسمت وفتحت باب قريب من الثلاجة وثواني وطلعت ومعها كرسي:تفضل
جلس فارس وبابتسامه:فكرتني بجلس على الارض
ضحكت وأشرت على الباب:مستودع صغير فيه كل شىء للي يزورنا فهمت؟
ضحك لضحكتها وهز راسه باإيه
دخلت آيه وشافت فارس وبفرحة:مارتن!
ابتسم لها فارس ومد يده لها حتى تمسكها و يجلسها بحضنه
تقدمت منه مسكت يده :لِم لم تخِبرني أنك سُوف تزورنا!!
فارس رفعها وجلسها على فخذه:أُردتها مفاجاةَ لكِ
ماذاّ الم تُعجبُكِ مفاجأتي؟
هزت راسها بلا: مسرورة لرؤيتكَ وسكتت
إياس ناظر لأخته إبـراق:آيه زعلانه
ناظرتها إبـراق باستغراب:آيه وش فيك؟
آيه وعيونها على فارس:مارتن
أبتسم لها فارس:نعم
إبـراق ناظرته: تكلم عربي!
فارس بأس رأس آيه وهمس بأذنها:يصير نتكلم بالعربي!
ابتسمت وهزت راسها بايه:عادي
إبـراق مدت له الكوفي:سويته لك بس ما ادري انت تحب الكوفي العادي؟
ابتسم لها واخذه:ايه ،شكرا
لف لآيه:وانتي ياالحلوة ليه زعلانه؟
آيه بضجر :ليه ما روح للمدرسه ابي اشوف أصدقائي ومعلمتي
زاد ابتسامته:تبين تروحين لها؟
هزت راسها بايه وناظرت لإبـراق شربت من الحليب وما ناظرتها
فارس:من بكره تروحين لها وش رأيك؟
آيه لفت له وناظرته:واليوم؟
ناظرت لساعته:يمدي!!!!
إبـراق:اَي بقى ساعة اصلا عن فتحها
فارس:تم اليوم تداومين
فرحت آيه وقامت بتروح تلبس بس مسكها فارس وضحك:اول أفطرِ
هزت راسها بلا وقامت وطلعت لغرفتها
اخذ إياس خبز وحط فيه زعتر وجبن وقام وراها
ابتسمت إبـراق براحة وهي عارفه انه بيعطيه آيه وكملت تشرب من الحليب
--------------✨✨✨✨
نرجع للأحساء..