ياختيار القلب قبل العين🥹✨

بارت ١٧

ابتسمت بسمه وهزت راسها وماعلقت
إياس:عبدالله تجي هناك نسولف
وناظر لأخته:لان بعض الناس يحترق اكثر من النار اللي قدامنا
رفعت إبـراق حاجبها:لا ياشيخ
ماتحملت بسمه وضحكت:روح قبل لاتحرقك
لف لها إياس وابتسم:اضحكِ تر يلوق عليك الضحك اكثر من العبوس
خجلت وزادت ابتسامتها ولا عرفت ترد
ضحكت إبـراق:كفو اخوي أحرجتها عشان مره ثانيه ما تضحك علي
ضحك إياس ووقف:انتي عاد يااختي بعض الاحيان ودي بس اضحك عليك بس محترم انك الكبيرة
رفعت حاجبها بذهول ووقفت حتى تضربه وراح بسرعه بعيد عنها وهو ينادي عبدالله يجي قام عبدالله وراح له
وجلست إبـراق وهي مبتسمه له ثواني وقامت آيه عشان تروح له بس مسكتها إبـراق:وين؟
آيه:إياس
إبـراق:عيب آيه، رجال يجلس مع رجال احنا عيب نجلس معهم ونتدخل
ناظرت آيه لاياس وعبدالله بضيق وعبست
ابتسمت بسمه ومسكتها وجلستها بحضنها:ليه ..ليه العبوس ياحلوة
ماردت وناظرت لاخوها
دق جوال إبـراق وشافت الاسم وقامت و بعدت
بسمه:نناديهم عشان يجلسون معنا؟
هزت راسها بلا
بسمه:مين تحبين اكثر إياس والا إبـراق؟
آيه:إياس وإبـراق
ضحكت بسمه:لا ابي اسم واحد
ماردت آيه
تنهدت بسمه وناظرت و سرحت فيها تحب الأطفال حيل وتتعلق فيهم بسرعه تشوف فيهم طفولتها المبتورة تحب تعوضهم عن كل شىء ماقدرت تعيشه او تحس فيه
ابتسامتهم وضحكتهم وحتى نظراتهم كلها اشياء تتعلق فيها وتوقف عندها هي اللي اهتمت بعيال اخوانها وهي بعمر ١٢سنوات .. هي اللي تاخذهم اذ امهم راحت بدونهم .. وهي اللي تنومهم معها وبنفس سريرها اذ أبهاتهم ناموا عند امها
غمضت عيونها ونزلت دمعتها من تذكرت ذَاك الوجهه السمح اللي غاب عنها كان لسعد ولد اسمه تركي اكبر عياله واصغر منها بسنه كانت تحبه حيل وتهتم فيه حيل بالبداية كانت تبي تحنن قلب سعد عليها وبعدها تعلقت بيده اللي يمسح فيها كل ضربه يضربها لها ابوه لما ابوه يروح وكانه يعتذر لها بهالطريقة ولما كبروا صارت ١٤ وهو١٣سنه صار يدافع عنها وما يخلي إبوه يضربها وبكل مره يعرف ان ابوه راح يجي عندهم يقول لها ويدسها حتى سعد ما يطلع غضبه عليها وكل هذا وابوها ما يدري ان سعد يضربها اذ عصب من شغله او من شىء ثاني كان معها بكل مراحل حياتها لين صارت بعمر١٦وهو١٥ وغاب ابوها ودنياها للأبد يالله مستحيل تنسى الايام السودا هذيك وكيف عاشتها وكيف تركي وقف معها وكيف كانت بكل مره تسمح لها الفرصه تفكر تنتحر يكون تركي موجود ويسولف ويضحكها بدون لا يعرف انها لجزء من الثانيه فكرت تنتحر ومرت سنه وتجاوزت وفاة ابوها امها التهت عنها وعن البيت
فصارت تاخذ شغل البيت كله وتهتم بكل شىء اذ امها فيه او غابت وكان تركي يجيها بس العصر او المغرب وهذا طبعا من ابوه لان للاسف تفكيره المقرف وصل لان يفكر بان هي وتركي بينهم شىء
تنهدت وزادت دموعها لما تذكرت كرهه لسعد وكيف يشرح لها بكل مره يجي لها وكيف يتمنى يموت او يروح لأبعد مكان بالعالم كان صغير وهي صغيره بس مدركين كرهه سعد لها هي بالذات وجاهلين السبب
لين جاء اليوم اللي جاء سعد فيه لبيت امها بكل شر وحقد وكره وكيف مسكها وضربها ضرب مستحيل تنساه وكل مايطيح على شىء يقدر يمسكه يضربه فيها لدرجة ضربها بسلك الغسالة بعد ما تله بكل وحشية
غمضت عيونها وضمت آيه لها بكل قوه خلت آيه تناظرها وتخاف
بهذاك اليوم كانت مؤمنه أنها بتفارق الحياة الا ان دخل تركي وصار يهاوش ابوه ويبعده عنها ويفكها منه وهو يبكي بكل قهر من وحشيته معها وللأسف ان سعد حول عليه وصار يضربه هو بعد للحد اللي ترك تركي يناظرها مبتسم ومستسلم تتذكر انها بهذاك اليوم كانت تنادته وترجته يوقف
وترجع تناظر سعد وتطلبه يوقف و تنادي امها وترجع تصارخ عليه بانه يوقف لين فقدت الوعي وهي ما تعرف وش صار كرهت سعد وكل يوم يزيد كرهها له وتتمنى يموت او اقلها يتحاسب على كل شىء سواه معها
كانت صغيره ولا رحم صغرها ولا امها اهتمت فيها كان يضرب بوقت اللي امها مو فيه واذ كانت فيه يضربها بس على خفيف بشكل يكون تأديبي حتى امها ما تقول شىء ..
وبعد يومين وبعد ما استوعبت ان هي اغمى عليها من قوى الضرب لقت امها بوجها تمسح الدم وتكمدها ناظرت وعرفت انها للحين ببيتهم سالت عن تركي وما ردت وسالت لين انبح صوتها وبالاخير قالت تركي اخذه ابوه للمستوصف بكت بهذاك اليوم بخوف عليه وخوف من ابوه
سعد كان ولا زال رعبها ومستحيل تنسى هذاك اليوم ما حيت
وبعد اسبوع وبعد ما قدرت تقوم من الفراش وصلها الخبر المفجع واللي للحين كل ما تسمع تبكي وكانها توها سمعته انفلتت منها شهقه وبكت آيه بخوف
ولفت لاياس اللي انتبه لها ووقف بسرعه لها اخذها بقوه من حضن بسمه لانها شاده عليها وضمها له يهديها
ناظر لبسمه اللي غطت وجها وبكت بقوة
ارتبك وناظر يدور اخته وشافها بعيدة وجوالها بحضنها وتبكي حتى هي خاف وراح لها بسرعه:إبـراق !!!
ناظرت وهي باقي تبكي
إياس:وش فيك ؟؟وش اللي مبكيك؟
غطت وجها وبكت
خاف ونزل آيه؛إبـراق وش فيك احد صار له شىء؟؟ ابوي الباسل بخير؟
إبـراق:اايي بخير وروح عني إياس خلني شوي
إياس ناظر لبسمه:إبـراق بسمه تبكي شوفي وش فيها
ناظرت إبـراق لبسمه وشافتها تبكي بانهيار وضامه عبدالله لها خافت ووقفت بسرعه ومشت لها:بسمه؟!
جلست جنبها وابعدت عبدالله عنها الا انها شدت عليه وبانيهار:لا تروح تركي لا تروح كيف تخليني لابوك كيف تموت وانا ما مت تركي والله ماعرف أعيش بدونك شلون هنت عليك وتروح!!
بلعت ريقها إبـراق بتوتر وناظرت لاياس اللي متوتر مثلها واكثر:بسمه بسم الله عليك بسمه وش صار لك؟
اتركي الولد بسمه خنقتيه
مدت يدها وحاولت تفك عبدالله بقوة وأخيراً قدرت تفكه وتبعده عن بسمه
أخذت بسمه وضمتها بقوة ولفت لاياس:جيب ماء بسرعه
لفت لبسمه ومسحت على راسها وظهرها:بسمه تعوذي من ابليس وش صار لك وش سامعه؟ انا تركتك بخيرر
الا انه بسمه كانت تردد تركي ولا تروح
احتارت وبكت معها غصب وهي تحاول تهديها اقل شىء توقف شهقاتها اللي قاعده توترها اكثر وخايفه من بين هالشقات تطلع روحها
حطت يدها على خذها وضربتها بخفيف:بسمه اهدي و اللي اسمه تركي الحين يجي بس لا تبكين تكفين بسمه
الا ان بسمه زادت دموعها من كلمتها وهزت راسهاا بلا:وين يجي ما راح يجي تركي مات شلون يجي ياإبـراق شلون !!
توسعت عيونها بصدمه وتسارعت دقات قلبها ماعرفت تتصرف ولفت لاياس الي مد لها كوب الماء أخذته بسرعه وحاولت تشربه لها بس ماقدرت بسبت انها ضامه نفسها وتبكي بانهيار
تنهدت ولفت لاياس تبيه يعلمها
إياس جلس جنب اخته ولف لبسمه وبهدوء وتوتر:تركي راح للي احسن مني ومنك ومن اختي هالدموع ما ترجع احد ولا تنفع احد
هزت راسها بقوة وبكت اكثر
بلع ريقه بتوتر وكمل:يا بسمه اللي تسوينه غلط ومايجوز ،البكي هي دموع لا تقدم ولا تاخر الا تزيد الطين بله تركي مايبي يشوفك كذا انتي اقوى من كذا صبرتي وتحملتي كل هالسنين شلون بلحظة تنهارين للحد هذا؟انتي قوية وصابره ومؤمنه ان كلنا بنمشي على هالطريق ليه هالبكي والانهيار وكأنك توك تسمعين هالخبر تركي ولد اخوك صح؟ اللي قلتي لي عنه وقلت انك تشوفي عبدالله فيه عوضي كل احساس ما حسيته بهذاك الوقت عبدالله يشبه لتركي وانا متاكد انك عرفتي هالشىء من اول يوم جيتك لهنا صح؟
ناظرته بسمه بصمت ودموعها بس اللي تنزل
ابتسم لها من انتبه لنظراتها:تركي راح والله يرحمه والعوض بالأحياء عبدالله وطلال وأمهم انتي عاقله لا تخلين الماضي يتغلب عليك وعيشي وانسي واذ تذكرتي لا تنهارين مثل كذا ابتسمي وادعي وتصدقي
بسمه ببكي:ابي تركي ابي اعتذر له عن ابوه وعن ضربه وعن اني اخت لابوه الحقير ابي اعتذر له عن ضعفي وسكوتي لو كنت اتكلم لو كنت أشكي ماكان مات بسبت إبوه ماكان راح ياخذ الضرب عني
وبياس:انا ضعيفه مو قويه يا إياس
إياس بهدوء:تركي يحبك وانا متاكد انه مو ندمان لانه دافع عنك فلا ياخذك تأنيب الضمير والشوق ومانتي ضعيفه كنتي صغيره ما تعرفين شىء ولا احد بيحاسبك على صغرك الا بيحاسبون اخوك الحقير واللي تجرد من الإنسانية وصار حيوان يدور اَي شىء يفرغ فيه غضبه
بسمه غطت وجها وبكت
إياس:بنتركك تبكين بس اتمنى اخر مره تبكين فيها بانهيار انتي قوية يا بسمه وتركي يعرف انك قوية والا ما كان يسمع لكلامك وقت تقولين له لا تعلم على ابوك صح؟
ناظرته بصدمه
ابتسم:تركي فخور فيك وبقوتك وتحملك وصبرك ولرجاك ان في يوم اخوك بيتغير لأحسن وتأكدي ان وقت اخذ عنك الضرب عارف انك تحملتي للحد اللي ما عد تأخذين اكثر بس حال القدر واخذه بسبت وحشيته ابوه وضربه اللي فاق تحمله وقدرته شفتي الفرق انتي تحملتي اكثر من كذا وصبرتي لا تنهارين وخليك قوية مثل ماتركي عرفك
لفت وضمت إبـراق المذهوله والمصدومة وضمت بسمه وعيونها على اخوها
ابتسم لها إياس ووقف ومشى لآيه وضمها هو يحب خواته اكثر من كل شىء ولا يبي يكنون في يوم بمكان بسمه
سمعوا نحنحه ولف إياس لباب المجلس
وانتبه انه طلال لف لأخته:إبـراق خلينا ندخل
وقفت إبـراق بعد ما باست راس بسمه ودخلت
ثواني ووقف طلال قدام بسمه اللي تبكي جلس جنبها وضمها له بقوة ولا تكلم يكفيه اللي سمعه شدت عليه وبكت
غمض عيونه وتنهد بضيق وبهمس:عشان كذا قلتي يعرف كل اللي فيك بدون لا تقول
هزت راسها بايه
--------------✨✨✨✨
دخلت الغرفة ولفت لاخوها بصدمه:إياس !!!
ناظرها بعد ما جلس آيه على السرير وجلس جنبها:هم
ولف لآيه يسمح دموعها وباس راسها
إبـراق:كيف تعرف بكل هالاشياء ؟
إياس هز كتوفه:قد جلست معها وتكلمت
إبـراق :قالت لك كل شىء !!!
إياس:لا بس اشياء بسيطة خلتني ادرك كل شىء عنها وتراي قلت لك قبل لا نطلع لا تخليني اجلس معها بس انتي ماعرف شلون تفكرين
إبـراق:ليه ما تبي تجلس معها كنت متوقع انهيارها ؟
إياس:لا بس كنت منحرج منها لاني عرفت اشياء هي ماودها احد يعرف فيها
إبـراق جلست جنبه:إياس شلون تعرف تركي!
إياس:ما عرفه بس قالت انه ولد اخوها وكان بعمر ١٦ومات
إبـراق:كيف مات؟ من ضرب ابوه؟
إياس:لا دعسته سياره وقت كان يبي يساعدها
توسعت عيونها بصدمه:شلون؟
إياس:يابنت ما عرفت الكثير بس اللي فهمته ان وقت كان اخوها يضربها تركي جاء ودافع عنها وصار ابوه يضربه وهي إغمى عليها بهالوقت وتركي خاف وطلع يدور جدته او احد من أعمامه بس ابوه فكر انه يهج من ضربه وزاد غضبه ولحقه وللأسف تركي وهو طالع دعسته سياره ومات من حينها
غطت فمها بصدمه وذهول ونزلت دموعها:معقوله فيه ناس كذا؟
إياس بسخرية:اَي ما تشوفيني ابي اهج للندن
ناظرته إبـراق وهي مصدقته
ضحك وتنهد بضيق:الله يعينها لين تستوعب انها مالها دخل بموته والسبب كله على ابوه اللي ما اتعظ ولا اعتبر
إبـراق بكي:كنت استغرب تعلقها بعبدالله اخو زوجها والحين عرفت السبب
إياس:عرفت انه يشبه لتركي كثير
ومد يده ومسح دموعها؛وانتي وش اللي ابكاك قبل لا اجي أناديك ؟
ناظرته لثواني وتذكرت فارس ومهمته وزادت دموعها
تنهد وضمها له:يالبكايه تبكين اكثر من آيه تراك
إبـراق مسحت دموعها الي تزيد:انا بعد ماعرف ليه ابكي
تنهد وسكت وهو متضايق من نفسه ..
--------------✨✨✨✨
بعد نص ساعه..
وصلوا للمكان المطلوب ووقفوا السيارات شبه بعيد عن العماره حتى ماحد يشوفها
نزلوا مجموعة فارس وثم سند اللي قرب من فارس وقال:راح نقتحم الجهة الخلفية وانت ومجموعتكَ الجهة الإماميه
هز راسه فارس ولف لمجموعته ومشى سند لمجموعته
فارس بحده:الوضع ما تحدد خطير او سهل ولكن حطوا بين عيونكم انكم تطلعو سالمين ومعكم الرهينة واكبر عدد من المروجين
واحد من الجنود اسمه سالم:طال عمرك العمارة شبه مظلمه هذا يدل على ان مافيها احد؟
فارس لف للعماره:هذا يدل على كمين لازم تنتبه له
ولف للجنود:الاجهزة شغاله مفهوم؟
والاتصال على مدار الثانيه شغال حتى نعرف موقعك ونعرف نتواصل مع بعض مفهوم؟
هزوا رأسهم
وكمل بحده:التركيز والدقة والوقت هالثلاث حطوها بعيونكم مفهوم
هزوا رأسهم
اخذ نفس وكمل:راح ننقسم مجموعتين الاولى من ٨ اسمها الصاعقة واللي بكون معهم وهو اسم راح نتواصل فيه بالاسلكي والثانيه من٨ اسمها
تكلم واحد من الجنود:تسمح لي طال عمرك اسميها؟
ناظره فارس وهز راسه بايه
الجندي ابتسم ونظرهم:على الأمل نلتقي
ابتسموا وهزوا روسهم برضا
كمل فارس:تم والاربعه يكون هنا لحد ما اطلب منهم يتقدمون راح أتقدم مع المجموعة الاولى نحاوط المكان ومن ثم المجموعة الثانيه مفهوم؟
الجميع:مفهوم
لف:توكلوا على الله
مشى ومشى معه الجنود لحد ما صلوا للعماره
صارت خطواتهم ابطىء واحرص تقدم فارس وخلفه اثنين ومن ثم خلفهم الباقين مشى بشكل بطىء وحذر وبيده سلاحه ومصوبه لقدام
وقف خلف الجدار وبجنب الباب والأثنين اللي خلفه وقفوا على الجهة الثانيه من الباب
رفع يده ورفع السبابه تقدم واحد من اخر المجموعة ووقف خلف الباب وحط مثل الجهاز الصغير على مقبض الباب وابعد الجندي وثواني واشتعلت شراره دليل ان مقبض الباب انفجر
تقدموا الاثنين اللي من جهة اليسار وفتحوا الباب ودخلوا بخفه وسرعه والسلاح مصوب لكل شىء وثواني وهمس واحد منهم:امن
دخل فارس والمجموعة اللي وراه
وتلفتوا للعماره الفاضية والمغبرة واللي استغرب هالشىء فارس وزاد عنده احساسه الشين واللي يجهله وش هو وش الاسباب
اخذ نفس ولف لمجموعته وحكم قبضة يده ووقف كل الجنود عند الحركة هذي دليل وقفوا !
لف لهم واشر على نفسه وعلى الاثنين اللي قدامه ورفع ابهام لفوق
وأشر على الباقي ورفع أصابعه لرقم ثلاثه"يعني بعد ثلاث ثواني اصعدوا"
هزوا روسهم
ومشى فارس وقدامه الاثنين لفوق
يمشون بدون صوت ولا همس وعيونهم تطيح على اَي شىء بفطنه وذكاء وحذر شغل الفلاش اللي بسلاحه من عم الظلام وهذا الفلاش نوره فقط للمحيط للي حوله وكرروا الجنود مثل حركته
لف لدرج واشر بعلامه الإبهام"امن"
صارا يصعدون الدرج بخطوات محسوبه وبدون صوت لحين وصلوا لفارس والاثنين اللي معه هم الحين بالطابق الاولى وقدامه ست أبواب
اشر على نفسه والباب الاولى
واشر على الاثنين واللي اسمهم"حمد ونايف"
على باب الثاني
وباقي المجموعة وزعهم على الأبواب
لف لهم ورفع يده لرقم ثلاثه شدوا على السلاح اللي بايديهم
وعيونهم على يد فارس اللي نزل الإبهام والسبابة والوسطى واقتحموا الأبواب بسرعه وقوة وأسلحتهم مصوبه لكل شىء دقايق مرت وهم يفتشون
واستغرابهم يزيد كل ما شافوا شقه فاضيه وطلعوا من الشقق وناظروا لباب شقه النقيب فارس اللي للحين ما طلع ومشوا بخفه وبدون همس للباب اللي دخل منه النقيب فارس وما طلع
واشر نايف بقبضة يده ووقفوا رفع سلاحه اكثر ودخل بسرعه وهو يدور بالشقه ودخل بعده اثنين من الجنود
وشاف فارس واقف بداخل غرفه
تشبه غرفه النوم بس الظلام والغبار مو بين تفاصيلها
وقف نايف خلفه وناظر لوين ما يناظر وكانت بنت صغيره بعمر ١٠ سنوات مربوطه ايدينها ورجولها وعلى عيونها وبدون حركة او نفس يصدر منها
تحرك فارس وقاس نبضها وتنهد من استشعر نبضها تحت أصابعه
ولف لنايف وبهمس:اطلب من مجموعة على الأمل نلتقي يدخلون ويجيبون نقاله
لف نايف ورفع الأسلكي اللي مثبت على كتفه
فارس فك حبالها والعصبة اللي على عيونها ورفعها بخفه وطلع من الشقه
وحس في شىء مو مرتاح له الا انه ارتاح لما شاف بنت السفير دليل ان المهمه انتهت ..
دخلوا مجموعة على الأمل نلتقي ،وأخذوا اثنين من المجموعة البنت وطلعوا
لف فارس واخذ اللاسلكي من كتفه:مجموعة غيمه سند حول !
ماسمع رد واستغرب وكرر الاتصال والاسم:غيمة سند حول ونفس الشىء مافي رد
ولف لمجموعته ولف لدور الثاني ترك اللاسلكي اللي مثبت على الكتف
وبهمس مسموع للجنود:مجموعةالنقيب سند ما ترد ويبدوا ان في شىء تغافلنا عنه راح اخذ سبعه والباقي ينزلون لتحت
اعترض واحد من الجنود واللي كان من مجموعة الصاعقه :طال عمرك بنكون معك وخلفك نحميك
فارس بحده:جندي هذا امر
ولف لحمد ونايف وسالم:انتم معي
ولف لاربعه:وانتم معي
ولف للباقي:انزلوا لتحت وانتظروا منا اتصال
ناظروه وبعيونهم اعتراض شديد على خطته
لف فارس وبحده:انطلقوا
نزلوا الجنود واللي يتكونون من ٨ اشخاص
ومشى فارس بحذر لدرج قاصد الدور الثاني وقدامه نايف وحمد
وخلفه سالم اللي ناظر للوراء تحسب لا اي حركه خلفهم وخلفهم الاربعه اللي يبعدون عنهم بخطوة وهذا كله تخطيط من فارس
وصلوا لدور الثاني وكان اقل إبـواب من الدور الاول
٤ أبواب بس كل بابه عرض وطوله ب٦/٤
لف فارس للي معه واشر على الباب الاول
مشوا لهم ببطىء وخطوات محسوبه ووقفوا خلفه
تقدم نايف وحاول يفتحه وما فتح
ناظر لنقيب فارس اللي رفع الاسلكي وبهمس:مجموعة على الأمل نلتقي جندي خلف تعال لدور الثاني المكان امن"
لف لباقي الأبواب ومشى لها بحذر وحاول يفتحها بس نفس الباب الاول مقفول
رجع للباب الاولى:راح اخذ اثنين ونروح لدور الثالث والأخير اطلب من مجموعة على الامل نلتقي تصعد هنا
بعد ما تفتحون كل الأبواب معهم ؟
هزوا رأسهم:مفهوم
فارس:نايف حمد تعالوا
ومشى ومشوا معه
وقف نايف ولف لنقيب فارس اللي يمشي بحذر وشبه سرعه حتى يوصل لسند بس وقف من وقفه نايف وهو يناديه بهمس:طال عمرك
عقد حواجبه وبحده:جندي كمل وبدون توقف
ولف يكمل
بلع ريقه نايف ولف لحمد اللي فهم وش يبي
وهز راسه:طال عمرك ليه ما نحذف قنبله دخان
لف له فارس وسكت لجزء من الثانيه ومد يده له مدها له بعد ما طلعها من الجيب اللي بفخذه فكها فارس وحذفها بسرعه لدور الثالث اللي ما يبعد عنه الا درجة وحده
ونزل درجة لوراء ولف له ظهره
ناظره لنايف وهز راسه له وعلامه الابهام
ابتسم نايف وهز راسه
رفعوا القناع لين الأنف ولبسوا النظارت المخصصة لدخان عشان ما يستنشقون الدخان اللي يكون مسيل لدموع ومنوم
تقدموا بخفه وسرعه وحذر ودخلوا لدور الثالث تلفتوا يمين ويسار والسلاح قدامهم والكشاف يتوزع بالظلام
على يمنيه نايف وعلى يساره حمد وهو بالوسطى يدورون على مجموعة سند
بس وقفوا من داهمتهم الأسلحة اللي انحطت خلف أرقابهم وبهمس حاد:ولا حركة
انصدموا ولفوا بس السلاح اللي انشد لارقابهم
وقف التفاتتهم وبنفس الهمس:ارفع يدك ونزل السلاح على الارض
ناظر حمد ونايف لفارس اللي هز راسه لهم دنقوا ونزلوا السلاح على الارض ..
ولما دنق فارس حط يده على فخذه واخذ المسدس ولف بسرعه وخفه وصوبه للي خلفه واطلق بنص جبهته ولف للاثنين اللي خلف نايف وحمد واطلقوا بكتفهم وصدرهم وطاحوا
لف فارس بحذر يمين ويسار ومشى للي صوب على كتفه وحط المسدس بنص جبهته وبحده:وين مجموعتي
كان يتالم ويصارخ عمداً وعرف هالشىء فارس وحط يده على فمه كتم نفسه:ما أكرر سوالي
واحد..
اثنين..
وسمع همهمه تحت يده وأبعدها
قال بالم ويده على كتفه والدم ملطخ يده:ذبحناهم
توسعت عيونه فارس بصدمه ولاشعوريا طاح على وراء
وصدمته مو اقل من نايف وحمد اللي بقهر اطلق عليه رصاص استقرت بنص جبهته
ولف لفارس اللي يناظر للأرض وعيونه مفتوحه على الاخر
بلع ريقه وناظر لنايف اللي يناظر فارس وملامحه صدمه وقهر
اخذ نفس ومشى لفارس:طال عمرك خلينا نكمل ونذبحهم كلهم
مارد فارس اللي للحين على وضعيته وكانه قاعد يسترجع لحظاته ومهماته اللي تشاركها مع النقيب سند مد يده وشد على كتفه:طال عمرك انتبه معنا المهمه للحينها ما انتهت خلينا نكمل
رمش فارس أخيراً وناظر لحمد وعقله مشوش ومو معه
حمد وبقهر::وخالقي لا اخذ ارواحهم روح وراء روح خلنا نكمل طال عمرك
نزل القناع ومسح على وجهه ووقف بجسد مهزوز ويتمايل
ناظر حمد لنايف وهم عارفين ان مستحيل يكملون والنقيب ما يقدر يوقف بثبات
اخذ سلاحه من الارض واخذ نفس طويل وغمض عيونه عن الدموع اللي داهمته مسح على وجهه مره ثانيه و ناظر لفوق وفمه مفتوح ياخذ اكبر قدر من الهواء
حمد:طال عمرك الدخان للحينه ما راح ياليت تلبس قناعك
لبس قناعه وانفلتت منه شهقه مايعرف سمعوها او طلعت بهمس تردد صداها بالقناع
بلع عبرته ولف لهم
نايف:طال عمرك الأفضل نستعين بخمسه من مجموعة على الأمل نلتقي
هز راسه بايه بدون اعتراض وهو عارف انهم خايفين ولف للجدار واستند عليه وعيونه على الارض وبباله يسترجع شريط لقاه بسند ومهماته اللي يشارك فيها
تذكر اخر كلمه له"الحلو بالمداهمة خوتك يالخوي"
صار ياخذ نفس اكثر من مره من عبره داهمته يحاول يثبت بس مو قادر هذا سند خوي المداهمات واللي لكل مهمه لازم يكون فيه ومعه
نزلت دموعه ونزل القناع والنظاره ولف وجهه للجدار ضربه اكثر من مره يفرغ حزنه وضيقه
لف حمد لنايف وتنهد بحزن لحاله ولف لدرج ولمجموعتهم اللي وضحت
مشى لنقيب فارس وبهمس:الجنود لا يشوفون حزنك وضعفك احنا للحين بالمداهمة ولازم نطلع منها باقل الخساير البس قناعك واثبت وخلنا نمشي وراك وننتقم
بلع عبرته ومسح وجهه ولبس قناعه اللي مد به حمد ولبسه اخذ نفس ولف للجنود المكون من ١٣ وبحده و انتقام:الخطة تغيرت راح نقتل كل من نصادفه
وسكت لثواني وقال:واي شخص رفع يدينه وماشفت سلاح أسره مجموعة النقيب سند بهذا المكان لازم نلقاهم احياء والا ..وبرجفه:اموات
رفع صوته:مجموعة تروح من الجهة اليمين والثانيه معي لجهة اليسار
مشى ومشى معه حمد ونايف وأربعه من الجنود
ومشت المجموعة للجهة المقابله يمشون بسرعه وخفه وبدون صوت يصدر بخطواتهم،اقتحموا كل باب يواجهم
خاصه ان الدور هذا كبير وأبوابه متوزعة عليه
سمع فارس طلق نار ورفع اللاسلكي:جندي حول!
سمع:طال عمرك ذبحنا واحد منهم
ابتسم بتشفي:اطلعنا على المستجدات
ولف لجنوده:دورنا
فتح باب قدامه بحذر وخلفه حمد ونايف والمجموعة يبعدون بميل وطلع قدامه واحد من جنود سند مذبوح معلق بمروحه بشقه
توسعت عيونه بصدمه ولف لجنوده اللي شهقوا وركضوا لرجوله يرفعونها حتى ما يختنق من الشنق و قطعوا الحبل المتدلي من المروحه
نزلوه على الارض وقاس نبضه فارس ونزل راسه بضيق وهم فهموا الجنود انه ميت
اشتعلت وجيههم غضب وقهر ووقفوا وشد السلاح على صدورهم ومثبتينه لقدام
وقف فارس بعد ما اخذ السلسلة الملتفه حول رقبته واللي فيها اسمه وبأي مجموعه
حطها بجيبه ولف لجنوده:الموضوع اكبر من عصابه مخدرات لازم ننتبه ونحذر بكل خطوه نمشيها مفهوم
الكل:مفهوم
طلع من الشقه ولف لدور الثالث كاملا وبحده:الكل هنا
وقفوا الجنود حوله وقال:هذا الدور فيه العصابة
وبكل شقه راح نلقى واحد منهم او اثنين او اكثر ، راح نتوزع كل شقه يقتحمها ثلاث
وقبلها تحذفون القنابل المسيله لدموع والاهم اَي شخص تشوفونه من مجموعة سند مقتول تأخذون السلسلة اللي حول رقبته مفهوم!!!
هزوا روسهم وبحده:مفهوم
لف فارس لحمد ونايف:انتم معي بنقتحم الباب هذا وكان جنبهم ويبعد عنهم الباب متر
ولف للمجموعة:وانتم ياالثلاثه للباب اللي بعده والاربعه الباب اللي بعدهم والثلاث الباب اللي يجي بعده راح نمشي بهالتسلسل قدامنا سبع أبواب بالجهة وجهة اليسار اللي راحت له مجموعتنا مجهول لنا لازم نخلص باقل من١٠ دقايق مفهوم
هزوا روسهم بحماس وشده وتقاسموا
مشى فارس واللي معه للباب وقف جنبه اليمين
وعلى اليسار نايف وحمد
حرك المقبض ببطىء ودفع الباب بقوة ودخل وسلاحه مصوب لقدام شاف اثنين من العصابة ركضوا لباب المطبخ صوب الأول برجله والثانيه بكتفه
وطاحوا وطاحت أسلحتهم جنبهم تقدم حمد بسرعه و بعد الأسلحة عنهم
تقدم نايف ورفع السلاح بوجيههم
فارس بحده قرب منهم:من انتم؟ ووين مجموعتكم؟؟
تكلم اللي ماسك رجله ويتألم:مالنا مجموعة نشتغل لحالنا
نايف اطلق رصاصه بفخذه:والحين تشتغل لحالك
صرخ بالم وضغط على رجله
فارس ابتسم بتشفي:ثلاث ثواني تتكلم والا تموت
تكلم اللي ماسك كتفه وهو يناظر صاحبه يصارخ ويتألم:مو لحالنا
ناظره وصرخ فيه فوق صراخه المؤلم:ياحمار لااا تتكلم بيذبحونك
ناظر خويه وناظر لفارس اللي نزل القناع:تكلم وتسلم
نطق بتردد:احنا مجموعة ومعنا رئيس عصابتنا
فارس:ووين رئيسك!!
سكت ومد فارس سلاحه ضغط فيه على كتفه وتحديدا لمكان الدم والرصاصة:تتكلم والا..
صرخ بالم وتنفس بسرعه:بقول بقول بس ابعدّ
ابعد سلاحه وناظره وكمل هو:بالجهة الثانيه بشقه ٨ ومعه جنودكم
فارس والأمل لاح قدام عيونه:جنودنا اللي دخلوا من الجهة الخلفية ؟
هز راسه بايه
وناظر فارس لحمد ونايف وبرجفة حاول يخفيها وماقدر :حيين والا ميتين!!!!
بالم والعرق بكل ملاح وجهه:ذبحنا ثلاث بس
بربكة:قائدهم مع رئيسك!!!
تكلم اللي يده على فخذه وشبه فقد الاستعاب:قائدكم عنيد بس رئيسنا اعند منه ويمكن الحين ذبحه
وقف فارس بسرعه ورفع يده وذبحهم
انصدموا نايف وحمد:طال عمرك!!!
مشوا و وصلوا للجهة الثانيه ورفع فارس اللاسلكي بهمس:مجموعةب حول
ما سمع رد وتوتر هذا دليل ان الاقتحام بيصير اصعب كون اللي معه بس ١٣ والعصابة للحين يجهل عددهم
كرر النداء:مجموعة "ب"حول
سمع وشوشه بالاسلكي وشوي سمع:مجموعة أ حول
تكلم فارس بسرعه:أعطني الاحداثيات حول
صمت دام لثواني ونطق الطرف الثاني: ٢٠ شخص محاوطين مجموعة النقيب سند وشخص يقولون له الرئيس واقف قدام النقيب سند وبينهم مشادة كلاميه .حول
فارس برجاء وامل: النقيب سند عايش؟؟حول
ونفس الصمت دام وانكتمت انفاس فارس بخوف ورجاء ان اللي يفكر فيه يكون صحيح وواقع
وقطع رجائه ودعائه:اَي طال عمرك حول
تنهد براحة ولاشعوريا مال على الجدار وابتسم
ابتسموا حمد ونايف براحة وفرحة
وقف باعتدال من سمع:تداهمهم طال عمرك؟
فارس بسرعه:لا انتظر راح نجيكم بس انت اَي شقه !
الجندي:يشبه لمستودع اكثر من شقه وموجود بالطابق الثالث جهة اليمين
مشى فارس ومعه الجنود بسرعه وخطوات مدروسه واقل من دقيقه وصلوا للمجموعه ب
اللي كانوا فقط ٥
وقف فارس جنب الجندي سالم واللي خلف الباب المفتوح لفتحة صغيره يشوف فيها العصابة بهمس وحده قال :وين الجنود !
جندي"سالم":أسروهم
عقد حاجبه فارس بعدم فهم:كيف؟
جندي سالم:انقسمنا حتى نلقاهم بسرعه الا انهم وبأقل من دقايق مسكوهم
فارس بعصبية:وليه ما توجهتوا لهم؟؟
جندي سالم:كانوا اكثر من عددنا ومستوعبين اننا راح ننمسك بايديهم فتركناهم وتتبعانهم لين وصلنا لهالمكان واكتشفنا ان مجموعة سند موجودة
سكت فارس ولف للجنود وفكر لثواني كيف يقتحم المكان بدون لا يخسر احد منهم .. --------------✨✨✨✨
الصبح عند اهل سعد..
جلست على الفرشة اللي حاطتها امها بره بالأجواء الحلوة وقدامهم منقل النار المشتعل وحرق الخطب تسمعه من الهدوء
ناظرت لسماء وابتسمت:شكلها بتمطر
ابتسم وناظر لسماء:لا شوفي الشمس واضحه معناتها ماهو سحاب مطر
عبست:خساره
لف وناظرها:مااذكرك تحبين المطر؟
بزلة لسان:هتان يحبه
رفع حاجبه:ها!!
ارتبكت وناظرته وضحكت:اقصد تذكرت هتان يحبه
هز راسه ونزل عيونه ليدها اللي ترجف:برد؟
شدت عليها وهزت راسها لان رجفتها من الربكة اللي داهمتها من سؤاله:لا بس جوعانه
لف لامه اللي جايه وبيدها صينيه الفطور:الحين بتشبعين
واخذ فروته من عليه وحطها على كتوفها:تدفي
ووقف ياخذ الصينيه من امه اللي دعت له وجلست بجنب ترف وغطت رجولها باطراف فروة راشد
جلس ونزل الفطور:تسلم يدينك يايمه
ابتسمت:الله يسلمك ياروحي سموا بالله أكلوا يالله
ترف؛وانتي؟
امها:أكلت من فطور جدتك اللي ارسلته لها
هزت راسها ومدت يدها واكلت وراشد مثلها
ناظرتهم وابتسمت
ونزلت عيونها عن لا توضح لمعة دموعها يكفي بكت بالمطبخ ويالله قدرت تخفي ملامح الدمع اخذت نفس وتقدمت من النار
ترف ناظرتها:فيك شىء يمه؟
هز راسها بلا ومدت يدها لنار:برد شوي
راشد:اليوم بروح لعمتي بسمه تروحين معي يمه؟
ترف بسرعه:بروح معك
ناظرها:لا
رفعت حاجبها بذهول:ليه؟
راشد:عشان ما تجين وتبكين مثل ذاك اليوم
ترف:خير هذاك اليوم كنت متأثره والحين لا
تكلمت امه:مالي نفس اروح يمه خلها يوم ثاني
راشد:ليه يمه؟ تعبانه اوديك المستشفى والا تبين اوديك لخالاتي
ابتمست:لا يمه ودي اليوم اجلس بالبيت
هز رآسه وسكت
وناظرت لأخته اللي تناظر امها باستغراب
اندق الباب ووقف باستغراب ومشى له
قامت ترف حتى تدخل بس وقفتها امها:ترف؟
لفت لها:لبيه يمه؟
امها:اجلسي ومدت لها شرشف اسود طويل
لفيه عليك يمكن انه واحد من عمانك
وقامت هي:انا بدخل ارتاح مصدع راسي
عقدت حواجبها ترف وجلست وهي تناظر امها تمشي وتدخل للبيت
وش فيها امي؟؟ ابوي قال لها شىء !
اخذت نفس طويل ولفت للي يتقدمون منها وتوسعت عيونها بذهول من شافت هتان ولا شعورياً قالت:هتانن
ابتسم:سمي
ناظرت لاخوها وله:شلون تجي وأبوي؟
راشد:انا قلت له يجي وأبوي عند جدتي ولا هو داري عنا
بلعت ريقها وناظرت لهتان اللي يتأملها:اها
هتان:شلونك ياترف؟
ترف:بخير وانت؟
هتان:بخير وشلون جرحك؟
لاشعوريا ناظرت خصرها و رجعت ناظرته:طيب
راشد:تفضل هتان الحق على رزقك
ناظر لفطورهم وابتسم وجلس:فطرت قبل اجيكم كملوا انتم وبالعافية
جلس راشد فصار جنبه على اليمين ترف واليسار هتان
لف لأخته:امي وين؟
ترف: دخلت تقول مصدعه وترتاح شوي
ناظر للبيت باستغراب
وناظر لهتان اللي يناظر لترف ابتسم:هتان وين رحت
هتان فاق من تأمله وناظر لراشد:معكم
ترف انحرجت ولا عرفت وش تسوي تقوم وتخليهم والا تجلس وتخلي الوضع عادي
هتان بعفوية:عمتي وين؟
ماتحمل وضحك راشد
ناظره هتان بتعجب:وش قلت؟
راشد:لا ابد ما قلت شىء وامي داخل اذ تبي تسلم عليها
سكت هتان ولف وجهه وعبس بوجهه من غبائه وعيونه اللي مو قادره تبعد عن جهتها وتحديدا وجها و تفاصيله اللي اشتاق له
لف لراشد وابتسم مجامله:ماعلينا وش اخباركم وش جديدكم؟
راشد:بخير ومانشكي بأس انت اللي وش علومك ووين رحت؟
هتان:ما رحت بس انشغلت
راشد:اها واخذ لقمه من الفول واكلها
هتان ناظر لترف:ترف وش فيك ساكته؟
ترف:ماعندي شىء اقوله ؟
هز راسه وسكت وما نزل عيونه عنها
ناظرت للأرض تتجنب نظراته اللي راشد ما علق عليها ولا حتى طلب ينزل عيونه !
ترف:انا بدخل انادي امي لك
هتان بسرعه:اجلسي ما يحتاج
ولما شافهم يناظرونه:اقصد خليها ترتاح شوي وانا ادخل اسلم عليها
هزت راسها وسكتت
لف راشد:الا اذ يبي راشد يناديها ما راح اقول لا
ابتسم راشد ولف له:ادخل عندها انت مابي اترك الفول وتآكله ترف كله عني
قرصته ترف وصرخ بالم توسعت عيونها بصدمه
ضحك من صدمتها وهو يمسح على مكان قرصتها اللي بفخذه:معليش تعورت!
ترف ناظرت لهتان اللي مبتسم ويناظرها
وارتبكت:تعورت من ايش مالمستك انا
ناظره بذهول:مالمستيني!!! اَي صح هذا بعوض الشتاء
ترف ناظرت لهتان:هتان شلون عمتي بسمه؟
ابتسم وناظر لعيونها:بخير الحمدلله
ترف نزلت عيونها:متى جيتها؟
هتان:قبل امس
هزت راسها
وبدوره سالها:وانتي متى كشفتي على جرحك؟ ووش قال عنه؟
ابتسمت:بكره بيفكون لي الغرز وأقدر امشي بدون لا انحني
ابتسم:حلوو حلوو اجل بكره انا اوديــ..
وسكت من استوعب وش يقول ونزل عيونه
كملت عنه:اذ تبي يعني تقدر توديني مع راشد
رفع راسه بسرعه:صدق؟
راشد:اَي وبهمس بدون لا تسمعه ترف:يالخفيف
ناظره هتان بحقد ولف لترف وابتسم لها
ناظرت لامها اللي طلعت لهم وابتسمت لها وشوي وشوي اختفت ابتسامتها وحل بدالها خوف حاولت توقف وماقدرت
وناظرت لراشد اللي وقف بسرعه ومشى لها:يمه وش فيك ؟يمه بسم الله عليك وش صابك
مسحت دموعها اللي تزيد غصب عنها وبهم:مافيني شىء بس انكتمت من الغاز وطلعت لبره
راشد بخوف:اَي غاز يمه؟
امه:لا تخاف سكرته انا كنت ناسيته مفتوح يوم اني اجيب لكم الفطور
راشد مشى بيدخل الا انها مسكته: مافيه شىء اجلس ولا تخاف
ناظرت لهتان وابتسمت:ياحيالله هتان
وقف وباس راسها:ياهلابك زود شلونك ياعمه؟
ام راشد:بخير الحمدلله
مسح دمعتها:عساها تنعدم ياعمتي وش فيك يالغالية ؟
اخذت نفس وناظرت وجهه وغمضت عيونها تبلع الدمع:مافيني شىء يايمه
وجلست وجلس راشد يناظرها بخوف
فصار هتان جنب ام راشد وثم ترف وثم راشد قدامهم
لفت له ام راشد ومسحت على راسه:علامك قطعت عنا ياهتان ؟
هتان باحراج:كنت مشغول ولا قدرت
تأملته لثواني ونزلت دمعه من عينها:الله يرح بالك
انصدم من دمعتها ومسحها بسرعه:عمه وش فيك؟
هزت راسها بلا ونزلت راسها
هتان:طلبتك علميني وش فيك وشله الدمع
اخذت نفس طويل وبهمس:تذكرته واعذرني
سكت ونزل راسه وعرف من تقصد
تكلمت ترف بخوف:يمه فيك شىء يعورك شىء ؟ ابوي قال لك شىء زعلك ؟
امها:لا يمه بس تذكرت لي شغله وحزنت عليها
سكتت ترف وناظرت لراشد اللي يناظر امه بتوتر
هتان رفع راسه وباس راسها وبهمس:الله يرحمه
مسحت دموعها واخذت نفس طويل ولفت لراشد :يمه راشد قلت تبي نروح لعمتك بسمه؟
هز راسه
ابتسمت:زين بلبس عباتي ونروح وانتي يا ترف بنخليك هنا ساعتين ونرجع
هزت راسها بلا:بروح معكم
راشد:قلتك لا ووقف:يلا يمه
ولف لهتان:نخليك هنا لين نرجع؟
سكت وناظر لام راشد اللي ابتسمت وهزت راسها بحزن:سعد ما هو راجع اليوم بدري اقعد عندها لين نرجع
هز راسه
دخل راشد للبيت يجيب عباية امه
ولفت ام راشد لترف:اذ تعبتي من الجلسة ادخلي وانسدحي زين؟
ترف:طيب
طلع راشد ومد العباية لامه وأخذتها ولبستها وطلعوا سوا
هي مقتنعه بقرار نفسها اهلها للحين مو متسوعبين انها ما تبي هتان يجلس معها بدونهم بس بنفس الوقت مقتنعه انها ما تقدر تغير هالشىء فيهم او فيها وخاصه وانها من وهي صغيره دايما معه وهو معها بس ودها فعلاً يكون هتان ولد عم لا اكثر او تكذب على نفسها بهالشىء حتى ما تتمادى بمشاعرها اللي تحاول تذبحها ولا تقدر ماتعرف وش تبي بس تعرف ان ابوها مستحيل يخلي هتان في يوم زوج لها
لفت لهتان اللي يناظر الارض بسرحان :هتان فيك شىء؟
رفع نظراته لها وابتسم بحزن:لا
ترف:بس ملامحك تقول عكس كذا
هتان ناظر لكل شىء الا عيونها وللأسف ماقدر الا انه يرجع ويناظر عيونها:بس تذكرت شغله
ترف وبضيق:نفس امي حزينه؟
ابتسم وهز كتفه بمدري
سكتت ونزلت عيونها ليدها تفكر بكل شىء تافه يبعدها عنه
الا ان هتان قال:ترف
ناظرته:هلا
هتان:اخذتي فلوسك؟
عقدت حواجبها:اَي فلوس؟
ابتسم:التعويض؟
ترف:اها لا ما اخذتها ولا ابيها قلت لك
هتان:تري حطيتها بحسابك متى ماتبينها خوذيها
ناظرته بصدمه:هتااان
ضحك:حقك ياقلبي
بلعت ريقها من كلمته وقالت:بس انا ما ابيها هتان قسم بالله خذها انت تكفى
ابتسم وبحب:انا ودي أخذك انتي
رمشت وتسارعت دقات قلبها :ايش!
ضحك:لا تعصبين بس ذَا الصدق
ناظرته وسكتت ..
ابتسم واخذ نفس طويل:الاسبوع اللي مر بدونك ماحسبته من عمري ويمكن انتي حسبتيه من عمرك
رفع عيونه وناظرها:ترف مايهمني وش تكنين لي من مشاعر لي اللي اهتم له واعرفه اني احبك وابي كل يوم اشوفك تكرهيني بخليك تحبيني .. تبغضيني بخليك تستلطفيني .. تتضايقين مني بخليك ترتاحين معي انا ما ابي الا انتي ولا راح افكر انتي من تبين لاني بكون بكل مكان وبكل وجهه تبينه
رمشت وتسارعت دقات قلبها بصدمه من اعترافه اللي ما فكرت فيه ولا بمقدار ذرة
هتان:من يومك طفلة وانتي بعيوني وقلبي والحين وانتي كبيره تتوقعين مكانك تغير الا زاد يا ترف للحد اللي يخليني ما احسب ولا أذوق طعم يومي بدون لا اشوفك او اسمع صوتك فيه
ناظر لبيتهم:هنا حبيتك وهنا اعترفت لك وهنا تحددين شعورك اتجاهي اذ انك فعلاً كارهتني او متقبلتني
رجفت يدها من ارتجاف قلبها وروحها وحست ببرودة بأطراف رجلها ويدها وعيونها مثبتتها على منطوق هتان بصدمه تلقط كلمه تعرفها او تستوعبه
الا ان اللي قاله شىء كبير على قلبها وعلى عقلها وجديد ماعهدته من هتان بالذات سكت وعيونه بعيونها
ونطقت من ادركت انه ينتظر شىء منها وللأسف ليتها بقت ساكته ولا تشوف ملامحه اللي تبدلت للصدمة: ابوي ما راح يزوجني لك
انصدم من كلمتها الي ما توقعها منها
كان حاط الف احتمال واحتمال رفض وقبول وتردد وحتى سكوتها متوقعه الا انها تقول ابوي ما راح يزوجني إياك
بلع ريقه وبصدمه:المهم انتي يا ترف وش تبين ؟
ترف:انا ؟!
هز راسه وهو ينتظر تتكلم بشىء ينزله لسابع ارض او يرفعه لسابع سماء
ترف بتردد:ماعرف هتان
هتان:تعرفين يا ترف هي كلمتين انتي تبيني او لا
ترف سكتت ونزلت عيونها للارض بحيره وصدمه
اخذ نفس طويل:يمكن اني ضغطت عليك بس أنا شفت بالأسبوع اني فعلاً احبك ولا اتحمل يمر يومي بدونك و الدليل اني جيت يا ترف مهزوم وولهان
ترف بخوف:هتان يكفي
ابتسم وناظرها:ليتني اقدر أوصف لك حبك بقلبي وخالقي ما راح تحملينه يا ترف فكيف بقلب شال هالحب ١٣سنه انا صبرت يا ترف كثير ولا فاد صبري وشوفيني مع اول جية لي اعترف لك بدون لا اتردد
ناظرته وماقدرت تقول شىء الا أنها نزلت دموعها عند لمعة دموعه الواضحة لها
هتان ابتسم:هذي الدموع رد والا خوف
ترف رفعت كتوفها وغطت وجها بأيدينها
هتان برجاء:لا تكسرين قلبي يا ترف لا تكسرينه وهو ما يشوف الا انتي ولا يعرف الا حبك
ترف بهمس:لا تقول كذا انا بس ما عرف وش اقول وش ارد انت علمني وش اقول هتان
ابتسم بحزن:قولي اللي يقوله قلبك
ترف:قلبي ما يعرف الا الخوف وش ارد يا هتان؟
سكت ولف عنها
زادت دموعها وهي ما تقدر تقول له ان قلبها مايعرف الا الخوف من ابوها وعقلها اللي ما بشوف الا ضربه وصراخه شلون تبادله الحب وهي عارفه وش نهايته
لف لها وناظرت عيونه:هتان عطني وقت
هز راسه و اخذ نفس وابتسم:روحي ترف وارتاحي
ناظرته برجاء وهزت راسها
هتان:ما راح اروح لين يجون ،روحي ترف
ناظرته لثواني وحاولت توقف وقدرت و عيونها عليه
ناظرها لدقائق ومن ثم نزل عيونه
لفت ومشت ودخلت
تنهد ومسح وجهه و كرر كلمتها"مااعرف الا الخوف "
تظنين اني ما فهمت يا ترف انك تقصدين ابوك تظنين اني مو خايف مثلك !
تحسبين اني مو مدرك سبب ترددك بس انا تعبت وجاء دور اني احارب عشانك وانتي تحديدين يا احارب وأوقف بوجهه عمي او انسحب ..