ياختيار القلب قبل العين🥹✨

بارت ٣

دق جوالها وسكرت بوجها لفت للي قدامها .. و رتبت البضاعة للمره الف من الملل
ناظرت للي حولها وبالسوق الكبير اللي قدامها اليوم جاءت بدال امها لانها راحت مع متعب تجيب بضاعه لان نص البضاعة انباعت والنص الثاني هي جالسه الحين عندها عشان تبيعها، ما تنكر الازعاج لان السوق زحمه مثل كل مره تجي تبيع فيه، الناس رايحه جايه و الدكاكين مصفوفة على الجهتين
ناظرت لجلستها (فارشه فرشة بالارض وحاطه البضاعة قدامها وجنبها ترمس ماء وعليه كوب
دايما امها تحطه قبل البضاعة تقول عشان اللي يشرب منه يدعي لابوك واخوك)
م كانت بضاعة أمها نفس بضاعة الدكاكين بالعكس كانت بسيطة"شراشف صلاة_وخامات ملونه_ وقمصان روز "وساعات تبيع حناء وسدر تذكر ان امها بدات بالشغله هذي قبل خمس شهور
واللي شارت عليها خالتها ام البدور واللي ساعات تجي مع امها وتساعدها بالبيع
ناظرت لدكاكين الذهب وهي أمنيتها تكون عندها اسوارة ذهب ناعمه مثل اللي عند البدور تحب الذهب بس مع ذلك ولا مره في حياتها لبسته ،صح كان ابوها الله يرحمه يشتري لها بس كانت امها تخبيه وتبيعه لا احتاجت الفلوس صح م تزعل ولا يضيق صدرها بس كانت تتمنى انها تلبسه فترة طويلة
ناظرت لدكان اللي جنبه واللي كان للخناجر والسيوف صح ما دخلته بس زبائنه الكثيره يكفي انه يعلمك ان صاحب الدكان ما يبع الا الشىء الأصلي والدكاكين الثانيه اللي كانت "خضره_بهارات_عبايات_اقمشه"
وغير دكان البقالة واستراحه الشاهي اللي فيها طاولات وناسها كثيره يشربون ويسولفون وساعات سوالفهم اذ ارتفعت تقدر تسمعها
كان سوق شعبي مزدحم وجميل اذ جاءت هنا تنسى هي مين وتنسى همها وتسمع للأصوات والإزعاج العالي وتبتسم ولا تنسى الهوشات والمضاربات اللي يصير فيها
واللي م تنزعج منها بالعكس تضحك وتصير سالفه تقولها للبدور اذ راحت معها للغنم
تذكر قبل فترة كانت هنا تبيع وصارت هوشه خفيفه بس كان السبب تافه بنظرها
"لا تجي عند زبوني لين يخلص من الشراء"
ضحكت بقلبها على السبب يعني شلون ! م يبيع لين يخلص هو بضاعته ؟
انتبهت للي واقفه عند القمصان وتسألها عن سعرها:ب30
الخالة:م يصير ب25
البخت:لا والله ياخاله هذي قماشه من النوع اللي م يشمر(يقصر وقت الغسيل) ولا يتقطع بتخسر اذ بعته لك25
مسكته الخاله وقلبته بيدها اكثر من مره:مافي لون غيره؟
البخت:الا فيه ابيض واخضر وهذاهم على يمينك
لفت الخاله وشافت الألوان ولون اللي بيدها
واللي كان احمر:خلاص اباخذه حطيه لي بكيس
ابتسمت البخت وقامت وكيسته لها ومدته لها
واخذت الفلوس منها حطتها بشنطتها
شوي وتسمع ازعاج عند استراحة الشاهي ولفت لها كان اثنين يتهاوشون ويتضاربون بقوة
وانصدمت من قوة الضرب للحظة خافت وكانت راح تقوم وتسحب الفرشة بعيد عن استراحة الشاهي بس سمعت شخص يدق على الشرطة و يوصف الأشخاص اللي يتضاربون
وكانها سمعت اسم"مسفر وصالح"
يعني هم اللي تهاوشون اسمهم مسفر وصالح ناظرت الحريم اللي جنبها واللي قدامهم بعد بضاعات يبعونها وشافتهم مو معطين الأمر أهميه وكل وحده مدنقه على بضاعتها ترتبها
ناظرت للي يتضاربون وفكرت وش بيكون سبب الضرب هالمرة ذي بعد؟
ربع ساعات ووصلت سيارة الشرطة ونزل منها شخص بنظرها غريب كان مبتسم والنظاره فوق شعره وبيده مسواك
وكأنه متعود انه يجي كل يوم هنا ويحل النزاعات
او يسجن اللي يتمادون !!!
شافته راح للي يتضاربون وفكهم عن بعض و صارخ عليهم
بلعت ريقها بدون شعور لما شافته أعطى واحد منهم كف قوي وصارخ باسمه"مسسفررر انتبه"
شافت الناس تهدي فيه بكلمات"يا ضابط فهد ما يصير تضربه هنا خذه وأسجنه هو اللي غلط على صالح"
رددت بقلبها"فهد"يالله نفس اسم اخوي
ابتسمت من طرى لها شكل اخوها وابتساماته ما كان عصبي نفس الشرطي ولا يضرب الا نادراً انتبهت له يحب رأس الشايب اللي مسؤول عن استراحة الشاهي واستغربت ..
بس ما طال استغرابها لان سمعته يقول"ياعمي اذ صارت هوشات مثل كذا سكر ذَا الاستراحة وارتاح"
ابتسمت لما سمعت رد الشايب"وانت تبي تقطع رزقي عشان ما تجي كل شوي هنا"
لفت للي اسمه مسفر واللي راح وباس رأس صالح
وراح لدكانه الخضرة
و بقلبها"شلون يعني ما راح ياخذهم لسجن؟"
شافت ال"فهد" سلم على الكل ولف لسيارته يمشي
بس خلاص كذا انتهت آلسالفه؟ اجل ليش يدقون عليه وليه يجي بسيارة الشرطة ولا يحطهم فيها!!!
تعدلت بجلستها بخوف من انتبهت له يلف عليها و يعقد حواجبه وكانه يفكر او مستغرب
توسعت عيونها من شافته يتقدم منها و يوقف عندها وهو مبتسم مستغرب:السلام عليكم؟
البخت وعيونها بالارض:وعليكم السلام
الشرطي فهد:وش جديدكم؟
عقدت حواجبها بعدم فهم"وش اللي وش جديد!؟؟"
ولفت الحرمه اللي جنبها من قالت"اللي ودك فيه نجيبه لو انه بالشرق"
من جدها ذي وش اللي شرق ونجيبه يا ويلي هذا لا يكون بياخذ من بضاعتنا بدون لا يشتري وربي امي م بترحمني وتدفني عند غنم خالتي ام البدور
فاقت من سرحانها على صوت وهو ينادي باسم امها "يعني هو يعرف امي ومستغرب من انا!"
ناظرته:انا بنتها وبضاعتنا قدامك اللي ودك فيه وموجود حياك اشتريه
ابتسم وجلس نص جلسه وناظر للبضاعه:وين اجل امك؟
البخت رفعت حاجبها:امي ماهي هنا
حاول ما يضحك:اَي داري وانا اقصد وينها اليوم اجل؟
البخت:مسافره، بتشتري؟
ضحك غصب عنه من حس بخوفها ونرفزتها من اسئلته:عطيني حناء
ما تنكر انه لما ضحك زادت وسامته بس مع ذلك زاد خوفها هي ما قالت شىء يضحك ليش اجل يضحك!
اخذت الحناء وحطته قريب منه:ب60
رفع حاجبه:ب60 متاكدة !
البخت:وش اللي متأكده بضاعتنا هذي ترى
ابتسم:امك تبيعه لي ب30
البخت:امي قالت بيعيه ب60 وما وصتني اذ شفت عسكري أبيع له ب30
ابتسم لذكائها:الله يخليها لك اجل عطيني اثنين منه وواحد سدر
وقفت واخذت اللي قال عنه وكيسته له ومدته له :180ريال
شهقت الخالة جنبها من سمعت الرقم ولفت لها: الله يهديك وش له يالبخت تبيعين له بالهسعر م تدرين ان امك تعز الضابط فهد
رفعت حاجبها اليسار البخت من تدخلها:الله يهديك ياخاله الحين اللي تبيع له امي والا انا؟
الخاله:بس انه زبونك اللي يجي دايما المفروض انك تنزلينه بالسعر
ناظرت البخت للي اسمه فهد وشافته متكتف و مبتسم لدفاع الخاله له:تشتري اهلا وسهلا مو شاري الخاله عندها حناء روح واشتري منها
لف الشرطي فهد للخاله:ماعليه ياخاله منيره هي ما تدري من انا وانا لو ماوصتني امي ما شريت الا لين تجي الخاله مزنه
البخت ابتسمت من وراء النقاب "الحمدلله م غير رايه": فلوسك؟
مد لها الفلوس واخذ الحناء:سلمي لي على امك
البخت:ان شاءالله
الخاله: وقف يالضابط فهد
ولفت للبخت:البخت يابنتي عطيه من الماء البارد خليه يبرد على قلبه
ناظرت البخت بقهر منها ومن تدخلها الغير مرحب فيه وحتى وان كانت طيبه
اخذت كوب وصبت له ماء ومدته له:تفضل
اخذه وشكرها وكان بيلف بس سالها:امك بتجي بكره؟
البخت:لا
هز راسه ومشى وجلست وهي تناظر الحرمه اللي تدعي له وهي مستغربه وش ذَا الغلا الحمدلله والشكر
--------------✨✨✨✨
بالسعودية وتحديداً بيت اهل طلال
جلس بعد ما سكر من فارس وابتسم ليدها الممدودة له بنفجان القهوة اخذه وقال:تروحين معي !
ناظرته باستغراب:وين؟
طلال:في أغراض ودي اشتريها
ابتسمت ولفت لعمها وعمتها:كلنا
ام طلال:لا يمه انا وعمك بنروح للحديقه اللي خلف بيتنا عازمتنا ام صالح وزوجها فيها
بسمه عبست ملامحها:صدق؟
ابو طلال:روحي يابوك واشتري معه أغراض لك
ام طلال بضحكة:خسريه زين يمه
ضحك طلال وبقلبه يكرر"فداها":يممه هذا وانا ولدك
ام طلال:خلها تنبسط قبل لا تسافر
ابتسم وهز راسه:ابشري
ولف لبسمه:روحي البسي عباتك عشان نمشي
بسمه بتوتر:الحين؟
طلال ناظر لساعه وكانت 4العصر:ايي
وقفت ولفت لعبدالله اللي يلعب كورة:عبودي تعال
طلال بسرعه:عبدالله بيروح مع أمي
ولف لامه:صح يمه؟
ابتسمت امه:اَي يمه اصلا صالح وصقر بيجون
سكتت بسمه ومشت تلبس وهي ودها الكل يروح معهم ،من زمان ما طلعوا عمتها وعمها لمشوار
كل مشاويرهم قريبه ويروحون لها رجلي
طلال ابتسم لامه وباس يدها:يابعد روووحي والله
ابو طلال بعصبية مصطنعة:انتبه لها وحطها بعيونك واي شىء تبيه تقول له تم فاهم!!!
طلال:من عيوني
ناظر لعبدالله اللي جلس بحضنه بطفش:طلال ليه م تلعب معي كورة
طلال باس راسه:بروح لمشوار واذ رجعت لعبت معك لين تمل
عبدالله لف وناظره وبتفكير:بتاخذ بسمه صح؟
طلال بضحكة:اَي بس تراك منت برايح
عبدالله:اصلا انا بروح لصقر وصالح وبلعب معهم
وكمل:طلال خلي بسمه تشتري عصير كيوي
عقد حواجبه طلال باستغراب:عصير كيوي؟!
عبدالله بزعل:اَي هي تحبه بس ما تشتريه عشان ما معنا فلوس واجد
طلال ابتسم:على خشمي انت ما تبي شىء اجيبه لك معي؟
ابتسم عبدالله:بسمه تعرف انا وش احب هي دايما تجيب لي اذ انا ما رحت
طلال ناظر لامه:يمه بسمه وش تحب؟
ام طلال بتفكير:البنت قنوعه ياطلال وما تطلب كثير ولا اعرف وش تحب..
تكلم عبدالله بسرعه:انا اعرف ..انا اعرف
ناظره طلال: ها علمني
عبدالله:هي تحب الحذيان نفس حقت العرس
طلال بعدم فهم:وش عبودي؟
عبدالله يشرح وهو يحرك يدينه:احنا رحنا مع أميره صح شفت الحذيان الطويلة اللي لبستها هي تحب مثلها
ام طلال ضحكت:ياحول ياعبدالله يمه طلال يقصد انها تحب الكعب
طلال:اهااا ووش بعد عبودي
عبدالله:تحب تلعب معي كورة
عقد حواجبه طلال:عبودي غير الكورة
ام طلال:تحب يمه الطيب
طلال:صددق؟
ام طلال:ايه مرة سمعتها تقول لأميره هالشىء
ابتسم طلال وسرح
بس ما طال سرحانه وافكاره الا وهي جايه وقف بسرعه ولف لاهله:تبون شىء نجيبه معنا
ابو طلال ناظر لبسمه:انتبه لها زين يبه!
طلال:من كثر ما توصيني نسيت اني ولدك
ابو طلال بقصد:بسمه غاليه يا طلال
ابتسمت بسمه وقربت وباست راسه:يابعد راسي
ابو طلال ابتسم وهمس لها:اَي شىء نفسك فيه قولي لطلال يجيبه لك لا تستحين هاا
هزت راسه و راحت لعمتها وباست راسها وهمست حتى طلال ما يسمع :يمه سويت لك القهوة و حطيت لك من قرص العقيلي بالحافظة تاخذينه اذ رحتوا لام صالح
ام طلال بامتنان:ياعسى ربي يوفقك ويرزقك يابنتي
ابتسمت بسمه وانحرجت لان عمتها رفعت صوتها
وقفت ولفت لعبدالله:عبودي لا تنام لين اجي
عبدالله:يمكن اتعب من اللعب وانام
بسمه:عبودي عشاني لا تنام
عبدالله:خلاص بحاول
ضحكت بقوة بدون شعور منها من كلمته ودنقت عليه:انت زعلان مني
عبدالله:ليه تروحين مع طلال وانتي دايما تروحين معنا للحديقه
بسمه بهمس:بخليه يشتري كل شىء واجيبه لك
ابتسم طلال اللي سمعها..
عبدالله:خلاص بحتريك
وقفت بسمه ولفت لطلال اللي مشى للباب:يلا بسمه
مشت معه وهي مرتبكة اول مره تطلع معه مشوار من تزوجوا مو عارفه وش تسوي او وش تقول وهي معه خايفه ومرتبكة وبنفس الوقت متطمنه من جهته شعور متضاد يهلك قلبها ويزيد توترها
ركبت بعد ما ركب وشغل السياره
وقبل لا يمشي لف عليها : وين ودك تروحين؟
عقدت حواجبها من سؤاله"هو اللي قال تروحين معي والحين يسألني وين ود اروح ؟!":ما اعرف
ابتسم ومشى:مافي مكان ببالك ودك تروحين له ودي امشي لمكان تحبينه
بسمه توترت"شلون تقول له هي ولا مره في حياتها طلعت وراحت لمشاوير لا بحياتها عند اخوانها ولا بعد زوجها منه اصلا الشهور اللي عاشتها عند اهله كانت كل روحتها مع امه لجيرانها وكلها مشاوير قريبه ويروحون لها رجلي":مافي بالي مكان
طلال:نتفق اجل
ناظرته:بأيش؟
طلال:اول مشوار علي وثاني مشوار عليك فكري بمكان تحبينه عشان نروح له بعد م نخلص
ابتسمت:كل الأماكن اللي اعرفها ماراح تصلح لك
ناظرها :ليه
بسمه هزت كتوفها:احساس
ابتسم: تطمني اَي مكان انت بتختارينه بحبه
سكت وهي محرجة من كلمته وهو سكت من سكوتها .
بس تذكر ولف عليها:صح وش تحبين يابسمه
عقدت حواجبها وهي مو فاهمه وش يقصد
طلال:اقصد وش تحبين تسمعين
بسمه ضحكت بعفوية:اهاا
زادت ابتسامته من ضحكتها وبقلبه"ياقلبي ترفق بي"
طلال:ها علميني!
بسمه ببتسامه:بتقول ذوقي قديم
لف لها وبضحكة:افا انا اقول كذا حشى
بسمه بهمس مسموع: قصائد خالد الفيصل
عقد حواجبه:اووهه وش ذَا الذوق الفخم وش يقول خالد الفيصل يا بسمه
بسمه سكتت لجزء من الثانيه وداهمتها صورة امها
والشهور اللي مرت بدونها والسبب للاسف اخوها سعد بضيق:
يقول خالد الفيصل
اتصبر واقول اني على البعد اقوى
والله اعلم بقلب فيه الاشواق حيه .
عقد حواجبه طلال وناظرها ثواني فتح فمه بيقول شىء بس تراجع ولف لطريق
ناظرته ونفس سؤاله:وانت؟
طلال شغل المسجل ولف عليها:هذي من كنت بلندن ما اسمع الا هي
ثواني واشتغلت اغنية لمحمد عبده
عقدت حواجبها من الكلمات اللي اول مره تسمعها
تعترف انها ما تسمع له ابدا .. ولا عرفت وش الاغنية ووش اسمها .. تكررت اسم "بنت النور!!"
وحست ان الاغنية غزليه او حب ما تعرف
ابتسمت من نفسها"والله ما راح تعرفينها لو تسمعينها سنه قدام":طلال!
م سمعها لان مندمج ويكرر كلمات الاغنية
و رفعت صوتها:طلال
قصر على المسجل ولف عليها من سمع اسمه:لبيه
اسكتت من كلمة"لبيه"اول مره احد يقول لها بهالشكل واول مره تسمعها وتحبها هالقد:م اعرفها
طلال:وشهي!
بسمه باحراج:أغنيتك
ضحك وسكر المسجل:م تعرفين محمد عبده؟
بسمه: هو اللي غنى الأماكن صح؟
طلال:صح هذي اسمها بنت النور ولها قصة جميلة
بسمه:صدق؟
طلال:ايه بس بعد ما نخلص مشوارنا اقولها لك
وقف عند المواقف وطفى السيارة:نزلنا
ناظرت للمبنى اللي قدامها"كان كبير بشكل وضخم" .
نزلت بعد ما نزل ومشت معه وهي مذهوله من المبنى الشاهق اللي قدامها وناظرت لطاوله والساحات اللي حوله والناس اللي تدخل وتطلع
مسك يدها ولفت له:لا تتركين يدي
مشت معه و دخلت وانصدمت لما فهمت انه "مول"
دخل اول محل جزمات وهو يتذكر كلام عبدالله: تختارين والا اختار لك؟
ناظرته وناظرت للمحل وهي مصدومه كل الجزمات اللي تحبها وتتخيلها لابستها قدامها بلعت ريقها ولفت لطلال:بس..
ابتسم وكان بيده كعب احمر قاتم :شوفي هذي
ناظرت للي بيده بإعجاب:جميلة
لف للي جنبها واخذها وكان كعب ابيض ويزينه
السلاسل الذهبية اللي تلتف حوله
و ابتسمت بدون شعور:جميل بعد
طلال:لا كذا ما ينفع لازم تختارين
ناظرت للمحل بحيره:كلهم جميلين طيب؟
ضحك وناظر للمحل بمثل حيرتها:صادقه بس انتي وش تحبين !؟
بسمه:احب البيج والأحمر والأسود
تنهدت:كلهم طلال حلوين
طلال تقدم واخذ كعب اسود مخمل تزينه كريستالات فضية على جوانبه:ذي حلوة
ابتسمت وهزت راسها بايه
اخذ ثانيه وكان الكعب الاول الاحمر القاتم:وذي عاد الثالثه عليك اختاري عشان نروح لمحل ثاني
ناظرت لرف السبورات "دامه اخذ كعبين
باخذ سبورت ابيض لمشاوير الحاره مع عمتي"
واخذت سبورت بيضاء فيها خطين وردي وازرق:هذي !
ابتسم واخذها مع اللي أخذهم و وداها المحاسب
حاسبهم وطلعوا
دخل محل فساتين:نشوف هذا
بسمه بتردد:طلال ما يحتاج احنا م عندنا عزايم
كثيرة
طلال بتفكير:ناسيه أميره وعزايمها
بسمه:بس انا ما اروح الا نادراً
طلال ابتسم:والحين بتروحين كل ما حبيتي
تعالي اختاري
تنهدت ومشت معه تتفرج
كانت الفساتين جميلة و مختلفة وتخلي الشخص يحتار غصب:طلال والله صعب اختار
ابتسم ووقف عند فستان احمر من الشيفون طويل: هذا حلو
بسمه: ايه
اخذه وأخذ ثاني باللون الأخضر مخملي له أكمام منفوخه وضيق لين نص الساق
ناظرت بين الفستاتين تدور فستان اسود دام اخذ لها احمر واخضر هي تبي اسود
شافت فستان اسود مخمل تمسكه تعليقات من السلسلة الفضيه ضيق ويوصل لحد تحت ركبتها
ابتسمت وحبت تاخذه بس ترددت لان عاري من فوق وما يمسكه الا سلسلتين فضيتين على الاكتاف لفت لطلال وشافته يدور شافت المحل وزبائنه وكانوا مو قليلين
ورجعت ناظرت الفستان وهي صدق ودها تاخذه
تقدم منها طلال وبيده فستان:أعجبك؟
ناظرته باحراج:ايي
ابتسم واخذه ومشى للمحاسب وطلعوا من المحل ودخلوا محل غيره ومن ثم غيره..
لحد ما اطلعوا من المول وبيده كل واحد اكياس هالكثر وهي منحرجه منه وخجلانه
كان كريم معها وما قصر بشىء بالعكس اَي شىء تشوفه يجيبه لها بدون لا يتردد
وياكثر ما لاحظت ابتسامته لها وقت تحتار ووقت تخجل وقت تتردد ،كان صبور كثير ورايق معها
ركبت السيارة بعد ما ركب وقال الساعه٨
تذكرت لما دخلت وقت صلاة المغرب وخافت انه ما انتبه وهي ما تعرف وين ممكن تصلي لان ما بحياتها دخلت لمحلات كذا
وقت مسك يدها وما تركها لحد ما وصلها للمصلى الصغير الموجود بالمول
كيف لما طلعت لقته واقف ينتظرها و وقت قربت منه مسك يدها وسألها"مبسوطة بسمه!"
هي فعلا اول مره تحس انها مبسوطة هالقد مبسوطة لدرجة انها تحس نفسها فوق الغيم اشياء بسيطة كانت الا انها ما كانت بسيطة بقلبها ،وحتى لما خلصنا وجينا بنطلع من المول شد على يدها وقال"في خاطرك شىء قبل لا نطلع!"
يالله كيف كلمات بسيطة منه زرعت بقلبها امتنان كبير له وشكر مو عارفه كيف ترده لها هي فعلا ممنونه له بشكل يخجلها منه
طلال بطلعته ذي قاعد يوصل لها رسالة هي فهمتها من اول م دخلت معه هالمول
قطع سرحانها صوته:بسسسمه؟
بسمه عضت شفتها بإحراج:سم
ابتسم:اكيد تفكير بالمكان اللي بنروح له
ناظرته لجزء من الثانيه بعدم فهم وبعدها تذكرت اتفاقهم العصر:نروح له الحين؟
طلال:اييي
بسمه بتردد:وعمي وعمتي ما طولنا عليهم؟
طلال:دقيت عليهم وقالوا انهم بيتعشون عند قوم ابو صالح يلا لا تغير الاتفاق اعطيني الأسم
ابتسمت وقالت:....
--------------✨✨✨✨
الأحساء تحديدا بيت البخت
رجعت من السوق وجلست بالحوش بتعب نزلت شنطتها وانسدحت على الفرشة
"اخخ تعبت من الجلوس"
نادت :سوماا .سسوما .. أووه صح الخدامه راحت مع امي تساعدها يالله مالي خلق اقوم او اشتغل
دق جوالها تنهدت بكسل وطلعته من شنطتها
وشافت اسم البدور":هلا البدور
البدور:جيتي من البسطة
البخت:ايي
البدور:تعالي عندنا الليلة بتنامين عندنا
البخت بخوف:ليه امي فيها شىء
البدور:لاا بس متعب يقول يمكن ينامون بالمدينه الليله ويجون بكره .
البخت:غريبه امي ما دقت علي!!
البدور:يقول متعب جوالها طفى شحن يمكن على الليل تكلمك
البخت تنهدت براحة:الحمدلله اجل ارتاح ساعتين واجي لكم
البدور:انتظرك سلام
سكرت منها ونزلت الجوال و رجعت انسدحت مع انها مالها ابدا خلق تروح وتزور بس هي خوافه ودايما اذ امها راحت عشان البضاعه تنام عند البدور لين ترجع
عقدت حواجبها من داهمتها صورة ذاك العسكري
"ياترى وش قصته؟ وليش حست انه محبوب بين الكل ؟ اصلا كيف عسكري وماياخذ احد لسجن و خاصه وان هوشت اليوم كانت واصله لضرب؟
بس اللي نرفزني جد تدخل ذيك الخالة ابدا مالها داعي تحرجني وتتحكم وتتآمر علي قدامه وهو الغثيث كان يضحك ومستانس عليها يوه نفسي اضربه قسم بالله بس صدق يمكن هي تحبه عشانه جميل وتحجزه لوحده من بناتها و ضحكت من وصلت لهالفكرة اَي بكيفها عساها تزوجه وانا وش دخلني اصلا انا عندي اللي مالي عيني وابتسمت من تذكرته"متعب"
ياترى هو يحبني !!!!
او يفكر فيني اقلها؟
لا لا متعب رجال محترم وثقيل وينه ووين الحب
والخرابيط اصلا من كلام اخته كل همه دراسته وبس يعني ما راح يفكر فيني آو يلتفت لي لين يخلص دراسته ،هذا اذ ما زوجته امه قبلها
ابتسمت برضا تام على قناعتها هي تحبه بس ما تفكر ترمي نفسها عليه او حتى تقول له عن هالحب اذ اخته اللي ما أخبي عنها شىء ماقلت لها عن إعجابي باخوها اروح اقول له هو مجنونه انا والا قليله شرف يكفي اني احبه بيني وبين نفسي وتاركه كل شىء للأيام تبينه يا يحبني ويتزوجني ، يا يتزوج اللي تختار له امه
رجعت تتذكر ذاك العسكري وكيف يعرف امها وليه مهتم فيها ؟ حتى الخاله اللي شوي وتدخله بعيونها ما حسيته بدالها الاهتمام! وانا ليش افكر ادق على امي واسألها .. يمكن تعرفه لحظة يمكن ما تعرفه عاد اذ هو يكذب علي هنا مصيبة ما يمديني اشتكي عليه وهو شرطي هففففف
وقفت من حست انها تمادت بالتفكير فيه وهو ما يستاهل حيالله عسكري يعرف امي فقط
دخلت للبيت وثم غرفتها تتروش ثم بعدها تروح لبيت البدور ..
--------------✨✨✨✨
الصبح الساعه 8_تحديدا لندن
كانت تمشي وبيدها اليمين آيه وبيدها اليسار إياس تبي توديهم لمواقف الحافلات بنفسها عشان يروحو للمدرسه وبنفس الوقت تتصادف مع ذاك الأجنبي"فارس" وتروح معه لشركة اللي تشتغل فيها .
إياس بنعاس:إبـراق ليه قيتي ماجاءت
إبـراق:قيتي بتروح لاهلها اليوم ،نسيت هي امس تستأذن عشان تروح لهم؟
آيه:ليه ما نروح مع لانا
إبـراق:ما يصير آيه نروح مع لانا كل شوي بعدين يتضايقون منا
إياس:انا قلت لها بس هي ما تفهم
إبـراق:آيه لازم تسمعين كلام إياس لانه دايما يكون صح تمام؟
م ردت آيه وشافت الباص وتركت يد إبـراق و ركضت له
تنهدت إبـراق بضيق من عنادها لفت لاخوها:إياس حبيبي انتبه لها
إياس:طيب انتي بتجينا الظهر؟
إبـراق ابتسمت وباست راسه:اكيد حبيبي
رفعت راسها وانتبهت للاجنبي"فارس" وزادت ابتسامتها أووه هذا هنا؟
يلا احسن مالي خلق اروح للكوفي وبعدها مشوار الشركه وكلهن بياخذون وقت مشت له بعد م قالت لاخوها ينتظر شوي وقفت خلفه وكانت بتحط يدها على كتفه
بس هو لف وانصدم منها :انتي!!
إبـراق :نعم انا ماذا تفعل هنا؟
فارس ناظرها وناظر لعزام اللي لف ظهره قبل لا تناظره ولف لإبـراق :اتحدث مع صديق
إبـراق :هل لا زلت تتذكر موعدنا؟
فارس :بطبع أتذكره وكنت ذاهباً للكوفي حتى التقي بك بعد ان أودع صديقي
تنهدت براحه:حسنا سوف انتظر هنا حتى تنتهي وبعدها نذهب اذ لم تُمانع ذلك !
فارس :لا مانع لدي افعلِ ما تريدين
ابتسمت له ومشت لإخوانها
إياس باستغراب:من هذا إبـراق ؟
إبـراق اجلست نص جلسه:شخص طيب بيساعدني بمشكله صغيره
ناظرت لأيه اللي واقفه ونادتها بصوت شبه عالي: تعالييي
هزت راسها بلا ولفت وجها للجهة الثانيه
وقفت ومشت لها:آيه ما يصير اللي تسوينه كذا تخليني اخاف
آيه:ليه تخافين
إبـراق:لانك عنيده وما تسمعين لي مثل إياس وانا اخاف اذ ما سمعتي لي يجي جدي ويأخذك عني
ناظرتها آيه وبخوف:بس انا م ابي اروح لجدي
إبـراق بقصد:ولا انا ابيك تروحين له بس جدي بيعرف انك م تسمعين كلام اختك الكبيرة ويأخذك عنده وما تشوفيني انا وإياس ابداً
امتلت عيونها دموع آيه وبغضب: انا م ابي اروح لجدي
لف لهم فارس ورفع حاجبه وهو منتبه لهم
إبـراق بضيق:طيب لا تبكين
جاء إياس وضم آيه:ماراح تروحين انا باخذك عن جدي
ولف لإبـراق:لا تقولين لها عن جدي
إبـراق تنهدت وجلست بمستوى آيه:لا تبكين
خبت وجها بصدر اخوها وما ردت
ابتسمت إبـراق:خلاص انا اسفه بس انتي لا عاد تعانديني
آيه ناظرتها وببكي:لا تخليني اروح لجدي
إبـراق:تسمعين كلامي وما تعانديني ابدا !!!
هزت راسها بايه
إبـراق:وعد م أخليه ياخذك الحين امسحي دموعك
مسح دموعها إياس وابتسم لها
لفت لإبـراق وضمتها:إبـراق
إبـراق شدت عليها:ياقلبها انتي
عزام قرب منه وبهمس:خلاص بتلاحظ انك مركز معهم
فارس وعيونه للحين عليهم:في شىءغريب يخصها يخليني بدون شعور منتبه لها ولو اني كاره
عزام ناظر لإبـراق وبزلة لسان:الله يكون بعونها
عقد حواجبه فارس من كلمته وناظره:ليه؟
ناظره عزام بوهقه:اقصد اخوانها صغار وهي تهتم فيهم بس
ناظره فارس بدون لا يعلق
عزام حك جبينه بإصبعه السبابه:وش؟
فارس:يكون بعونها!؟
سكت عزام ونزل عيونه عن نظرات فارس
فارس بسؤال:فيه شىء يا عزام ما اعرفه صح؟
عزام:انتي مو صاحي الحين عشان قلت لها الله يكون بعونها تقول فيه شىء
فارس رفع حاجبه:عزام تنطق والا خليتك تنطق غصب !
اخذ نفسه من حس ان فارس قافطه من زلت لسان صغيره وهالشىء يبين دهائه:اذ جيت لشقه علمتك
ولف بيمشي:وانتبه لها
ناظره فارس بغموض من اخر كلمه قالها والأكيد ان في أشياء غايبه عنه تخصها ويعرفها عزام و هالشىء معناته ان عزام للحين ما وثق فيه!!!
لف لها وبسؤال"مين انتي"
تنهد وتقدم منها بعد ما ركبت اخوانها الباص:هل نذهب الان؟
ناظرته إبـراق وناظرت لاياس وآيه:حسنا
ناظرهم فارس وابتسم لهم
وناظر لإبـراق اللي تودعهم وبالعربي:إياس انتبه لآيه
إياس:هذا مين!
إبـراق:هذا اللي قلت لك عنه
ورفعت يدها تلوح لهم:راح اجي الظهر آخذكم من المدرسه زين!
آيه وبملل:ومانروح مع الباص طيب؟
ناظرتها إبـراق واضحكت:ياكثر دلعك نركب تاكسي؟
آيه:لا سيارة المربية قيتي
إبـراق تنهدت :إياس علمها قيتي وين يلا باي
ولفت لهم ظهرها بدون لا تمشي
ناظرها وناظر لإخوانها اللي يناظرونها !!ومشى الباص
لفت وناظرته وتنهدت بحزن"مو هنا مكانكم والله"
لفت للأجنبي :فلنذهب ومشت
مشى معها وهو مستغرب
فكر بحركتها وليه لفت لهم ظهرها وهي اللي ركبتهم و ودعتهم؟
اخذ نفس"هي جاءت على حركتها، كل شىء يخصها مو مفهوم"
فارس :هل مكان عملك بعيد؟
إبـراق :لا ولكن سوف ننتظر الحافلة القادمة
فارس :اذ لنأخذ سيارةًاجرة !
إبـراق ناظرته وابتسمت :ماذا الم تركب حافلة من قبل؟
فارس:نعم لم اركب حافله في حياتي
ناظرته بصدمه:هل حقاً ما تقول؟
فارس:أخبرتك من قبل انني غني!
بتذكر:اهااا لقد تذكرت ذلك
وابتسمت:الم اقل لك انك تتفاخر امامي بانك غني
ضحك وجلس بعد ماجلست بكراسي الانتظار :وهل هذا شىء جيد اما لا؟
إبـراق :لا عليك قد كنت في وقت ما غنية والآن اني فقيرة
فارس بذهول:أحقا ما تقولين؟!
إبـراق:نعم فوالدي غني وجدي غني وأيضا صديق والدي غني وهو بمثابه والداً لي
فارس:وكيف تقولين انك فقيرة؟!
إبـراق ناظرته ولفت لقدامE:والدي مات وجدي يكره رؤيتي وصديق والدي قد دخل السجن مؤخرا و آلان لأحد منهم معي ،إذاً انا فقيرة وأعيل نفسي وإخوتي
فارس ناظرها:الم يترك لكِ والدك أمواله؟
إبـراق ضحكت بقهر:وكيف يتركها لي وقد اخذها جدي
فارس باستغراب:ان الأمر بسيط طالبي بها فهي لكِ ولا شأن له جدك بأن ياخذها!
إبـراق :لن ينفع معهُ هذا الامر فلقدّ فعلتُها سابقاً وهددني بأن يأخُذ اخوتي مني فتركتها له
فارس:لقد ظننت بأنه رجل طيب فكل الأجداد طيبين ولُطفا
وقفت إبـراق من شافت الباص:اني أعيش بين أشخاص مختلفين لم يقتصر الامر على جدي
ولفت له :أتت حافلتنا فلنركب
وقف فارس وهي يفكر باخر كلمه قالتها ويحاول يفهمها وركب بعدها وشافها واقفه وماسكه باللي تنزل من سقف الباص مثل المسكه ويحطونها
عشان يمسكونها اللي مالهم كراسي
ولكن وقفه السائق:المال !
نظره فارس باستغراب وكان بيتكلم بس سبقته إبـراق ومدت له البطاقة وبعد ما اخذ حق الركوب رجعها لها ابتمست له
ولفت للأجنبي"فارس":هيا
ومشت وقفت بنفس مكانها وناظرته :فلتقف بجانبي ولتفعل مثل ما افعل
تقدم فارس ومسك بالمسكه :شكرا لك ولكن لم اكن أظن ان ركوب الباص يحتاج مالاً
إبـراق:لا عليك
فارس:سوف اردها لكِ حينما ننتهي من هذا المشوار ،وناظر لناس
كان باص مزدحم ومليان ناس
وكل الكراسي مليانه،وأنواع الازعاج والسوالف بأكثر من لغه
ناظر لإبـراق وشافها تناظر لمكان معين ..
ناظر لوين م تناظر وشاف شخص بيقوم من كرسيه
ومع بنته والواضح بيوقفون عند الباب عشان ينزلون اذ وقف الباص
وفعلا مشوا للباب وراحت إبـراق على طول وجلست ولفت للأجنبي"فارس":لقد حصلت على كرسي لنا هيا
تقدم منها وجلس بجانبها وهو مذهول من كل شىء
إبـراق ابتسمت:أتعلم لما احب ركوب الباصات؟
ناظرها فارس يحثها على الكلام
إبـراق:لاني لا افكر سوا ان اجد كرسي لي حتى اجلس عليه
فارس بذكاءE:وهل هناك أمور لا تريدين ان تطيلي التفكير بها؟
ناظرته بذهول:كيف علمت ذلك؟
ابتسم:حزرت فقط
إبـراق:نعم وسكتت
ناظرها وثم ناظر لقدام محترم سكوتها.
بعد نص ساعه وقف الباص إبـراق:هذه وجهتنا فلننزل
وقف وخلها تمر بحكم انها جالسه بالكرسي الي جنب النافذه وهو بالي جنبها
وانزلت ونزل معها وقالتE:نهايه هذا الشارع
سوف ترى واجهة الشركة
هز راسه ومشى معها وفعلا مجرد م انتهى الشارع الي كان تسعه متر
شاف الشركة والي كانت ضخمه
وطوابقها عاليه جداً
انتبه لمواقف الباصات وسألها:هل هذه باصات السياح؟
إبـراق:نعم
ولفت عليه قبل يدخلون الشركة :فلنتفق
عقد حواجبه :بماذا؟
--------------✨✨✨✨
بالأحساء وتحديدا البسطة
عند البخت الي جالسه قدام بسطتها
وبيدها دفترها تكتب فيه بدال الملل
لفت لمكان الخالة الفاضي "اليوم ماجاءت!!"
وارجعت ناظرت لناس الي مو كثيرين
واستغربت هالشىء !
ياترى اليوم وش عشان الاغلب م جاء
اذ ماهو يوم الجمعة اجل ايش؟
تنهدت بحيره وتوتر لان م في احد يبيع من الحريم الا هي !
واستراحة الشاهي مفتوحة واغلب الطاولات فاضيه
ودكان الذهب مسكر بس دكان السيوف والبشوت فاتح!! والباقي نصهم فاتح ونصهم مسكر
ليكون فيه حدث مهم وانا م ادري عنه والكل منشغل فيه؟!!
نزلت عيونها لدفترها وفكرت تكتب وتشغل نفسها عن الهواجيس
الي كل مالها وتكبر بصدرها وتصير خوف وتوتر
"اليوم الاربعاء 2012 ،الساعه10
‏سلامٌ على عينيك يا أبي التي كانت تنثُر الضوء في وحشة أيامي سلامٌ على روحك التي كانت كالمأوى سلامٌ عليك يا حبيبي ..
‏أفتقدك جداً وعلي السّلام فيما أفتقد"(منقول")
واكتبت بطرف الصفحة"‏أحسنوا لمن تحبون
‏فإن الشوق بعد الموت لا يطاق"
وسكرت دفترها وارجعت تنتظر الناس
بعد ربع ساعه محد جاء لها
فكرت تروح تسال الي يبيع الشاهي
يمكن تكون فيه مناسبه والكل راح لها وهي الخبله م درت !!
بس قطع تفكيرها الشخص الي وقف عندها
ابتسمت اخيرا في احد يشتري
وارفعت راسها وتوسعت عيونها وبدون شعور:انت!
ابتسم:اَي
البخت باستغراب:بتشتري!؟
واستوعبت سؤالها الغبي
توسعت ابتسامته:يمكن على حسب السعر
البخت:حناء بعد
م تحمل وضحك:م تبني اشتري والا كيف؟
البخت بسرعه:لا م اقصد
فهد وهو مبتسم:زين عطيني من الاقمشه ذي
وجلس نص جلسه ناظرته ثواني وبعدها طلعت له الاقمشه وحطتها قدامه اخذ واحد منهم لونه اسود ومنقوش بورد:هذا حلو
م كنت منتبه للي بيده كثر انتباها فيه
رفع نظره لها وشافها تناظره رفع حاجبه وبغرور:ادري اني جميل
لاشعوريا عفست ملامحها بقرف من غروره:نعمم
ابتسم:انكري اني مو وسيم؟
سكتت وهي ودها جد تهفه كف عشان تمحي ابتسامته وأسنانه الي مستانس فيها
البخت: اجهرتني بجمالك صراحة
م تحمل وانفجر ضحك
تنهدت بقهر منه ولفت وجها عنه وانتبهت لبسه
قريبه من بسطتها كان لونها ابيض وعيونها بنفسجية لاشعوريا شدتها لون عيونها
ووقفت:اختر عشان أحاسب عليها
ومشت للبسه جلست ومدت يدها وكشت البسه
ابعدت يدها بسرعه وابتسمت اكثر
ومدت يدها مره ثانيه وحاولت تسمح عليها
بس قبل توصل يدها لشعر البسه سمعت صوته:تراها بتخمشك
البخت:مو شكله ومدت يدها وامسحت عليها
فهد:شلون كذا هاديه معك
ابتسمت البخت:يمكن عشانها عرفت اني احب البسس
فهد وقف بجنبها:اجل تحبين البسس
البخت بعفويه:أووه كثير اذكر كنت اتهاوش مع
امي عشانهم وكان فهد يفزع لي
ضحك وبمزح:ما اذكر اني فزعت لك
وقفت مسح على البسه وناظرته بدون لا تتكلم
مزحته بايخه بس..
فهد لما شاف سكوتها ونظراتها حس باحراج :معليش انا بطبعي مزوحي ثقيله
البخت لفت للبسه:اخوي اسمه فهد
فهد:الله يرحمه
البخت:ما راح اسال كيف عرفت لان واضح ان امي قالت لك بس بسألك كيف عرفت امي ؟
فهد:قبل فترة مو طويله بحكم اني اجي هنا وافك النزاعات اللي تصير
البخت شالت البسه وحطتها بحضنها:اي واضح
فهد باستغراب:كيف؟
البخت: صارت امس هوشه ما سجنتهم ليه؟
ابتسم:طيب تراضو واعتذروا ليه السجن ؟
سكتت البخت وشافت البسه تحاول تنزل عن حضنها: وين بتروحين؟
خافت تخمشها ونزلتها تشوف وين بتروح ومشت لين رجلين فهد
ناظرته وناظرت للبسه وبتعجب:تحبك!!!
ضحك واخذها:يمكن
البخت تلفتت :ودي أخذها بس يمكن لها راعي
فهد:حبيتيها؟
البخت:كثير
فهد بقصد:والله حتى انا
ابتسمت:بدليل انها عندك
شاف البسه اللي نزلت وراحت للجدار:حست ان اليد الناعمه تبدلت ليد خشنه ونزلت عن حضني
البخت ضحكت: ما تغلط
فهد بضحكة:اقول لك يد ناعمه وتقولين م تغلط
طيب يابو عرادة تبينها كذا؟
ما تحملت وانفجرت ضحك:لا وش ابو عرادة انت الثاني
فهد:انا ادري عنك ،تعالي اذ تبين البسه خوذيها
البخت باستغراب:يصير؟
فهد ببتسامته: يصير
البخت ناظرت البسه اللي قريبه منهم:والله عيونها جميله سبحان الله
فهد بدون شعور:اَي والله وحتى صوتها
لفت له البخت:صوتها؟؟!
فهد بربكة:اييي ما تسمعينها تماوي
البخت:ما سمعت كيف سمعت انت؟!
فهد:قولي ماشاءالله لا يصير بأذني شىء
ابتسمت:م توقعتك كذا بس بقولها ماشاءالله
فهد:شلون ما فهمت؟
البخت:يعني تكون من اللي يخافون من العين و على اَي مدحة لازم ماشاءالله
فهد:العين حق
البخت وقفت:صح شريت شىء؟!!
فهد بكذب:لا القماش ثلاث متر وانا ابيه خمس متر
البخت بتفكير:ما اتوقع فيه
ابتسم:اجل اجي بكره وتكونون وفرتوه
البخت:ما اظن لان امي للحين م جاءت
فهد:غريبه العاده ثلاث ايام وتجي اليوم كملت اسبوع
ناظرته بذهول:كيف عرفت؟!!
ضحك من نبرة صوتها:ترى امك غالية علي
البخت:مع ان ودي اعرف من متى وكيف بس انا اعرف امي تدخل القلب بسرعه
زادت ضحكته:الله يخليها لك
واخذ نفس من كثر الضحك:على فكرة ضحكت اليوم كثير والسبب أنتي وهالشىء يعتبر نادر
البخت:لا تعليق
لفت للبسه وشافتها عند رجوله:هي له كل شوي عندك؟
فهد ببتسامه:غيرانه مني ؟
البخت:لا طبعا بس انت وش أعطيتها !
فهد اخذها ومدها لها وأخذتها وهي متستغربه: صارت لك
البخت:وين اخذها وهي مو لي
وتلفتت:الحين يجي راعيها ويأخذها
فهد:خذيها وحلال عليك
ناظرته البخت:تعزمني انت على شىء مو لك؟
ضحك:ايي
نزلتها وشافتها مشت لفهد:ماهي حقتنا لا نتعازم عليها وبعدين شوف كل دقيقه وهي عندك
فهد:طيب خوذيها انا ما ابيها
البخت من استوعبت:حقتك هي؟؟؟!!
ضحك:بدري
البخت بذهول:امانه حقتك؟؟؟
فهد:والله حقتي جبتها عشان أمشيها بدال حكرة البيت وبعدين ما انتبهتي اني جاي بلبس مدني
ناظرت لبسه اللي كان عباره عن ثوب ابيض وشماغ احمر
وعضت شفتها من فهاوتها:ما انتبهت
فهد اخذ البسه ومدها لها: لا تنزلينها لين توصلين للبيت
البخت:واقعد طول جلستي بالبسطة وهي بحضني؟
فهد ناظر للبسطة: اتوقع اليوم ما بتبيعين
البخت:ليش؟
فهد:اليوم الاربعاء وفاتحين سوق حمام ودجاج
باخر القريه عشان كذا ما فيه احد اليوم
البخت وكانها فهمت ليش محد فيه اليوم:امانه عاد
طيب كل أربعاء يعني ما فيه سوق هنا؟
ابتسم من كلمه امانه اللي طلعت عفوية منها:اَي
البخت:يعني اروح لبيتنا؟
فهد:شىء يرجع لك بس انا قلت لك م اتوقع بتبيعين اليوم
سكتت ثواني:لا اجل ارجع لبيتنا
ابتسم:زين
ولف بمشي:انتبهي لها ولا تطلعينها من البيت لحد ما تتعود عليك
ناظرت للبسه وناظرته وابتسمت:شكرا
فهد رفع يده ولوح لها ومشى
مشت للبسطه وغطتها واخذت المهم وترمس الماء وراحت لبيتهم وهي مستانسه على البسه كثيررر
--------------✨✨✨✨
عند ابراق ..
ولفت عليه قبل يدخلون الشركة :فلنتفق
عقد حواجبه :بماذا؟
إبـراق نزلت عيونها وبضيق :بانني شخص عزيز عليك ،وأنك تعرفني من ذو مدة طويلة
و رفعت عيونها وكملت:من أجل المدير فقط
فارس:حسنا
ناظرته باستغراب توقعته يسال ليه او اقل شىء يستغرب !
بس حمدت ربها بقلبها ومشت لداخل مشى معها وهو يتأمل الشركه الكبيرة والناس والباصات اللي اعدادها فوق 44
ما ينكر انه لما دخل الشركة انصدم من فخامتها يمكن ما توقع هالفخامه موجوده بشركات مثل شركات السياحة والسفر كانت واجهة الشركه مثل استقبال الفنادق جهة فيها الرسبشن وجهة فيها كنب وطاولات حتى يجلسون فيها العملاء وغير فخامة الجدران والتحف واللوحات
دخل المصعد معها وقبل لا يتسكر دخل معهم شخص واضح عربي بس من جنسيه ثانيه عدل الكاب من انتبه انه يكلم إبـراق
الشخص:إبـراق هو انتي بتعملي هنا إيه؟
إبـراق بملل:للحين ما انفصلت يا حسن ..
حسن المصري:أوعي تفكَري اني عاوزك تنفصلي
انا كُنت بس مستغرب
إبـراق ابتسمت مجامله
ناظر للي واقف جبنها وكان لابس بنطلون اسود
وجاكيت بالطوا زيتي وكاب اسود: دا مين؟
إبـراق:قريبي ،وممكن ما تسال تأني اصلي انا مش عيزه اتكلم كتيررر
حسن باستغراب:ليه هو مالك ياإبـراق !
إبـراق:مافيني شىء وسكتت
ناظرها حسن وبعدها لف عنها وبهمس:مش حتغيري طبعك خالص
ناظرته إبـراق ولفت عنه
انفتح الباب وطلعت منه وطلع منه فارس بعد ما شاف انهم بالطابق 20 ..
لفت له من تذكرت شىء مهم :لم تخبرني ماهو اسمك؟
ابتسم :لقد ظننت انك تعرفين اسمي لانك لم تسألي عنه
إبـراق بإحراج :انا اعتذر
عقد حواجبه :لما الاعتذار؟
إبـراق :انا حقا نسيت ذلك
فارس مد يده :مارتن
ابتسمت:لن تستطيع ان تنطق اسمي الحقيقي لذا يمكنك مناداتي بـجين
فارس:لِم!!!
إبـراق:الكل لا يجيدون نطقه فمللت هذا الامر
فلنذهب
مشت ولفت لسيب وبالعربي:يارب يكون فيه
ودخلت بمكتب السكرتير:ستيفن هل المدير هنا؟
ستيفن ابتسم لها ووقف:اهلاً ياجميلة
إبـراق بنرفزه:ستيفن اجبني هل هو هنا ام ذهب ؟
وقف بجنبها ستيفن:لمِ كل هذا الغضب؟إبـراق:أخبرتك من قبل انني أكره الحديث معك
ستيفن ببتسامه:ولكن تعلمين انني احبك
إبـراق بهمس:عسى تحبك جنيه لا تصلي ولا تصوم
و رفعت صوتها وبغضب:وأخبرتك باني أكرهك
ستيفن ضحك:سوف تحبيني مع قادم الايام
إبـراق باستهزاء:يبدو انك لم تنم ليله الامس من كثرة الأحلام
ستيفن:تعلميني انني احلم بك ولا تبادليني هذا الحب كم انتي قاسيه ؟
إبـراق تنهدت بقرف منه:انا حقاً أكره الحديث معك فأنت لا تحترم حجابي واني فتاة عربية تكره ان يتحدث معها بكلام غير محترم فلتذهب أنت وحبك للجحيم
ودخلت لمكتب المدير بدون حتى لا تطلب الأذن كانت طول ما تتكلم مع ذَا اللي اسمه ستيفن
ضاغط على يده بقهر ونرفزه
هو صح ما يكن لها مشاعر ولا يعرفها بس حس بغضب من كلامه ووقاحته معها بالاخير هي بنت ديرته واللي حس فيه من غيرته عليها تمنى انه مد يده حتى يفرغ الغضب اللي داهمه
وهو بطبعه هادي وجداً بس م يعرف ليش تنرفز ما ينكر أعجابه بردودها ولا ينكر الابتسامه اللي داهمته من دعوتها بس كان الغضب سيد مشاعره
دخل بعد ما أعطى ستيفن نظره تركته يرجع لمكتبه وهو يبلع ريقه بتوتر وربكه
شافها جلست والواضح بتنتظر المدير وجلس بالكرسي المقابل لها :هل نحنُ ننتظر المدير؟
إبـراق :نعم وتكتفت