يَا نَجمِي اللي تالِيَ الليل وقَّاد

‎١٠-ما خسرت من السنين الفايتة من عمري ، كون بعض سنيني اللي ما عرفتك فيها

{استرجاع للأحداث}-> فجأة سمعت صوت من وراها

—: ليش رحتي؟

جيلان: أعوذ بالله .. من انت؟

—: انا هزاع بس تكفين جاوبيني أول ، ليش تركتيني خمس سنوات؟ وين الوعود اللي قطعناها ؟

جيلان دمعت عينها و هي تسمع نبرته المخذولة و قررت انها تقول له كل شيء : انا كنت مريضة نفسياً يا هزاع
ما كنت اقدر أجي الا اذا تعافيت و تأكدت ان المرض راح

هزاع انقبض قلبه بقهر : بسم الله عليتس ، وش كان فيتس ؟

جيلان قالت و صوتها فيه رجفة و على وشك انها تبكي: اكتئاب و اضطراب فقدان الشهية اللي خلاني اعاني من أمراض جسدية كثيرة و صرت هزيلة و ما اتحرك بالسَّاهل ، لكن والله ما توقعت انه راح ياخذ كل هالوقت عشان اتعالج .. والله اني آسفة ليش زعلت علي؟ ترا والله الموضوع ماكان بيدي

هزاع قال بندم: لا تتأسفين و الله انا اللي آسف اني ظلمتتس و شكيت انتس تكرهيننا و احسبتس تخليتي عننا

جيلان مسحت دموعها و عصبت : ليش اتخلى عنكم ؟ غبية انا عشان اترك اللي اغلى من روحي علي ، والله اني غير أزعل *اخذت الشاي و راحت و هي معصبة *

هزاع كان متأثر بس انفجر ضحك على حركتها الأخيرة و كان يضحك براحة لأول مرة من خمس سنوات ، أو بالأصح*لما راحت جيلان *

في بيت الشعر دخلت جيلان و هي معصبة و جلست عند ترف اللي كانت تضحك على شكلها

و دخل بعدها بدقائق هزاع و هو مبتسم

ريحانة : يا ويلي الولد مبتسم ولا انا انعميت

ذكرى : الله يبارك باللي خلاك تبتسم، يووه من زمان عن هالمبسم !

هزاع قال بصوت عالي عشان تسمع جيلان: اللهم آمين الله يبارك به

سامية : دامك توك جيت ترا قررنا قرار

هزاع: وش هو ؟

ريحانة: بكرة نبي نطلع للبر

هزاع : تم بس ودي بشيء

ذكرى: أبشر به ، وش الشيء؟

هزاع ابتسم : الله يبشرتس باللي يسرتس ، تجون معي بسيارتي

ذكرى فهمت حركاته : اهااااا ايوه كذا نظامك يعني هههههه

هزاع: خالتي عاد بدون معارضات تكفين

ذكرى: خلاص تم ما طلبت شيء

هزاع: كفو يا بعد عيني

[*و قاموا الخالات عشان يجهزون الأغراض لأن بكرة بتكون الطلعة *]

جيلان قالت بقلبها : هذا ما يكفي انه نشب لي و خلاني أعصب و بعد يبي ينشب لي بكرة بعد!  *بعدها قالت لترف باذنها* اخوتس نشبة النشبات و تراه ورع و ما راح احتسي معه ليوم القيامة