ضلال الحب (باللهجة العراقية)

البارت السادس عشر

ضلال الحب
البارت السادس عشر
بقلم روجينا

**********************

سمرة

صار أكثر من أسبوع على روحت عمه ميثاء لسوريا ما نعرف عنها شي و كلش مشتاقه الها لان بس هيه جانت تجي تشوفنا
كمت من الفجر عجنت و بعدين غسلت الحوش و شوي رتبت البيت

_ يمه رايحه اشعل التنور

_ اي يمه ديري بالج من النار

_ اي يمه

طلعت شعلت التنور و كعدت على بلوك اشوف شلون النار قويه تحرك الحطب حسيت هيج عمه ميثاء احترك كلبها ربي يهديهم لطريق الصحيح

مخليه ايدي على حنجي و صافنه على النار شوي فزيت على صوت

_ هاا غزالي شبيج صافنه

_ يمعود شبيك فززتني وكفت كلبي

_ اسم الله على كلبج غزالي

_ بعد ما رعبتني

_ اي شبيج صافنه على النار صار ساعه

_ لا ما كو شي بس جنت افكر ب عمتي ميثاء

_ راحت على سوريا

_ اي قبل اسبوع

_ اي ، راح تخبزين

_ اي

_ جا راح اكعد على ما تخلصين اريد اكل خبز من تحت ايد غزالي

دنكت راسي خجلانه من كلامه

_ انا راح ادخل للبيت اجيب العجين

_ خلي اجي اشيله عنج غزالي ثكيل عليج

_ لا لا انا متعوده

ركضت للبيت بدون ما اسمع ردة دخلت للبيت شفت امي جاي تسوي دولمه و كِناز ترتب المطبخ

_ ها يمه شعلتي النار

_ اي يمه جايه أخذ العجين

_ يمه تكدرين تخبزين وحدج جاي تشوفيني اسوي الغدة

_ اي يمه اكدر

_ روحي كِناز عاوني اختج لشوكت تبقين هيج

_ هسه شبيج يمه كبيتي عليه

_ اي مو حضرتج لا شغله ولا عمله من هسه تتعلمين الخبز من اختج

_ ليش يمه والله ما اعرف سمرة خبزاتها اطيب

_ اختج عن قريب تجي قسمتها و تروح منو يخبزلنه بعد

_ ها ها بيها زواج لعد اذا هيج من عيوني اتعلم

باوعت لامي

_ يمه يا زواج شنو جاي تحجين

_ ماكو شي والله بس الدنيا قسمه و نصيب ما تعرفين شوكت تجي قسمتج و هم اختج عمرهه راح يصير ثلاث عشر و بعد ما تعرف تشتغل مثل الناس